1 Ne mona, mpindiewu biakalua ne kipatshila ketu kavua kalonda kavua ka kuangata tshimenga tshia Manti; kadi mona, kakuvua mushindu nansha umua utuvua mua kubapatuisha mu tshimenga ne bisumbu bietu bikesa to. Bualu mona, bakavuluka bituvua benza tô ne mpindiewu; bua nanku katuvua mua kubalobesha bua kubapatuisha ku miaba yabu mikolesha to.

2 Ne bavua ba bungi bikola kupita musumba wetu wa basalayi katuakakima kuya ne kubabundila mu miaba yabu mikolesha to.

3 Eyowa, ne biakakengedibua ne tuenzela bantu betu bua kukuba bitupa bia bulaba bituvua bangatulula kutuvua malaba etu; bua nanku biakakengedibua ne tuindila, bua tupeta makanda makuabu avua afumina ku bulaba bua Zalahemela ne biakudia bikuabu.

4 Ne biakalua ne nanku ngakatuma bantu kudi ngovena wa mu bulaba, bua kumumanyisha bivua bitangila malu a bantu betu. Ne biakalua ne tuakindila bua kupeta biakudia ne makanda bua kufumina ku bulaba bua Zalahemela.

5 Kadi mona, ebi bivua bitupesha tshipeta tshimpa tshikesa; bualu Bena Lamana bavua bapeta pabu makanda a bungi ku dituku ne ku dituku, ne biakudia bia bungi kabidi; ne ki muvua malu etu mu tshikondu tshia diba etshi nanku.

6 Ne Bena Lamana bavua balopoka ku tshikondu ne tshikondu bua kutubunda, ne bakapangadika bulongolodi bua batubutula; nansha nanku katuvua mua kuya kubaluisha to, bua miaba yabu ya kunyemena ne miaba yabu mikolesha.

7 Ne biakalua ne tuakindila mu malu makola â bua mutantshi wa ngondu ya bungi, mena tô ne patuvua pabuipi ne kufua bua dipanga dia biakudia.

8 Kadi biakalua ne tuakapeta biakudia, bivua bilamibua kudi musumba wa basalayi binunu bibidi bua diambuluisha dietu; ne edi didi diambuluisha dionsu ditua kapeta, bua kudiluangena ne kuluangena ditunga dietu ku dipona mu bianza bia bena lukuna betu, eyowa, bua kukokangana ne muena lukuna uvua bungi kabuyi kubala to.

9 Mpindiewu tshiena bualu tshia bundu buetu ebu, anyi tshiena bualu tshivuabu kabayi batutumina makanda mapita to, katuvua batshimanya to; bua nanku tuvua ne dibungama ne tuvua kabidi buwula ne bôwa, ne mu mushindu mukuabu bitungu bia Nzambi kabilu kulua pa bulaba buetu, bua ditonkoka dietu ne dibutuka dijima dietu.

10 Bua nanku tuakalomba kudi Nzambi ne anyima yetu mijima mu disambila, bua atukolesha ne atupatuisha mu bianza bia bena lukuna betu, eyowa, ne atupesha kabidi makanda bua tulama bimenga bietu, ne malaba etu, ne bintu bietu, bua dikuatshisha dia bantu betu.

11 Eyowa, ne biakalua ne Mukalenga Nzambi wetu wakatukumbula ne dijadika ne neatupatuisha; eyowa, mua ne wakambila anyima yetu mêyi a ditalala, ne wakatupesha ditabuija dinena, ne wakatuenzeja ne tutekemena bua dipatuisha dietu kudiye.

12 Ne tuakapeta dikima bua tshisumbu tshikesa tshia basalayi tshituvua bapeta, ne tuvua bakankamana ne dipangadika dia kutshimuna bena lukuna betu, ne dia kukuba malaba etu, ne bintu bietu, ne bakaji betu, ne bana betu, ne tshiena bualu tshia budishikaminyi buetu.

13 Ne tuakaya nanku ne bukola buetu bonsu bua kubunda Bena Lamana, bavua mu tshimenga tshia Manti; ne tuakâsa ntenta yetu pabuipi ne ku luseka lua tshipela, tshivua pabuipi ne tshimenga.

