1 Mpindiewu, mema, Nefi, ndi ngakula kakesa pa mêyi andi mufunda, avua makudibua kudi mukana mua Yeshaya. Bualu monayi, Yeshaya wakakula bintu bia bungi bivua bikala bikola bua ba bungi ba ku bantu banyi kumvua; bualu kabena bamanya bitangila mushindu wa kuamba ku Nyuma munkatshi mua bena Yuda to.

2 Bualu mema, Nefi, ntshiena mubalongesha bintu bia bungi bitangila mushindu wa bena Yuda to; bualu midimu yabu ivua mikala midimu ya mîdima, ne bienzedi biabu bivua bikala bienzedi bia malu mapita bubi.

3 Pananku, ndi mfundila bantu banyi, kudi aba bonsu bapeta bintu bindi mfunda ebi kunyima eku, bua ne bamanya bitungu bia Nzambi, bua ne bidi bilua pa mutu pa bisamba bionsu, bilondeshila ku dîyi didiye muakula.

4 Pananku, telejayi, Ô bantu banyi, badi bikala ba mu nzubu wa Isalele, ne teyayi matshi ku mêyi anyi; bua bualu bua mudi mêyi a Yeshaya kâyi patoka kunudi to, nansha nanku adi patoka kudi bonsu badi buwula ne nyuma wa buambi. Kadi ndi nupesha buambi, bilondeshila ku nyuma udi munda muanyi; pananku nengamba ku Nyuma bilondeshila ku patoka padi pikala nanyi ku tshikondu dingakapatuka mu Yelushalema ne tatuanyi; bualu monayi, anyima wanyi udi usankila mu kuakula patoka kudi bantu banyi, bua balonga.

5 Eyowa, ne anyima wanyi udi usankila mu mêyi a Yeshaya, bualu ndi mupatuka mu Yelushalema, ne mesu anyi adi mamona malu a bena Yuda, ne ndi mumanya ne bena Yuda badi bumvua malu a bambi, ne kakuena nansha bantu bakuabu badi bumvua malu avua makuila bena Yuda bu mudibu to, amu bikala ne badi balongeshibua ku mushindu wa malu a bena yuda.

6 Kadi monayi, mema, Nefi, ntshiena mulongesha bana banyi ku mushindu wa bena Yuda to; kadi monayi, mema, panyi nkayanyi, mvua muikadila mu Yelushalema, bua nanku ndi mumanya bitangila bitupa bia ku mpenga yonsu; ne ndi muakula kudi bana banyi bitangila bitungu bia Nzambi, bidi bilua munkatshi mua bena Yuda, kudi bana banyi, bilondeshila ku bionsu bidi Yeshaya muakula, ne ntshiena mbifunda to.

7 Kadi monayi, ndi ntungunuka ne buambi buanyi nkayanyi, bilondeshila ku patoka panyi; mundi mumanyina ne muntu kena mua kutupakana to; nansha nanku, mu matuku âkumbajibua mambi a Yeshaya, bantu nebamanya bushuwa, mu bikondu bialuawu.

8 Bua nanku, adi a mushinga kudi bana ba bantu, ne udi utshinka ne ka’ena to, kudibu ndi ngakula nangananga, ne nendombola mêyi anyi kudi bantu banyi nkayanyi; bualu ndi mumanya ne neikala a mushinga kudibu mu matuku a ndekelu; bualu mu dituku adi neba’umvua; bua nanku, bua diakalenga diabu ndi muwafunda.

9 Ne bu mudi lukongu lua bantu lumua luikala lubutuka munkatshi mua bena Yuda bua bualu bua malu mabi, mena momumua badi babutuka ku tshikondu ne tshikondu bilondeshila ku malu mabi abu; ne nansha umua wabu wakubutuka amu bikala bidianjila kubambila kudi bambi ba Mukalenga.

10 Bua nanku, bivua bikala bibambila bitangila dibutuka dialua pa mutu pabu, katataka kunyima kua tatuanyi mumbuka ku Yelushalema; nansha nanku, bavua bapapisha mitshima yabu; ne bilondeshila ku buambi buanyi badi bikala babutuka, kumbusha badi bambudibua bakuatshibu mu Babulona.

11 Ne mpindiewu etshi ndi ngakula bua bualu bua nyuma udi mundi. Ne nansha muvuabu bikala bambudibua kula nebapingana kabidi, ne nebâsa kabidi mu bulaba bua Yelushalema; bua nanku, nebapingajibua kabidi ku bulaba bua bupianyi buabu.

12 Kadi, monayi, ne bikala ne mvita, ne manunganyi a mvita; ne palua dituku diadimuenesha Umuepela Mulela wa Tatu, eyowa, mena Tatu wa diûlu ne wa buloba, kudibu mu musunyi, monayi, nebamubenga, bua bualu bua malu mabi abu, ne dipapisha dia mitshima yabu, ne dîminyina dia nshingu yabu.

