Dilongesha dia kudi Buimanyinyi bua kumpala , Ngondu Muitanu 2019
“Luaku, Undonde”
Yesu Kilisto udi utubikila bua tulonda njila wa bipungidi udi muikala utualuja pambelu kudi baledi betu ba ku diûlu ne bua kuikala ne aba batudi bananga.
Bananga banyi baluma ne bakaji, mukaji’anyi Wendy ne mema tudi tusanka bua kuikala nenu mudinda edi dia Nsabatu. Biabungi mbipitakana katshia ku mpungilu wetu munene mushala. Ntempelo mipia-mipia mmijidila ku Concepción, mu Chili; Barranquilla, mu Colombie; ne ku Lomo, mu Italiya. Tuvua bapetakanangana ne bukola buabungi bua Nyuma diba dia malu a tshijila aa.
Ndi ngela kalumbandi kudi ba mamu (ne ba tatu) babungi badi babala musangu mushala ewu Mukanda wa Molomo ne bajandula disanka ne mabanji adi masokokamu. Ndi mûjibua ne milubu ya malu a bishima adi mapetshibua.
Ndi nsanka bua bansonga ba bidimu 11, badi mpindiewu bu badiakre, babanya biadidia bia tshijila mu buakane Dialumingu dionso. Badi baya ku ntempelo ne bansonga bakaji ba bidimu 11, badi bikala mpindiewu balonga ne bambuluisha bu Mbulumbulu. Bonso bansonga baluma ne bansonga bakaji badi bayisha malelela a lumu luimpe mu butoke ne dituishibua.
Ndi nsanka bua bana ne bansonga badi bambuluisha mu kulongesha kua lumu luimpe mu nzubu yabu mu kudienzeja pamua ne baledi babu bua kuenza nzubu nsangilu, tshikadilu tshidi Ekelezia utua mpanda.
Tuvua bapeta foto wa muana wa bidimu binayi Blake, mudinda dia mu Disambombo, wakakuata umua wa ku mikanda ya Ekelezia ne kujukulaye se, “ndi musue kudisha nyuma wanyi!”
Blake, tudi tusanka neba pamue ne bakuabu badi basungula bua kudisha nyuma yabu kupitshila ku kujila kua biakudia buakumanya malelela a lumu luimpe luibakulula lua Yesu Kilisto. Ne tudi tusanka mu dimanya dia babungi badi bapeta bukola bua Nzambi mu mioyo yabu mu kukukuila ne kuambuluisha mu ntempelo.
Bumudi babungi ba kunudi bamanya, dîku dietu nditatshishibua bua ditapuluka dinena dia kanyinganyinga ngondo isatu ikadi mipita diba didi muanetu wa bakaji Wendy mushiyangana ne muoyo eu. Mu matuku mashala a kutata kuenda ne disama dia cancer, mvua mubeneshibue bua kupeta tshipolo tshia kuenza muyuki wa dilayangana wa tatu ne muana.
Ngakakuata bianza biende ne kumuambila mushindu kayi umvua mumunanga ne disanka dia kuikala tatu’enda. Ngakamba ne: “Udi musedibua ku ntempelo ne uvua mulama bipungidi bieba ne lulamatu. Wewa ne bayeba nudi bakidila bana muanda mutekete mu nzubu muenu ne nudi babakolesha bua kuikala bayidi ba Yesu Kilisto, bidimba bikolakana bia Ekelezia, ne bantu bansongo. Ne bobu mbasungula bena kuabu ba mushindu umue. Tatu’eba udi, udi ne kudiumvua kukola bueba. wakantuadila disanka dia bungi!
Wakandamuna biteketa ne,“Tuasakadila, Tatu.”
Tshivua kanyinganyinga, tshikondo tshia binsonji buetu tuetu. Pavuaye ne bidimu 67, tuvua tuenza mudimu pamue, tumba pamue, ne tunaya nangananga pamue. Kadi dilolo adi, tuakakula bua malu a mushinga wabungi, bumudi bipungidi, mishinga, ditumikila, ditabuja, dîku, lulamatu, dinanga, ne muoyo wa tshiendelela.
