Kenginn ko Pigpig, February 2019

Ngan Gay Rogon Ngan Pigpig u Fithik e Murnguy

Pigpig e ngan chibiy ngalang. Rayag ni ngad ayuwegned bee’ ngad nangfaned e pi n’en nibe buch buch ulan e yafos rok magdad dag ni gadad ba’dag ni ngad dared riy ni woed rad.

Ni bachan e Chitamangdad nibay u Tharmiy e ba’adag dad ni ngad boded Ir, pi gafgow ni gadad be yan u fthik ko biney e yafos e rayag ni nge ayuwegdad ni fa’an gadad ra michuwan’dad Ngak’ magdad par u dakan fare pi’i kanawo’. Boech i ngiyal’, ul’ul u dakan fare pi’i kanawo’ ab momaw’ ni woed ni fa’an bay thamiyed ni dariy be’ ni be nang fan e pi mo’owar rodad.

Machane ndariy bagdad ni nge yan u dakan fare pi’i kanawo’ ni yigo’ ir. Fare Tathapeg e bay fare runguy rok’ nib plo’, nin pi’ ngab nga but’ ni nge yag ni nge nangfan urngin pi a’mith nge gafgow rodad (muguy ko Alma 7:11–12; Doctrine and Covenants 122:8). Be taga’ ngodad ni gubin ni ngad leked wo’en magdad dag ere murnguy ney. Gubin gidii’en fare Galasia mag kad feked nga dakandad e biney e motochiyel ni ngan “kirbaen’med ngak’ e pi’in nibe kirbaen’; arragon, mi gimed fal’eg laniyaen’ e pi’in nib t’uf rok’ ni ngan fal’eg laniyaen’” (Mosiah 18:9). Demtrug gelngin e gafgow rodad, kan fil ngodad ko fapi thin nib thothup ni ngad “mpuged pa’med nib m’ay [gelngin] ngalang, mi gimed gelnag bugun aymed nib me’waer” magmed “pired ni gimed be be yan u dakan e kanawo nib k’iy” (Hebrews 12:12–13; kum guy ko Isaiah 35:3–4; Doctrine and Covenants 81:5–6).

Nap’an gadad ra kol pa’rad, mpag rad ngar thig gad nga pe’yom, mag un ngorad, min ayuwegrad ngar pired ko fare pi’i kanawo’ ni nge yog ni nge ayuweg rad fare Tathapeg—iraray reb fare kiy ko pgipig—ma krayag ni nge fosagrad (muguy ko Doctrine and Covenants 112:13).

Mang ba yip fan ni ngam ayuwegem?

Runguy e woed ni yibe nangfan rogon ni be thamiy facha’, tafney rok, ma yibe nangfan e lem rok.¹

Thamiy e runguy e rib ga’fan ko fare pigpig ngak e gidii’ nap’an ni gadad be rin’ e muruwel rodad ko pigpig ngak fapi walagdad ni pumo’on nge pi’in nib ppin. Biney e rayag ni nge ayuwegdad ngad nanged fan rogon facha’.

Yaen ni ta’ab rogon ngak Facha’

Mornga’agen ba mo’on nib tatamra’ ni’ir reb Gidii’en Got ko Tin Tomur e Rran ni baga’ nima par u tomur ko fare chapel ni gubin e mo’olung. Nap’an ni ke yim’ reb gidii’en fare elder quorum, fare bisof e pii’ e tawa’ath ko priesthood ni nge ayuweg e gidii’ ko fare tabinaew. Ppin ko fare Relief Society era feked e ggan i yib. Gidii’ ko fare binaew e rabad ngar fingichiyed fare tabinaew miyad yog, “Mog ngomad ko mang e bay nib tu’uf ni ngu pi’iyed e ayuw riy.”

Ma nap’an ni yib fare mo’on nib tatamra’ ni ngabi guy fare tabinaew, me ring nag e mab ma nap’an ni bing fare ppin e mab rok, me ga’ar fare mo’on ngak, “Ku gub ni ngu lukuy e sus rom.” De gaman in e awa ngay, ma gubin gathon fare tabinaew mab be’ech ma be mat ra’en e sus rorad nifan fare magawon. Fare Madnom nga m’on fare gathon e tabinaew nike yim’ be’ rorad ar pired nga keru’ fare mo’on nib tatamra’.

Iraray be’ nib mo’on nike rin’ ban’en nib tu’uf ndariy be’ nike rin’. Yaed gubin fare mo’on nge fare chongin fare tabinaew ni kan tawa’ath nag ran ni bachan e biney e pigpig.

Uw rogon nrayag ni ngan gay rogon e Murnguy?

