1 Mpindiewu kunyima kua Alama muakula mêyi â, bakatuma dîyi bajinga kumanya ne badi ne bua kuitabuija Nzambi umuepela, bua bapeta tshimuma tshivuaye muamba, anyi munyi mudibu ne bua kukuna dimînu, anyi dîyi divuaye muamba, divuaye muamba ne didi ne tshia kukunyibua mu mitshima yabu; anyi mushindu kayi udibu ne bua kubanga kuenzela ditabuija diabu.

2 Ne Alama wakabambila ne: Monayi, nuvua bamba ne kanuena mua kutendelela Nzambi wenu bualu bua nuipatshibu mu nsunagoga yenu. Kadi monayi, ndi nnuambila ne, bu nuenu nuela meji ne kanuena mua kutendelela Nzambi, nudi nupambuka bikola, ne nudi ne tshia kukeba kujingulula mifundu, ne nudi ne tshia bua kukebulula mifundu; panudi nuela meji ne ivua minulongesha nanku, kanuena nuyumvua to.

3 Nudi nuvuluka babala bivua Zenose, muambi wa kala, muamba bitangila disambila anyi ditendelela anyi?

4 Bualu wakamba ne: Udi ne lusa, Ô Nzambi, bualu wakumvua disambila dianyi, nansha pamvua mu tshipela; eyowa, uvua ne lusa pangakasambila bitangila bobu bavua bena lukuna banyi, ne wakashitulula meji abu kundi.

5 Eyowa, Ô Nzambi, ne uvua ne lusa pangakabila kûdi mu budimi buanyi; pangakabila kûdi mu disambila, ne wakangumvua.

6 Ne kabidi, Ô Nzambi, pangakabuela mu nzubu muanyi wakangumvua bitangila disambila dianyi.

7 Ne pangakalua kûdi mu kazubu kanyi ka tshisokomenu, Ô Mukalenga, ne pangakakusambila, wakangumvua.

8 Eyowa, udi ne lusa kudi bana beba padibu babila kûdi, bua bumvuibua kûdi, ne kabiyi kudi bantu to, ne neubumvua.

9 Eyowa, Ô Nzambi, uvua ne lusa kundi, ne wakumvua mbila yanyi munkatshi mua masangisha a bantu beba.

10 Eyowa, ne uvua mungumvua kabidi pamvua muipatshibua ne pavua bena lukuna banyi bampetula; eyowa, wakumvua mbila yanyi, ne wakafîkila bena lukuna banyi tshiji, ne wakabakumbula mu tshiji tshieba ne dinyanguka dia lukasa.

11 Ne wakangumvua bua ntatu yanyi ne bulelela buanyi; ne mbua Muaneba ki pawuvua ne lusa nanku kundi, bua nanku nembila kûdi mu ntatu yanyi yonsu, bualu disanka dianyi didi kûdi; bualu udi mumbusha bitungu bieba kula ne kundi, bua bualu bua Muaneba.

12 Ne mpindiewu Alama wakabambila ne: Nudi nuitabuija mifundu ya Nzambi idi mifunda kudi bantu ba kala anyi?

13 Monayi, binuitabuija, nudi ne tshia kuitabuija biakamba Zenose: Umbushi bitungu bieba bua bualu bua Muaneba.

14 Mpindiewu monayi, bana betu, ndi nuebeja ne nudi babala mifundu ya Nzambi anyi? Bu nuenu babala, munyi munudi mua kubenga kuitabuija Muana wa Nzambi?

15 Bualu kabiena bifunda ne Zenose nkayenda wakamba bintu ebi to, kadi Zenoke kabidi wakamba bintu ebi—

16 Bualu monayi, wakamba ne: Udi mufîka tshiji, Ô Mukalenga, bua bantu aba, bualu badi babenga kumvua midimu ya lusa lueba iwudi mubapesha bua bualu bua Muaneba.

17 Ne mpindiewu, bana betu, nudi numona ne muambi muibidi wa kala mujadika bua Muana wa Nzambi, ne bualu bantu bakabenga kumvua mêyi enda, bakamuasa mabua tô ne ku lufu.

18 Kadi monayi, kabiena bionsu to; kabena aba nkayabu bavua bakula bitangila Muana wa Nzambi to.

19 Monayi, Mose wakakula buenda; eyowa, ne monayi tshifuanyikiji tshiakimanyishibua mu tshipela, bua ewu yonsu watshitangila ikala ne moyo. Ne babungi bakatangila ne bakikala moyo.

20 Kadi bantu bakesa bakumvua diumvuija dia malu â, ne nanku bua bualu bua bupapa bua mitshima yabu. Kadi kuvua ba bungi bavua bapapa bikola ne bakabenga kutangila, bua nanku bakafua. Mpindiewu kipatshila kavuabu babengela kutangila, kadi bualu kabavua bitabuija ne kuvua kubôndopa to.

21 Ô bana betu, bu nuenu mua kôndopibua amu mu dikupa dia mesu enu bua nôndopibua, kanuakutangila lukasa anyi, anyi nudi nunanga kupapisha mitshima yenu mu dipanga dia ditabuija, ne bikala bafuba, mu mushindu wa ne kanuakukupa mesu enu to, mu mushindu wa ne nufua anyi?

22 Biobi nanku, diakabi nedilua kunudi; kadi biobi kabiyi nanku to, apu kupayi mesu enu ne bangayi kuitabuija Muana wa Nzambi, bualu nealua bua kusungila bantu benda, ne bualu neakenga ne afua bua kupikula bua mibi yabu; ne neajuka kabidi ku bafua, tshiavuija dibika ku lufu, bua bantu bonsu bimana kumpala kuenda, bua kulumbuluishibua mu dituku dia ku nshikidilu ne dituku dia tshilumbuluilu, bilondeshila midimu yabu.

23 Ne mpindiewu, bana betu, ndi njinga ne nenukuna dîyi edi mu mitshima yenu, ne bu mudidi dibanga kudiunda mena nanku nudidisha ku ditabuija dienu. Ne monayi, nedilua mutshi, ukola munda muenu tô ne ku moyo wa kashidi. Ne pashisha Nzambi anuanyishila ne majitu enu ikala mapepela, ku disanka dia bua Muanenda. Ne nudi mua kuenza bionsu ebi binuasa. Amena.