Reirein te Mwakuri n Ibuobuoki, Maati 2019

Aron Tibwauan te Koaua n te Aro n Taneiai

Te Mwakuri n Ibuobuoki bon kakoauana. Angaraoin te mwakuri n ibuobuoki e kona ni karikirakea tibwangara n tibwai koaua n te kawai ae nako raoi iai ao ae e aki.

Ti a tia ni berita bwa tina “tei bwa taan kakoaua ibukin te Atua n taainako ao ni bwaai nako, n taabo nako” (Motiaea 18:9). Tibwauan ara koaua bon mwakoron ae tina riki bwa taan kakoaua ao bon te kawai ae mwaaka ni kaoan te Tamnei ae Raoiroi bwa e na riinga nanon temanna ao ni bita maiuia.

“Kakoaua—koaua ni koaua, nako mairoun te Tamnei ao e kamatoaki iroun te Tamnei ae Raoiroi—biti maiu,” e taku Beretitenti M. Russell Ballard, Bonomwi ni Beretitenti n te Kooram n Abotoro n te Tengaun ma Uoman.¹

Ma tibwauaan ara koaua e kona n taraa ni kakamaku ke ni kamweengabuaka irouia tabeman mai ibuakora. E riki anne ibukina bwa ti taku bwa tibwauaan ara koaua bon te bwai ae ti karaoia n te bootaki n aki mamatam ao ni kaoti koaua ke ngkana ti angareirei. Ni kawaina ae bwainaki ti aki toki ni kabonganai taeka ao kibuntaeka ake a tara n ritinaniku n aron tein ara maroro.

Tibwauan ara koaua e kona n riki bwa kakabwaia aika a ririki inanon maiura ao ni maiuia tabeman ngkana ti ata bebetena are ti kona n tibwaua iai ara kakoaua n tabo nako inanon te bong koraki. Aikai iango tabeua aika a na buokiko ni waaki ma ngaia.

Karaoia ni Kabebetea

Kaotan te koaua e aki kainnanoia ni moanaki ma te kibuntaeka, “I kan kaota au koaua,” ao e aki kainnanoaki bwa e na kainaki ma, “N aran Iesu, amen.” Te koaua bon kaotan te bwai are ko kakoaua ao n ataia bwa e koaua. Ngaia are te marooro ma kain rarikim iaon te kawai ibukin te kaangaanga are e rinanona ao n taekinna, “I ataia bwa te Atua e kaekai ara tataro,” e kona naba ni mwakaroiroi n aron kaotan te koaua are e tibwaaki man te tabo n tei n tain te taromauri. Te mwaaka e aki roko man te taetae ni wiikateke, e roko mairoun te Tamnei ae Raoiroi ni kamatoa te koaua (taraa Reirei ao Berita aika Tabu 100:7–8).

Ira Birin Tein te Maroro

Ngkana ti ingainga ni kan tibwatibwa, iai te tai ibukira ni kabane n tibwauai koaua inanon ara maroro ni katoabong. N aron te katooto:

Temanna e titirakiniko ibukin am wiikente. “E rang tikiraoi,” ko kaeka. “Te taromauri bon ngaia te bwai ae I kainnanoia.”
Temanna e kaota ana nanoanga imwiin ataakin te kaangaanga are ko kaitaraa inanon maium: “I rang nanokawaki.” Am kaeka: “Ko rabwa ibukin am tabeaianga. I ataia bwa te Atua e na bon buokai. E a tia n raonai mai imwaina.”
E taetae temanna: “Au kantaninga bwa kanoan te bong e na waekoa ni bitaki,” ke “E a bon rimwi raoi te bwati,” ke “Noora te ibetutu n te kawai.” Kam kaeka: “I kakoaua bwa te Atua e na bon buoka kanakoraoan bwaai ni kabane.”

Tibwaua Am Taneiai

Ti maroroakin taekan ara kaangaanga imarenara n tainako. Ngkana e tuangko temanna ibukin te bwai are a kaitara ma ngaia, ko kona n tibwa te tai are e a tia iai ni buokiko te Atua n tain am kangaanga ao kakoaua ni kaotia bwa E kona ni buokiia naba. Te Uea e taku bwa E kakorakoraira rinanon te kataaki bwa “kam aonga n riki bwa taan kakoaua ibukiu i mwin aio, bwa kam aonga n ataa te koaua bwa Ngai, te Uea ae te Atua, I bon kaakawariia au botanaomata i nanon aia tai n rawawata” (Motiaea 24:14). Ti kona n tei bwa taan kakoaua Ibukina ngkai ti kakoaua arona are E a tia ni buokiira iai n ara kanganga.

