Mga Prinsipyo sa Ministering, Pebrero 2019

Pagpauswag sang Pag-unong sa Pag-minister

Ang pag-minister amo ang pagbayaw. Sarang naton mabayaw ang iban kon kita nagatinguha nga intiendihon ang ila ginaeskperiyensya kag ipakita nga handa kita nga updan sila sa pagpangatubang sang mga ini.

Bangod luyag sang aton Amay nga Langitnon nga mangin kasubong kita sa Iya, ang mga hangkat nga aton ginaatubang sa sining kabuhi sarang mangin mga oportunidad sa pagtuon kon kita magasalig sa Iya kag magpadayon sa banas. Ugaling, ang magpadayon sa banas mahimo nga mangin tuman kabudlay kon sa pamatyag naton ginaatubang naton ining mga pagtilaw nga nagaisahanon.

Apang indi naton kinahanglan nga maglakat sa banas nga nagaisahanon. Ang Manluluwas nakaangkon sang perpekto nga pag-unong, nagpanaog sa idalom sang tanan nga mga butang agud Iya mahibal-an kon paano kita buligan sa aton mga kabudlayan kag kasablagan (tan-awa sa Alma 7:11–12; Doctrine and Covenants 122:8). Nagapaabot sia nga ang tagsa sa aton magsunod sa Iya ehemplo kag magpakita man sang pag-unong. Ang tagsa ka miyembro sang Simbahan nagpangako nga “magpangasubo upod sadtong mga nagapangasubo; kag subong man magpaumpaw subong sadtong mga nagakinahanglan sang kaumpawan” (Mosias 18:9). Wala sapayan sang aton kaugalingon nga mga kabudlayan, ginatudloan kita sa balaan nga mga kasulatan nga maglab-ot kag “[bayawon] ang nagapamuypoy nga mga kamot kag ang maluya nga mga tuhod [pabakuron]” kag “maghimo sing mga banas nga matadlong sa inyo mga tiil, agud nga ang piang indi magliw-as kundi hinunuo mag-ayo” (Mga Hebreo 12:12–13; tan-awa man sa Isaias 35:3–4; Doctrine and Covenants 81:5–6).

Sa aton pagdapit sa iban, pagtugot sa ila nga magsandig sa aton, kag pag-upod sa ila sa paglakat, ginabuligan naton sila nga magpadayon sa banas sing malawig-lawig agud ang Manluluwas indi lamang maghaylo sa ila—isa sa mayor nga katuyuan sang ministering—kundi magpaayo man sa ila (tan-awa sa Doctrine and Covenants 112:13).

Ano ang Pag-unong?

Ang pag-unong amo ang paghangop sang balatyagon, pamensaron, kag kondisyon sang iban nga tawo gikan sa ila panan-awan imbes nga sa aton.¹

Ang pagkamainunungon importante sa aton pagpanikasog sa pag-minister sa iban kag sa pagtuman sang aton katuyuan bilang mga ministering brother kag sister. Ginatugotan kita sini nga ibutang ang aton kaugalingon sa sapatos sang iban nga tawo.

Paglakat sa Sapatos sang Iban nga Tawo

May istorya parte sa isa ka mahuluy-on nga Santos sa Ulihing mga Adlaw nga masami nagapungko sa likod nga raya sa simbahan nga nagaisahanon. Sang hinali nga napatay ang isa ka miyembro sang elder’s quorum, ang bishop naghatag sang mga bendisyon sang priesthood agud paumpawan ang mga miyembro sang pamilya sining elder. Ang mga sister sa Relief Society nagdala sang pagkaon. Ang nagapakig-ugyon nga kaabyanan kag mga kasilingan nagbisita sa pamilya kag nagsiling, “Pahibal-a lang kami kon ano ang amon mabulig.”

Pero sang ining mahuluy-on nga lalaki nagbisita sa pamilya sang hapon sina nga adlaw, nag-doorbell sia kag sang ginbuksan sang balo, simple niya nga ginsiling, “Ari ako para limpyuhan ang inyo sapatos.” Sa sulod sang duha ka oras, ang tanan nga sapatos sang pamilya nagtinlo kag naghining bilang paghanda para sa lubong. Sang masunod nga Dominggo ang pamilya sang napatay nga elder nagtupad sa mahuluy-on nga lalaki sa likod nga raya.

