1 Ne biakalua ne Alama ne Amuleke bakapeta mukenji wa kumbuka mu tshimenga atshi; ne bakumbuka, ne bakalua mena ku bulaba bua Sidoma; ne monayi, bakasanganamu bantu bonsu bavua bumbuka ku bulaba bua Amoniha, bavua bipatshibua ne bashibua mabua, bualu bakitabuija mêyi a Alama.

2 Ne bakabalondela bionsu bivua biakenzekela bakaji babu ne bana babu, ne kabidi bivua bibatangila bobu bina, ne bukola buabu bua didipatuisha.

3 Ne kabidi Zêzeloma uvua mulala mubêdi ku Sidoma, ne mubidi kapia kakola, kavua kaluila ku mpaji minena ya meji enda bua bubi buenda, bualu uvua utshinka ne Alama ne Amuleke kabavuaku kabidi to; ne uvua uvua utshinka ne bakavua babashipa bua malu mabi enda. Ne bubi ebu bunena, ne mibi yenda mikuabu ya bungi yakapandisha meji enda tô ne pakaluawu kumukengesha menamena, ne kavua ne dipatuishibua to; bua nanku wakabanga kôshika ne luya lukola.

4 Mpindiewu, pakumvuaye ne Alama ne Amuleke bavua mu bulaba bua Sidoma, mutshima wenda wakabanga kukola; ne wakabatumina musangu umua mukenji, ujinga bua balua kudiye.

5 Ne biakalua ne bakalua musangu umua, batumikila mukenji uvuaye mubatumina; ne bakabuela mu nzubu kudi Zêzeloma; ne bakamusangana pa bulalu buenda, mubêdi, muikala muteketa bikola ne mubidi kapia kakola; ne meji enda avua akenga menamena bua malu mabi enda; ne pakabamonaye wakôlola tshianza tshienda, ne wakabasengelela ne bamôndopa.

6 Ne biakalua ne Alama wakamukuata ku tshianza, ne wakamuambila ne: Udi witabuija bukola bua Kilisto bua lupandu anyi?

7 Ne wakandamuna ne wakamba ne: Eyowa, ndi ngitabuija miaku yonsu iwudi mulongesha.

8 Ne Alama wakamba ne: Wewa muitabuija disungila bua Kilisto udi mua kôndopibua.

9 Ne wakamba ne: Eyowa, ndi ngitabuija bilondeshila ku mêyi eba.

10 Ne pashisha Alama wakabila kudi Mukalenga, wamba ne: Ô Mukalenga Nzambi wetu, fuila muntu ewu lusa, ne môndopa bilondeshila ku ditabuija dienda didi mu Kilisto.

11 Ne pakamba Alama mêyi â, Zêzeloma wakatumpika ne wakimana pa makasa enda, ne wakabanga kuenda; ne biakakemesha bantu bonsu bikola; ne dimanya dia ebu luakaya mu bulaba bonsu bua Sidoma.

12 Ne Alama wakatambuisha Zêzeloma bua Mukalenga; ne wakabanga katshia ku tshikondu atshi kuyisha bantu.

13 Ne Alama wakashikika ekelezia mu bulaba bua Sidoma, ne wakajidila bakuidi ne balongeshi mu bulaba, bua kutambuishabu bonsu bavua bajinga kutambuishibua bua Mukalenga.

14 Ne biakalua ne bavua ba bungi; bualu bakapatuka lubilu ku bitupa bia ku mpenga ya Sidoma yonsu, ne bakatambuishibua.

15 Kadi bitangila bantu bavua mu bulaba bua Amoniha, batshivua bashala bantu ba mitshima mipapa ne ba nshingu mîminyina; ne kabakakudimuna mutshima ku mibi yabu to, bamba ne bukôkeshi bonsu bua Alama ne Amuleke budi buikala bua diabulu; bualu bavua bena ditabuija dia Neholo, ne kaba kitabuija dikudimuna dia mutshima ku mibi yabu to.

16 Ne biakalua ne Alama ne Amuleke, bualu Amuleke uvua mulekela ngolo yenda, ne mpalata yenda, ne bintu bienda bia mushinga mukola, bivua mu bulaba bua Amoniha, bua dîyi dia Nzambi, bualu bavua bamubenga kudi bavua musangu mukuabu bikala balunda benda ne kabidi kudi tatuenda ne malela enda;

17 Bua nanku, kunyima kua Alama mushikika ekelezia mu Sidoma, wakamona dishintuluka dinena, eyowa, wakamona ne bantu bavua bashintuluka bitangila diditambisha divua mu mitshima yabu, ne bakabanga kudipuekesha kumpala kua Nzambi, ne bakatuadija kudisangisha pamua ku bitendelelu biabu bua kutendelela Nzambi kumpala kua tshiôshelu, bikala batungunuka kudimuka ne kusambila, bua kupatuishibuabu kudi Satana, ne kudi lufu, ne kudi dinyanguka—

18 Mpindiewu bu mumvua muamba, kunyima kua Alama mumona bintu bionsu ebi, mpindiewu wakangata Amuleke ne wakalua ku bulaba bua Zalahemela, ne wakaya nenda kuenda, ne wakamukuatshisha mu mpaji yenda, ne wakamukolesha mu mushindu wa Mukalenga.

19 Ne ki muakajika tshidimu tshia dikumi tshia dikôkesha dia balumbuluishi pa mutu pa bantu ba Nefi nanku.