Pedped ko an Jerbal in Karejar, Pāpode 2019

Kōļapļo̧k Jeļā Ņae N̄an Jerbal in Karejar

Jerbal in Karejar ej ļōn̄aj. Jemaron̄ ļōn̄aj ro jet ilo ad kajjieon̄ meļeļe ta ko rej en̄jaki im kwaļo̧k ke jem̧ōņōņō in jipan̄ er eļļā ioer.

Kōnke Jemedwōj Ilan̄ ekōņaan bwe jen erom āinwōt E, apan̄ ko jej iooni ilo mour in remaron̄ erom iien n̄an ekkatak eļan̄n̄e jenaaj lōke E im mour ekkar n̄an gospel eo. Jerata, mour kōn gospel eo emaron̄ pen n̄e jej en̄jake ke jej jelmaeik mālijjon̄ ko ilo an ejjeļo̧k jipan̄.

Bōtaab jeban kar make jelmaeik mālijjon̄ ko ippād make. Rilo̧mo̧o̧r ekar jeļā ņae, Eaar wanlaļtak ium̧win aolep men ko otemjeļo̧k bwe En jeļā ekōjkan an jipan̄ kōj ilo en̄taan im m̧ōjņo̧ ko ad (lale Alma 7:11-12; Katak im Bujen ko 112:8). Ej kōtmāne bwe jān ļoore waanjon̄ak ko An im kwaļo̧k jeļā ņae barāinwōt. Kajojo ro uwaan Kabun̄ in emōj kallim̧ur n̄an “jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an” (Mosaia 18:9). Mene ewōr mālijjon̄ ko jej iooni, jekar katak eļōn̄ kōttan ilo jeje ko rekwojarjar n̄an reinamojļo̧k im “kotak pā ko rej etoto laļ, im [kōkajoor] ne ko rajukkuk” im n̄an “kōm̧m̧an ial ko n̄an n̄e ko neem, n̄an ro rejaje emakutkut ilo aer etal jān ial eo” (Hibru 12:12-13; lale barāinwōt Aiseia 35:3-4; Katak im Bujen ko 81:5-6).

Ilo ad jibwe pein ro jet, kōtļo̧k bwe ren atartar ipped, im etetal ipped, jej jipan̄ er mour kōn gospel eo ilo juon iien eo aitok bwe Riļomo̧o̧r eo en lōn̄ an iien ukōte er—juon iian kii in unin karejar—ak n̄an barāinwōt kōmour er (lale Katak im Bujen ko 112:13).

Ta In Jeļā Ņae?

Jeļā ņae ej meļeļe kōn en̄jake, kōļmenļo̧kjeņ, im ta ko juon armej ej iooni jān wāween aer lale im ejjab jān ta ko jej loi.¹

Jeļā ņae elukkuun aorōk ilo jerbal in karejar ko ad n̄an ro jet im ej kakūrm̧ool kōttōbar ko ad āinwōt rikarejar jeiū im jatū m̧aan ak kōrā. Ej kōtļo̧k bwe jān pijaikļo̧k kōj ne jen kar pād ilo wāween mour ko aer.

Meļeļe kōn Wāween Mour an Bar Juon Armej

Bwebwenato in ej kwaļo̧k kōn juon membōr em̧m̧aan ejookok eo ekka an jijet make iaan ilo jea eo liktata ilo monjar eo. Ke juon iaan em̧m̧aan ro ilo doulul eo en elder ekar jako, bisop eo ekar leļo̧k juon kōjeraam̧m̧an n̄an kaenōm̧m̧an baam̧le eo an em̧m̧aan eo me emej. Ro ilo Doulul eo an Kōrā ro rekar bōktok jet mōn̄ā. Ro mōttaer im ro riturieer rekar loļo̧k baam̧le eo im ba, “Eļan̄n̄e ewōr jabdewōt men in jipan̄ jouj im ba tok n̄an kōm̧.”

Innām em̧m̧aan in ejookok ekar loļo̧k baam̧le eo, ekar riin̄ i beeļ eo ilo kōjem eo aer im kōrā eo emej ļeo pāleen ekar kōppeļļo̧ke, im ekar ba, “Ikar itok n̄an kareeo jori ko ami.” Ilo jejjo awa ko, aolepen jori ko an baam̧le eo rekar lukkuun erreo im erabolbol im pojak n̄an iien ilomej eo. Jabōt eo juon, baam̧le eo an elder me emej rekar jijet turin em̧m̧aan eo me ejokook ilo jea eo liktata.