Muanetu wa bakaji mmutusamina muoyo bikola. Kadi, kupitshila ku lumu luimpe luibakulula lua Yesu Kilisto, katuena tunyingalala bua bualu buenda to. Patudi tutungunuka ne kulama bipungidi bietu ne Nzambi, tudi bikala mu ditekemena dia kusomba nende kabidi. Nansha nanku, tudi tuenzela Mukalenga mudimu panuapa ne yeya udi umuenzela mudimu kuaka—mu paradizu.1
Mu bulelela, mukajanyi ne mema tuakenza luendu mu Paradizu kumbangilu kua tshidimu etshi — ku Paradizu udi muikala Californie. Bivua bifika ne kabala matuku ketu ka difika muaba eu kavua kalondangana ne meba mashadila ku 40 kudishiyangana ne muanetu wa bakaji . Tuetu, pamua ne Mukulu Kevin W. Pearson ne mukaji’enda June, tuakadi batuibua mpanda kudi bansantu ba ku Dikunji dia Chico mu Californie. Tuakalonga bua ditabuja diabu dinene, buambi buabu, ne bua bishima bia kamueneka munkatshi muabu pavuabu batutshika ku tshipepela tshivua tshifuma ku kabutu ka ku kala mu Californie.
Koku aku, tuakakula ne mpulushi wa tshitenda, John , uvua muikala umua wa ku bantu ba kumpala ba dikima bavua bandamuna. Wakavuluka bua muidima munena uvua mupueka mu Paradizu mu matuku 8 a ngondo wa dikumi ne umue mu 2018, ne muvuamudilu mukola ne makala bipueka mu tshimenga, biosha nzubu ne bintu tshienza bu tshiyola ne katshiyi tshishiya tshintu nansha tshimue kadi anu mishiki ya buta mu njila yonso.
Mu meba 15, John wakendesha mu muidima mukola uvua mukondakaja ne biamua ne butu pavuaye wambuluisha bantu ne mêku bua kukubibua—wambuluisha bonso mufuana kujimija muoyo wenda. Munkatshi mua tshiyola etshi, bualu buvua butonda John buvua buikala lukonko lunene: “dîku dianyi didi kuepi?” Panyima pa ntanta mula, wa meba a lukanku ne tshinyongopelu, kundekelu wa kamanya ne bavua bapandishibue.
Muyuki wa John pa dîku dienda udi ungenzeja bua ngakula lelu ne aba bonso badi mua kudikonka diba dia ndekelu dia matuku abu a muoyo, “dîku dianyi didi kuepi?” Mu dituku edi ditshilualua pawuikala ukadi kundekelu kua muoyo eu ne pawabuela mu muaba wa nyuma, newuikala kumpala kua lukonko elu lua bowa: “dîku dianyi didi kuepi?”
Yesu Kilisto udi ulongesha njila wa kualukila ku nzubu wetu wa tshiendelela. Udi umvua bulongolodi bua Tatu wetu wa mu Diûlu bua dilubuluka dia tshiendelela dimpa dietu. Panyima pa bionso, Yeya udi Nsapi idi mikuata dibua buabi bionso. Udi Mupandishi wetu, Mondapi wetu, ne Musungidi wetu.
Katshia bipata Adama ne Eva pambelu pa Budimi bua Yadena, Yesu Kilisto wakolola diboko diende dia bukola bua kuambuluisha eu yonso udi usungula bua kumulonda. Misangu mivule, mifundu idi yamba ne nansha mishindu kayi ya mibi ifuma ku mishindu yonso ya bantu, Maboko enda adi anu molola.2
Nyuma wa umua ne umua wa munkatshi muetu udi mûjibua ne dinanga dia dîku bua kashidi. Misambu ya dinanga idi yepula ditekemena dibi ne dinanga adi ndidi bonso bajinga bua kuikala pamue kashidi. Ne bakuabu badi ne ditaba dibi bua se Dibika ku lufu dia Yesu Kilisto didi difila mulayi ne muntu yonso neikala ne bananga benda panyima pa lufu.
Mu bulelela, Mukalenga nkayenda wakamba bitokeshibua se nansha mudi dibika dienda ku lufu dileja se muntu yonso udi ne muoyo neikala bushuwa mua kubika ne kuikala ne muoyo kashidi,3 biabungi mbilombibua bua tuetu basue kupeta dibenesha dia kuzanjikibua. Lupandu ludi lua muntu nkaya, kadi kuzanjikibua kudi bua dîku.
