1 Biakalua ne pakamanya Bena Lamana bavua baya kuluisha Bena Nefi, kunyima kua kuluangana kua bungi bua kubabutula, ne bivua tshianana bua kukeba dibutuka diabu, bakapingana ku bulaba bua Nefi.

2 Ne biakalua ne Bena Amaleki, bakafîka tshiji menamena bua dijimija diabu. Ne pakamonabu ne kabavua mua kudisombuela kudi Bena Nefi to, bakabanga kusonsola bantu ku tshiji kudi bana babu, bantu ba Anti-Nefi-Lehi; bua nanku bakabanga kabidi kubashipa.

3 Mpindiewu bantu aba bakabenga kabidi bua kuangata biluilu biabu, ne bakadilekela ne bashipibua bilondeshila ku majinga a bena lukuna babu.

4 Mpindiewu pakamona Amona ne bana babu mudimu ewu wa dishipa munkatshi mua bavua babananga bikola kupita—bualu bavua bangata bu banjelu batumibua kudi Nzambi bua kubapandisha ku dinyanguka dia kashidi—bua nanku, pakamona Amona ne bana babu mudimu ewu munena wa dishipa, bakanyungushibua ne moyo wa lusa, ne bakambila mfumu ne:

5 Tusangishayi bantu ba Mukalenga aba pamua, ne tupuekayi ku bulaba bua Zalahemela kudi bana betu Bena Nefi, ne tunyemayi ku bianza bia bena lukuna netu, bua katubutuki to.

6 Kadi mfumu wakabambila ne: Monayi, Bena Nefi nebatubutula, bua dishipa dia bantu ne mibi ya bungi bituvua babenzela.

7 Ne Amona wakamba ne: Nenya ne nengebeja Mukalenga, ne pikalaye mutuambila bua kupueka kudi bana betu, nenuye anyi?

8 Ne mfumu wakamuambila ne: Eyowa, pikala Mukalenga muamba ne ndayi, netupueka kudi bana betu, ne netuikala bapika babu tô ne patuabakajila dishipa dia bantu ne mibi bia bungi bituvua babenzela.

9 Kadi Amona wakamuambila: Bidi bibengishibua mu mikenji ya bana betu, ivua mishindamijibua kudi tatuanyi, ne kakuikadi bapika munkatshi muabu to; bua nanku lekelayi tupueka ne tueyemena ku lusa lua bana betu.

10 Kadi mfumu wakamuambila: Ebeja Mukalenga, ne pikalaye mutuambila ne ndayi, netuye; tshianana netufua mu bulaba ebu.

11 Ne biakalua ne Amona wakaya ne wakebeja Mukalenga, ne Mukalenga wakamuambila ne:

12 Patula bantu aba mu bulaba ebu, bua kabafu to; bualu Satana udi mukuata mitshima ya Bena Amaleki bikola, badi basonsola Bena Lamana ku tshiji kudi bana babu bua kubashipa; bua nanku patuka mu bulaba ebu; ne bantu aba mu tshikondu etshi badi babeneshibua, bualu nembakuba.

13 Ne mpindiewu biakalua ne wakaya ne wakambila mfumu mêyi onsu avua Mukalenga mumuambila.

14 Ne bakasangisha bantu babu bonsu pamua, eyowa, bantu ba Mukalenga bonsu, ne bakasangisha bisumbu bia bimuna bikesa ne binena biabu bionsu, ne bakumbuka mu bulaba, ne bakalua mu tshipela tshivua tshiabuluja bulaba bua Nefi ku bulaba bua Zalahemela, ne bakalua pabuipi ne ku mikalu ya bulaba.

15 Ne biakalua ne Amona wakabambila ne: Monayi, mema ne bana betu netuye ku bulaba bua Zalahemela, ne nenushala apa tô ne patuapingana; ne netutêta mitshima ya bana betu, ne badi basua ne tulua mu bulaba buabu.

16 Ne biakalua ne pavua Amona uya ku bulaba, yeya ne bana babu bakasambakena ne Alama, pa muaba muamba; ne monayi, tshivua disambakena dia disanka.

17 Mpindiewu disanka dia Amona divua dipita bunena mena bualu uvua muwula ntenta ndi disanka; eyowa, uvua mudînyibua mu disanka dia Nzambi wenda, mena tô ne ku dijikija dia bukola buenda; ne wakapona kabidi panshi.