Boech e gidii’ e kan tawa’ath nag rad ko fare murnguy. Machane ngak’ e pi gidii’ nib momaw’ rok, ba’aray e thin nib mangil. 30 e duw kafram, ulung i gidii’ nima gay mornga’agen ban’en e ke fil mornga’agen e murnguy. Bo’or i yaed e ba thilthil rogon nibe sap ngay, oren ni yaed e ta’areb lungunrad ni murnguy e ban’en nrayag ni ngan fil rogon.²

Rayag ni ngad meybil gad ni fan fare tawa’ath ko murnguy. Ra ngan mon’og, kab mangil ni ngan nang fan rogon nima murwel e murnguy. Tin ba’aray ni kan pi’ e ir e daf ko rogon e murnguy.³ Nap’an nibe buch buch e tiney ma darda tiyan’dad ngay nibe buch buch, ran nang e pin’ey ma rayag ni nge ayuweg dad ngad guyed rogon ni ngad mon’og gaed.

1.Nangfan

Murnguy ab tu’uf ni ngan nang salpen facha’. Ran nang salpen facha’, ma ra mom ni ngan nang rogon ni yaed be thamiy nge rogon ni ngad pi’iyed e ayuw.

Motoyil nib fel’rogon, fith e duwer, min powi’iyrad nge ku boech e gidii’ e kanawo’en nib mangil nibe dag ni gadad be nangfan salpenraed. Fil boech e pi kanawo’ ney ko fare bin ba’aray e Kengin e Pigpig nike thumur:

“Lal’ i N’en Nima Rin’ e Gidii’ Nima Motoyil,” Liahona, June 2018, 6.
“Weliy Mornga’agen e Tin nib Tu’uf Rorad,” Liahona, Sept. 2018, 6.
“Uneg Boech e Gidii’ ko Pigpig—urngin nib Tu’uf,” Liahona,Oct. 2018, 6.

Nap’an ni gadad ra gay rogon ni ngad nanged fan, thingar saluk gaed ngan nang fan e tin th’abi tu’uf rorad ko bin ba’aray ni ngan tafney nag e tin nib tu’uf rorad ni bachan e tin nike buch rodad nib chuchgur rogon. Ya fa’an danga’, ma rayag ni dab da gayed e tin nib tu’uf rorad miyed thamiy ndariy be’ nike nangfan salpenrad.

2.Tafneynag

Ko fare m’ag nikad micheged ni gadad ra un ngak e pi gidi’ nibe yor magdad ayuweg e tin nibe gafgow, rayog ni ngad meybil gad ni fan fare Kan ni Thothup ni nge ayuwegdad ngad nanged fan e tin nibe thamiy facha’ nge rogon nrayag ni ngad pi’iyed e ayuw.⁴

Nap’an ni gadad ra nangfan salpen facha’, gadad gubin—demtrug ko ke buch ni gadad manang fa danga’—e rayag ni nge tafneynag ir ni woed facha’ nibe buch e biney rok. Nang fan e pi lem nge tin ni yibe thamiy ban’en, nib mu’un fare Kan ni Thothup, e rayag ni nge powi’iydad ngad rin’ed e tin nib tu’uf nga rogon salpenrad.

Nap’an ni gadad ra nang salpen facha’ ma kad tafney niged rogon ni yad be thamiy, rib tu’uf ni dab da og tharan facha’ (muguy ko Matthew 7:1). Fa’an gadad ra kireb nag facha’ nike rin’ e tagan e rayag ni nge karang e amith nib alamrin.

3.Fulweg Lungun

Rogon ni gadad ra fulweg lungun facha’ e rib ga’fan ni bachan e iraray rogon ni gadad ra dag e murnguy. Bo’or kanawo’en nrayag ni ngad non gad ma gadad nang fan ni woed rogon ni yibe non u langay fa rogon e ngongol rodad. Ba tu’uf ni ngad ted u wun’dad ni gathi gubin ngiyal’ mab tu’uf ni ngad fal’egned rogon fare n’en nike togan. Oren ni ngiyal’ mab mom ya kemus ni ngam pi’ e athamgil ngorad mag yog ngorad ni gabay u charenraed. Biney e rayag ni ngam mog, “Kamagar ni kam mog ngog” fa “Siro’ ngom. Woed nib amith e ran’ir.”

Gubin ngiyal’ mab tu’ug ni thin rodad ab murnguy. Ma fa’an rib ma’aw, ma rayag ni ngam mog e tin ni gabe mo’owar riy e rayag ni nge chugur nigem ngak facha’.

Pinning ningar Thilyeg.

Nap’an ni gabe tafney nag salpen e pi gidii’ ni gama pigpig ngak, tafney nag rom ni gur e ke buch e biney rom ma mang e gara piri’eg nib tu’uf ni fa’an ni gabay ulan e sus rorad. Meybil ni ngam nang fan rogon ni yad be thamiy mag rin’ ni aray rogon. Fulweg taban ngom e rayag nib achig, machane rib ga’fan.