1 Mpindiewu muananyi wa baluma, mona kakesa kakuabu kandi musua kukuambila; bualu ndi mumona ne meji eba adi aditatshisha bitangila dibika dia ku lufu.

2 Mona, ndi nkuambila ne, kakuena dibika dia ku lufu to—anyi, mu mêyi makuabu, nengamba ne mubidi wa tshifuaka ewu kena uvuala mubidi udi kawuyi ufua to, mubidi wa dibola ewu kena uvuala mubidi udi kawuyi ubola to—tô ne kunyima kua dilua dia Kilisto.

3 Mona, udi utuala dibika dia ku lufu dia bafua. Kadi mona, muananyi wa baluma, dibika dia ku lufu kadiena dianji kufika to. Mpindiewu, ndi nkujinguluila bualu busokoka; nansha nanku, kudi malu masokoka a bungi adi malama, adi muntu kayi mumanya to amu Nzambi nkayenda. Kadi ndi nkuleja tshintu tshimua tshindi muebeja ne dinanukila kudi Nzambi bua mmanya—ne mbitangila dibika dia ku lufu.

4 Mona, kudi diba dipangidikibua diajuka bonsu ku bafua. Mpindiewu muntu kena mumanya padi diba edi dilua to; kadi Nzambi udi mumanya diba didi dipangidikibua.

5 Mpindiewu, ne biakuikala musangu umua, anyi musangu muibidi, anyi musangu muisatu, wajuka bantu ku bafua, kabiena ne bualu to; bualu Nzambi mumanya bintu bionsu; ne mbikumbana bua mema mema kumanya ne bienzeka nanku—ne kudi diba dipangidikibua diajuka bonsu ku bafua.

6 Mpindiewu kudi ne tshia kukuila mutantshi pankatshi pa diba dia lufu ne diba dia dibika dia ku lufu.

7 Ne mpindiewu ndi ngebeja ne tshinyi tshiafikila anyima ya bantu kumbuka ku diba dia lufu tô ne ku diba didi dipangidikibua bua dibika dia ku lufu?

8 Mpindiewu nansha kuikala misangu mipita umua mipangidikibua bua bantu kujuka kabiena ne bualu to; bualu bonsu kabena bafua musangu umua to, ne etshi katshiena ne bualu to; bionsu bidi bu dituku dimua kudi Nzambi, ne amu bantu ki badi babala diba.

9 Bua nanku, kudi diba dipangidikibua bua bantu kujukabu ku bafua; ne kudi mutantshi pankatshi pa diba dia lufu ne dibika dia ku lufu. Ne mpindiewu, bitangila mutantshi wa diba ewu, tshiafikila anyima ya bantu tshidi tshintu tshimvua muebeja ne dinanukila kudi Mukalenga bua kumanya; ne etshi tshintu tshindi mumanya.

10 Ne palua diba diajuka bonsu, pashisha nebamanya ne Nzambi udi mumanya meba onsu adi mapangidikibua bua bukua bantu.

11 Mpindiewu, bitangila ne ngikadilu wa anyima pankatshi pa lufu ne dibika dia ku lufu—Monayi, muanjelu uvua mummanyisha ne, nyuma ya bantu bonsu, katataka padiyi ipatuka mu mubidi wa tshifuaka ewu, eyowa, nyuma ya bantu bonsu, nansha ya bantu bimpa anyi babi, idi iya kuabu kudi Nzambi wakayipesha moyo.

12 Ne pashisha nebifika ne, nyuma ya badi bakana idi miakididibua mu ngikadilu wa disanka, udi ubikidibua ne mpaladiso, ngikadilu wa ditalala, kuikishabu ku ntatu yabu yonsu ne diditatshisha, ne dibungama.

13 Ne pashisha nebifika ne, nyuma ya babi bapita, eyowa, badi bibi—bualu mona, kabena ne bupianyi anyi difutu kudi Nyuma wa Mukalenga to; bualu mona, bavua basungula midimu mibi pa mutu pa mimpa; bua nanku nyuma wa diabulu uvua mubuela munda muabu, ne uvua muakangata nzubu yabu—ne aba nebimanshibua mu mîdima ya pambelu; nekuikala muadi, ne kudilakana, ne disumakana dia menu, ne ebi bua malu mabi abu nkayabu, bualu bavua bakuatshibua bilondeshila disua dia diabulu.

