1 Ne mpindiewu biakalua ne, katataka pakapeta Amalikia bukalenga wakabanga kupesha mitshima ya Bena Lamana meji bua kuluisha bantu ba Nefi; eyowa, wakasungula bantu bua kuambila Bena Lamana kûlu ku tuleya tuabu bua kuluisha Bena Nefi.

2 Ne nanku wakapesha mitshima yabu meji bua kuluisha Bena Nefi, ki bua bualu kayi ku nshikidilu kua tshidimu tshia dikumi ne tshitema tshia dikôkesha dia balumbuluishi, bualu uvua mukumbaja majinga enda tô ne mpindiewu, eyowa, bualu uvua mubanjibua mfumu ku mutu kua Bena Lamana, wakakeba kabidi bua kukôkesha mu bulaba bonsu, eyowa, ne kudi bantu bonsu bavua mu buloba, Bena Nefi ne Bena Lamana kabidi.

3 Bua nanku uvua mukumbaja dijinga dienda, bualu uvua mupapisha mitshima ya Bena Lamana ne uvua mufofomija meji abu, ne uvua mubasonsola ku tshiji, mua ne uvua musangisha musumba wa bungi pamua bua kuya kuluisha Bena Nefi.

4 Bualu uvua mupangadika, bua bunena bua bungi bua bantu benda, bua kutamba Bena Nefi bukola ne kubabueja mu bupika.

5 Ne nanku wakasungula tupita tunena tua Bena Zolama, bualu bavua bamanya makanda a Bena Nefi bimpa, ne miaba yabu ya tshinyemenu, ne bitupa biteketa menamena bia bimenga biabu; bua nanku wakabasungula bua kuikala tupita tunena ku mutu kua misumba yenda ya basalayi.

6 Ne biakalua ne bakambula tshitudilu tshiabu, ne bakaya batangila ku bulaba bua Zalahemela mu tshipela.

7 Mpindiewu biakalua ne pakapeta Amalikia bukôkeshi nanku ku dibila ne didinga, Moloni, ku luseka lukuabu, uvua muikala ulongolola meji a bantu bua kuikala ne lulamatu kudi Mukalenga Nzambi wabu.

8 Eyowa, uvua muikala ukolesha misumba ya basalayi ya Bena Nefi, ne uvua muikala wimanyikija bisokomenu bikesa, anyi miaba ya tshinyemenu; wela mabula a buloba ku mpenga yonsu bua kukangila misumba yenda ya basalayi munda, ne kabidi muikala wibaka bimanu bia mabua bua kuyinyungulula, ku nyunguluilu ya bimenga biabu ne mikalu ya malaba abu; eyowa, ku mpenga yonsu ya bulaba.

9 Ne mu miaba yabu mikolesha ivua miteketa wakateka bungi bupita bunena bua bantu; ne nanku wakakolesha ne bulaba buvua Bena Nefi basamu ne wakabupesha makanda.

10 Ne nanku uvua muikala ulongolola bua kukuatshisha budishikaminyi buabu, malaba abu, bakaji babu, ne bana babu, ne ditalala diabu, ne bua bikala ne moyo kudi Mukalenga Nzambi wabu, ne bakuba tshivua bena lukuna babu babikila ne kipatshila ka Bena Kilisto.

11 Ne Moloni uvua muntu wa makanda ne bukola; uvua muntu wa ngumvuilu mujima; eyowa, muntu uvua kayi usanka bua dimatshisha dia mashi to; muntu muena anyima uvua usanka bua budishikaminyi ne budikadila bia ditunga dienda, ne bia bana babu ku lukanu ne ku bupika;

12 Eyowa, muntu wa mutshima uvua muwula ne tuasakidila kudi Nzambi, bua diakalengela dia bungi ne mabenesha a bungi akapeshaye bantu benda; muntu wakakuata mudimu bua diakalengela dia bantu benda ne bukubi buabu.

13 Eyowa, ne uvua muntu uvua mukamakana mu ditabuija dia Kilisto, ne uvua muditshipa ne mutshipu bua kusungidila bantu benda, manema enda, ne ditunga dienda, ne ntendelelu wenda, mena ne ku dijimija dia mashi enda.

