1 Kadi monayi, mu matuku a ku ndekelu, anyi mu matuku a Bena Bisamba bia Benda—eyowa, monayi bisamba bionsu bia Bena Bisamba bia Benda, ne kabidi Bena Yuda, bonsu bâlua pa bulaba ebu ne bâlua pa malaba makuabu, eyowa, mena pa malaba onsu a buloba, monayi, nebakuatshika ne malu mabi ne mishindu yonsu ya malu mapita bubi—

2 Ne pâlua dituku adi nebakumbudibua kudi Mukalenga wa Misumba, ne makubakuba ne ne dinyungana dia buloba, ne ne mutoyi mukola, ne ne mvula wa tshipepela, ne ne mvula wa muvimbi, ne ne ludimi lua kapia kabutudi.

3 Ne bisamba bionsu bidi biluisha Siona, ne bidi bimukengesha nebikala bu tshilota tshia tshimônyi tshia butuku; eyowa, nebikala kudibu mena bu kudi muntu udi ne nzala udi ulota, ne monayi udi udia, kadi udi ubika ne anyima wenda udi mutupu; anyi bu mudi kudi muntu udi ne nyota udi ulota, ne monayi udi unua, kadi udi ubika ne monayi udi ne mateketa, ne anyima wenda udi mutupu; eyowa, mena momumua musumba wa bisamba bionsu neuluisha Mukuna wa Siona.

4 Bualu monayi, nuenu bonsu badi benza malu mabi, imanayi ne kemayi, bualu nenubila bikola, ne nenudila; eyowa, nenuikala bakuatshika kadi kabiyi ne mvinyo to, nenulenduka kadi kabiyi ne mâluvu makola to.

5 Bualu monayi, Mukalenga udi munupumuina nyuma wa tulu tukola. Bualu monayi, nudi bakanga mesu enu, ne nudi babenga bambi; ne bakokeshi benu, ne bamonyi udi mubuikila bua bualu bua malu mabi enu.

6 Ne nebilua ne Mukalenga Nzambi neatuala kunudi mêyi a mukanda, ne neikala mêyi a badi balala tshikishi.

7 Ne monayi, mukanda neukangibua; ne mu mukanda nemuikala dibuluila dia kudi Nzambi, ku mbangilu wa buloba tô ne ku ndekelu wabu.

8 Pananku, bua bualu bua malu adi makangibua, malu adi makangibua ka’akufidibua mu dituku dia bubi ne malu mapita bubi bia bantu to. Bua nanku mukanda neulamibua kula nabu.

9 Kadi mukanda neufidibua kudi muntu, ne neafila mêyi a mukanda, adi mikala mêyi a badi balala tshikishi mu lupuishi, ne neafila mêyi â kudi mukuabu;

10 Kadi mêyi adi makangibua kakufila to, nansha kakufila mukanda to. Bualu mukanda neukangibua ku bukola bua Nzambi, ne dibuluila divua dikangibua nedilamibua mu mukanda tô ne tshikondu tshikumbana tshia Mukalenga bua alopoka; bualu monayi, adi abuluila malu onsu ku tshishimikidi tshia buloba tô ne ku ndekelu wabu.

11 Ne dituku didi dilua diabadibua mêyi a mukanda avua makangibua pa misonga ya nzubu; ne neabadibua ku bukola bua Kilisto; ne malu onsu neabuluidibua kudi bana ba bantu adi kâyi manji kuikala munkatshi mua bana ba bantu to, ne bionsu bikalaku mena ne ku ndekelu wa buloba.

12 Pananku, mu dituku adi diafidibua mukanda kudi muntu undi muamba, mukanda neusokokibua ku mesu a ba pa buloba, bua ne mesu a nansha umua kâku’umona to amu bikala ne bajadiki basatu nebaumona, ku bukola bua Nzambi, kupitshila kudi wafilabu mukanda; ne nebajadika bua bulelela bua mukanda ne malu adimu.

13 Ne kakuena nansha mukuabu wawumona to, amu bikala bakesa bilondeshila ku disua dia Nzambi, bua kufila bujadiki bua dîyi dienda kudi bana ba bantu; bualu Mukalenga Nzambi udi muamba ne mêyi a badi bena lulamatu neakula bu bivua ku bafua.

14 Bua nanku, Mukalenga Nzambi neatuadija kutuala mêyi a mukanda; ne kupitshila ku mukana mua bungi bonsu bua bajadiki bu mudibi bimulengelela, neashindamija dîyi dienda; ne diakabi dikala kudi udi ubenga dîyi dia Nzambi!

15 Kadi monayi, nebilua ne Mukalenga Nzambi neamba kudi wafilabu mukanda: Angata mêyi â adi kâyi makangibua to ne afila kudi mukuabu, bua âleja kudi mumanyi, wamba: Bala etshi, ndi nkusengelela. Ne mumanyi neamba: Luaku ne mukanda apa, ne nengabala.

