1 Ne mpindiewu biakalua ne ku ntuadijilu wa tshidimu tshia makumi abidi ne tshia tshitema tshia balumbuluishi, ne Amolona wakatuma muntu kudi Moloni ujinga ne ashintulula bena lukanu.

2 Ne biakalua ne Moloni wakumvua disanka menamena bua dilomba edi, bualu uvua ujinga ne biakudia bivuabu bafila bua dikuatshisha dia bena lukanu ba ku Bena Lamana abi bikala bua dikuatshisha dia bantu benda nkayenda; ne uvua ujinga bantu benda kabidi bua kukolesha musumba wenda wa basalayi.

3 Mpindiewu Bena Lamana bavua bakuata bantu bakaji ne bana ba bungi, ne kakuvua muntu mukaji anyi muana umua munkatshi mua bena lukanu ba Moloni to, anyi bena lukanu bavua Moloni mukuata to; bua nanku Moloni wakangata dipangadika dia bumua bulongolodi bua kuangata bungi bonsu bua bena lukanu ba ku Bena Nefi buvuaye bua kuangata kudi Bena Lamana.

4 Bua nanku wakafunda mukanda, ne wakawutuma kudi musadidi wa Amolona, yeya muina uvua mulua ne mukanda kudi Moloni awu. Mpindiewu eyi ki miaku yakafundilaye Amolona, wamba ne:

5 Mona, Amolona, ndi mukufundila kakesa bitangila mvita eyi iwudi muela bantu banyi, anyi idi muanenu wa baluma mubela, ne iwutshidi mupangadika bua kutungunuka nayi kunyima kua lufu luenda.

6 Mona, ndi musua kukuambila kakesa bitangila bululama bua Nzambi, ne muela wa mvita wa tshiji tshienda tshia bukitu bonsu, udi mulembelela pa mutu weba, amu wewa mukudimuna mutshima ne mupingaja misumba yenu ya basalayi mu malaba enu nkayenu, anyi mu bulaba bunudi nuasamu, budi buikala bulaba bua Nefi.

7 Eyowa, nenkuambila bintu ebi bu wewa muikala mukumbana bua diteleja kudibi; eyowa, nenkuambila bitangila ngena udi utshingisha awu udi muindila bua kuakidila bashipi ba bantu ba bu munuvua bikala wewa ne muanenu wa baluma bikala, pa kumbusha nuenu bakudimuna mutshima ne balekela majinga enu a kushipa bantu, ne bapingana ne misumba yenu ya basalayi ku malaba enu nkayenu.

8 Kadi bu munuvua umua musangu babenga bintu ebi, ne nuvua baluangana ne bantu ba Mukalenga, ndi mua kutekemena ne nenuenza kabidi nanku.

9 Ne mpindiewu mona, tudi badilongolola bua kuluangana nuenu; eyowa, ne pa kumbusha nuenu balekela majinga enu, mona, nenudikuluila tshiji tshia Nzambi awu unuvua babenga, mena bua dibutuka dijima dienu.

10 Kadi, bu mudi Mukalenga ne moyo, misumba yetu ya basalayi neilua kunubunda pa kumbusha nuenu bumbuka, ne nenukumbudibua ne lufu katataka, bualu netulama bimenga bietu ne malaba etu; eyowa, ne netukuba ntendelelu wetu ne kipatshila ka Nzambi wetu.

11 Kadi mona, ndi ntshinka ba ndi nkuambila bitangila bintu ebi tshianana; anyi ndi ntshinka ne udi muana wa mu ngena; bua nanku nenjikija mukanda wanyi ku dikuambila ne ntshiakushintulula bena lukanu, amu pa kumbusha ku diumvuangana ne neufila muntu umua ne mukaji wenda ne bana benda, bua muena lukanu umua; pikalabi ne newenza nanku, nenshintulula.

12 Ne mona, panuikala kuyi wenza nanku to, nendua kunubunda ne misumba yanyi ya basalayi, eyowa, nempaya mena bakaji banyi ne bana banyi ne biluilu, ne nendua kukubunda, ne nenkulonda mena ku bulaba buenu nkayenu, budi buikala bulaba bua bupianyi buetu bua kumpala; eyowa, ne nebikala mashi bua mashi, eyowa, moyo bua moyo; ne nennuluisha mena tô ne panuabutuka pa mpala wa buloba.

13 Mona, ndi ne tshiji, ne bantu banyi kabidi; nuvua nukeba bua kutushipa, ne tuvuanu tukeba bua kudisungila. Kadi mona, panuikala nukeba bua kutubutula bikola netukeba bua kunubutula; eyowa, ne netukeba bua kunyenga bulaba buetu, bulaba bua bupianyi buetu bua kumpala.

14 Mpindiewu ngajikiji mukanda wanyi. Ndi Moloni; ndi mulombodi wa bantu ba Bena Nefi.

15 Mpindiewu biakalua ne Amolona, pakapetaye mukanda ewu, wakafîka tshiji; ne wakafundila Moloni mukanda mukuabu, ne eyi ki miaku yakafundaye, wamba ne:

16 Ndi Amolona, mfumu wa Bena Lamana; ndi muanabu ne Amalikia wa baluma unuvua bashipa. Mona, nensombola mashi enda kunudi, eyowa, nennuluila ne misumba yanyi ya basalayi bualu ntshiena ntshina dikanyina dieba to.

17 Bualu mona, batatuenu bakenzela bana babi bibi, mu mushindu wa ne bakabanyenga bunema buabu bua bukalenga pavuabu bulelela buikala buabu.

18 Ne mpindiewu mona, panuateka biluilu bienu panshi, ne panuadibatshika bua kulombodibua kudi badi bulombodi buikala buabu, pashisha nengenzeja ne bantu banyi bateka biluilu biabu bia mvita panshi ne kabakuluangana kabidi mvita nansha.

19 Mona, udi unkanyina mema ne bantu banyi; kadi mona, katuena tutshina dikanyina dieba to.

20 Nansha nanku, nenganyisha bua kushintulula bena lukanu bilondeshila ku dilomba dieba, ne disanka, bua kukuba biakudia bianyi bua bantu banyi ba mvita; ne netunuela mvita ikala ya tshiendelela, bua dibatshika dia Bena Nefi ku bukôkeshi buetu anyi bua dibutuka diabu dia tshiendelela.

21 Ne bua bidi bitangila Nzambi uwudi wamba ne tudi babenga, mona, katuena bamanya muntu wa buena awu to, nansha nuenu bina; kadi pikalabi ne kudi muntu wa buena ewu, tudi tuela meji ne udi mutufuka bu mudiyi munufuka.

22 Ne pikalabi ne kudi diabulu ne ngena, mona kena ukutuma mômu bua kusomba ne muanetu wa baluma unuvua bashipa, uwudi usua kuamba ne udi muya ku muaba wa buena ewu anyi? Kadi mona bintu ebi kabiena ne mushinga to.

23 Ndi Amolona, ne ndi kankanunuina ka Zolama, uvua batatuenu bapatuisha mu Yelushalema ku mbamba.

24 Ne mona mpindiewu, ndi Muena Lamana wa dikima; mona, mvita eyi ivua miedibua bua kusombuela bubi buakenzelabu Bena Lamana ne bua kupeta ne bua kukuba manema abu ku bukalenga; ne ngajikiji mukanda wanyi kudi Moloni.