1 Mêyi a Yakoba, muanabu ne Nefi wa baluma, avuaye muakula kudi bantu ba Nefi:

2 Monayi, bana betu bananga, mema, Yakoba, muikala mubikidibua kudi Nzambi, ne mujididibua ku mushindu wa mulongu wenda wa tshijila, ne muikala mujididibua kudi muanetu wa baluma Nefi, unudi nutangidila bu mfumu anyi mukubi, ne unudi nueyemena bua bukubi, monayi nudi bamanya ne ndi muakula malu a bungi menamena kunudi.

3 Nansha nanku, ndi ngakula kunudi kabidi; bualu ndi njinga diakalenga dia anyima yenu. Eyowa, dipampakana dianyi didi dikola buenu; ne nuenu nkayenu nudi bamanya ne ditu amu dikala nanku. Bualu ndi munukankamija ne dinanukila dionsu; ne ndi munulongesha mêyi a tatuanyi; ne ndi muakula kunudi bitangila malu onsu adi mafundibua, katshia ku bufuki bua buloba.

4 Ne mpindiewu, monayi, ndi musua kuakula kunudi bitangila malu adiku, ne ne atshilualua; bua nanku, nennubadila mêyi a Yeshaya. Ne adi mêyi adi muanetu wa baluma mujinga ne ngakula kunudi. Ne ndi ngakula kunudi bua bimpa bienu, bua numanya ne nutumbisha dîna dia Nzambi wenu.

5 Ne mpindiewu, miaku ingabala idi ivua Yeshaya muakula bitangila nzubu wa Isalele yonsu; bua nanku, adi mua kuenzela kunudi, bualu nudi ba mu nzubu wa Isalele. Ne kudi malu a bungi adi mikala makudibua kudi Yeshaya adi mua kuenzela kunudi, bualu nudi bena mu nzubu wa Isalele.

6 Ne mpindiewu, â ki mêyi: Nanku Mukalenga Nzambi udi wamba: Monayi, nembandula tshianza tshianyi bua bena bisamba bia benda, ne nengâsa dibendela dianyi bua bantu; ne nebalua ne bana beba ba baluma mu maboku abu, ne bana beba ba bakaji ne bambudibua pa makaya abu.

7 Ne bakalenga nebikala batatueba badishi, ne bakalenga bakaji babu bamamueba badishi; ne nebakuinamina ne mpala yabu mitua pa buloba, ne nebalaka lupuishi lua ku makasa eba; ne neumanya ne ndi Mukalenga; bualu badi bangindila kabakufua bundu to.

8 Ne mpindiewu mema, Yakoba, ndi musua kuakula kakesa bitangila mêyi â. Bualu monayi, Mukalenga mmundeja ne bavua ku Yelushalema, kutudi bafuma, bavua bashipibua ne bambudibua bakuatshibu.

9 Nansha nanku, Mukalenga udi mundeja ne nebapingana kabidi. Ne udi mundeja kabidi ne Mukalenga Nzambi, Wa Tshijila wa Isalele, neadimuenesha kudibu mu musunyi; ne kunyima kua mudimuenesha, nebamukuma mfimbu ne nebamutshiamakaja, bilondeshila ku mêyi a muanjelu uvua mubiakula kundi.

10 Ne kunyima kua bobu bapapishila Wa Tshijila wa Isalele mitshima yabu ne bamuiminyishila nshingu yabu, monayi, bitungu bia Wa Tshijila wa Isalele nebilua pa mutu pabu. Ne dituku dilualua diatûtshibuabu ne diatatshishibuabu.

11 Pa nanku, kunyima kua basakibua eku ne eku, bualu muanjelu udi wamba nanku, ba bungi nebatatshishibua mu musunyi, ne kabakulekedibua ne bafua to, bua bualu bua masambila a bakana; ne nebatangalajibua, ne batûtshibua, ne bakinyibua; nansha nanku, Mukalenga neikala ne lusa kudibu, bua ne pâluabu ku dimanya dia Musungidi wabu, nebasangishibua pamua kabidi mu malaba a bupianyi buabu.

12 Ne babeneshibua bobu Bena Bisamba bia Benda, bobu badi muambi mufunda buabu; bualu monayi, bikalabi ne nebakudimuna mutshima ne kabakuluisha Siona mvita to, ne kabakudisangisha ku ekelezia munena ne wa bubi awu to, nebapandishibua; bualu Mukalenga Nzambi neakumbaja bipungidi bienda bivuaye muenza kudi bana benda; ne bua bualu ebu muambi udi mufunda malu â.

13 Pananku, badi baluisha Siona ne bantu ba tshipungidi ba Mukalenga nebalaka lupuishi lua ku makasa abu; ne bantu ba Mukalenga kabakufua bundu to. Bualu bantu ba Mukalenga badi badi bamuindila; bualu batshidi bindila dilua dia Mashiya.

14 Ne monayi, bilondeshila ku mêyi a muambi, Mashiya neaditeka kabidi musangu muibidi bua kubangatulula; bua nanku, neadimuenesha kudibu mu bukola ne butumbi bunena, ku dibutula dia bena lukuna babu, pâlua dituku adi diamuitabuijabu; ne kakubutula nansha umua udi umuitabuija to.

15 Ne badi kabayi bamuitabuija to nebabutuka, bubidi ku kapia, ne ku tshipepela, ne ku manyungana a buloba, ne ku dimatshisha dia mashi dia bungi, ne ku tshipupu, ne ku tshiyola. Ne nebamanya ne Mukalenga udi Nzambi, Wa Tshijila wa Isalele.

16 Bualu nebanyenga muena bukitu tshidiye mukuata mu mvita, anyi mukuatshibu mu dîyi neapatuishibua anyi?

17 Kadi nanku Mukalenga udi wamba ne: Mena bakuatshibu ba mukitu nebanyengibua, ne tshidi mubi bikola mukuata netshipatuishibua; bualu Nzambi wa Bukitu neapatuisha bantu benda ba tshipungidi. Bualu nanku Mukalenga udi wamba ne: Nenduisha badi bakuluisha—

18 Ne nendisha badi bakukengesha, ne musunyi wabu nkayabu; ne nebakuatshika ne mashi abu nkayabu bu ne mvinyo mushema; ne musunyi onsu neumanya ne mema Mukalenga ndi Mupandishi weba ne Musungidi weba, Wa Bukitu wa Yakoba.