1 Ne mpindiewu ndi ngakula kûdi, Yosefe, muananyi wa ndekelu. Uvua muledibua mu tshipela tshia ntatu yanyi; eyowa, mu matuku a kanyinganyinga kanyi kapita bukola mamueba wakakulela.

2 Ne Mukalenga akujidila kabidi bulaba ebu, budi buikala bulaba bua mushinga kupita, bua bupianyi bueba ne bupianyi bua ndelanganyi yeba pamua ne bana benu ba baluma, bua bukubi bueba bua kashidi, bikalabi ne neulama mikenji ya Wa Tshijila wa Isalele.

3 Ne mpindiewu, Yosefe, muananyi wa mukala, undi mupatula mu tshipela tshia ntatu yanyi, Mukalenga akubenesha bua kashidi, bualu ndelanganyi yeba kayakubutuka yonsu to.

4 Bualu mona, udi tshimuma tshia mu tshifuka tshianyi; ne ndi kankanunuina ka Yosefe uvua muambudibua mukuatshibu mu Ejipitu. Ne bivua binena bipungidi bia Mukalenga biakenzaye kudi Yosefe.

5 Pananku, Yosefe wakamona tshikondu tshietu bulelela. Ne wakapeta dilaya kudi Mukalenga, ne Mukalenga Nzambi neabishila nzubu wa Isalele ditamba diakana ku mamuma a mu tshifuka tshienda; Mashiya to, kadi ditamba divua ne bua kutudibua, nansha nanku, bua kuvulukibua mu bipungidi bia Mukalenga ne Mashiya neamueneshibua kudibu mu matuku a ndekelu, ku nyuma wa bukola, bua kubumbusha mu mîdima ne kubabueja mu bukenka—eyowa, mu mîdima misokoma ne mu bukuatshibu kubuela mu budishikaminyi.

6 Bualu Yosefe bulelela wakajadika, wamba ne: Mukalenga Nzambi wanyi neabisha mumonyi, wikala mumonyi wa nsunga kudi mamuma a mu tshifuka tshianyi.

7 Eyowa, Yosefe bulelela wakamba ne: Nanku Mukalenga udi ungambila: Nembisha mumonyi wa disungula ku mamuma a mu tshifuka tshieba; ne neangatshibua ne mushinga bikola munkatshi mua mamuma a mu tshifuka tshieba. Ne nemmupesha mukenji ne enza umua mudimu bua mamuma a mu tshifuka tshieba, bana babu, wikala wa mushinga mukola kudibu, mena ku dibatuala ku dimanya dia bipungidi bimvua muenza ne batatueba.

8 Ne nemmupesha mukenji ne kenji mudimu mukuabu to, amu mudimu ungamupeshela mukenji. Ne nemmuvuija munena ku mesu anyi; bualu neenza mudimu wanyi.

9 Ne neikala munena bu Mose, umvua muamba ne nennubishila, bua kupatuisha bantu banyi, Ô nzubu wa Isalele.

10 Ne nembisha Mose, bua kupatuisha bantu beba ku bulaba bua Ejipitu.

11 Kadi nembisha mumonyi ku mamuma a mu tshifuka tshieba; ne nemmupesha bukola bua kufikisha dîyi dianyi kudi mamuma a mu tshifuka tshieba—ne Mukalenga udi wamba ne, nki amu bua kufikisha dîyi dianyi to, kadi bua kubitabujija dîyi dianyi, dikala dimana kuya munkatshi muabu.

12 Bua nanku, mamuma a mu tshifuka tshieba neafunda; ne mamuma a mu tshifuka tshia Yuda neafunda; ne biafundibua kudi mamuma a mu tshifuka tshieba, ne kabidi biafundibua kudi mamuma a mu tshifuka tshia Yuda, nebisangila pamua, bua kupuwisha malongesha a mafi ne dilekela dia makokangana, ne dishikika ditalala munkatshi mua mamuma a mu tshifuka tshieba, ne kubavuija ku dimanya dia batatuabu mu matuku a ndekelu, ne kabidi ku dimanya dia bipungidi bianyi, Mukalenga udi wamba.

