ຫລັກທຳຂອງການປະຕິບັດສາດສະໜາກິດ, ເດືອນມິນາ 2019

ວິທີແບ່ງປັນປະຈັກພະຍານແບບທຳມະດາ

ການປະຕິບັດສາດສະໜາກິດ ຄືການເປັນພະຍານ. ເມື່ອເຮົາສາມາດປັບການປະຕິບັດສາດສະໜາກິດໄດ້ ໂອກາດຂອງເຮົາທີ່ຈະແບ່ງປັນປະຈັກພະຍານ ແບບເປັນທາງການ ແລະ ແບບເປັນກັນເອງ ກໍມີຫລາຍຂຶ້ນ.

ເຮົາໄດ້ເຮັດພັນທະສັນຍາ ທີ່ຈະ “ຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9). ການແບ່ງປັນປະຈັກພະຍານ ເປັນພາກສ່ວນໜຶ່ງຂອງການຢືນເປັນພະຍານ ແລະ ເປັນວິທີທາງທີ່ມີພະລັງ ໃນການເຊື້ອເຊີນພຣະວິນຍານບໍລິສຸດ ໃຫ້ມາສຳພັດຫົວໃຈຂອງຄົນ ແລະ ປ່ຽນຊີວິດຂອງເຂົາເຈົ້າ.

“ປະຈັກພະຍານ—ປະຈັກພະຍານທີ່ແທ້ຈິງ, ເກີດຈາກພຣະວິນຍານ ແລະ ຖືກຢືນຢັນໂດຍພຣະວິນຍານບໍລິສຸດ—ກໍປ່ຽນຊີວິດ,” ປະທານ ເອັມ ຣະໂຊ ບາເລີດ, ປະທານກຸ່ມອັກຄະສາວົກແທນຊົ່ວຄາວ ໄດ້ກ່າວ.¹

ແຕ່ການແບ່ງປັນປະຈັກພະຍານຂອງເຮົາ ສາມາດເຮັດໃຫ້ຢ້ານ ຫລື ບໍ່ສະບາຍໃຈສຳລັບເຮົາບາງຄົນ. ມັນເປັນແນວນັ້ນເພາະວ່າເຮົາຄິດເຖິງການແບ່ງປັນປະຈັກພະຍານຂອງເຮົາ ວ່າເປັນບາງສິ່ງທີ່ເຮົາເຮັດ ຢູ່ໃນກອງປະຊຸມຖືສິນອົດເຂົ້າ ແລະ ສະແດງປະຈັກພະຍານ ຫລື ຕອນທີ່ເຮົາສອນບົດຮຽນ. ໃນສະຖານທີ່ແບບເປັນທາງການເຫລົ່ານັ້ນ ເຮົາມັກຈະໃຊ້ຖ້ອຍຄຳ ແລະ ສຳນວນໃດໜຶ່ງໂດຍສະເພາະ ທີ່ເຮົາບໍ່ຄ່ອຍໃຊ້ ຢູ່ໃນການສົນທະນາແບບທຳມະດາ.

ການແບ່ງປັນປະຈັກພະຍານຂອງເຮົາ ສາມາດກາຍເປັນພອນປະຈຳຫລາຍຂຶ້ນ ໃນຊີວິດຂອງເຮົາ ແລະ ໃນຊີວິດຂອງຄົນອື່ນ ເມື່ອເຮົາເຂົ້າໃຈເຖິງຄວາມລຽບງ່າຍຂອງມັນ ທີ່ຈະແບ່ງປັນສິ່ງທີ່ເຮົາເຊື່ອຖືໃນທຸກສະຖານທີ່ທຸກໆວັນ. ຕໍ່ໄປນີ້ ແມ່ນສອງສາມວິທີທີ່ຈະຊ່ວຍໃຫ້ທ່ານເລີ່ມຕົ້ນ.