En̄in kar em̧m̧aan eo me ekar maron̄ jipan̄ kōn aikuj eo me ej jan̄in kar dedeļo̧k. Jim̧or er im lein rekar jim̧or jeraam̧m̧an kōn jeļā ņae ilo jerbal in karejar.

Ewi Wāween Aō Maron̄ Kōļapļo̧k Jeļā Ņae?

Jet rej jeraam̧m̧an kōn menin in letok eo an jeļā ņae. Bōtaab n̄an ro rej kakkōt, elōn̄ news em̧m̧an. Ium̧win 30 iio ko remootļo̧k, ekar lōn̄ļo̧k oran rietale ro rekar ekkatak kake jeļā ņae. Ilo an elōn̄ iaer rekar wanlōn̄tak kōn elōn̄ uwaak ko reoktak jān doon, elōn̄ iaer rekar errā bwe jeļā ņae emaron̄ juon men eo jemaron̄ ekkatak kake.²

Jemaron̄ jar kōn menin letok eo an jeļā ņae. Bwe jen kōkōm̧anm̧anļo̧k, ej barāinwōt menin in jipan̄ n̄an meļeļe kōn elmen an jeļā ņae jerbal. Meļeļe ko naaj kwaļo̧ki ej jet iaan uwaak ko emōj errā kaki āinwōt jet iaan meļeļe ilaļ in jeļā ņae.³ Men̄e jet iien men kein rej bōk jikin ilo iien ko jej jab jeļā ke rej waļo̧k, ilo ad kili ke rej letok juon iien bwe jen lale iien ko rem̧m̧an n̄an kōkōm̧anm̧anļo̧k.

1. Meļeļe

Jeļā ņae emenin aikuj meļeļe kōn ta ko rej waļo̧k n̄an bar juon armej. Ilo ad meļeļe kōn wāween ko rej pād ie, enaaj pidodo n̄an ad meļeļe kōn ta ko rej en̄jaki im ta ko jemaron̄ kōm̧m̧ani n̄an jipan̄.

Ron̄jake, kajjitōk, im ko̧o̧njel ippāer im ro jet rej m̧akūtkūt ko raorōk n̄an meļeļe kōn wāween ko rej pād ie. Ekkatak elapļo̧k kōn katak kein ilo bwebwenato eo lok ikkijeen Katak ko an Jerbal in Karejar:

• “Five Things Good Listeners Do,” Liahona, June 2018, 6.

• “Counsel about Their Needs,” Liahona, Sept. 2018, 6.

• “Involve Others in Ministering—as Needed,” Liahona,Oct. 2018, 6.

Ilo ad kapukot n̄an meļeļe, jej aikuj bōk ad iien meļeļe kōn lukkuun ta ko rej waļo̧k n̄an er ijeļļokin am kajidede pedped wōt kōn juon bar armej eo me ekar pād ilo ejja wāween in wōt. Ijjelokin, jemaron̄ likjab ilo ad meļeļe im kōjekdo̧o̧n er ilo ad jab meļeļe kōn er.

2. Pijaik Ļo̧k

Ilo kijejeto ko ad n̄an jan̄ ippen ro rej jan̄ im kaenōm̧m̧an ro rej aikuj aenōm̧m̧an, jemaron̄ jar bwe Jetōb Kwojarjar en jipan̄ kōn meļeļe ta eo juon bar armej ej enjake im elmen ad maron̄ jipan̄e.⁴

N̄e jenaaj meļeļe kōn wāween eo juon bar armej epād ie, kōj kajjojo—men̄e ej make waļo̧k ak jaab—jemaron̄ ekkatak n̄an pijaik ļo̧k ta ko jen kar lōm̧ņake ak en̄jake ilo wāween eo. Meļeļe kōn ļōm̧ņak im en̄jake kein, ippān tōl eo an Jetōb Kwojarjar, emaron̄ jipan̄ kōj uwaak n̄an wāween mour eo rej pād ie.

N̄e jej meļeļe kōn wāween mour ko an ro jet im pijaik ļo̧k elmen aer nej en̄jake, elukkuun aorōk bwe jān jab ekajet er ilo bōd (lale Matu 7:1). Ilo ad kappukot bōd kōn elmen an kar juon armej pād ilo jekjek ko repād ie emaron̄ kōm̧m̧an bwe jen jab lukkuun meļeļe kōn metak ko me rej en̄jaki ilo wāween eo repād ie.