13 Ne ku bufuba neavuijibua ne makanda, mu dituku adi pâtuadija mudimu wanyi munkatshi mua bantu banyi bonsu, mu dipinguluja dieba, Ô nzubu wa Isalele, Mukalenga wamba.

14 Ne nanku Yosefe wakamba ku Nyuma, wamba: Monayi, Mukalenga neabenesha mumonyi awu; ne bobu badi bakeba bua kumubutula nebashikijibua; bualu dilaya edi, dindi mupeta kudi Mukalenga, bitangila mamuma a mu tshifuka tshianyi, neukumbajibua. Monayi, ndi mumanya bimpa bua dikumbajibua dia dilayi edi;

15 Ne neinyikibua dîna dianyi; ne nedikala mudi dîna dia tatuenda. Ne neikala bu mundi; bualu tshintu tshiapatula Mukalenga ku tshianza tshienda, ku bukola bua Mukalenga netshituala bantu banyi ku lupandu.

16 Eyowa, nanku Yosefe wakamba ku Nyuma: Ndi mumanya bimpa tshintu etshi, mena bu mundi mumanya bimpa bua dilaya dia Mose; bualu Mukalenga uvua mungambila ne, nenkuba ndelanganyi yeba bua kashidi.

17 Ne Mukalenga wakamba ne: Nembisha Mose umua; ne nemmupesha bukola mu mulangala ne nemmupesha bujunguludi mu difunda. Kadi ntshiakusulula ludimi luenda to, bua ne akula bia bungi, bualu ntshiakumupesha bukitu mu diakula to. Kadi nemmufundila mikenji yanyi, ku munu wa tshianza tshianyi nkayanyi; ne nemmutekela muakuidi.

18 Ne Mukalenga wakangambila kabidi ne: Nembishila mamuma a mu tshifuka tshieba mumonyi; ne neatekela muakuidi. Ne mema, monayi, nemmupesha ne afunda mifundu ya mamuma a mu tshifuka tshieba, bua mamuma a mu tshifuka tshieba; ne muakuidi wa mu tshifuka tshieba neayimanyisha.

19 Ne mêyi âfundaye neikala mêyi akengedibua mu lungenyi luanyi aya kudi mamuma a mu tshifuka tshieba. Ne nebikala bu ne mamuma a mu tshifuka tshieba avua abila kudibu ku lupuishi; bualu ndi mumanya ditabuija diabu.

20 Ne nebabila ku lupuishi kudi bana babu; eyowa, mena bua dikudimuna dia mutshima, mena kunyima kua bikondu bia bungi bipita kunyima kuabu. Ne nebilua ne lubila luabu neluya, mena bilondeshila ku bupepela bua mêyi abu.

21 Bua bualu bua ditabuija diabu mêyi abu neapatukila mukana muanyi aya kudi bana babu badi bikala mamuma a mu tshifuka tshieba; ne buteketa bua mêyi abu nemvuija bukola mu ditabuija diabu, bua divuluka dia tshipungidi tshianyi tshindi muenza ne batatueba.

22 Ne mpindiewu, Mona, muananyi wa baluma Yosefe, ku mushindu ewu tatuanyi wa kala wakamba ku Nyuma.

23 Bua nanku, bualu bua tshipungidi etshi udi mubeneshibua; bualu ndelanganyi yeba kayakubutuka to, bualu neyumvuila mêyi a mukanda.

24 Ne nekujuka umua wa bukitu munkatshi muabu, wenza bimpa bia bungi, bubidi mu dîyi ne mu bienzedi, muikala tshiamu tshia mudimu mu bianza bia Nzambi, ne ditabuija ditamba bukitu, bua kuenza malu a dikema bikola, ne kuenza tshintu tshidi tshia tshinena ku mesu kua Nzambi, bua divuija mapinguluja a bungi kudi nzubu wa Isalele, ne kudi ndelanganyi ya bana benu ba baluma.

25 Ne mpindiewu, udi mubeneshibua, Yosefe. Mona, udi muana mukesa; bua nanku umvuila mêyi a muanenu wa baluma, Nefi, ne nebikuenzekela mena bilondeshila ku mêyi andi muakula. Vuluka mêyi a tatueba udi ne lufu. Amena.