1 Ne mpindiewu, muananyi wa baluma Helamana, ndi nkupesha mukenji ne wangata miandiku ivua mmilamisha;

2 Ne ndi nkupesha mukenji kabidi ne nulama miandiku ya bantu aba, bilondeshila mumvua muenza, pa bitata bia Nefi, ne ne ulama bintu bionsu bia tshijila ebi bimvua mulama, mena bu mumvua mubilama; bualu bidi bilamibua bua kipatshila ka lungenyi.

3 Ne bitata bia kalabi ebi, bidi bikala ne mikanunu eyi, bidi ne miandiku ya mifundu ya tshijila pa mutu pabi, bidi bikala ne bulondanganyi bua bankambua betu, mena kumbukila ku mbangilu—

4 Mona, bivua biamba kudi batatuetu ku Nyuma, ne nebilamibua ne nebishîdibua tshikondu tshimua ne tshikuabu, ne tshianza tshia Mukalenga netshibilama ne netshibikuba tô ne payabi ku tshisamba tshionsu, tshisa tshionsu, muakulu onsu, ne bantu bonsu, bua nanku bamanya malu masokoka adipu.

5 Ne mpindiewu mona, bialamibuabi bidi ne tshia kulama diengeleka diabi; eyowa, ne nebilama diengeleka diabi; eyowa, ne bitata bionsu bidi bikala ne tshidi tshikala kaleta ka tshijila.

6 Mpindiewu udi mua kutshinka ne etshi busenji buanyi; kadi mona ndi nkuambila ne, ku malu makesa ne a mateketa malu manena atu enjibua; ne njila mikesa misangu ya bungi itu ipuwisha bena lungenyi.

7 Ne Mukalenga Nzambi utu wenzela imua njila bua kukumbaja tuipatshila tuenda tunena ne tua tshiendelela; ne ku njila mikesa bikola Mukalenga utu upuwisha bena lungenyi ne wenzeja lupandu lua anyima ya bungi.

8 Ne mpindiewu, bivua tô ne mpindiewu bikala bimpa mu lungenyi lua Nzambi ne bintu ebi bikubibua; bualu mona, bivua bivudija mvulukilu wa bantu aba, eyowa, ne bivua bitabujija ba bungi bitangila ditupakana dia njila yabu, ne bivua bibatuadila dimanya dia Nzambi wabu, bua lupandu lua anyima yabu.

9 Eyowa, ndi nkuambila ne, bu kabiyi bua bintu ebi bidi miandiku eyi mikala nabi to, bidi pa bitata ebi, Amona ne bana babu kabavua mua kuitabujija mena binunu bia Bena Lamana bitangila dipanga dia bujalama dia ngikadilu ya batatuabu; eyowa, miandiku eyi ne miaku yabu yakaluisha dikudimuna dia mutshima; bivua ne, bakaluishibua ku dimanya dia Mukalenga Nzambi wabu, ne bua kusankila mu Yezu Kilisto Musungidi wabu.

10 Ne nganyi udi mumanya nebikala njila kuluisha binunu bia bungi biabu, eyowa, ne kabidi binunu bia bungi bia bana betu ba nshingu mîminyina, Bena Nefi, badi bapapisha mpindiewu mitshima yabu mu mibi ne malu mabi, ku dimanya dia Musungidi wabu?

11 Mpindiewu malu masokoka â ka’ena manji kuikala mammanyisha menamena to; bua nanku nembenga ku’akula a bungi.

12 Ne bidi mua kukumbana mema muamba amu ne bidi bikuba bua kipatshila ka lungenyi, kipatshila kadi kamanyibua kudi Nzambi; bualu udi upesha meji mu lungenyi mu midimu yenda yonsu, ne njila yenda idi milulama, ne njila wenda udi tshijengu tshimua tshia tshiendelela.

13 Ô vuluka, vuluka, muananyi wa baluma Helamana, bu mudiyi mikola mikenji ya Nzambi. Ne wakamba ne: Panualama mikenji yanyi nenulubuluka mu bulaba—kadi nuenu kanuyi balama mikenji yenda to nenukoshibua ku mpala kuenda.

