Yuav Ua Li Cas Kom Txaus Siab Hais Lus Tim Khawv

Kev txhawb pab yog kev ua tim khawv. Qhov uas peb ua tau ntau yam thaum peb txhawb pab lwm tus ua rau peb muaj cib fim ntxiv hais lus tim khawv txawm nyob qhov twg los xij.

Peb tau khi lus tias peb yuav “ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw” (Mauxiyas 18:9). Kev hais lus tim khawv yog kev ua tim khawv uas muaj hwj chim kom caw tus Vaj Ntsuj Plig Dawb Huv tshoov lwm tus lub siab kom hloov lawv lub siab.

Thawj Tswj Hwm M. Russell Ballard, tus Thawj Tswj Hwm Sawv Cev ntawm Pawg Kaum Ob tug Thwj Tim hais tias, “Kev hais lus tim khawv—kev hais lus tim khawv tiag tiag, uas tus Ntsuj Plig qhia thiab tus Vaj Ntsuj Plig Dawb Huv pom zoo—yeej hloov tib neeg lub neej.”¹

Tiam sis peb ib txhia ntshai los sis tsis tshua txaus siab hais lus tim khawv. Tej zaum yog vim peb xav tias kev hais lus tim khawv yog ib yam uas peb ua hauv kev sib ntsib yoo mov thiab hais lus tim khawv los sis thaum peb qhia neeg. Nyob hauv tej qhov chaw no peb siv tej lus thiab tej kab lus uas tsis tshua zoo hais thaum peb sib tham nrog lwm tus.

Kev hais lus tim khawv yeej yuav ua rau peb tau koob hmoov hauv peb lub neej thiab lwm tus lub neej thaum peb to taub hais tias kev hais lus txog tej yam uas peb ntseeg yooj yim npaum li cas. Muaj ob peb lub tswv yim ntawm no kom pab koj pib ua li ntawd.

Hais Lus Yooj Yim

Ib zaj lus tim khawv tsis tas pib nrog cov lus, “Kuv xav hais lus tim khawv,” thiab tsis tas muab xaus thaum yus hais tias, “Los ntawm Yexus Khetos lub npe, amees.” Ib zaj lus tim khawv yog qhov uas peb hais tias peb ntseeg li cas thiab paub tej yam uas muaj tseeb. Yog li ntawd qhov uas yus sib tham nrog yus tus neeg zej zog rau ntawm txoj kev txog ib qho teeb meem thiab hais tias, “Kuv paub tias Vajtswv teb peb tej lus thov,” qhov ntawd yeej muaj hwj chim npaum li ib zaj lus tim khawv uas yus hais rau ntawm sam thiaj hauv lub tsev koom txoos. Lub hwj chim tsis yog los ntawm paj lug; yog los ntawm tus Vaj Ntsuj Plig Dawb Huv txoj kev pom zoo rau qhov tseeb (saib Lus Qhuab Qhia thiab Kev Khi Lus 100:7–8).

Hais Lus Tim Khawv Thaum Sib Tham

Yog tias peb txaus siab hais, ces muaj cib fim ntau heev nyob ib puag ncig peb kom hais lus tim khawv thaum peb sib tham nrog lwm tus txhua hnub. Piv txwv hais tias:

Ib tug neeg nug seb koj ua li cas thaum hnub rau thiab hnub xya. Koj teb hais tias, “Yeej zoo kawg. Lub koom txoos twb pab kuv heev.”
Ib tug neeg hais tias nws pab koj nyuaj siab tom qab nws kawm txog ib qho teeb meem hauv koj lub neej: “Pab koj nyuaj siab ’os.” Koj teb hais tias: “Ua tsaug vim koj txhawj txog kuv. Kuv paub tias Vajtswv yuav pab kuv. Nws ib txwm tau txhawb nqa kuv.”
Ib tug neeg hais tias: “Kuv xav kom huab cua phem no hloov,” los sis “Lub npav los lig ua luaj,” los sis “Saib tsheb khiav mus los ntau kawg.” Tej zaum koj yuav teb hais tias: “Kuv paub tias Vajtswv yuav pab kom txhua yam zoo.”

Hais tej Yam uas Muaj Los rau Koj

Peb sib tham ntau txog peb tej teeb meem. Thaum lwm tus qhia koj tias lawv raug teeb meem, tej zaum koj yuav xav qhia lawv txog ib lub sij hawm thaum Vajtswv tau pab koj thaum koj raug kev sim siab thiab ua tim khawv tias koj paub Vajtswv yuav pab lawv thiab. Tus Tswv hais tias Nws txhawb peb lub dag zog thaum peb raug kev sim siab “xwv kom nej yuav ua tim khawv txog kuv txij li no mus, thiab xwv kom nej yuav paub tseeb tias kuv, tus Tswv Vajtswv, yeej los saib xyuas kuv cov neeg thaum lawv muaj kev txom nyem” (Mauxiyas 24:14). Peb ua tim khawv txog Nws thaum peb ua tim khawv tias Nws tau pab peb thaum peb raug kev sim siab.

Npaj Siab

Peb ib txhia ntshai hais lus tim khawv thaum tsis tau npaj hais. Muaj tej yam uas peb ua tau kom npaj ua ntej thiab “npaj tos txhua lub sij hawm, yog thaum twg muaj neeg nug [peb] hais tias vim li cas [peb] muaj chaw cia siab, thaum ntawd [peb] thiaj paub teb lawv” (1 Petus 3:15).