14 Ne biakalua ne pakatshiabu, ne pakamona Bena Lamana ne tuvua ku mikalu pabuipi ne tshipela tshivua pabuipi ne tshimenga, ne bakatuma batentekedi ku mpenga yetu yonsu bua bajandula bungi ne makanda bia musumba wetu wa basalayi.

15 Ne biakalua ne pakamonabu ne katuvua ne makanda to, bitangila bungi buetu, ne bualu bakatshina ne netubakosa njila uvuabu bapetela dikuatshisha diabu pa kumbusha bobu balua kutuluisha ne kutushipa, ne bakatshinka kabidi ne bavua mua kutubutula ne misumba yabu ya bungi kakuyi lutatu to, bua nanku bakabanga nanku kudilongolola bua kulua kutuluisha mvita.

16 Ne patuakamona ne bavua badilongolola bua kulua kutubunda, mona, ngakenzeja ne Gidi asokoma mu tshipela ne bungi bukesa bua bantu, ne kabidi Teomenele ne bungi bukesa bua bantu basokoma pabu mu tshipela.

17 Mpindiewu Gidi ne bantu benda bavua ku dia baluma ne bakuabu ku dia bakaji; ne pakadisokokabu nanku, mona, ngakashala, ne tshishadi tshia musumba wanyi wa basalayi, ku muaba wa momumua utuvua bâsa ntenta yetu kumpala bua tshikondu tshivua Bena Lamana bapatuka bua kuluangana.

18 Ne biakalua ne Bena Lamana bakapatuka ne musumba wabu wa basalayi ba bungi. Ne pakaluabu ne pavuabu pabuipi ne kudiela kutudi ne muela wa mvita, ngakenzeja ne bantu banyi, bavua nanyi abu, bapingana kunyima mu tshipela.

19 Ne biakalua ne Bena Lamana bakatulondakaja ne lukasa lukola, bualu bavua ne dijinga dikola dia kutukuata bua kutushipa; bua nanku bakatulonda mu tshipela; ne tuakapitshila pankatshi pa Gidi ne Teomenele, mua ne kabavua kubajandula kudi Bena Lamana to.

20 Ne biakalua ne pavua Bena Lamana bapita, anyi pavua musumba wa basalayi mupita, Gidi ne Teomenele bakapatuka ku miaba yabu ya musokoku, ne bakakosa batentekedi ba Bena Lamana njila bua kabapinganyi ku tshimenga to.

21 Ne biakalua ne pakabakosabu njila, bakanyemena ku tshimenga ne bakadiela kudi balami bavuabu bashiya bua kulama tshimenga, mua ne bakabashipa ne bakangata tshimenga.

22 Mpindiewu biakenzeka nanku bualu Bena Lamana bakalekela ne musumba wabu wa basalayi mujima apambuishibua, pa kumbusha amu balami bakesa, mu tshipela.

23 Ne biakalua ne Gidi ne Teomenele bakangata ku mushindu ewu miaba yabu mikolesha. Ne biakalua ne kunyima kua bamana kuenda bikola mu tshipela, tuakangata njila wetu batangila ku bulaba bua Zalahemela.

24 Ne pakamona Bena Lamana ne bavua baya batangila ku bulaba bua Zalahemela, bakumvua bôwa menamena, ne kakulu kuikala dilongolola dilongolodibua bua kubalombola ku dibutuka; bua nanku bakabanga kupingana kunyima kabidi mu tshipela, eyowa, mena bapinganyina ku njila uvuabu baluila.

25 Ne mona, butuku buakila, ne bakâsa ntenta yabu, bualu tupita tunena tua Bena Lamana bavua batshinka ne Bena Nefi batshioka bua luendu luabu; ne bualu Bena Lamana bavua batshinka ne bavua banyemesha musumba wabu wa basalayi mujima, bua nanku kabakela meji bitangila tshimenga tshia Manti to.

26 Mpindiewu biakalua ne pakila butuku, ngakenzeja ne bantu banyi kabaladi to, kadi ne benda kumpala ku njila mukuabu batangila ku bulaba bua Manti.

27 Ne bua luendu luetu munda nkulu, mona, pakatshiabu tuvua bapita muaba uvua Bena Lamana bikala, mua ne tuakafika kumpala kuabu ku tshimenga tshia Manti.