Yari ang isa ka tawo nga nagpuno sang wala matungdi nga panginahanglan. Sila kag sia pareho nga ginbugayan sang iya gingiyahan-sang-pag-unong nga ministering.

Paano Bala Ako Magpauswag sang Pag-unong?

May mga tawo nga daw ginbugayan sang ikasarang nga magkig-unong. Pero para sa mga ginabudlayan, yari ang maayong balita. Sa masobra 30 anyos, nagadamo nga mga manalawsaw ang nagtuon parte sa pag-unong. Bisan ang kadam-an sa ila nagapaathag halin sa nagkalain-lain nga anggulo, kalabanan sa ila nagaugyon nga ang paghangop isa ka butang nga sarang matun-an.²

Sarang kita magpangamuyo para sa regalo sang pag-unong. Agud nga magtubo, makabulig man ang pag-angkon sang mas maayo nga pag-intiendi kon paano ang pag-unong nagahikot. Ang masunod nga mga panugyan ginabaton nga mga tig-una nga elemento sang pag-unong.³ Bisan nga ang mga ini nagakahanabo nga indi naton matalupangdan, ang paghibalo parte sini nagahatag sa aton sang oportunidad nga magpangita sang kahigayunan nga mag-uswag.

1. Maghangop

Ang pag-unong nagakinahanglan sang paghangop sang sitwasyon sang iban. Kon mas mahangpan naton ang ila mga sirkumstansya, mangin mas mahapos nga intiendihon ang ila nabatyagan tuhoy sini kag kon ano ang sarang naton himuon para makabulig.

Ang aktibo nga pagpamati, pagpamangkot, kag paghambalanay upod sa ila kag sa iban importante nga mga aksyon agud mahangpan ang ila sitwasyon. Tun-i pa gid ining mga konsepto sa nagliligad nga sinulatan sang Mga Prinsipyo sang Ministering:

• “Lima ka mga Butang nga Ginahimo sang mga Maayo Magpamati,” Liahona, Hunyo 2018, 6.

• “Hambali ang Ila Panginahanglan,” Liahona, Sep. 2018, 6.

• “Ilakip ang Iban sa Ministering—kon Kinahanglanon,” Liahona,Okt. 2018, 6.

Sa aton pagtinguha sa pag-intiendi, kinahanglan naton maghatag sang tiempo agud mahangpan ang ila mismo sitwasyon sangsa maghusga base sa iban nga may pareho man nga eksperiyensya. Kon indi, mahimo nga magsayop kita kag mabilin sila nga nagabatyag nga wala mahangpi.

2. Huna-hunaa

Sa aton pagtinguha nga tumanon ang aton kasugtanan nga magpangasubo upod sadtong mga nagapangasubo kag paumpawan yadtong mga nagakinahanglan sang kaumpawan, mahimo kita nga magpangamuyo para sa Balaan nga Espiritu agud buligan kita nga mahangpan ang mahimo ginabatyag sang isa ka tawo kag kon paano kita makabulig.⁴

Sa tion nga mahangpan na naton ang sirkumstansya sang isa ka tawo, ang tagsa sa aton—natural man nga matabo ukon indi—sarang maghimo sang paghunahuna kon ano ang aton panumdumon ukon batyagon sa amo nga sitwasyon. Ang paghangop sinang mga panghunahuna kag emosyon, upod ang giya sang Balaan nga Espiritu, sarang maggiya sang aton aksyon sabat sa ila sitwasyon.

Sa aton pag-intiendi sang sirkumstansya sang isa ka tawo kag paghunahuna kon ano ang ila mahimo batyagon, importante nga indi naton sila paghusgaran sing indi nagakabagay (tan-awa sa Mateo 7:1). Ang paghusga kon paano nakalab-ot ang isa ka tawo sa amo nga sitwasyon sarang magdala sa aton sa pagbale-wala sang sakit nga ginadulot sang sitwasyon.