Telejayi miaku eyi miakula kudi Mukalenga Yesu Kilisto kudi muprofete Wende: “Bipungidi bionso, diumvuangana, dilamakana, madienzeji, mitshipu, malaya, nkudimukilu, ndamakajilu, nsangilu, anyi ndongoluelu, bidi kabiyi bienza ne bisuikibua pamue kudi Nyuma Muimpa wa mulayi … kabiena ne mushinga, buakana, nansha ne bukola kumpala ne panyima pa dibika ku lufu to; bua diumvuangana dionso didi dienza mu mushindu eu didi dijika diba didi muntu ufua.”4
Nanku, ntshinyi tshidi tshilombibua bua mêku kuikala mazanjikibua bua kashidi? Tudi tukumbana bua dianyisha edi mu kuenza bipungidi ne Nzambi, kulama bipungidi ebi, ne kupeta mishînga ya nsongo.
Bionso ebi biakadi bilelela katshia ku tshibangilu kua tshikondo. Adama ne Eva, Nowa ne mukaji’enda, Abalahama ne Sala, Lehi ne Salia, ne bayidi bonso bena lulamatu ba Yesu Kilisto—katshia buloba buafukibua—bakenza bipungidi bia momumua ne Nzambi. Bakapeta mishînga ya momumua ituvua tuetu bu bidimba bia Ekelezia muibakilula wa Mukalenga lelu benza: bipungidi ebi bitudi bapetela ku dibatiza ne mu ntempelo.
Musungidi udi utubikila bonso bua tumulonda mu mayi a dibatiza ne, pashisha, tuenza bipungidi bikuabu ne Nzambi mu ntempelo ne tuikala balamatshi ba mishînga eyi ya mushinga. Bionso ebi bidi bilombibua patudi basue kuikala bazanjikibua ne mêku etu ne kuikala ne Nzambi kashidi.
Kanyinganyinga ka muoyo wanyi kadi bua se bantu ba bungi bandi munanga, bandi nganyisha, ne bandi nnemeka badi babenga dibikila Dienda. Badi bikala bapua muoyo ditusengelela dia Yesu Kilisto padiye utubikila, “Luaku, Undonde.”5
Ndi ngumvua buatshinyi Nzambi udi udila.6 Ndi ndila panyi bua balunda banyi aba ne bua balela. Badi bikala bantu baluma ne bakaji ba mushinga, balamata ku mêku abu ne midimu yabu ya bumuntu. Badi bafila ne muoyo mujima diba diabu, makanda ne bintu biabu. Ne bukuapanu budi buimpa kupitshila ku didienzeja diabu. Kadi kabavua basungula bua kuenza bipungidi ne Nzambi to . Kimbapeta mishinga idi mua kubazanjika ne mêku abu ne kubasuika pamue kashidi to.7
Ndi ne dijinga dia kumonangana nabu ne kubabikila bua kuela meji menamena ku mikenji ya Mukalenga. Ngakadikonka se ntshinyi tshindi mua kuamba bua bobu kumvua mushindu udi Musungidi mubananga ne kumanyabu mushindu undi mubananga ne mundi mufika ku dimanya tshipungidi tshia kulama tshidi baluma ne bakaji mua kuenza bua kupeta “disanka dia tshishiki.”8
Badi basue kumvua se bumudiku muaba buabu pashisha—ne bakaji ne baluma balenga bansongo badi kabayi basungula buakuenza bipungidi ne Nzambi— kakuena muaba wikala mêku muakusuikibua ne kupeta dibenesha dia kuikala ne kutungunuka kashidi. kakuena bukalenga budibu bindila disanka dia tshishiki—budi dikola diakumpala ne diakalenga kadiyi ndekelu.9 Mabenesha aa adi alua anu mu bukalenga buzanjika bua mu diûlu ne Nzambi, Tatu Wetu wa Tshiendelela; Muanenda, Yesu Kilisto; ne bulenga buetu, buakana, ne kuakaja bidimba bia mêku etu.
