1 Ne kabidi, bana betu, ndi musua kupingaja meji enu kunyima ku diba diakapesha Mukalenga Nzambi mikenji eyi kudi bana benda; ne ndi musua ne nuvuluka ne Mukalenga Nzambi wakajidila bakuidi, ku mulongu wenda wa tshijila, uvua ku mulongu wa Muanenda, bua kulongesha bantu malu â.

2 Ne bakuidi abu bavua bajididibua ku mulonga wa Muanenda, mu mushindu wa ne kudiwu bantu bamanya mushindu wa kutekemena kudi Muanenda bua disungila.

3 Ne ewu udi mushindu uvuabu bajididibua—bikala babikidibua ne balongolodibua kumbukila ku tshishimikidi tshia buloba bilondeshila ku budianjidi kumanya bua Nzambi, bua ditabuija diabu dipita ne midimu yabu mimpa; bangabanga bikala balekedibua bua kusungulabu buimpa anyi bubi; bua nanku bikala basungula buimpa, ne baleja ditabuija dipita bunena, mbabikidibua ne dibikidibua dia tshijila, eyowa, ne dibikidibua dia tshijila adi divua dilongolodibua ne, ne bilondeshila ku, disungila dia tshibangilu bua nanku.

4 Ne nanku mbabikidibua ku dibikidibua dia tshijila edi bua ditabuija diabu, patshivua bakuabu bapidia Nyuma wa Nzambi bua dipapa dia mitshima yabu ne bumpofu bua meji abu, patshivuabi ne, bu kabiyi nanku to bavua ne mua kuikala bapeta diakalengela dinena bu bana babu.

5 Anyi mu tshikosu, ku bangabanga bavua mushindu wa momumua ne bana babu; dibikidibua dia tshijila edi nanku divua dilongolola kumbukila ku tshishimikidi tshia buloba bua aba badi babenga kupapisha mitshima yabu, dikala mu ne ku njila wa bupikudi bua Muana Umuepela Mulela, uvua mulongolodibua—

6 Ne badi babikidibua nanku ku dibikidibua dia tshijila edi, ne bajididibua ku buakuidi bunena bua mulongu wa tshijila wa Nzambi, bua kulongesha mikenji yenda kudi bana ba bantu, bua kumonabu pabu bua kubuela mu dikisha dienda—

7 Buakuidi bunena ebu budi ku mulongu wa Muanenda wa Baluma, mulongu muina uvua muikala ku kumbukila ku tshishimikidi tshia buloba; anyi, mu mêyi makuabu, kabuena ne mbangilu wa matuku anyi ndekelu wa bidimu to, ne budi bulongolola tshiendelela ne tshiendelela, bilondeshila ku didianjila dimanya dia malu onsu—

8 Mpindiewu bakajididibua ku mushindu ewu—bikala babikidibua ne dibikidibua tshia tshijila, ne bajididibua ku mululu wa tshijila, ne bakitaba buakuidi bunena bua mulongu wa tshijila, dibikidibua dîna, ne mululu, ne buakuidi bunena, bidi kabiyi ne mbangilu anyi ndekelu to—

9 Nanku badi balua bakuidi banena bua kashidi, ku mulongu wa Muana, Umuepela Mulela wa Tatu, udi kayi ne mbangilu wa matuku anyi ndekelu wa bidimu to, udi muwula ntenta ne ngâsa, ne bujalama, ne bulelela. Ne nanku mudibi. Amena.

10 Mpindiewu, bu mumvua muamba bilondeshila ku mulongu wa tshijila, anyi buakuidi bunena ebu, kuvua ba bungi bavua bajididibua ne bakalua bakuidi banena ba Nzambi; ne nku ditabuija diabu dipita ne ku dikudimuna diabu dia mutshima, ne ku buakana buabu kumpala kua Nzambi, bualu bakasungula bua kukudimuna mutshima ne kuenza buakana pamutu pa kufua;

11 Bua nanku bavua babikidibua bilondeshila ku mulongu wa tshijila ewu, ne bajididibua, ne bilamba biabu bisukudibua bitoka ku mashi a Muana wa Mukoku.

12 Mpindiewu, kunyima kua bajididibua kudi Nyuma wa Tshijila, bilamba biabu bitokeshibua, bikala bakezuka ne kabayi ne katoba kumpala kua Nzambi to, kabavua mua kutangila mibi amu ne dinyoka; ne kuvua ba bungi, ba bungi bapita menamena, bavua bakezukibua ne bakabuela mu dikisha dia Mukalenga Nzambi wabu.

13 Ne mpindiewu, bana betu, ndi musua ne nudipuekesha kumpala kua Nzambi, ne nukuama bimuma bidi biakanyina dikudimuna dia mitshima, bua nubuela penu mu dikisha adi.

14 Eyowa, dipuekeshayi mena bu bantu ba mu matuku a Melekisedeke, uvua penda muakuidi munena bilondeshila ku mulongu wa momumua ewu umvua muamba, wakitaba penda buakuidi bunena bua kashidi.

15 Ne nyeye Melekisedeke umua ewu uvua Abalahama mufuta tshia dikumi kudiye; eyowa, mena tatuetu Abalahama wakafuta tshitupa tshimua tshia dikumi tshia bionsu bivuaye nabi.