ເຮັດແບບລຽບງ່າຍ

ປະຈັກພະຍານບໍ່ຈຳເປັນຕ້ອງເລີ່ມຕົ້ນດ້ວຍສຳນວນນີ້, “ຂ້ອຍຢາກສະແດງປະຈັກພະຍານ,” ແລະ ມັນບໍ່ຈຳເປັນຕ້ອງຈົບດ້ວຍຄຳວ່າ, “ໃນພຣະນາມຂອງພຣະເຢຊູຄຣິດ, ອາແມນ.” ປະຈັກພະຍານ ຄືການສະແດງຄວາມຮູ້ສຶກ ເຖິງສິ່ງທີ່ເຮົາເຊື່ອ ແລະ ຮູ້ວ່າເປັນຄວາມຈິງ. ສະນັ້ນ ເມື່ອທ່ານເວົ້າລົມກັບເພື່ອນບ້ານຢູ່ຂ້າງທາງກ່ຽວກັບບັນຫາໃດໜຶ່ງທີ່ນາງປະເຊີນຢູ່ ແລະ ທ່ານເວົ້າວ່າ, “ຂ້ອຍຮູ້ວ່າພຣະເຈົ້າຕອບຄຳອະທິຖານ,” ສາມາດເປັນປະຈັກພະຍານທີ່ມີພະລັງ ເທົ່າໆກັບຕອນທ່ານກ່າວມັນຢູ່ທີ່ແທ່ນປາໄສ ຕອນຢູ່ໂບດ. ພະລັງບໍ່ໄດ້ມາຈາກການກ່າວດ້ວຍຄຳສັບທີ່ຍາກໆ; ມັນມາຈາກພຣະວິນຍານບໍລິສຸດຢືນຢັນເຖິງຄວາມຈິງ (ເບິ່ງ Doctrine and Covenants 100:7–8).

ການຕື່ມປະຈັກພະຍານໃສ່ກັບການສົນທະນາແບບທຳມະດາ

ຖ້າຫາກເຮົາເຕັມໃຈທີ່ຈະແບ່ງປັນ, ມັນມີໂອກາດຢູ່ອ້ອມຮອບເຮົາ ທີ່ຈະຕື່ມປະຈັກພະຍານຂອງເຮົາ ໃສ່ໃນການສົນທະນາໃນແຕ່ລະວັນ. ຍົກຕົວຢ່າງ:

ມີຄົນຖາມທ່ານກ່ຽວກັບທ້າຍສັບປະດາຂອງທ່ານ. “ມັນດີຂະໜາດ,” ທ່ານໄດ້ຕອບ. “ຂ້ອຍດີໃຈທີ່ໄດ້ໄປໂບດ.”
ມີຄົນສະແດງຄວາມເສຍໃຈກັບທ່ານ ຫລັງຈາກທີ່ເຂົາເຈົ້າໄດ້ຍິນກ່ຽວກັບບັນຫາທີ່ທ່ານກຳລັງປະເຊີນຢູ່: “ຂ້ອຍເສຍໃຈນຳເດີ້.” ທ່ານຕອບວ່າ: “ຂອບໃຈທີ່ເປັນຫ່ວງເປັນໃຍນຳຂ້ອຍ. ຂ້ອຍຮູ້ວ່າພຣະເຈົ້າຊິຊ່ວຍເຫລືອໃຫ້ຂ້ອຍຜ່ານຜ່າມັນໄປໄດ້. ພຣະອົງເຄີຍຊ່ວຍຂ້ອຍມາກ່ອນແລ້ວ.”
ມີບາງຄົນເອີ່ຍປາກເວົ້າວ່າ: “ຂ້ອຍຫວັງວ່າ ອາກາດບໍ່ດີນີ້ຊິຜ່ານໄປໃນໄວໆນີ້,” ຫລື “ລົດເມຈັ່ງແມ່ນມາຊ້າແທ້ໆ,” ຫລື “ຫົນທາງຈັ່ງແມ່ນຫຍຸ້ງນໍ.” ທ່ານອາດເວົ້າວ່າ: “ຂ້ອຍແນ່ໃຈວ່າພຣະເຈົ້າຊິຊ່ວຍໃຫ້ທຸກສິ່ງທຸກຢ່າງດີຂຶ້ນ.”

