Bimanyika mu bisamba bionsu, bisa bionsu, miakulu yonsu, ne bantu bonsu, kuafikila mudimu ewu: Ne tuetu, ku ngâsa wa Nzambi Tatu, ne Mukalenga wetu Yezu Kilisto, tuamonyi bitata bidi bikala ne miandiku eyi, miandiku idi ya bantu ba Nefi, ne kabidi a Bena Lamana, bana babu, ne kabidi a bantu ba Yalede, avuila ku kaleya kavua kakudibua. Ne tudi kabidi bamanya ne avua miandamunyibua ku dipa ne bukola bua Nzambi, bualu dîyi dienda didi dimanyisha nanku kutudi; bua nanku tudi bamanya bua bushuwa ne mudimu ewu udi mulelela. Ne tudi kabidi tujadika ne tuamonyi mikanunu idi pa mutu pa bitata; ne ivua milejibua kutudi ku bukola bua Nzambi, kadi kudi muntu to. Ne tudi tumanyisha ne miaku ya bushindama, ne muanjelu wa Nzambi wakapueka kumbukila mu diûlu, ne kutuala ne kuteka ku mesu etu, ne tuakatangila ne kumona bitata, ne mikanunu pa mutu apu; ne tudi bamanya ne ku ngâsa wa Nzambi Tatu, ne wa Mukalenga wetu Yezu Kilisto, tuakamona ne tudi tujadika ne malu â adi malelela. Ne bidi bia dikema ku mesu etu. Nansha nanku, dîyi dia Mukalenga diakatupesha mukenji ne tudi tubijadika; bua nanku, bua kuikala batumikidi ku mikenji ya Nzambi, tudi tuamba bujadiki bua bintu ebi. Ne tudi bamanya ne bituikala ne lulamatu mu Kilisto, tukupula mashi a bantu bonsu ku bilamba bietu, ne tusanganyibua katuyi ne katoba to kumpala kua nkuasa wa tshilumbuluilu wa Kilisto, ne tusomba nenda tshiendelela mu diûlu. Ne lumu luikala kudi Tatu, ne kudi Muana, ne kudi Nyuma wa Tshijila, badi Nzambi umua. Amena.