Ndi mumvua bua kuambila balunda banyi badi ne kukandamana:
“Mu muoyo eu, wewa kuyi muanji kusanka bua disungula dibidi nansha mutshintu tshimua. Bu mûdi ubenga bua kuakidila lumu luimpe luibakulula lua Yesu Kilisto, udi witaba bua kusanka ne disungula dibidi.
“Musungidi udi wamba ne, ‘mu nzubu wa Tatu wanyi mudi miaba ya bungi.’10 Ki bualu kayi, bu mûdi kuyi usungula bua kuenza bipungidi ne Nzambi to , udi usungula bua kuambula musaka mubi pa mutu weba bua kashidi ne tshiendelela.”
Ndi musue kabidi kuela lubila kudi balunda badi bakandamana ngamba se:
“Tuma muoyo weba kudi Nzambi. Mukonkesha pikala bintu ebi mbilelela. Petaku diba dia kulonga meyi enda. Longa bushuwa! Pawikala munanga dîku dieba ne musue bua kuzanjikibua nadi tshiendelela, sambila mpindieu—ku dilonga diakana ne disambila dimpe—bua kumanya bulelela bua tshiendelela ne pashishe kubakankamika.
“Pawikala kuyi pabuipi ne kuitabuja Nzambi, bangila pinapu. Umvua ne mudipangila malu a kudi Nzambi, mukuabu udi mua kuela mpata buikadianganyi bua Nzambi. Nunku, ikala mu mushindu wa kubanga kupeta mamanya enda. Dipuekesha. Sambila bua kumona tshianza tshia Nzambi mu muoyo weba ne mu nyungulukilu weba. Mukonka bua a kuambila bushuwa ne Yeya udiku—ne Yeya mmukumanya. Mukonka tshidiye umvua bua bualu bueba. Ne pashishe uteleja.”
Umue wa ku balunda banyi bananga bamushindu eu wa kakosa dimanya dia malu enda ne Nzambi. Kadi uvua ukeba bua kuikala pamue ne mukaji’enda ukavua mufua. Wakandomba bua mmuambuluisha. Meme kumukankamika bua kumonanganaye ne bamishonyi betu bua umvua malongesha a Kilisto ne kulonga bipungidi bia lumu luimpe, mishinga, ne mabenesha.
Ke mua kenzaye. Kadi wakumvua se mibelu ivuabo bamupesha ivua ishintulula muoyo wenda mujima. Wa kamba ne, “mikenji eyi ne bipungidi bidi bikola buanyi. Kabidi, tshena nkumbana bua kufuta tshia dikumi, ne tshiakupeta diba dia kuambuluisha mu Ekelezia to.” Pashisha wakankonka ne, “Musangu Undi mfua, suaku wenzelaku mukaji’anyi ne mema mudimu wa mu ntempelo bua tuikala petu pamue kabidi.”
Bikala bimpa, mundi tshiyi mulumbuluishi wa muntu eu. Kadi ndi ndiela lukonko bua mudimu wa ntempelo wa muntu udi mupeta mushindu wa kuikala mubatijibua mu muoyo eu—mua kuikala mutekibua mu buakuidi ne mupeta mabenesha a ntempelo patshidiyi mu mubidi emu—kadi udi wangata dipangadika dia kubenga njila eu.
Bana betu bananga baluma ne bakaji, Yesu Kilisto udi utulomba bua tulonda njila wa bipungidi ke udi utualuja kudi baledi betu ba ku diûlu ne buakuikala ne betu bananga. Udi utuambila se“luaku, undonde.”
Mpindieu, bu Muimanyinyi wa Ekelezia Wenda, ndi nsengelela bantu bonso bavu ntanta ne Ekelezia ne badi kabayi bamanya bulelela ne Ekelezia wa Musungidi mmuibakilula. Enza mudimu weba wa nyuma bua udikankamika, ne uwenza mpindieu. Diba ndishala dikesa.
Ndi njadika ne Nzambi udi ne muoyo! Yesu udi Kilisto. Ekelezia wenda ne tshiuwidi tshia lumu luimpe luenda bidi bibakulula bua kubenesha mioyo ne disanka, panu ne pashisha. Ndi njadika nunku mu dina dia Yesu Kilisto, amen.
© 2019 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/18. Dianyisha dia dikudimuna: 6/18 Dikudimuna dia First Presidency Message, May 2019. Language. 18605 760