ແບ່ງປັນປະສົບການຂອງທ່ານ

ສ່ວນຫລາຍແລ້ວເຮົາມັກຈະເວົ້າລົມກັນກ່ຽວກັບບັນຫາຂອງເຮົາ. ເມື່ອມີຄົນບອກທ່ານກ່ຽວກັບສິ່ງທີ່ເຂົາເຈົ້າກຳລັງປະເຊີນຢູ່, ທ່ານສາມາດເລົ່າຕອນທີ່ພຣະເຈົ້າໄດ້ຊ່ວຍເຫລືອທ່ານ ເວລາທ່ານປະເຊີນກັບບັນຫາ ແລະ ສະແດງປະຈັກພະຍານວ່າ ທ່ານຮູ້ວ່າພຣະອົງສາມາດຊ່ວຍເຫລືອເຂົາເຈົ້າເໝືອນກັນ. ພຣະຜູ້ເປັນເຈົ້າໄດ້ກ່າວວ່າ ພຣະອົງເພີ່ມຄວາມເຂັ້ມແຂງໃຫ້ເຮົາ ເວລາເຮົາປະເຊີນກັບບັນຫາ ເພື່ອ “ພວກເຈົ້າຈະໄດ້ຢືນເປັນພະຍານໃຫ້ເຮົາໃນພາຍໜ້າ, ແລະ ເພື່ອພວກເຈົ້າຈະຮູ້ຈັກຢ່າງແນ່ນອນວ່າ ເຮົາຄືພຣະຜູ້ເປັນເຈົ້າ ອົງເປັນພຣະເຈົ້າ, ໄດ້ມາຢ້ຽມຢາມຜູ້ຄົນຂອງເຮົາໃນຄວາມທຸກທໍລະມານຂອງພວກເຂົາ” (ໂມໄຊຢາ 24:14). ເຮົາສາມາດຢືນເປັນພະຍານເຖິງພຣະອົງ ເມື່ອເຮົາເປັນພະຍານເຖິງວິທີທີ່ພຣະອົງໄດ້ຊ່ວຍເຫລືອເຮົາແກ້ໄຂບັນຫາ.

ຕຽມພ້ອມຢູ່ສະເໝີ

ສຳລັບເຮົາບາງຄົນ, ການແບ່ງປັນປະຈັກພະຍານຢ່າງບໍ່ໄດ້ຕຽມຕົວລ່ວງໜ້າ ອາດເປັນຕາຢ້ານ. ມັນມີຫລາຍວິທີທີ່ເຮົາສາມາດຕຽມຕົວລ່ວງໜ້າ ແລະ “ຕຽມພ້ອມຢູ່ສະເໝີ ເພື່ອຈະສາມາດຕອບແກ້ຕົວໄດ້ ຕໍ່ທຸກຄົນທີ່ຖາມ [ເຮົາ] ວ່າ [ເຮົາ] ມີເຫດຜົນປະການໃດ ຈຶ່ງມີຄວາມຫວັງຢ່າງນີ້” (1 ເປໂຕ 3:15).

ຢ່າງທີໜຶ່ງ, ການຕຽມພ້ອມຢູ່ສະເໝີສາມາດໝາຍເຖິງ ການເບິ່ງວິທີທີ່ເຮົາດຳລົງຊີວິດ. ເຮົາໄດ້ເຊື້ອເຊີນພຣະວິນຍານບໍລິສຸດໃຫ້ເຂົ້າມາສະຖິດຢູ່ໃນຊີວິດຂອງເຮົາ ແລະ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາບໍ ໃນແຕ່ລະວັນ ຜ່ານທາງການດຳລົງຊີວິດທີ່ຊອບທຳ? ເຮົາໃຫ້ໂອກາດແກ່ພຣະວິນຍານເພື່ອກ່າວກັບເຮົາ ແລະ ເອົາຂໍ້ຄວາມໃສ່ໄວ້ໃນປາກຂອງເຮົາບໍ ຜ່ານທາງການອະທິຖານ ແລະ ການສຶກສາພຣະຄຳພີ? ພຣະຜູ້ເປັນເຈົ້າໄດ້ແນະນຳໄຮຣຳ ສະມິດ ວ່າ ບໍ່ໃຫ້ເພິ່ນປະກາດພຣະຄຳຂອງພຣະອົງ, ແຕ່ທຳອິດໃຫ້ສະແຫວງທີ່ຈະໄດ້ຮັບພຣະຄຳຂອງພຣະອົງກ່ອນ ແລ້ວລີ້ນຂອງເພິ່ນຈະມາຍອອກ (ເບິ່ງ Doctrine and Covenants 11:21).

ຢ່າງທີສອງ, ການຕຽມພ້ອມຢູ່ສະເໝີສາມາດໝາຍເຖິງການເບິ່ງຂ້າງໜ້າ ແລະ ການພິຈາລະນາໂອກາດທີ່ທ່ານອາດມີໃນມື້ນັ້ນ ຫລື ໃນອາທິດນັ້ນ ເພື່ອແບ່ງປັນປະຈັກພະຍານຂອງທ່ານ. ທ່ານສາມາດກະກຽມສຳລັບໂອກາດ ໂດຍການຄິດກ່ຽວກັບຊ່ອງທາງທີ່ໂອກາດເຫລົ່ານັ້ນ ຈະໃຫ້ທ່ານໄດ້ແບ່ງປັນສິ່ງທີ່ທ່ານເຊື່ອຖື.