16 Mpindiewu milulu eyi ivua mifidibua ku mushindu ewu, nanku bua bantu badi bindilaMuana wa Nzambi, muvuatshi tshikala tshifuanyikiji tshia mulongu wenda, anyi muvuatshi tshikala mulongu wenda, ne bua bindila nanku bua dilekedibua dia mibi yabu, bua babuela mu dikisha dia Mukalenga.

17 Mpindiewu Melekisedeke ewu uvua mfumu mu bulaba bua Salema; ne bantu benda bavua bakolakana mu dienza dia malu mabi ne malu mapita bubi; eyowa, bavua bonsu bapambuka; bavua buwula ntenta ne mishindu yonsu ya bubi;

18 Kadi bualu Melekisedeke muikala muenzela ditabuija dikola, ne uvua muitaba mudimu wa buakuidi bunena bilondeshila ku mulongu wa tshijila wa Nzambi, wakayisha bantu benda dikudimuna dia mutshima. Ne monayi, bakakudimuna mutshima; ne Melekisedeke wakashikika ditalala mu bulaba mu matuku enda; bua nanku wakabikidibua ne mfumu wa ditalala, bualu uvua mfumu wa mu Salema; ne uvua muikala mfumu kadi muikala ku bukôkeshi bua tatuenda.

19 Mpindiewu, kuvua ba bungi kumpala kuenda, ne kuvua kabidi ba bungi kunyima, kadi muntu nansha umua kavua mupita bunena to; bua nanku, yeya ki udibu nangananga batela.

20 Mpindiewu ntshiena nkengela kuambulula muanda ewu to; bindi muamba bidi bua kuikala bikumbana. Monayi, mifundu ya Nzambi idi kumpala kuenu; nuenu basua kuyikonyangalaja nebikala bua dinyanguka dienu nkayenu.

21 Ne mpindiewu biakenzeka ne pakabambila Alama mêyi â, wakôlola tshianza kudibu ne wakabila ne dîyi dikola, wamba ne: Mpindiewu ki diba dia kukudimuna mutshima, bualu dituku dia lupandu didi disemena pabuipi;

22 Eyowa, ne dîyi dia Mukalenga, ku mukana wa banjelu, didi dibumanyisha ku bisamba bionsu; eyowa, didi dibumanyisha, bua bapeta mukenji mulenga wa disanka dinena; eyowa, ne udi wamba mukenji mulenga ewu munkatshi mua bantu benda bonsu, eyowa, mena kudi badi batangalajibua kula pa mpala wa buloba; bua nanku mukenji mulenga udi mulua kutudi.

23 Ne didi ditumanyisha patoka, bua tuetu kumvua, bua katupambuki to; ne bidi nanku bua kuikala batambakanyi kuetu mu bulaba budi kabuyi bumanyika to; bua nanku, tudi basuibua bikola nanku, bualu tudi ne mukenji mulenga ewu mutuambila mu bitupa bionsu bia budimi buetu bua mvinyo.

24 Bualu monayi, banjelu badi baumanyisha kudi bantu ba bungi diba edi mu bulaba buetu; ne ebi bidi bua kipatshila ka kulongolola mitshima ya bana ba bantu bua kuitaba dîyi dienda diba dia dilua dienda mu butumbi buenda.

25 Ne mpindiewu tudi bindila amu, lumu lua disanka lua dilua dienda luakatumanyisha banjelu ku mukana muabu; bualu diba didi dilua, kadi katuena bamanya pâluadi. Bisankisha Nzambi ne bikala pantshidi ne moyo; kadi nansha bikala katataka anyi kunyima kua lufu luanyi, nensankila mu.

26 Ne nedimanyishibua kudi bantu balulama ne bansantu, ku mukana wa banjelu, diba dia dilua dienda, bua mêyi a batatuetu akumbana, bilondeshila ku bivuabu bamba bimutangila, bivua bilondeshila ku nyuma wa buambi uvua muabu.

27 Ne mpindiewu, bana betu, ndi njinga kumbukila ku ndondu wa mutshima wanyi, eyowa, ne dipampakana dinena tô ne ku dikenga, ne nuteleja mêyi anyi, ne nuimansha mibi yenu, ne kanupumbishi dituku dia dikudimuna dienu dia mutshima to;

28 Kadi ne nudipuekesha kumpala kua Mukalenga, ne nubila dîna dienda dia tshijila, ne nutungunuka kudimuka ne kusambila, bua kanutêtshibu kupita binudi mua kuambula to, ne nanku Nyuma wa Tshijila anulombola, ne nulua badipuekeshi, batudiji, batumikidi, bena ditukija, buwula ne dinanga ne bulekelelu;

29 Ne nuikala ne ditabuija kudi Mukalenga; ne nuikala ne ditekemena bua nupeta moyo wa tshiendelela; ne nuikala diba dionsu ne dinanga dia Nzambi mu mitshima yenu, bua nubandishibua ku dituku dia ndekelu ne nubuela mu dikisha dienda.

30 Ne Mukalenga anupesha dikudimuna dia mitshima, bua kanuluishi tshiji tshienda kunudi to, bua nkanu ya ngena kayinukuatshi panshi to, bua kanukengi lufu luibidi to.

31 Ne Alama wakambila bantu mêyi makuabu mapita bungi, adi kâyi mafundibua mu mukanda ewu to.