Qhov thib ib, peb npaj tau thaum peb xav seb peb ua neej li cas. Peb puas caw tus Vaj Ntsuj Plig Dawb Huv los rau hauv peb lub neej thiab txhawb nqa peb zaj lus tim khawv txhua hnub los ntawm kev ua neej ncaj ncees? Peb puas muab cib fim rau tus Ntsuj Plig hais lus rau peb thiab qhia lus rau peb los ntawm kev thov Vajtswv thiab kev kawm vaj lug kub? Ib yam li tus Tswv tau ntuas Hyrum Smith hais tias, “Tsis txhob nrhiav kev mus tshaj tawm kuv txoj lus, tiam sis xub nrhiav kom tau kuv txoj lus tso, ces tom qab ntawd koj tus nplaig yuav npliag” (Lus Qhuab Qhia thiab Kev Khi Lus 11:21).

Qhov thib ob, peb npaj tau thaum peb xav txog yav tom ntej thiab xav txog tej lub cib fim uas peb yuav muaj hnub ntawd los yog lub lim tiam ntawd kom hais lus tim khawv. Koj npaj tau thaum koj xav seb lawv yuav hais li cas ua rau koj muaj cib fim qhia lawv tias koj ntseeg dab tsi.

Tsom Ntsoov rau tus Cawm Seej thiab Nws cov Lus Qhuab Qhia

Thawj Tswj Hwm Ballard qhia hais tias, “Txawm peb cov mej zeej ntawm lub Koom Txoos ua tim khawv txog ntau yam, muaj ntau yam tseeb tseem ceeb uas peb ib leeg yuav tsum qhia ib leeg txhua lub sij hawm.” Xws li: “Vajtswv yog peb Leej Txiv thiab Yexus yog tus Khetos. Txoj hau kev cawm seej lub ntsiab yog tus Cawm Seej txoj Kev Theej Txhoj. Yauxej Xamiv tau muab Yexus Khetos txoj moo zoo txum tim rov qab los thiab Phau Ntawv Maumoos yog puav pheej uas qhia tias peb hais lus tim khawv tseeb.” Thaum peb hais tej yam tseeb no, peb caw tus Ntsuj Plig los ua tim khawv hais tias tej yam uas peb hais muaj tseeb tiag. Thawj Tswj Hwm Ballard hais tias “tsis muaj peev xwm txwv tus Ntsuj Plig los thaum yus ua tim khawv txog tus Khetos.”²

Tus Cawm Seej tus Yam Ntxwv

Thaum nws nkees taug ib txoj kev uas dhau Xamalis, tus Cawm Seej mus so rau ntawm ib lub qhov dej thiab ntsib ib tug poj niam nyob ntawd. Nws nrog tus poj niam sib tham txog txoj kev cev dej los ntawm lub qhov dej ntawd. Qhov uas Yexus hais txog ib yam uas tus poj niam ua txhua hnub ces ua rau Yexus muaj cib fim ua tim khawv txog cov dej uas cawm txoj sia thiab txoj sia nyob mus ib txhis uas txhua tus neeg uas ntseeg Nws yuav txais tau (saib Yauhas 4:13–15, 25–26).

Ib zaj Lus Tim Khawv Me Me Hloov Tau Tib Neeg lub Neej

Thawj Tswj Hwm Russell M. Nelson tau hais txog ib tug kws tu neeg uas tau nug tus Kws Kho Mob Nelson ib lo lus nug tom qab nws tau ua ib yam uas nyuaj thaum nws phais mob. “Vim li cas koj tsis zoo li lwm tus kws phais mob?” Nws paub ib txhia cov kws phais mob sib luv thiab hais lus dev thaum lawv phais mob uas nyuaj heev.

Tus Kws Kho Mob Nelson yeej teb tau ntau yam. Tiam sis nws teb hais tias, “Yog vim kuv paub tias Phau Ntawv Maumoos muaj tseeb.”

Qhov nws teb li ntawd ua rau tus kws tu neeg thiab nws tus txiv xav kawm Phau Ntawv Maumoos. Thawj Tswj Hwm Nelson twb tau muab tus kws tu neeg ua kev cai raus dej. Ntau xyoo tom qab ntawd, thaum nws tswj hwm ib ceg txheem ntseeg rooj sab laj nyob hauv Tennessee, lub Teb Chaws Amelikas, tom qab nws yog ib tug Thwj Tim tshiab, Thawj Tswj Hwm Nelson twb rov qab sib ntsib tus kws tu neeg ntawd. Nws hais txog nws txoj kev hloov siab los ntseeg, uas tau los ntawm qhov uas Thawj Tswj Hwm Nelson tau hais lus tim khawv thiab Phau Ntawv Maumoos, es twb pab kom 80 tus neeg ntxiv hloov siab los ntseeg.³

Kev Caw Ua tej Yam

Tsis txhob ntshai hais lus tim khawv. Koj zaj lus tim khawv yuav ua rau cov uas koj txhawb pab tau koob hmoov. Koj yuav siv tej lub tswv yim no los sis koj lub tswv yim kom hais koj zaj lus tim khawv hnub no?

© 2019 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/18. Pub txhais ua lus Hmoob: 6/18. Kev txhais Ministering Principles, March 2019. Hmong. 15764 295