1 Ne mpindiewu, Yakoba, ndi ngakula kûdi: Udi muananyi wa kumpala mu matuku a mpaji yanyi mu tshipela. Ne Mona, mu buana bueba udi mukenga ne ntatu ne kanyinganyinga ka bungi, bua bualu bua tshikisu tshia bana benu ba baluma.

2 Nansha nanku, Yakoba, muananyi wa kumpala mu tshipela, udi mumanya bunena bua Nzambi; ne neajidila ntatu yeba bua tshipeta tshimpa tshieba.

3 Bua nanku, anyima weba neabeneshibua, ne neasomba mu bukubi ne muanenu wa baluma, Nefi; ne matuku eba neapita mu disadila dia Nzambi weba. Bua nanku, ndi mumanya ne udi musungidibua, bua bualu bua buakana bua Musungidi weba; bualu udi mumona ne mu tshiwudi tshia tshikondu udi ulua bua kutuala lupandu kudi bantu.

4 Ne udi mumona mu bunsonga bueba butumbi buenda; bua nanku, udi mubeneshibua mena bu mudi basadilaye mu musunyi; bualu Nyuma udi momumua makelela mushala, lelu, ne bua kashidi. Ne njila udi mulongolodibua katshia ku dipona dia muntu, ne lupandu ludipu bua tshianana.

5 Ne bantu badi balongeshibua bikumbana bua ne bajingulula buimpa ku bubi. Ne mikenji idi mipeshibua kudi bantu. Ne ku mikenji musunyi nansha umua kawena mubingishibua to; anyi, ku mikenji bantu badi bakoshibua. Eyowa, ku mikenji ya panu apa bavua bakoshibua; ne kabidi, ku mikenji ya ku nyuma badi bafua ku tshidi tshimpa, ne badi balua bena dikenga bua kashidi.

6 Bua nanku, disungila didi diluila kudi Mashiya Wa Tshijila ne ku njila wenda; bualu udi muwula ne ngâsa ne bulelela.

7 Monayi, udi udifila mulambu bua mibi, bua kukumbaja ndekelu wa mikenji, bua bonsu badi ne mutshima mutshibuluka ne nyuma munyingalala; ne ndekelu wa mikenji kena mua kukumbajibua kudi mukuabu to.

8 Bua nanku, mushindu wa bukola bua mushinga bua kumanyisha malu â kudi bena pa buloba, bua ne bamanya ne kakuena musunyi udi mua kusomba ku mpala kua Nzambi to, amu bikala ku dikumbanyina, ne lusa, ne ngâsa wa Mashiya wa Tshijila, udi uteka moyo wenda panshi bilondeshila ku musunyi, ne uwangata kabidi ku bukola bua Nyuma, bua ne aluija dibika dia bafua, muikala wa kumpala wabika.

9 Bua nanku, udi mamuma a diambedi a kudi Nzambi, bu mualumbuluilaye bana ba bantu bonsu; ne badi bamuitabuija nebapandishibua.

10 Ne bua bualu bua dilumbuluila dia bonsu, bantu bonsu badi balua kudi Nzambi; bua nanku, badi bimana ku mpala kuenda, bua kulumbuluishibua kudiye bilondeshila ku bulelela ne bunsantu bidi munda muenda. Bua nanku, ndekelu wa mikenji idi Wa Tshijila mufila, bua dipeshibua dia dinyoka didi dilamika, dîna dinyoka didi dilamika didi mu dishilangana ne ku disanka didi dilamika, bua kukumbaja ndekelu wa bupikudi—

11 Bualu bidi ne tshia kuikala ne, kuikala dîmanyinangana mu malu onsu. Bu kabiyi nanku, muananyi wa kumpala mu tshipela, buakana kabuvua mua kuvuishibua to, nansha bubi, nansha bunsantu anyi dikenga, nansha bimpa anyi bibi. Bua nanku, bintu bionsu bidi ne bia kuikala biwula mu tshimua; bua nanku, bikalatshi mubidi umua tshidi ne tshia kushala bu tshifua, katshiyi ne moyo anyi lufu, katshiyi tshibola anyi kupanga kubola, disanka anyi dikenga, diumvua dia bintu pambidi anyi kupanga diumvua pambidi.

12 Bua nanku, tshivua ne tshia kuikala tshifukibua bu tshintu tshia patupu; bua nanku kakuvua bua kuikala kipatshila mu ndekelu bua bufuki buatshi to. Bua nanku, tshintu etshi tshivua ne tshia kunyangakaja lungenyi lua Nzambi ne tuipatshila tuenda tua tshiendelela, ne kabidi bukola, ne lusa, ne bululama bua Nzambi.

13 Ne binuamba ne kakuena mikenji to, nenuamba kabidi ne kakuena mibi to. Binuamba ne kakuena mibi to, nenuamba kabidi ne kakuena buakana to. Ne bikalaku kakuyi buakana kakuena disanka to. Ne bikalaku kakuyi buakana anyi disanka kakuena dinyoka anyi dikenga to. Ne bikala bintu ebi kabiyiku kakuena Nzambi to. Ne bikalaku kakuena Nzambi to katuenaku to, nansha buloba; bualu kakuvua mua kuikala bufuki bua bintu to, nansha kuenza anyi kuenzejibua; bua nanku, bintu bionsu bivua ne tshiakuikala bijimina.

