1 Ne mpindiewu, monayi, bana betu, ngakudi kunudi, bilondeshila muvua Nyuma mungenzeja; bua nanku, ndi mumanya ne bushuwa bidi ne tshia kulua.

2 Ne malu a mu mukanda âfundibua neikala ne mushinga munena kudi bana ba bantu, ne nangananga kudi ndelanganyi yetu, idi tshishadi tshia nzubu wa Isalele.

3 Bualu nebilua ne mu dituku adi ne ma’ekelezia adi mashibua, ne ka’ayi bua Mukalenga to, pâmba umua kudi mukuabu: Mona, mema, ndi wa Mukalenga; ne mikuabu neyamba: Mema, ndi wa Mukalenga; ne nanku yonsu neamba ne udi muasa ma’ekelezia, ne ka’ayi bua Mukalenga to—

4 Ne nebakokangana muntu ne mukuenda; ne bakuidi babu nebakokangana muntu ne mukuenda, ne nebalongesha ne dimanya diabu, ne bavila Nyuma wa Tshijila, udi ufila diakula.

5 Ne badi bavila bukola bua Nzambi, Wa Tshijila wa Isalele; ne badi bamba kudi bantu: Telejayi kutudi, ne umvuayi dilongesha dietu; bualu monayi kakuena Nzambi lelu ewu to, bualu Mukalenga ne Musungidi wenji mudimu wenda, ne wafidi bukola buenda kudi bantu;

6 Monayi, telejayi dilongesha dianyi; biambabu kudi tshishima tshienza ku tshianza tshia Mukalenga, kanutshitabuiji to; bualu dituku edi kena Nzambi wa bishima to; ukadi muenza mudimu wenda.

7 Eyowa, ne nekuikala ba bungi bâmba: Diayi, nuayi, ne sankayi, bualu malaba tudi tufua; ne malu onsu neikala bimpa buetu.

8 Ne nekuikala kabidi ba bungi bâmba: Diayi, nuayi, ne sankayi; nansha nanku, tshinayi Nzambi—neabingisha dienza dia mibi mikesa; eyowa, shimayi kakesa, muenenayi muntu bua bualu bua mêyi enda, umbuilayi mukueba tshina; kakuena mômu njiwu to; ne enzayi malu onsu â, bualu malaba tufuafua; ne bikalabi ne tudi bapîla, Nzambi neatukuma ne mibundabunda mikesa, ne ku ndekelu netupandishibua mu bukalenga bua Nzambi.

9 Eyowa, ne nekuikala ba bungi bâlongesha ku mushindu ewu, malongesha a mafi ne a tshianana ne masenji, ne buwulakana ne diditambisha mu mitshima yabu, ne bakeba bikola bua kusokoka Mukalenga bifufu biabu; ne midimu yabu neikala mu mîdima.

10 Ne mashi a bansantu neabila kumbukila panshi mu buloba bua kubafunda.

11 Eyowa, badi bonsu bumbuka mu njila; badi balua banyanguka.

12 Bua bualu bua diditambisha, ne bua bualu bua balongeshi ba mafi, ne malongesha a mafi, ma’ekelezia abu adi milua minyanguka, ne ma’ekelezia abu adi adibandisha; bua bualu bua diditambisha badi buwulakana.

13 Badi banyenga bapela bua bualu bua bitendelelu biabu bilenga; badi banyenga bapela bua bualu bua bilamba biabu bilenga; ne badi bakengesha batudiji ne bapela mu mutshima, bua bualu bua mu diditambisha diabu badi buwulakana.

14 Badi bela nshingu mîminyina ne mitu mûlu; eyowa, ne bua bualu bua diditambisha, ne bubi, ne malu mapita bubi, ne masandi, badi bonsu bapambuka amu pa kumbusha bakesa, badi bikala bayidi badipuekeshi ba Kilisto; nansha nanku, badi balombodibua, bua ne misangu ya bungi badi batupakana bualu bua mbalongeshibua ku malongesha a bantu.

15 Ô bena lungenyi, ne bamanyi, ne babanji, badi buwulakana mu diditambisha dia mitshima yabu, ne bonsu badi bayisha malongesha a mafi, ne bonsu badi benda masandi, ne badi banyangakaja njila muakana wa Mukalenga, diakabi, diakabi, diakabi kudibu, Mukalenga Nzambi wa Bukitu Bonsu udi wamba, bualu nebakupibua panshi mu ngena!

