1 Ngumvuilayi, nuenu badi balonda buakana. Tangilayi ku dibua kunudi bupudibua, ne ku disosu dia tshina kunudi bumbudibua.

2 Tangilayi kudi Abalahama, tatuenu, ne kudi Sala, yeya wakanulela; bualu ngakamubikila nkayenda, ne kumubenesha.

3 Bualu Mukalenga neasamba Siona, neasamba miaba yenda yonsu ya bikulu; ne neavuija tshipela tshienda bu mudi Edene, ne tshipela tshienda tshia lusenga bu mudi budimi bua Mukalenga. Disanka ne musangelu nebisanganyibua muinamu, disakidila ne dîyi dia muimbu.

4 Telejayi kundi, bantu banyi; ne teyayi matshi kundi, Ô tshisamba tshianyi; bualu mikenji neipatukila kundi, ne nengenza tshilumbuluilu tshiakana tshianyi bua tshishala bu mudi bukenka kudi bantu.

5 Buakana buanyi budi pabuipi; lupandu luanyi ludi luya, ne diboku dianyi nedilumbuluisha bantu. Bidila nebindila kundi, ne pa diboku dianyi nebieyemena.

6 Bandishayi mesu enu mu diûlu, ne tangilayi panshi pa buloba; bualu diûlu nedijimina bu mudi muishi, ne buloba nebukulakaja bu tshilamba; ne badi basombamu nebafua mushindu umua. Kadi lupandu luanyi neluikalaku bua tshiendelela, ne buakana buanyi kabuakushikila to.

7 Ngumvuilayi, nuenu badi bamanya buakana, bantu bena mu mutshima mundi mufunda mikenji yanyi, kanutshinyi didiwula dia bantu, anyi kanutshinyi bipendu biabu to.

8 Bualu musuasua neubadia bu mudi tshilamba, ne tshishi netshibadia bu mudi lene. Kadi buakana buanyi nebuikalaku bua kashidi, ne lupandu luanyi ku tshikondu ne tshikondu.

9 Bika, bika! Divuadika makanda, Ô dibiku dia Mukalenga; bika bu mu matuku a kala. Ki nguewa wakakosa Lahaba, ne wakatapa mpupuji mputa anyi?

10 Ki nguewa wakumisha mbuwa, mâyi a mu tshina tshinena; uvua muenza ne ndondu ya mbuwa njila bua basungila bapitapu anyi?

11 Bua nanku, basungidibua ba Mukalenga nebapingana, ne balua bimba misambu mu Siona; ne disanka dia tshiendelela ne bunsantu nebikala pa mutu pabu; ne nebikala ne musangelu ne disanka; kanyinganyinga ne didila nebinyema.

12 Ndi yeya; eyowa, ndi yeya udi unusamba. Mona, udi nganyi, bua utshina muntu, wafua, ne muana wa muntu, wenjibua bu mudi bisosa?

13 Ne upua Mukalenga mufuki weba moyo, udi mualabaja diûlu, ne muasa bishimikidi bia buloba, ne udi mutshina ne munanunanu dituku dionsu, bua bualu bua lonji lua mukengeshi, bu ne uvua pabuipi ne kubutula? Ne lonji lua mukengeshi ludi penyi?

14 Mukuatshibu kunga udi wambuluja, bua alekedibua, ne bua kafu mu tshina to, anyi bua diampa dienda kadijiki to.

15 Kadi ndi Mukalenga Nzambi weba, muena mavuala akungula; Mukalenga wa Misumba ndina dianyi.

16 Ne ndi muela mêyi anyi mukana mueba, ne ndi mukubuikila mu dileji dia tshianza tshianyi, bua nkuna diûlu ne ngâsa bishimikidi bia buloba, ne ngambila Siona ne: Monayi, nudi bantu banyi.

17 Bika, bika, imana kûlu, Ô Yelushalema, udi munua ku tshianza tshia Mukalenga dikopu dia lonji luenda—udi munua dikopu dia muzakalu tô ne binyindanyinda—

18 Ne nansha umua bua kumuludika munkatshi mua bana ba baluma bonsu badiye mulela to; nansha wa kumukuata ku tshianza, wa ku bana ba baluma bonsu badiye mukolesha to.

19 Bana ba baluma babidi aba badi balua kûdi, nganyi wakumvuila lusa—kabutu keba ne dibutuka, ne tshiyola ne muela wa mvita—ne kudi nganyi kungakusamba?

20 Bana beba ba baluma badi batshioka, amu babidi aba; badi balala ku mitu ya njila yonsu; bu ngulungu wa dîtu mu bukondu, badi buwula ne tshiji tshia Mukalenga, disamina dia kudi Nzambi weba.

21 Bua nanku umvua etshi mpindiewu, wewa mutatshishibua, ne mukuatshika, ne ne mvinyo to:

22 Nanku Mukalenga weba udi wamba, Mukalenga ne Nzambi weba udi ulumbuluila bantu benda; Mona, ndi mumbusha mu tshianza tshieba dikopu dia muzakalu, binyindanyinda bia dikopu dia lonji luanyi; kuakudinua nansha kabidi to.

23 Kadi nenditeka mu tshianza tshia badi bakutatshisha, badi bambila mutshima weba: Kobama, bua tupita pa mutu—ne udi muladika mubidi weba bu buloba ne bu njila kudi badi bapita pa mutu.

24 Bika, bika, angata makanda eba, Ô Siona; vuala bilamba bieba bimpa, Ô Yelushalema, tshimenga tshia tshijila; bualu kubangila apa kakuakulua munda mueba udi kayi mutengula ne wa bukoya kabidi nansha to.

25 Ditutula ku lupuishi; juka, somba, Ô Yelushalema; disulula ku mionji ya ku nshingu kueba, Ô muana wa bakaji mukuatshibu wa Siona.