14 Ne mpindiewu vuluka, muananyi wa baluma, ne Nzambi uvua mukulamisha bintu ebi, bidi bikala bia tshijila, bidiye mulama bia tshijila, ne bialamaye ne biakubaye kabidi bua kipatshila ka lungenyi buenda, bua aleja bukola buenda kudi nkongu ya bantu idi ilua.

15 Ne mpindiewu mona, ndi nkuambila ku nyuma wa buambi ne, wewa musambuka mikenji ya Nzambi, mona, bintu ebi bidi bikala bia tshijila nebiumbushibua kûdi ku bukola bua Nzambi, ne neufidibua kudi Satana, bua akupepula bu mudi bisota kumpala kua lupepela.

16 Kadi wewa ulama mikenji ya Nzambi, ne wenzela bintu ebi bidi bikala bia tshijila bilondeshila mudi Mukalenga ukupesha mukenji, (bualu udi ne tshia kuebeja Mukalenga bua bintu bionsu biwudi ne tshia kuenza nabi) mona, bukôkeshi bua pa buloba anyi bua ngena nansha bumua kabuena mua kukunyenga biobi to, bualu Nzambi udi mutamba bukola bua kukumbaja miaku yenda yonsu.

17 Bualu neakumbaja malaya enda onsu âkulayaye, bualu uvua mukumbaja malaya enda avuaye mulaya batatuetu.

18 Bualu wakabalaya ne neakuba bintu ebi bua kipatshila ka lugenyi buenda, bua aleja bukola buenda kudi nkongu ya bantu idi ilua.

19 Ne mpindiewu mona, udi mukumbaja kipatshila kamua, mena ka dipinguluja dia binunu bia bungi bia Bena Lamana ku dimanya dia bulelela; ne uvua muleja bukola buenda buvua munda muabu, ne nealeja kabidi bukola buenda budi munda muabu kudi nkongu ya bantu idi ilua; bua nanku nebikubibua.

20 Bua nanku ndi kumpesha mukenji, muananyi wa baluma Helamana, ne wikala munanukidi mu dikumbaja mêyi anyi onsu, ne wikala ne dinanukila mu dilama dia mikenji ya Nzambi bu midiyi mifunda.

21 Ne mpindiewu, ndi nenkuambila bitangila bitata abi makumi abidi ne binayi, bua ubilama, bua malu masokoka ne midimu ya mîdima, ne midimu ya mu musokoku ya bantu abu bakabutuka, bimueneshibua kudi bantu aba; eyowa, dishipa diabu dia bantu dionsu, ne dinyengangana diabu dia bintu bintu bia benda, ne dipawula diabu dia bintu bia benda, ne bubi buabu bonsu ne malu mapita bubi abu onsu bilejibua kudi bantu aba; eyowa, ne ukuba biandamunyi bia miakulu ebi.

22 Bualu mona, Mukalenga wakamona ne bantu benda bakabanga kuenza mudimu mu mîdima, eyowa, dishipa dia bantu dia mu musokoku ne kuenza malu mapita bubi; bua nanku Mukalenga wakamba ne, bobu kabayi bakudimuna mutshima to, badi babutuka pa mpala wa buloba.

23 Ne Mukalenga wakamba ne: nendongoluela musadidi wanyi Gazelema, dibua, diakenka mu mîdima bua bukenka, bua mema mema kuleja bantu banyi badi bansadila, bua kubaleja midimu ya bana babu, eyowa, midimu yabu ya mu musokoku, midimu yabu ya mîdima, ne bubi buabu ne malu mapita bubi abu.

24 Ne mpindiewu, muananyi wa baluma, biandamunyi bia miakulu ebi bivua bilongolola bua dîyi dia Nzambi dikumbajibua, diakakulaye, wamba ne:

25 Nempatula midimu yabu ya mu musokoku ne malu abu mapita bubi ku mîdima ne nembileja patoka; ne nembabutula pa mpala wa buloba pa kumbusha bobu bakudimuna mutshima; ne nentuala malu abu a mu musokoku ne malu mapita bubi abu onsu patoka, kudi tshisamba tshionsu tshilua kuasa mu bulaba ebu mu matuku adi alonda.