16 Diakabi kudi badi bipata muakana bu tshintu tshia tshianana ne badi bapenda tshidi tshimpa, ne bamba ne katshiena ne mushinga nansha! Bualu dituku nedilua diakumbula Mukalenga Nzambi lubilu bena pa buloba; ne mu dituku adi dikalabu baboba ntenta mu malu mabi nebafua.

17 Kadi monayi, biakudimuna bena pa buloba mutshima ku bubi buabu ne malu mapita bubi abu kabakubutuka to, Mukalenga wa Misumba udi wamba.

18 Kadi monayi, ekelezia munena ne mupita bubi awu, ndumba wa buloba bonsu, udi ne tshia kupuka panshi, ne diupuka diadi didi ne tshia kuikala dikola.

19 Bualu bukalenga bua diabulu budi ne tshia kubukuka, ne badi ba ku bobu badi ne tshia kusonsodibua ku dikudimuna dia mutshima, anyi diabulu neabakuata ne nkanu yenda ya tshiendelela, ne basonsodibua ku tshiji, ne bafua;

20 Bualu monayi, mu dituku adi neikala ne lonji mu mitshima ya bana ba bantu, ne neabasonsola ku tshiji tshia tshidi tshimpa.

21 Ne bakuabu neatalaja, ne ababembeleja mu bukubi bua mubidi, bua ne nebamba: Bionsu bidi bimpa mu Siona; eyowa, Siona udi ulubuluka, bionsu bidi bimpa—ne nanku diabulu udinga anyima yabu, ne neabalombola bitulu bitulu ne budimu panshi mu ngena.

22 Ne monayi, bakuabu udi ubomba biteketa biteketa, ubambila kakuena ngena to; ne udi wamba kudibu: Ntshiena diabulu to, bualu kakuena nansha umua—ne nanku udi unungena mu matshi abu, tô ne padiye ubakuata ne nkanu yenda mibi mipita, kudi kakuyi dipatuisha to.

23 Eyowa, badi bakuatshibua ne lufu, ne ngena; ne lufu, ne ngena, ne diabulu, ne bonsu badi bikala bakuatshibua kudibi badi ne tshia kuimana kumpala kua nkuasa wa butumbi wa Nzambi, ne kulumbuluishibua bilondeshila ku midimu yabu, kudibu ne tshia kuyila mu muaba mulongolola buabu, mena dijiba dia kapia ne dia nsufulu, bidi bikala mpaji ya kayiyi ndekelu.

24 Bua nanku, diakabi dikala kudi udi muikala musangalamu Siona!

25 Diakabi dikala kudi udi ubila: Bionsu bidi bimpa!

26 Eyowa, diakabi dikala kudi udi utelejela ku malongesha a bantu, ne uvila bukola bua Nzambi, ne dipa dia Nyuma wa Tshijila!

27 Eyowa, diakabi dikala kudi udi wamba: Tukadi bapeta, ne katuena ne dijinga dia bikuabu to!

28 Ne mu tshikosu, diakabi kudi bonsu badi bazakala, ne badi bafîka tshiji bua bualu bua bulelela bua Nzambi! Bualu monayi, udi muibakibua pa dibua udi ubupeta ne musangelu; ne udi muibakibua pa tshishimikidi tshia lusenga udi uzakala ne kalu kupona.

29 Diakabi dikala kudi wamba: Tukadi bapeta dîyi dia Nzambi, ne katuena ne dijinga dikuabu dia dîyi dia Nzambi to, bualu tudi ne dikumbana!

30 Bualu monayi, Mukalenga Nzambi udi wamba: Nempesha kudi bana ba bantu mulongu pa mulongu, dilongesha pa dilongesha, apa kakesa, kuaka kakesa; ne babeneshibua bobu badi batelejela malongesha anyi, ne bateya ditshi ku mubelu wanyi, bualu ne bapeta lungenyi; bualu kudi udi wakidila nempesha bipita; ne kudi badi bamba, Tudi ne bikumbana, kudibu nebinyengibua mena tshidibu natshi.

31 Mulawu udi kudi udi mueyemena kudi muntu, anyi udi wenza musunyi diboku dienda, anyi watelejela malongesha a bantu, amu papeshibua malongesha abu ku bukola bua Nyuma wa Tshijila.

32 Diakabi dikala kudi Bena Bisamba bia Benda, Mukalenga wa Misumba udi wamba! Bualu nansha nanku nendepeshelula diboku dianyi ku dituku ne dituku, nebamvila; nansha nanku, nengikala ne lusa kudibu, Mukalenga Nzambi udi wamba, biakudimunabu mutshima ne bialuabu kundi; bualu diboku dianyi didi diôlola dituku dijima, Mukalenga Nzambi udi wamba.