3. Eo̧ron̄

Wāween ad eo̧ron̄ eaorōk kōnke ej kwaļo̧k ad jeļā ņae. Elukkuun lōn̄ wāween ko jemaron̄ uwaake meļeļe ko ilo ad kōnono ak jab kōnono. Eaorōk n̄an keememej bwe kōttōbar eo ad ejjab n̄an m̧adm̧ōde būraabļōm̧ eo. Elōn̄ iien kōttōbar eo ej n̄an kotak im kōkajoor ilo ad kwaļo̧k n̄an er ke rej jab make iaer. Komaron̄ ba, “Ij mōņōņō bwe kwaar ba tok” ak “Joļo̧k aō bōd. Men in emaron̄ kōmetak.”

Ilo jabdewōt wāween uwaak ko ad ej aikuj in em̧m̧an. Im ilo iien em̧m̧an, ilo am kotļo̧k bwe ro jet ren loe m̧ōjņo̧ im mijak ko am̧ make emaron̄ kōm̧m̧an juon jemjerā eo eaorōk.

Juon Kūr n̄an Jerbal

Ilo am̧ etale wāween ko ro kwoj karejar n̄an er repād ie, pijaik ļo̧k ta eo rej ioone im ta eo komaron̄ loe enej ļap an jipan̄ eļan̄n̄e kwar pād ilo wāween ko rej pād ie. Jar n̄an meļeļe elmen aer en̄jake im kōm̧m̧an ekkar n̄an en̄jake ko aer. Uwaak eo am̧ emaron̄ pidodo, bōtaab ewōr meļeļe in.

© 2019 jān Intellectual Reserve, Inc.. All rights reserved. Jeje ilo USA. Kōmālim ilo kajin English: 6/18. Kōmālim an ukook: 6/18. Ukook eo an Ministering Principles, February 2019. Marshallese. 15763 874

Kakeememej ko

1. See W. Ickes, Empathic Accuracy (1997); im M. L. Hoffman, Empathy and Moral Development: Implications for Caring and Justice (2000).

2. Lale, n̄an waanjon̄ak, Emily Teding van Berkhout and John M. Malouff, “The Efficacy of Empathy Training: A Meta-Analysis of Randomized Controlled Trials,” Journal of Counseling Psychology (2016), 63(1), 32–41.

3. Lale, n̄an waanjon̄ak, Brené Brown, I Thought It Was Just Me (But It Isn’t) (2008); Theresa Wiseman, “A Concept Analysis of Empathy,” Journal of Advanced Nursing (1996), 23, 1162–67; and Ed Neukrug and others, “Creative and Novel Approaches to Empathy: a Neo-Rogerian Perspective,” Journal of Mental Health Counseling, 35(1) (Jan. 2013), 29–42.

4. Henry B. Eyring, “Rikaenōm̧m̧an eo,” Liaona, Māe 2015, 17-21

Jisōs Kraist ekar Jerbal in Karejar ilo Jeļā Ņae

Iien eo Rilo̧mo̧o̧r eo ekar waļo̧k n̄an RiNipai ro, ekar katakin er m̧ae iien Ekar jeļā bwe, ilo wāween eo rej pād ie, reban kar lukkuun meļeļe aolepān ta ko Ekar katakin er. Ak ekar barāinwot jeļā ke rekar jab kōnaan bwe en etal.

Ekar uwaak ilo an kar ukōte katak ko an ilo an kwaļo̧k kōn gospel eo n̄an jerbal in karejar kōn aikuj ko aer ilo mour in—karuwainene er n̄an bōktok ro rekar naninmej, riakā, ripilo, ak rikinejnej. Ekar kōmour er. Innām Ekar jar kōn er im jerbal in karejar n̄an ajri ro, bōk an iien ippāer kajjojo n̄an kōjeraam̧m̧an er.

Ta eo jemaron̄ ekkatak jan wanjonak eo an Rilo̧mo̧o̧r kōn jeļā ņae ilo an jerbal in karejar n̄an RiNipai ro?

“Pedped in katak ko an Jerbal in Karejar” bwebwenato ko rekar kōm̧m̧an n̄an jipan̄ kōj katak n̄an kea kōn doon—ejjab aikuj in kwaļo̧ke āinwōt juon ennaan. Ilo ad itok n̄an jeļā kajien ro jej jerbal n̄an er, Jetōb Kwojarjar eo enaaj im̧we kōj n̄an jeļā ta ennaan eo remaron̄ aikuji n̄an kōļapļo̧k kea eo ad im ad turiamo.