Mukanda wa Yaloma

1 Mpindiewu monayi, mema, Yaloma, ndi mfunda miaku mikesa bilondeshila ku mukenji wa tatuanyi, Enosha, bua ne bulondanganyi bua bankambua betu buikala bufunda.

2 Ne bu mudi bitata ebi bikala bikesa, ne bu mudi bintu ebi bifunda bua dijinga dia diakalenga dia bana betu Bena Lamana, bua nanku, ndi ne tshia mfunda kakesa; kadi ntshiakufunda bintu bia buambi ku Nyuma kuanyi to, anyi bia mabuluila anyi to. Bualu tshinyi tshindi bua kufunda kupita bivua batatuanyi bafunda? Bualu kabavua babuluila dilongolola dia lupandu anyi? Ndi nnuambila, Eyowa; ne ebi mbikumbanyina.

3 Monayi, bidi bikengedibua bua bia bungi bienzeka munkatshi mua bantu aba, bualu bua bupapa bua mitshima yabu, ne bua dipata dia matshi abu, ne bua bumpofu bua meji abu, ne bua dîminyina dia nshingu yabu; nansha nanku, Nzambi udi ne lusa lupita kudibu, ne kena muanji kubakomba pa mpala wa bulaba to.

4 Ne kudi ba bungi munkatshi muetu badi ne mabuluila a bungi, bualu kabena bonsu ne nshingu mîminyina to. Ne bonsu buabu badi kabayi ne nshingu mîminyina ne badi ne ditabuija, badi mu bobumua ne Nyuma wa Tshijila, udi ujandula kudi bana ba bantu bilondeshila ditabuija diabu.

5 Ne mpindiewu, monayi, bidimu nkama ibidi bikavu bipita, ne bantu ba Nefi bavua bakolakana mu bulaba. Bavua batangila bua kulama mikenji ya Mose ne kujidila dituku dia sabata kudi Mukalenga. Ne kabavua banyanga tshijila; anyi bapenda Nzambi. Ne mikenji ya bulaba ivua mikola menamena.

6 Ne bavua batangalaka mu tshitupa tshinena tshia pa mpala wa bulaba, ne Bena Lamana pabu. Ne bavua bapita bungi kupita muvua Bena Nefi; ne bavua bananga dishipangana ne basua kunua mashi a nyama.

7 Ne biakalua ne bakalua misangu ya bungi kutubunda tuetu, Bena Nefi, bua kuluangana. Kadi bamfumu betu ne balombodi betu bavua bantu bakola mu ditabuija dia Mukalenga; ne bavua balongesha bantu njila ya Mukalenga; bua nanku, tuakakandamena Bena Lamana ne tua kabapatula kula pambelu pa malaba etu, ne tua katuadija kukolesha bimenga bietu, anyi muaba onsu wa bupianyi buetu.

8 Ne tuakavulangana menamena, ne tuakatangalaka pa mpala wa bulaba, ne tuakalua babanji menamena ku ngolo, ne ku mpalata, ne ku bintu bia mushinga mukola, ne mu tshikosu mudimu muimpa wa bantu wa ku bianza wa mabaya, ku nzubu minena, ne ku bikuatshidi bia mudimu, ne kabidi ku biamua bifika ne biamua bia kabanda, ne biamua bia kalabi ne biamua bikolesha, tuenza mishindu yonsu ya biamua bia mudimu bia mushindu onsu bua kudima buloba, ne biluilu bia mvita—eyowa, muketa mutua ku lusongu, ne musaka wa miketa, ne muketa wa dala, ne difuma, ne bulongolodi bonsu bua mvita.

9 Ne badilongolola nanku bua kutuluingana ne Bena Lamana, kabavua batutamba to. Kadi muaku wa Mukalenga wakajadikibua, uvuaye muambila batatuetu wamba: Monsu munualama mikenji yanyi nenulubuluka mu bulaba.

10 Ne biakalua ne bambi ba Mukalenga bakadimuisha bantu ba Nefi, bilondeshila ku dîyi dia Nzambi, ne bobu kabayi balama mikenji to, kadi bapona mu disambuka mikenji, bavua babutuka pa mpala wa bulaba.

11 Bua nanku, bambi, ne bakuidi, ne balongeshi, bakenza mudimu ne dinanukila, basengelela bantu ne bulekelelu bonsu ku dinanukila; mu dilongesha mikenji ya Mose, ne kipatshila kavuayi mifidila; mu dibitabujija dindila dia Mashiya ne kumuitabuja ne nealua bu ukavua mumana kulua. Ne ki mu mushindu ewu uvuabu babalongesha.

12 Ne biakalua ne ku dienza nanku bakabapandisha ku dibutuka pa mpala wa bulaba; bualu bavua bakabatua mu mitshima ne muaku, babasonsola misangu yonsu ku dikudimuna mutshima.

13 Ne biakalua ne bidimu nkama ibidi ne makumi asatu ne muanda mukulu biakapita—ku mushindu wa mvita, ne makokangana, ne matapuluka, bua mutantshi munena wa tshikondu etshi.

14 Ne mema, Yaloma, ntshiena mfunda kupita to, bualu bitata bidi bikesa. Kadi monayi, bana betu, nudi mua kuya ku bitata bikuabu bia Nefi; bualu monayi, munda muabi mudi mukanunyibua miandiku ya mvita yetu, bilondeshila ku mifundu ya bamfumu, anyi yakafundishishabu.

15 Ne ndi mfila bitata ebi mu bianza bia muananyi Omoni, bua bikala bilama bilondeshila mikenji ya batatuanyi.