14 Ne mpindiewu, bana banyi ba baluma, ndi ngakula malu â kunudi bua tshipeta tshimpa tshienu ne dimanya dienu; bualu kudi Nzambi, ne uvua mufuka bintu bionsu, bubidi diûlu ne buloba, ne bintu bionsu bidimu, bubidi bintu bidi bienza ne bintu bidi bienzejibua.

15 Ne bua kukumbaja tuipatshila tuenda tua tshiendelela mu ndekelu wa muntu, kunyima kua mufuka baledi betu ba kumpala, ne nyama ya mu mpata, ne nyunyi ya mûlu, ne mu tshikosu, bintu bionsu bivua bifukibua, bivua ne tshiakuikala ne kuvua dishilangana; mena tshimuma tshikandika mu dishilangana ne mutshi wa moyo; tshimua tshikala tshimpa ne tshikuabu bululu.

16 Bua nanku, Mukalenga Nzambi wakapesha muntu ne adienzela. Bua nanku, muntu kavua mua kudienzela amu bikalabi ne uvua mulobeshibua kudi tshimua anyi tshikuabu.

17 Ne mema, Lehi, bilondeshila ku malu andi mubala, ndi ne tshia kutshinka ne muanjelu wa Nzambi, bilondeshila ku tshidi tshifundibua, uvua mupona kumbukila mu diûlu; bua nanku, wakalua diabulu, muikala mukeba tshivua tshibi kumpala kua Nzambi.

18 Ne bualu bua uvua mupona kumbukila mu diûlu, ne uvua mulua muena dikenga bua kashidi, wakakeba kabidi dikenga dia bukua bantu bonsu. Bua nanku, wakambila Eva, eyowa, mena nyoka wa kala awu, udi muikala diabulu, udi tatu wa mafi onsu, bua nanku wakamba ne: Diaku tshimuma tshikandika, ne kuakufua to, kadi newikala bu mudi Nzambi, mumanya buimpa ne bubi.

19 Ne kunyima kua Adama ne Eva badia tshimuma tshikandika, bakipatshibua mu budimi bua Edene, bua kudima buloba.

20 Ne bakalela bana; eyowa, mena dîku dia buloba bonsu.

21 Ne matuku a bana ba bantu avua malepeshibua, bilondeshila ku disua dia Nzambi, bua ne bakudimuna mutshima patshidibu mu musunyi; bua nanku, ngikadilu wabu wakalua ngikadilu wa ditêtshibua, ne tshikondu tshiabu tshivua tshilepeshibua, bilondeshila ku mikenji ivua Mukalenga Nzambi mupesha bana ba bantu. Bua bualu bua uvua muela mukenji ne bantu bonsu badi ne tshia kukudimuna mutshima; bualu uvua muleja bantu bonsu ne bavua bajimina, bualu bua disambuka dia mikenji dia baledi babu.

22 Ne mpindiewu, monayi, bu Adama kayi musambuka mikenji to, kavua upona to, kadi uvua ushala mu budimi bua Edene. Ne bintu bionsu bivua bifukibua bivua ne tshia kushala mu ngikadilu wa momumua muvuabi kunyima kua bifukibua; ne bivua ne tshia kushala bua kashidi, kabiyi ne ndekelu to.

23 Ne kabavua kupeta bana to; bua nanku bavua kushala mu ngikadilu wa kabayi bamanya bualu to, kabayi ne disanka, bualu kabavua bamanya dikenga to; kabayi benza bimpa, bualu kabavua bamanya mibi to.

24 Kadi monayi, bintu bionsu bivua bienjibua mu lungenyi lua ewu udi mumanya bintu bionsu.

25 Adama wakapona bua ne bantu bikalaku; ne bantu badiku, bua ne bikala ne disanka.

26 Ne Mashiya udi ulua mu tshiwudi tshia tshikondu, bua ne asungila bana ba bantu ku dipona. Ne bualu bua ne mbasungidibua ku dipona, mbalua badisuila bua kashidi, bajingulula buimpa ne bubi; bua kudienzela nkayabu kadi kuenzejibua to, amu bikala ku dinyokibua kudi mikenji mu dituku dinena ne dia ndekelu, bilondeshila ku mikenji idi Nzambi mufila.

27 Bua nanku, bantu badi badisuila bilondeshila ku musunyi; ne bintu bionsu bidi bibapesha bidi bikengedibua kudi muntu. Ne badi badisuila bua kusungula budishikaminyi ne moyo wa tshiendelela, ku njila wa Mutuangaji munena wa bantu bonsu, anyi bua kusungula bukuatshibu ne lufu, bilondeshila ku bukuatshibu ne bukola bua diabulu; bualu udi ukeba ne bantu bonsu bikala ne dikenga bu mudiyi.

28 Ne mpindiewu, bana banyi ba baluma, ndi musua ne nutangila kudi Muakuidi munena, ne numvuila mikenji yenda minena; ne nulamata mêyi enda, ne nusungula moyo wa tshiendelela, bilondeshila ku disua dia Nyuma wa Tshijila wenda;

29 Ne kanusungudi lufu lua tshiendelela, bilondeshila ku disua dia musunyi ne bubi budimu to, budi bupesha nyuma wa diabulu bukola bua kunukuata, bua kunupuekesha mu ngena, bua anukôkesha mu bukalenga buenda nkayenda.

30 Ndi muakula mêyi makesa kunudi bonsu, bana banyi ba baluma, mu matuku a ndekelu a ditêtshibua dianyi; ne ndi musungula luseka luimpa, bilondeshila ku mêyi a muambi. Ne ntshiena ne tshintu tshikuabu amu bikala diakalenga dia tshiendelela dia anyima yenu. Amena.