18 Mpindiewu edi kadivua disanka dipita anyi? Monayi, edi didi disanka didi muntu nansha umua kayi mua kupeta to, amu pa kumbusha ewu udi mukudimuna mutshima bulelela ne mudipuekeshi udi ukeba diakalenga.

19 Mpindiewu disanka dia Alama bua kusambakena ne bana babu divua bulelela dinena, ne disanka dia Alona kabidi, dia Omenele, ne Himini; kadi monayi disanka diabu kadivua bu dia kupita bukola buabu to.

20 Ne mpindiewu biakalua ne Alama wakalombola bana babu ku bulaba bua Zalahemela; mena ku nzubu wenda nkayenda. Ne bakaya ne bakambila mulumbuluishi munena bintu bionsu bivua bibenzekela mu bulaba bua Nefi, munkatshi mua bana babu, Bena Lamana.

21 Ne biakalua ne mulumbuluishi munena wakatuma dimanyisha mu bulaba bonsu, ujinga kumanya dîyi dia bantu bitangila diakidila dia bana babu, bavua bikala bantu ba Anti-Nefi-Lehi.

22 Ne biakalua ne dîyi dia bantu diakalua, diamba ne: Monayi, netulekela bulaba bua Yeleshona, adi ku esete pêpi ne mbuwa, adi makuatangana ne bulaba bua Buvula, adi ku sude kua bulaba bua Buvula; ne bulaba bua Yeleshona ebu budi bulaba butuapesha bana betu bua bupianyi.

23 Ne monayi, netuteka misumba yetu ya basalayi pankatshi pa bulaba bua Yeleshona ne bulaba bua Nefi, bua tukuba bana betu ku bena lukuna babu mu bulaba bua Yeleshona; ne tudi tuenza nanku bua bana betu, bua bôwa buabu bua kuambuila bana babu biluilu ne kabalu kuenza mibi to; ne bôwa buabu bunena ebu buakalua bua dikudimuna dia mutshima dikola divuabu nadi, bua mashipeyangana a bungi abu ne bubi bukola bua tshingishu.

24 Ne mpindiewu monayi, netuenzela bana betu nanku awu, bua ne bapiana bulaba bua Yeleshona; ne netubalama ne misumba yetu ya basalayi kudi bena lukuna babu, pikalabu batupesha tshitupa tshia bintu biabu bua kutuambuluisha bua tukuatshisha misumba yetu ya basalayi.

25 Mpindiewu, biakalua ne pakumvua Amona nanku, wakapingana kudi bantu ba Anti-Nefi-Lehi, ne Alama kabidi nenda, mu tshipela, tshivuabu bâsa ntenta yabu, ne wakabamanyisha bintu bionsu ebi. Ne Alama wakabalondela penda dikudimuna moyo dienda, pamua ne Amona ne Alona, ne bana babu.

26 Ne biakalua ne abi biakabatuadila disanka dinena munkatshi muabu. Ne bakapueka ku bulaba bua Yeleshona, ne bakangata bulaba bua Yeleshona; ne Bena Nefi bakabinyika ne bantu ba Amona; bua nanku bavua basunguludibua ku dîna adi matuku onsu akalonda.

27 Ne bavua munkatshi mua bantu ba Nefi, ne kabidi bababala munkatshi mua bantu bavua mu ekelezia wa Nzambi. Ne bavua basunguludibua kabidi ku lukunukunu luabu kudi Nzambi, ne kudi bantu kabidi; bualu bavua balelela ne balulama ne bujima mu bintu bionsu; ne bavua bikala bakamakana mu ditabuija dia Kilisto tô ne ku ndekelu.

28 Ne bakatangila dimatshisha dia mashi a bana babu ne lukuna lupita bukola; ne kabavua mua kusuishibua bua kuambula biluilu bua kuluishabu bana babu nansha; ne kabakatshina nansha lufu ne tshipimu tshia ditshina to, bua ditekemena diabu ne muenenu yabu bitangila Kilisto ne dibika dia ku lufu; bua nanku, lufu luakadînyibua buabu kudi butshimunyi bua Kilisto pa mutu palu.

29 Bua nanku, bavua bua kukenga lufu lua mushindu mukola ne wa dikenga dipita uvua bana babu mua kubafuisha, kumpala kua kuangatabu muela wa mvita anyi kela ka mvita bua kubatûtabu.

30 Ne nanku, bavua bena dikima ne bantu banangibua, bantu basuibua bikola kudi Mukalenga.