28 Ne nanku biakalua ne, ku bulongolodi buetu ebu tuakangata tshimenga tshia Manti kakuyi dimatshisha dia mashi to.

29 Ne biakalua ne pakafika misumba ya basalayi ya Bena Lamana pabuipi ne tshimenga, ne pakamonabu tuvua badilongolola bua kutuilangana nabu, bakakema menamena ne bôwa bukola bua kabakuata, mu mushindu wa ne bakanyemena mu tshipela.

30 Eyowa, ne biakalua ne misumba ya basalayi ya Bena Lamana yakanyema tshitupa tshia bulaba tshionsu etshi. Kadi mona, bavua baya ne bakaji ne bana ba bungi pambelu pa bulaba.

31 Ne bimenga abi bivua Bena Lamana bangata, bionsu biabi bidi mu tshikondu tshia diba edi ku bukôkeshi buetu; ne batatuetu ne bantu bakaji betu ne bana betu badi bapingana ku nzubu yabu, bonsu amu pa kumbusha bavuabu bakuata bena lukanu ne bavua Bena Lamana baya nabu abu.

32 Kadi mona, misumba yetu ya basalayi idi mikesa bua kukuba bula ne bimenga bipita bungi ne malaba a bungi.

33 Kadi mona, tudi batekemena kudi Nzambi wetu uvua mutupesha butshimunyi mu malaba awu, mua ne tuakapeta bimenga abi ne malaba awu, avua mikala etu nkayetu.

34 Mpindiewu katuena bamanya tshiena bualu tshidi bantu badi mu bukalenga kabayi batupesha makanda makuabu to; anyi bantu bavua balua kutudi abu kabena bamanya bua tshinyi katuena bapeta makanda makuabu to.

35 Mona, katuena bamanya ne nudi bapangila, ne nudi bakoka bisumbu bia basalayi ku tshitupa tshia bulaba atshi; ne bidi nanku, katuena tujinga kunungana to.

36 Ne padibi kabiyi nanku to, mona, tudi tutshina ne kudi ditapulukangana munkatshi mua bantu badi mu bukalenga, bua ne kabena batutumina bantu ba bungi bua kutuambuluisha to; bualu tudi bamanya ne badi ba bungi kupita badibu batutumina.

37 Kadi mona, kabiena ne bualu to—tudi tutekemena ne Nzambi neatupatuisha, nansha bua buteketa bua misumba yetu ya basalayi, eyowa, ne neatupatuisha mu bianza bia bena lukuna betu.

38 Mona, etshi tshidimu tshia makumi abidi ne tshia tshitema, ku nshikidilu, ne tudi ne bukokeshi ku malaba etu; ne Bena Lamana badi banyema ku bulaba bua Nefi.

39 Ne bana ba baluma ba bantu ba Amona abu, bandi mutumbisha bikola abu, badi nanyi mu tshimenga tshia Manti; ne Mukalenga udi mubakuatshisha, eyowa, ne udi mubalama bua kabaponyi ku muela wa mvita to, mua ne muntu nansha muntu umua kena mushipibua to.

40 Kadi mona, badi batapika mputa ya bungi; nansha nanku badi bakankamana mu budishikaminyi abu buakabafikisha Nzambi badikadila; ne badi bavuluka Mukalenga Nzambi wabu ne bushuwa menamena ku dituku ne ku dituku; eyowa, badi batangila bua kulama mikandu yenda, ne mêyi enda, ne mikenji yenda diba dionsu; ne ditabuija diabu dia mambi bua bidi bitangila malu atshilualua didi dikola.

41 Ne mpindiewu, muanetu wa baluma munanga, Moloni, Mukalenga Nzambi wetu, uvua mutusungila ne uvua mutuenza badikadila, akulama diba dionsu kumpala kuenda; eyowa, ne atûtshisha bantu aba dikasa dimpa, mena bua nukumbana mua kupeta bukôkeshi ku bionsu bivua Bena Lamana batunyenga, bivua bikala bua dikuatshisha dietu. Ne mpindiewu, mona, ngajikiji mukanda wanyi. Ndi Helamana, muana wa baluma wa Alama.