26 Ne mpindiewu, muananyi wa baluma, tudi tumona ne kabakakudimuna mutshima to; bua nanku bavua babutuka, ne tô ne mpindiewu dîyi dia Nzambi divua dikumbajibua; eyowa, malu mapita bubi abu a musokoku avua mapatudibua ku mîdima ne avua mamanyishibua kutudi.

27 Ne mpindiewu, muananyi wa baluma, ndi nkupesha mukenji ne udilamina mitshipu yabu, ne bipungidi biabu, ne muvuangana abu a malu mapita bubi abu a mu musokoku onsu; eyowa, ne umbusha bimanyinu biabu bionsu ne malu abu a dikema kudi bantu aba, bua kababimanyi to, bua pamuapa kabalu kabidi kupona mu mîdima ne kabalu kubutuka.

28 Bualu mona, kudi mutshipu pa mutu pa bulaba ebu bonsu, bua ne dibutuka nedilua kudi benji ba midimu ya mîdima bonsu, bilondeshila bukola bua Nzambi, pikalabu baboba menamena; bua nanku ndi njinga ne bantu aba kababutuki to.

29 Bua nanku neusokoka malongolola a mu musokoku a mitshipu yabu ne bipungidi biabu kudi bantu aba ne neubamanyisha bubi buabu ne dishipa dia bantu diabu ne malu mapita bubi abu; ne neubalongesha bua kukina bubi ne malu mapita bubi ne dishipa dia bantu bia buena ebi; ne neubalongesha kabidi ne bantu aba bavua babutuka bua bubi buabu ne malu mapita bubi abu ne bua dishipa dia bantu diabu.

30 Bualu mona, bakashipa bambi bonsu ba Mukalenga bakalua munkatshi muabu bua kubamanyisha malu mabi abu; ne mashi a bakashipabu akabila kudi Mukalenga Nzambi wabu bua disombuela kudi bavua babashipi babu; ne nanku bitungu bia Nzambi biakalua pa mutu pa benji ba midimu ya mîdima ne bipungidi bia mu musokoku aba.

31 Eyowa, ne bulaba ebu nebutshipibua bua kashidi ne kashidi bua benji ba mudimu wa mu mîdima ne wa bipungidi bia mu musokoku aba, mena tô ne ku dibutuka, pa kumbusha bobu bakudimuna mutshima kumpala kua kubobabu menamena.

32 Ne mpindiewu, muananyi wa baluma, vuluka mêyi amvua mukuambila; kupeshi bantu aba malongolola masokoka â to, kadi ubalongesha lukinu lua kashidi lua mibi ne malu mabi.

33 Ubayisha dikudimuna dia mutshima ne ditabuija kudi Mukalenga Yezu Kilisto; ubalongesha bua kudipuekesha ne kuikala batudiji ne bapuekela mu mutshima; ubalongesha bua kukolela ku matêtshibua onsu a diabulu, ne ditabuija diabu kudi Mukalenga Yezu Kilisto.

34 Ubalongesha bua kabatshioki midimu mimpa nansha, kadi bua kuikala batudiji ne bapuekela mu mutshima; bualu ba nanku nebapeta dikisha bua anyima yabu.

35 Ô, vuluka, muananyi wa baluma, ne longa lungenyi mu bunsonga bueba; eyowa, longa mu bunsonga bueba bua kulama mikenji ya Nzambi.

36 Eyowa, ne bila kudi Nzambi bua didikuatshisha dieba dionsu; eyowa, lekela midimu yeba yonsu ikala kudi Mukalenga, ne lekela konsu kûdi uya kuikala mu Mukalenga; eyowa, lekela meji eba onsu aludikibua kudi Mukalenga; eyowa, lekela ntatu ya mu mutshima weba itekibua kudi Mukalenga bua kashidi.