14 Mpindiewu ewu udi ngikadilu wa anyima ya bantu babi, eyowa, mu mîdima, ne ngikadilu udi utshingisha bantu badi buwula ntenta ne bôwa, bindila difîka munda didi bu kapia dia tshiji tshia Nzambi kudibu; nanku badi bashala mu ngikadilu ewu, bu mudi bantu bakana bashala mu mpaladiso, tô ne diba dia dibika dia ku lufu.

15 Mpindiewu, kudi bamua bantu bavua bumvua ne ngikadilu wa disanka ewu ne ngikadilu wa dikenga ewu dia anyima, kumpala kua dibika dia ku lufu, uvua dibika dia ku lufu dia diambedi. Eyowa, ndi ngitaba ne badi mua kûbikila ne dibika dia ku lufu, dibikishibua dia nyuma anyi anyima ne difidibua diabu ku disanka anyi ku dikenga bilondeshila ku mêyi avua mamba.

16 Ne mona, bivua biamba kabidi, ne kudi dibika dia ku lufu dia diambedi, dibika dia ku lufu dia bonsu bavuaku, anyi badiku, anyi bikalaku, kupueka tô ne ku dibika dia ku lufu dia Kilisto ku bafua.

17 Mpindiewu, tudi tutshinka ne dibika dia ku lufu dia diambedi, didi mifundu miamba buayi mushindu ewu, didi mua kuikala dibika dia ku lufu dia anyima ne dipeshibua diayi disanka anyi dikenga. Kuena mua kutshinka ne bidi biamba nanku to.

18 Mona, ndi nkuambila ne, To; kadi bidi biamba ne dipingajulula pamua dia anyima ne mubidi, dia bavuaku katshia ku matuku a Adama kupueka tô ne ku dibika dia ku lufu dia Kilisto.

19 Mpindiewu, ne anyima anyi mibidi ya bavua bamba nebisangishibua kabidi musangu umua, bantu babi ne bantu bakana, ntshiena ngamba to; mbikumbana, ne ngamba ne nebajuka; anyi mu mêyi makuabu, dibika diabu dia ku lufu nedienzeka kumpala kua badi bafua kunyima kua dibika dia ku lufu dia Kilisto.

20 Mpindiewu, muananyi wa baluma, ntshiena ngamba ne dibika dia ku lufu diabu didi dilua diba dia dibika dia ku lufu dia Kilisto; kadi mona, ndi ngamba nanku bilondeshila dimona dianyi, ne anyima ne mibidi bidi bisangishibua kabidi, bia bantu bakana, diba dia dibika dia ku lufu dia Kilisto, ne dibanda dienda mu diûlu.

21 Kadi ne diba dia dibika dia ku lufu anyi kunyima, ntshiena mua ngamba to; kadi mbindi ngamba bungi ebu, ne kudi mutantshi pankatshi pa lufu ne dibika dia ku lufu dia mubidi, ne ngikadilu wa anyima mu disanka anyi mu dikenga tô ne diba didi Nzambi mupangadika bua bafua bajuka, ne basangishibua kabidi, anyima ne mubidi, ne bimanyijibua kumpala kua Nzambi, ne balumbuluishibua bilondeshila ku midimu yabu.

22 Eyowa, etshi tshidi tshienzeja dipinguluja dia bintu bivua mikana ya bambi miakula.

23 Anyima neapingajibua ku mubidi, ne mubidi ku anyima; eyowa, ne tshidimba tshionsu ne dinungu dionsu nebipingajibua ku mubidi wabi; nansha lusuki lua ku mutu lumua kaluakujimina to; kadi bintu bionsu nebipingajibua mu mushindu wabi muakana ne mujima.

24 Ne mpindiewu, muananyi wa baluma, etshi ki dipinguluja divua diakudibua mu mikana ya bambi—

25 Ne pashisha bantu bakana nebakenka mu bukalenga bua Nzambi.

26 Kadi mona, lufu lua kutshingisha ludi luluila bantu babi; bualu badi bafua bitangila bintu bia buakana; bualu kabena bakana to, ne tshintu tshidi katshiyi tshiakana to katshiena mua kupiana bukalenga bua Nzambi to; kadi nebipatshibua, bafidibua bua kudia bimuma bia midimu yabu anyi bienzedi biabu, ivua mikala mibi; ne badi banua binyindanyinda bia dikopu dia bululu.