ເຈາະຈົງຢູ່ທີ່ພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງ

ປະທານບາເລີດ ໄດ້ສອນວ່າ, “ເຖິງແມ່ນເຮົາສາມາດມີປະຈັກພະຍານເຖິງຫລາຍສິ່ງ ໃນຖານະສະມາຊິກຂອງສາດສະໜາຈັກ, ແຕ່ຄວາມຈິງຂັ້ນພື້ນຖານແມ່ນວ່າ ເຮົາຕ້ອງສິດສອນ ແລະ ແບ່ງປັນໃຫ້ກັນເປັນປະຈຳ.” ດັ່ງທີ່ເພິ່ນໄດ້ໃຫ້ຕົວຢ່າງໄວ້ວ່າ: “ພຣະເຈົ້າເປັນພຣະບິດາຂອງເຮົາ ແລະ ພຣະເຢຊູ ຄືພຣະຄຣິດ. ແຜນແຫ່ງຄວາມລອດແມ່ນເຈາະຈົງໃສ່ການຊົດໃຊ້ຂອງພຣະຜູ້ຊ່ວຍໃຫ້ລອດ. ໂຈເຊັບ ສະມິດ ໄດ້ຟື້ນຟູຄວາມສົມບູນຂອງພຣະກິດຕິຄຸນອັນເປັນນິດ ຂອງພຣະເຢຊູຄຣິດ, ແລະ ພຣະຄຳພີມໍມອນເປັນຫລັກຖານວ່າ ປະຈັກພະຍານຂອງເຮົາເປັນຄວາມຈິງ.” ເມື່ອເຮົາປະກາດຄວາມຈິງທີ່ຈິງໃຈເຫລົ່ານັ້ນ, ເຮົາໄດ້ເຊື້ອເຊີນພຣະວິນຍານ ໃຫ້ເປັນພະຍານວ່າ ສິ່ງທີ່ເຮົາກ່າວໄປນັ້ນເປັນຄວາມຈິງ. ປະທານບາເລີດ ໄດ້ເນັ້ນວ່າ “ພຣະວິນຍານບໍ່ສາມາດຖືກກີດກັນ ເມື່ອປະຈັກພະຍານທີ່ແທ້ຈິງເຖິງພຣະຄຣິດ ຖືກກ່າວອອກມາ.”²

ຕົວຢ່າງຂອງພຣະຜູ້ຊ່ວຍໃຫ້ລອດ

ໂດຍທີ່ອິດເມື່ອຍຈາກການເດີນທາງຜ່ານຊາມາເຣຍ, ພຣະຜູ້ຊ່ວຍໃຫ້ລອດໄດ້ຢຸດພັກຢູ່ທີ່ນ້ຳສ້າງ ແລະ ໄດ້ພົບກັບຜູ້ຍິງຄົນໜຶ່ງຢູ່ທີ່ນັ້ນ. ພຣະອົງໄດ້ເລີ່ມຕົ້ນສົນທະນາກ່ຽວກັບການດື່ມນ້ຳຈາກສ້າງ. ໂດຍທີ່ໃຊ້ວຽກງານທີ່ຜູ້ຍິງຄົນນັ້ນເຮັດທຸກວັນເປັນສິ່ງປຽບທຽບ ພຣະເຢຊູຈຶ່ງມີໂອກາດເປັນພະຍານເຖິງນ້ຳທີ່ປະກອບດ້ວຍຊີວິດ ຊຶ່ງມີໃຫ້ສຳລັບຜູ້ທີ່ເຊື່ອໃນພຣະອົງ (ເບິ່ງ ໂຢຮັນ 4:13–15, 25–26).