37 Ebeja Mukalenga mu midimu yeba yonsu, ne neakuludika bimpa; eyowa, pawudi ulala panshi butuku, lala panshi mu Mukalenga, bua ne akutangila mu tulu tueba; ne pawudi ubika mu dinda lekela mutshima weba wikala muwula ne tuasakidila kudi Nzambi; ne biwenza malu â, neubandishibua ku dituku dia ndekelu.

38 Ne mpindiewu, muananyi wa baluma, ndi ne kakesa ka kuamba bitangila tshintu tshidi batatuetu babikila ne dibulungu, anyi kaludiki—anyi batatuetu bavua batshibikila ne Liahona, tshidi mu diandamuna dia miakulu tshiamba ne kaleji njila; ne Mukalenga uvua mutshilongolola.

39 Ne mona, kakuena muntu nansha umua udi mua kuenza mudimu ku mushindu wa mudimu wa bianza wa dikema nanku awu to. Ne Mona, tshivua tshilongolodibua bua kuleja batatuetu njila uvuabu ne bua kuenza luendu mu tshipela.

40 Ne tshiakabenzela mudimu bilondeshila ku ditabuija diabu kudi Nzambi; bua nanku, bu bobu ne ditabuija bua kuitaba ne Nzambi uvua mua kutangidija tulonda etu ku njila uvuabu ne bua kuya, mona bivua bienzeka; bua nanku bakamona tshishima etshi, ne bishima bikuabu bia bungi kabidi bivua bienzeka ku bukola bua Nzambi, ku dituku ne ku dituku.

41 Nansha nanku, bualu bishima bionsu abi bivua bienjibua ku njila mikesa biakabaleja midimu ya dikema. Bavua bafuba, ne bakapua moyo bua kuenzela ditabuija ne dinanukila diabu ne pashisha midimu ya dikema ayi yakajika, ne kabakaya kumpala mu luendu luabu to;

42 Bua nanku, bakanenga mu tshipela, anyi kabakenda mu njila mululama to, ne bakatatshishibua ne nzala ne nyota, bua disambuka dia mikenji diabu.

43 Ne mpindiewu, muananyi wa baluma, ndi musua ne umvua ne bintu ebi kabiena bipanga tshindidimbi to; bualu pavua batatuetu bikala bafuba bua kuteya ntema ku kaleji njila aka (mpindiewu bintu ebi bivua bia pa buloba) kabakalubuluka to; bidi mena momumua nanku bua bintu bia mu nyuma.

44 Bualu mona, bidi mena biteketa kuteya ntema ku dîyi dia Kilisto, diakuleja njila mululama wa disanka dia tshiendelela, bu muvuabi bua batatuetu bua kuteya ntema ku kaleji njila aka, kavua bua kubaleja njila mululama wa ku bulaba bulaya.

45 Ne mpindiewu ndi ngamba ne, kakuena tshifuanyikiji mu bualu ebu anyi? Bualu bushuwa bu muvua kaludiki aka kalombola batatuetu, ku dilonda dia njila waku, ku bulaba bulaya, patualonda njila wa miaku ya Kilisto neitusambuisha dinsambu dia tshibanda etshi tshia kanyinganyinga ne neitufikisha ku bulaba bua dilaya budi bupita buimpa.

46 Ô muananyi wa baluma, katuikadi bafuba bua buteketa bua njila to; bualu ki muvuabi nanku bua batatuetu; bualu ki muvuabi bilongolola buabu, bua ne patangilabu bapeta moyo; mena ki mudibi buetu. Njila udi mulongolola, ne patuatangila tupeta moyo bua kashidi.

47 Ne mpindiewu, muananyi wa baluma, tangila ne ulama bintu bia tshijila ebi, eyowa, tangila ne utangila kudi Nzambi ne wikala ne moyo. Ndâku kudi bantu aba ne umanyisha dîyi, ne ikala nebushindama. Muananyi wa baluma, ushala bilenga.