Kona Tatauraoi

Bwa irouia tabeman mairoura, tibwauan te koaua n akea raoi te katauraoi e kona n rang kakamaku. Iai kawai ake ti kona iai ni baireia imwain taina ao n “tauraoi n tainako n anga te kaeka nakoia aomata nako ake a titiraki[niira] ibukin te kantaninga ae mena inano[ra]” (1 Betero 3:15).

Te moan, arora n tatauraoi e kona n taraaki n arora ni maiu. Ti kaoa te Tamnei ae Raoiroi inanon maiura ao ni kakorakorai ara koaua ni katoa bong rinanon maiuakinan te raoiroi? Ti angan te Tamnei ana tai n taetae nakoira ao n anganiira taeka ake ti kainnanoi rinanon te tataro ao kamatebwai ni koroboki aika a tabu? Ngke te Uea e reireina Hyrum Smith, “Tai ukoukora taekinan au taeka, ma ukoukora moa karekean au taeka, ao ngkanne e na aki bae newem” (Reirei ao Berita aika Tabu 11:21).

Kauoua, arom n tatauraoi e kona n nanona taarakin taai aika a na roko ao n iangoi waaki ake kam na tibwa iai ami koaua n te bong ke te wiiki anne. Kam kona n tauraoi ibukin taai akanne man iangoan aron e na kanga ni kona n angani ngkami te tai n tibwa te bwai ae ko kakoaua.

Tiku n Oioi iaon te Tia Kamaiu ao Ana Reirei

Beretitenti Ballard e reirei, “E ngae ngke ti kona ni karekei kakoaua ni bwaai aika a mwaiti ngkai kain te Ekaretia, iai koaua aika a oioi ake ti riai n teimatoa n reireiniira imarenanra ao n tibwauai.” N aron te katoto, are e taekinna: “Te Atua bon Tamara ao Iesu bon te Kristo. Te baire ni kamaiu e boboto iaon Ana Mwakuri ni Kamaiu Kristo. Iotebwa Timiti e kaoka bwaninin ana euangkerio Iesu Kristo, ao ana Boki Moomon bon kakoauan ara koaua bwa e bon koaua.” Ngkai ti taekin koaua ake a namakinaki man te nano, ti kaoa te Tamnei bwa e na kaota koauana bwa te bwai are ti taekinna e bon koaua. Beretitenti Ballard e katuruturua bwa “te Tamnei e aki kona n taobaraki ngkana te koaua ae itiaki e kaotaki ibukin Kristo.”²

Ana Katoto te Tia Kamaiu

Kuana man mwanangana rinanon Tamaria, te Tia Kamaiu e tiku ni motirawa n te mwanibwa ao e kaitibo ikekei ma te aine. E moana ana maroro iaon roaakin te ran man te mwanibwa. Ni kabonganai tibwangana ake e karaoi ni katoabong te aine anne e angan Iesu ana tai ni kakoaua n te ran ni kamaiu ao te maiu ae akea tokina are e tauraoi nakoia ake a kakoaua (taraa Ioane 4:13–15, 25–26).

Te Kakoaua ae Beebete E Kona ni Bitii Maiu

Beretitenti Russell M. Nelson e taekina te neeti are e titirakina-Dr. Nelson te titiraki imwiin karaoan te korokoro ae kaangaanga. “Bukin tera ngkai ko kaokoro ma taan korokoro ake tabeman?” Tabeman taan korokoro aika e kinaia a kona n rang kakai un ao n taetae n aki akaka n aia tai naba ni karaoa te korokoro ae kaangaanga.

Dr. Nelson e kona n anga kaeka aika a mwaiti. Ma e beebete ana kaeka, “Ibukina bwa I ataia bwa e koaua Ana Boki Moomon.”

Ana kaeka e kaunga te neeti ma kainnabana bwa a na kamatebwaia ana Boki Moomon. Beretitenti Nelson imwiina e bwabetitoa te neeti. Tebwina te ririki imwiina, ngkai e tararua te maungatabu n te titeiki i Tennessee, USA, ngke e a tibwa katabuaki bwa te Abotoro, Beretitenti Nelson e kukurei ni manga kaitiboaki ma te neeti naba arei n ae e aki kantaningaia. E kauringnga bwa rairakina, e riki man ana kakoaua ae beebete ao te bitaki man Ana Boki Moomon, are e buoka rairakiia 80 riki irarikina.³

Te Kakao ni Mwakuri

Tai maaku n tibwa am koaua. E kona ni buokiia naake ko buokiia. Kona kanga ni kabonganai iango aikai ke are ibon iroum n tibwa am koaua n te bong aei?

© 2019 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakana n te Ingiriti: 6/18. Kariaiakaki rairana: 6/18. Rairan te Ministering Principles, March 2019. Kiribati. 15764 859