14 Mpindiewu bavua balongesha Bena Nefi kudisungidila kudi bena lukuna babu, mena ne ku dimatshisha dia mashi pikalabi bikengedibua nanku; eyowa, ne bavua babalongesha kabidi bua kabayobodi nansha, eyowa, ne kabajudi muela wa mvita nansha pa kumbusha bikala bua muena lukuna, pa kumbusha bikala bua kukuba mioyo yabu.

15 Ne ditabuija diabu divua ne, ku dienza dia nanku Nzambi neabalubuluja mu bulaba, anyi mu mêyi makuabu, bikalabu ne lulamatu mu dilama mikenji ya Nzambi neabalubuluja mu bulaba; eyowa, neabadimuisha, anyi bua kudilongolola bua mvita, bilondeshila njiwu wabu;

16 Ne kabidi, ne Nzambi neabamanyisha kuvuabu ne bua kuya bua kudisungidila kudi bena lukuna babu, ne ku dienza dia nanku, Mukalenga neabapatuisha; ne edi divua ditabuija dia Moloni, ne mutshima wenda wakatumbilamu; kabiyi mu dimatshisha dia mashi to kadi mu dienza dia malu mimpa, mu dikuba dia bantu benda, eyowa, mu dilama dia mikenji ya Nzambi, eyowa, ne mu dikolela ku malu mabi.

17 Eyowa, bulelela, bulelela ndi nnuambila ne, bu bantu bonsu bavua bikala, ne bavua, ne nebikalaku, bafuanangana ne Moloni, monayi, makola mina a mu ngena abukudibua bua kashidi; eyowa, diabulu kakuikala ne bukola pa mitshima ya bana ba bantu nansha.

18 Monayi, uvua muntu uvua mufuanangana ne Amona, muana wa baluma wa Mosiya, eyowa, ne mena bana ba baluma bakuabu ba Mosiya, eyowa, ne kabidi Alama ne bana benda ba baluma, bualu bavua bonsu bantu ba Nzambi.

19 Mpindiewu monayi, Helamana ne bana babu kabavua ne dikuatshisha dikesa dishala dia bantu ba Moloni to; bualu bakayisha dîyi dia Nzambi, ne bakatambuisha bantu bonsu bakateleja mêyi abu bua dikudimuna dia mitshima.

20 Ne nanku bakaya kumpala, ne bantu bavua badipuekesha bua mêyi abu, mua ne bavua basuibua bikola kudi Mukalenga, ne nanku kabavua ne mvita ne makokangana munkatshi muabu to, eyowa, mena bua mutantshi wa bidimu binayi.

21 Kadi, bu mumvua muamba, ku nshikidilu kua tshidimu tshia dikumi ne tshitema, eyowa, nansha muvuaku ditalala munkatshi muabu, bakabenzeja, mitshima yabu ibenga, bua kukokangana ne bana babu, Bena Lamana.

22 Eyowa, ne mu tshikosu, mvita yabu ne Bena Lamana kayakajika nansha to bua mutantshi wa bidimu bia bungi, nansha muvua mitshima yabu ibenga bikola.

23 Mpindiewu bakanyingalala bua kuambula biluilu bua kuluisha Bena Lamana, bualu kabavua basanka mu dimatshisha dia mashi to; eyowa, ne ebi kabivua bionsu to—bakanyingalala bua kuikala njila wa kumbusha bana babu ba bungi pa buloba ebu bua kubabueja ku buloba bua tshiendelela, kabayi balongolola kusambakena ne Nzambi wabu to.

24 Nansha nanku, kabavua mua kulekela bua kufila mioyo yabu, bua bakaji babu ne bana babu bashipibua ku lonji ludi lupanga nshidimukilu lua bavua bikala ku kala bana babu, eyowa, ne bavua batapuluka ku ekelezia wabu, ne bavua babashiya ne bavua baya bua kubabutula ku didisangisha kudi Bena Lamana.

25 Eyowa, kabavua mua kuitaba ne bana babu basanka bua mashi a Bena Nefi to, patshivuaku bamua bavua balama mikenji ya Nzambi, bualu dilaya dia Mukalenga divua ne, bialamabu mikenji yenda nebalubuluka mu bulaba.