ປະຈັກພະຍານທີ່ລຽບງ່າຍສາມາດປ່ຽນແປງຊີວິດໄດ້

ປະທານຣະໂຊ ເອັມ ແນວສັນ ຊຶ່ງຕອນນັ້ນໃນຖານະ ດຣ ແນວສັນ ໄດ້ບອກນາງພະຍາບານຄົນໜຶ່ງ ຜູ້ໄດ້ຖາມຄຳຖາມຂໍ້ໜຶ່ງ ຫລັງຈາກການຜ່າຕັດທີ່ຫຍຸ້ງຍາກ. “ເປັນຫຍັງທ່ານຈຶ່ງບໍ່ຄືກັບໝໍຜ່າຕັດຄົນອື່ນໆ?” ໝໍຜ່າຕັດບາງຄົນທີ່ນາງເຄີຍຮູ້ຈັກ ເປັນຄົນໃຈຮ້າຍໄວ ແລະ ເວົ້າຈາຫຍາບຄາຍ ຂະນະທີ່ເຂົາເຈົ້າທຳການຜ່າຕັດທີ່ມີຄວາມກົດດັນຫລາຍ.

ດຣ ແນວສັນ ສາມາດຕອບໄດ້ໃນຫລາຍໆຮູບແບບ. ແຕ່ເພິ່ນພຽງແຕ່ຕອບວ່າ, “ເພາະຂ້ອຍຮູ້ວ່າ ພຣະຄຳພີມໍມອນແມ່ນຈິງແທ້.”

ຄຳຕອບຂອງເພິ່ນ ໄດ້ກະຕຸ້ນນາງພະຍາບານ ແລະ ສາມີຂອງນາງ ໃຫ້ສຶກສາພຣະຄຳພີມໍມອນ. ຕໍ່ມາປະທານແນວສັນ ໄດ້ໃຫ້ບັບຕິສະມາແກ່ນາງພະຍາບານຄົນນັ້ນ. ຫລາຍທົດສະວັດຕໍ່ມາ, ຂະນະທີ່ຄວບຄຸມກອງປະຊຸມສະເຕກຢູ່ລັດເທັນນີຊີ, ສະຫະລັດອາເມຣິກາ, ໃນຖານະທີ່ຫາກໍໄດ້ຮັບການແຕ່ງຕັ້ງໃຫ້ເປັນອັກຄະສາວົກ, ປະທານແນວສັນ ໄດ້ພົບເຫັນນາງພະຍາບານຄົນດຽວກັນນັ້ນອີກ. ນາງໄດ້ບອກວ່າ ການປ່ຽນໃຈເຫລື້ອມໃສຂອງນາງ ຊຶ່ງເກີດຈາກປະຈັກພະຍານທີ່ລຽບງ່າຍ ແລະ ຈາກອິດທິພົນຂອງພຣະຄຳພີມໍມອນ, ໄດ້ຊ່ວຍໃຫ້ຜູ້ຄົນອື່ນອີກ 80 ຄົນ ປ່ຽນໃຈເຫລື້ອມໃສ.³

ການເຊື້ອເຊີນໃຫ້ກະທຳ

ຢ່າຢ້ານກົວທີ່ຈະແບ່ງປັນປະຈັກພະຍານຂອງທ່ານ. ມັນສາມາດເປັນພອນໃຫ້ແກ່ຜູ້ທີ່ທ່ານປະຕິບັດສາດສະໜາກິດ. ທ່ານຈະໃຊ້ແນວຄິດເຫລົ່ານີ້ ຫລື ແນວຄິດຂອງທ່ານເອງ ເພື່ອແບ່ງປັນປະຈັກພະຍານຂອງທ່ານໃນມື້ນີ້ ໃນວິທີໃດ?

© 2019 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/18. ການແປໄດ້ຮັບອະນຸຍາດ: 6/18. ແປຈາກ Ministering Principles, March 2019. Laotian. 15764 331

“ຫລັກທຳຂອງການປະຕິບັດສາດສະໜາກິດ” ຖືກກະກຽມໄວ້ເພື່ອຊ່ວຍເຮົາໃຫ້ຮຽນຮູ້ວິທີທີ່ຈະດູແລກັນແລະກັນ—ບໍ່ແມ່ນແບ່ງປັນແບບຂ່າວສານ ລະຫວ່າງການໄປຢ້ຽມຢາມ. ເມື່ອເຮົາຮູ້ຈັກຄົນທີ່ເຮົາຮັບໃຊ້, ພຣະວິນຍານບໍລິສຸດ ຈະກະຕຸ້ນເຮົາໃຫ້ຮູ້ຈັກວ່າ ເຂົາເຈົ້າຕ້ອງການຂ່າວສານແບບໃດ ທີ່ນອກເໜືອໄປຈາກຄວາມເປັນຫ່ວງເປັນໃຍ ແລະ ຄວາມເຫັນອົກເຫັນໃຈຂອງເຮົາ.