3. Mag-aksyon

Kon paano kita mag-aksyon importante bangud sa dira naton mapakita ang aton pag-unong. May di-maisip nga mga pamaagi sa pagpabutyag sang aton paghangop alangay sa hambal kag sa buhat. Importante nga panumdumon nga ang aton katuyuan indi ang kaayuhon ang problema. Masami ang katuyuan amo lamang ang magbayaw kag magpabakod paagi sa pagpabatyag sa ila nga wala sila nagaisahanon.Mahimo nga ini amo ang paghambal, “Salamat nga ginsugid mo sa akon” ukon “Ahay. Kasakit guro sina.”

Sa tagsa ka tion ang aton sabat kinahanglan nga sinsero. Kon nagakabagay, ang mangin apektado sa mga hitabo agud makita sang iban ang imo kaugalingon nga mga kahuyang kag pagpang-alang-alang sarang magtuga sang balatyagon sang koneksyon.

Pangagda sa Pag-akto

Sa inyo pagbinag-binag sang mga sirkumstansya sang inyo ginaministeran, pamensara nga yara kamo sa ila sitwasyon kag kon ano ang pinakamaayo himuon kon yara kamo sa ila lugar. Magpangamuyo agud mahangpan kon ano ang ila nabatyagan kag sunda ini. Ang inyo sabat mahimo nga simple lang, apang mangin makahulugan ini.

© 2019 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, February 2019. Hiligaynon. 15763 861

Mga Tanda

1. Tan-awa sa W. Ickes, Empathic Accuracy (1997); and M. L. Hoffman, Empathy and Moral Development: Implications for Caring and Justice (2000).

2. Tan-awa, halimbawa ang, Emily Teding van Berkhout and John M. Malouff, “The Efficacy of Empathy Training: A Meta-Analysis of Randomized Controlled Trials,” Journal of Counseling Psychology (2016), 63(1), 32–41.

3. Tan-awa, halimbawa ang, Brené Brown, I Thought It Was Just Me (But It Isn’t) (2008); Theresa Wiseman, “A Concept Analysis of Empathy,” Journal of Advanced Nursing (1996), 23, 1162–67; kag Ed Neukrug and others, “Creative and Novel Approaches to Empathy: a Neo-Rogerian Perspective,” Journal of Mental Health Counseling, 35(1) (Ene. 2013), 29–42.

4. Tan-awa sa Henry B. Eyring, “The Comforter,” Liahona, Mayo 2015, 17–21.

Si Jesucristo Nag-alagad nga May Pag-unong

Sang magpakita ang Manluluwas sa nga Nefinhon, gintudloan Niya sila tubtob nga nahibal-an Niya nga, sa ila kahimtangan sadto, indi nilang maintiendihan ang tanan nga Iya ginatudlo sa ila. Apang nahibal-an man Niya nga indi nila Sia gusto nga maghalin.

Nagsabat Sia paagi sa pagbalhin gikan sa pagtudlo sa ila paagi sa pagpaathag sang ebanghelyo pakadto sa pagminister sa ila temporal nga mga panginahanglan—nga ginaagda sila nga dalhon palapit ang mga nagamasakit, piang, bulag, ukon lupog. Ginpang-ayo Niya sila. Dayon nagpangamuyo Sia para sa ila kag gin-atipan ang ila kabataan, nga nagahatag sang tion sa kada isa sing indibidwal agud bendisyunan sila.

Ano ang aton matun-an sa halimbawa sang Manluluwas sang pagpakig-unong sa pag-alagad sang mga Nefinhon?

Ang mga artikulo nga “Mga Prinsipyo sang Ministering” gintuyo agud buligan kita sa pagtuon nga tatapon ang kada isa—indi agud ipaambit bilang mensahe sa tion sang aton mga pagbisita. Sa aton pagkilala sa aton mga ginaalagaran, ang Balaan nga Espiritu magapabatyag sa aton agud mahibaloan kon ano nga mensahe ang ila kinahanglan dugang pa sa aton pag-atipan kag kaluoy.