16 Ne mpindiewu, bua bualu bua butumbi bua ba pa buloba ne bua kupeta makasa nebamba nanku, ne bua butumbi bua Nzambi to.

17 Ne muntu neamba: Ntshiena mua kutuala mukanda to, bualu udi mukangibua.

18 Nanku mumanyi neamba: Ntshiena mua kûbala to.

19 Pananku, nebilua, ne Mukalenga Nzambi neafila kabidi mukanda ne mêyi awu kudi udi kayi mumanyi to; ne udi kayi mumanyi to neamba: Ntshiena mumanyi to.

20 Pashisha Mukalenga Nzambi neamba kudiye: Bamanyi kabaku’abala to, bualu badi ba’abenga, ne ndi mukumbana bua kuenza mudimu wanyi nkayanyi; Bua nanku neubala mêyi angakupesha.

21 Kulengi malu adi makangibua to, bualu nengatuala mu tshikondu tshikumbana tshianyi nkayanyi; bualu nendeja kudi bana ba bantu ne ndi mukumbana bua kuenza mudimu wanyi nkayanyi.

22 Pananku, pawikala mubala mêyi andi mukupeshela mukenji, ne mupeta bajadiki bandi mulaya kûdi, pashisha neukanga mukanda kabidi, ne usokoka buanyi, bua nkuba mêyi awudi kuyi mubala to, tô ne pangamona bikumbana, mu lungenyi luanyi nkayanyi bua kubuluila malu onsu kudi bana ba bantu.

23 Bualu monayi, ndi Nzambi; ne ndi Nzambi wa bishima; ne nendeja kudi ba pa buloba ne ndi momumua makelela mushala, lelu, ne bua kashidi; ne ntshiena ngenza mudimu munkatshi mua bana ba bantu to amu bilondeshila ku ditabuija diabu.

24 Ne kabidi nebilua ne Mukalenga neamba kudi wabala mêyi afidibua kudiye:

25 Bua monsu mudi bantu aba basemena kundi ne mukana muabu, ne ne mishiku yabu bannemeka, kadi badi bumbusha mitshima yabu kula nanyi, ne ditshina diabu kundi didi dilongeshibua ku malongesha a bantu—

26 Bua nanku, nentuadija kuenza mudimu munena ne wa dikema munkatshi mua bantu aba, eyowa, mudimu munena ne bualu bua dikema, bualu lungenyi lua bena lungenyi ne bamanyi babu nelufua, ne lungenyi lua bena lungenyi babu nelusokokibua.

27 Ne diakabi kudi badi bakeba bikola bua kusokoka Mukalenga tshifufu tshiabu! Ne midimu yabu idi mu mîdima; ne badi bamba: Nganyi udi utumona, ne nganyi udi mutumanya? Ne badi bamba kabidi ne: Bushuwa, dikudimuna dieba dia malu mpala panshi nediangatshibua ne mushinga bu dîma dia mufingi wa ngesu. Kadi monayi, nendeja kudibu, Mukalenga wa Misumba udi wamba, ne ndi mumanya midimu yabu yonsu. Bualu mudimu newamba bua udi muenza, kena mungenza to anyi? Anyi tshintu tshienza netshiamba bitangila wakatshienza ne, kavua ne ngumvuilu to anyi?

28 Kadi monayi, Mukalenga wa Misumba udi wamba: Nendeja kudi bana ba bantu ne kutshidi mutantshi mukesa ne Lebanona neakudimushibua mpata mufuka; ne mpata mufuka neangatshibua ne mushinga bu wa dîtu.

29 Ne mu dituku adi bapata matshi nebumvua mêyi a mukanda, ne mesu a mpofu neamona kumbuka mu bujimakana ne mu mîdima.

30 Ne batudiji kabidi nebatanta, ne disanka diabu nedikala mu Mukalenga, ne bapela munkatshi mua bantu nebasankila mu Wa Tshijila wa Isalele.

31 Bualu bushuwa bu mudi Mukalenga ne moyo nebamona ne mutshinyishi udi uvuishibua tshianana, ne mupetudianganyi udi uvingutudibua, ne bonsu badi bakeba malu mabi badi bakoshibua;

32 Ne badi babanda muntu bua dîyi, ne bela diteyi bua udi udiwula mu tshibuelelu, ne bipata muakana bu tshintu tshia tshianana.

33 Bua nanku, nanku Mukalenga udi wamba, nganyi wakasungila Abalahama, bitangila nzubu wa Yakoba: Yakoba kakufua bundu mpindiewu to, nansha mpala wenda kakutokoloka mpindiewu to.

34 Kadi padiye umona bana benda, mudimu wa bianza bianyi, munkatshi muenda, nebamba ne dîna dianyi dia tshijila, ne bamba ne Wa Tshijila wa Yakoba ngua tshijila, ne batshina Nzambi wa Isalele.

35 Kabidi bavua batupakana mu nyuma nebalua ku ngumvuilu, ne bavua banungana nebakuata dilongesha.