1 Ne lutonga nelupatuka ku tshikuku tshia Yishai, ne ditamba neditoloka ku miji yenda.

2 Ne Nyuma wa Mukalenga neatudila pa mutu penda, nyuma wa lungenyi ne wa ngumvuilu, nyuma wa mubelu ne bukitu, nyuma wa dimanya ne wa ditshina dia Mukalenga;

3 Ne neamuenza wa ngumvuilu mukola mu ditshina dia Mukalenga; ne kakulumbuluisha ku dimona dia mesu enda to, nansha kakudiwula ku diumvua dia matshi enda to.

4 Kadi ne buakana nealumbuluisha bapela, ne adiwula ne bujalama bua batudiji ba pa buloba; ne neatûta buloba ne mulangala wa mukana muenda, ne ne mueyelu wa ku mishiku yenda neashipa bena bubi.

5 Ne buakana nebuikala mukaba wa tshimonu tshienda, ne lulamatu mukaba wa mala enda.

6 Mubuabua kabidi newikadila ne muana wa mukoku, ne nkashama nealala panshi ne muana wa mbuji, ne muana wa ngomba ne muana wa ntambua ne nyama wa manyi pamua; ne muana muteketa neabalombola.

7 Ne ngomba ne muzewu nebadia pamua; bana babu bateketa nebalala panshi pamua; ne ntambua neadia bisosa bu mudi ngomba.

8 Ne muana udi wamua neanaya pa buina bua nyoka wa dikâla, ne muana udi kayi wamua neateka tshianza tshienda pa buina bua ntoka.

9 Kabakubenzela bibi anyi kubabutula mu mukuna wanyi wa tshijila onsu to, bualu buloba nebuikala buwula ne dimanya dia Mukalenga, bu mâyi abuikila mbuwa.

10 Ne mu dituku adi nekuikala muji wa Yishai, wikala muimana bua dibendela bua bantu; bisamba bia ba benda nebiwukeba; ne dikisha dienda nedikala dia butumbi.

11 Ne nebilua mu dituku adi ne Mukalenga neela tshianza tshienda kabidi musangu muibidi bua kuangatulula tshishadi tshia bantu benda tshiashala, ku Ashû, ne ku Ejipitu, ne ku Patelosa, ne ku Atiopa, ne ku Elama, ne ku Shinâ, ne ku Hamata, ne ku bidîla bia mu mbuwa.

12 Ne neâsa dibendela bua bisamba, ne neasangisha badi bipatshibua ba Isalele, ne neasangisha pamua batangalajibua ba Yuda ku matumba anayi a buloba.

13 Dialakana dia Efelayima kabidi nedijika, ne baluishi ba Yuda nebakoshibua; Efelayima kakualakana Yuda to, ne Yuda kakutatshisha Efelayima to.

14 Kadi nebabûka bua kudikupa pa makaya a bena Peleshete batangila ku wesete; nebanyenga bia ku esete pamua; nebatua tshianza tshiabu pa mutu pa Edome ne Moaba; ne bana ba Amona nebabatumikila.

15 Ne Mukalenga neabutula ludimi lonsu lua mbuwa wa Ejipitu; ne ne lupepela luenda lukola neabukula tshianza tshienda pa musulu, ne nealutûta mu tusulu muanda muteketa, ne neenza bantu baya dinsambu makasa mûma.

16 Ne nekuikala tshibeba bua tshishadi tshia bantu benda tshiashala, ku Ashû, bu muvuabi kudi Isalele mu dituku diakapatukayi ku bulaba bua Ejipitu.