1 Ne pashisha nengimba musambu wa munanga wanyi kudi munanga bimpa wanyi, bitangila budimi bua mvinyo buenda. Munanga bimpa wanyi uvua ne budimi bua mvinyo pa kakuna kamfumfuka.

2 Ne wakabuelela lupangu, ne wakasangisha mabua a mômu, ne wakakunamu mitshi ya mvinyo ya disungula, ne wakibaka kaleya munkatshi muabu, ne kabidi wakenza tshikaminu tshia mvinyo mômu; ne wakindila ne nebutuala tumuma tua mvinyo, ne buakatuala tumuma tua mvinyo tua tshisuku.

3 Ne mpindiewu, Ô bena mu Yelushalema, ne bantu ba Yuda, kosayi, ndi ndomba, pankatshi panyi ne budimi buanyi bua mvinyo.

4 Tshinyi tshimvua mua kuenza kabidi bua budimi buanyi bua mvinyo tshindi ntshiyi muenzamu to? Pananku, pangakindila ne netshituala tumuma tua mvinyo, tshiakatuala tumuma tua mvinyo tua tshisuku.

5 Ne mpindiewu monayi, nenuambila tshinyi tshingenza ku budimi buanyi bua mvinyo—Nengumbusha lupangu luabu lua mitshi, ne nebabudia bonsu; ne nengûpula tshimanu tshiabu, ne nebudiatshibua;

6 Ne nembushiya butupu; kabuakupempibua anyi kumbudibua to; kadi nekulua mingonga ne mêba; nempesha kabidi mavuba mukenji ne kâlokeshipu mvula to.

7 Bualu budimi bua mvinyo bua Mukalenga wa Misumba budi nzubu wa Isalele, ne bantu ba Yuda badi mutshi wenda mulenga; ne wakatekemena tshilumbuluilu tshiakana, ne monayi, dikengeshibua; buakana, kadi monayi, muadi.

8 Diakabi kudi badi batuangaja nzubu ne nzubu, tô ne muikalaku kakuyi muaba to, bua baditeka nkayabu munkatshi mua buloba!

9 Mu matshi anyi, Mukalenga wa Misumba udi wamba, bulelela nzubu ya bungi neikala mitupu, ne bimenga binena ne bilengela kabiyi ne benamu to.

10 Eyowa, hectares itanu ya budimi bua mvinyo neyela bath umua, ne dimînu dia homer neyela ephah.

11 Diakabi kudi badi bajuka patshiatshia, bua balonda mâluvu makola, badi batungunuka tô ne butuku, ne mvinyo udi utemesha mitshima yabu!

12 Ne tshisanji, ne lunzenza, ne dikasa, ne lushiba, ne mvinyo bidi mu ditshionkomoka diabu; kadi kabena batangila mudimu wa Mukalenga, anyi bananela meji a tshienzedi tshia bianza bienda to.

13 Bua nanku, bantu banyi mbaya mu bukuatshibu, bua bualu bua kabena ne dimanya to; ne bantu babu ba kunemekela mbafua ne nzala, ne musumba wabu mmuma ne nyota.

14 Bua nanku, ngena udi mudialabaja nkayenda, ne munzulula mukana muawu kakuyi ndekelu to; ne butumbi buabu, ne misumba yabu, ne bunena buabu, ne udi usanka, nebapuekamu.

15 Ne muntu mupuekela neavuishibua panshi, ne muntu wa bukitu neapuekeshibua, ne mesu a mudiambi neapuekeshibua.

16 Kadi Mukalenga wa Misumba neabandishibua bua tshilumbuluilu tshiakana, ne Nzambi udi munsantu neabikidibua Wa Tshijila ku buakana.

17 Pashisha bana ba mikoku nebadia mu mushindu wabu, ne benyi nebadia miaba mitupu ya nyama ya manyi.

18 Diakabi kudi badi bakoka malu mabi ne mionji bua tshianana, ne mibi bu ne muonji wa ditempu;

19 Badi bamba: Endesha lubilu, endesha lubilu lua mudimu wenda, bua tuwumona; ne lekela mubelu wa Wa Tshijila wa Isalele usemena pêpi ne ulua, bua tûmanya.

20 Diakabi kudi badi babikila bubi buimpa, ne buimpa bubi, badi bangata mîdima bu bukenka, ne bukenka bu mîdima, badi bangata bululu bu bushema, ne bushema bu bululu!

21 Diakabi kudi badi bena lungenyi ku mesu abu nkayabu ne batalama mu dimona diabu!

22 Diakabi kudi ba bukitu bua kunua mvinyo, ne bantu ba bukola bua kusambakaja mâluvu makola;

23 Badi babingisha muena bubi bua difutu, ne banyenga buakana bua muakana kudiye!

24 Bua nanku, bu mudi kapia kabutula nsona, ne ludimi lua kapia luvingutula bisota, muji wabu newikala dibola, ne bilongu biabu nebiya mûlu bu lupuishi; bua bualu badi bimansha mikenji ya Mukalenga wa Misumba, ne bapêtula dîyi dia Wa Tshijila wa Isalele.

25 Bua nanku, tshiji tshia Mukalenga tshidi tshitemela bantu benda, udi môlola tshianza tshienda kudibu, ne udi mubatûta; ne tukuna tuakazakala; ne bitalu biabu bivua bipandakaja munkatshi mua njila. Bualu bua tshiji tshienda tshionsu etshi katshiena tshijika to, kadi tshianza tshienda tshitshidi tshiôlola.

26 Ne neabandula dibendela kudi bisamba bia kula, ne neela kashiba kudibi ku ndekelu wa buloba; ne monayi, nebilua ne lubilu lukasa; ne nansha umua munkatshi muabu kakutshioka anyi utetuka to.

27 Nansha umua kena wikisha anyi ulala to; nansha mukaba wa tshimonu tshiabi kawakusuludibua, anyi nshinga ya bisabata biabi kukoseshibua to;

28 Bena miketa ikala mitua, ne mata abi onsu mananyibua; ne bikonu ya tubalu tuabi neikala mimueneka bu mudi lusoka, ne nkata yabi bu mudi mvunda, diela dia tshionu diabi bu mudi dia ntambua.

29 Nebiela tshionu bu mudi bana ba ntambua; eyowa, nebiela tshionu, ne bikuata nyama, ne nebiya nayi kakuyi njiwu to, ne nansha umua kakuyipatuisha to.

30 Ne mu dituku adi nebibakunguila bu mudi dikunguladia mbuwa; ne biatangilabu ku bulaba, monayi, mîdima ne kanyinganyinga, ne bukenka budi bufîkuluka mu diûlu diabu.