13 Monayi, nebamutshiamakaja; ne kunyima kua muladikibua mu lukita bua mutantshi wa matuku asatu neajuka ku bafua, ne londapu mu mapuapua enda; ne bonsu bitabuija mu dîna dienda nebapandishibua mu bukalenga bua Nzambi. Pananku, anyima wanyi udi usankila kuamba ku Nyuma bimutangila, bualu ndi mumona dituku dienda, ne mutshima wanyi udi unemesha dîna dienda dia tshijila.

14 Ne monayi nebilua ne kunyima kua Mashiya mujuka ku bafua, ne mudimuenesha kudi bantu benda, kudi bungi bonsu buabu bitabuija mu dîna dienda, monayi, Yelushalema neabutuka kabidi; bualu diakabi kudibu badi baluisha Nzambi ne bantu ba ekelezia wenda.

15 Pananku, bena Yuda nebatangalajibua munkatshi mua bisamba bionsu; eyowa, ne Babulona kabidi neabutuka; bua nanku, bena Yuda nebatangalajibua kudi bisamba bionsu.

16 Ne kunyima kua bikala batangalajibua, ne Mukalenga Nzambi mubanyasula kudi bisamba bikuabu bua mutantshi wa bikondu bia bungi, eyowa, mena panshi ku tshikondu ne tshikondu tô ne pitabujijabu bua kuitabuija mu Kilisto, Muana wa Nzambi, ne bupikudi, budi kabuyi ndekelu bua bukua bantu bonsu—ne pâlua dituku ditabuijabu Kilisto, ne diatendelelabu Tatu mu dîna dienda, ne mitshima mikezuka ne bianza bitoka, ne kabayi bindila Mashiya mukuabu nansha, apu, mu tshikondu atshi, dituku nedilua diakengedibuabi ne bitabuija malu â.

17 Ne Mukalenga neela tshianza tshienda kabidi musangu muibidi bua kupinguluja bantu benda kumbuka ku ngikadilu wabu wa dijimina ne dipona. Bua nanku, neatuadija kuenza mudimu munena ne bualu bua dikema munkatshi mua bana ba bantu.

18 Bua nanku, neatuala mêyi enda kudibu, mina mêyi âbalumbuluisha ku dituku dia ku nshikidilu, bualu nebapeshibuawu bua kipatshila ka kubitabujija Mashiya mulelela, uvua mubengibua kudibu; ne bua kubitabujija ne kabajingi kuindila kabidi bua Mashiya mukuabu alua to, bualu kakuakuikala mukuabu walua to, amu bikala Mashiya wa mafi washima bantu; bualu kudi amu Mashiya umua udi muakudibua kudi bambi, ne Mashiya awu nyeye wabengibua kudi bena Yuda.

19 Bualu bilondeshila ku mêyi a bambi, Mashiya udi ulua bidimu nkama isambombo katshia ku tshikondu tshiakumbuka tatuanyi ku Yelushalema; ne bilondeshila ku mêyi a bambi, ne kabidi dîyi dia muanjelu wa Nzambi, dîna dienda nedikala Yezu Kilisto, Muana wa Nzambi.

20 Ne mpindiewu, bana betu, ngakudi patoka bua kanutupakanyi to. Ne bu mudi Mukalenga Nzambi wakapatula Isalele ku bulaba bua Ejipitu ne moyo, ne wakapesha Mose bukola bua ne ôndopa bisamba kunyima kua bikala basumibua kudi nyoka ya lulengu, bobu bakupa mesu abu kudi nyoka wakajulaye kumpala kuabu, ne kabidi wakamupesha bukola bua ne atûta dibua ne mâyi alopoka; eyowa, monayi ndi ngamba kunudi, ne bu mudi malu â malelela, ne bu mudi Mukalenga ne moyo, kakuena dîna dikuabu dipeshibua muinshi mua diûlu amu bikala Yezu Kilisto ewu, undi muakuila, kudi muntu mua kupandishibuila.

21 Pananku, bua bualu ebu Mukalenga Nzambi udi mulaya kundi ne malu â andi mfunda nealamibua ne akubibua, ne neapitshishibua kudi ndelanganyi yanyi, ku tshikondu ne tshikondu, bua dilaya diukumbajibua kudi Yosefe, ne ndelanganyi yenda kayakufua nansha bu muikalaku buloba.

22 Bua nanku, malu â neaya ku tshikondu ne tshikondu bu muikalaku buloba; ne neaya bilondeshila ku disua ne nsankilu wa Nzambi; ne bisamba bikala nawu nebilumbuluishibua kudiwu bilondeshila ku mêyi adi mafundibua.

23 Bualu tudi tukuata mudimu ne dinanukila bua kufunda, bua kuitabujija bana betu balela, ne kabidi bana betu, bua kuitabuija mu Kilisto, ne bua kuikala balengeja ne Nzambi; bualu tudi bamanya ne tudi tupandishibua kupitshila ku ngâsa, kunyima kua bionsu bitudi mua kuenza.

24 Ne, nansha mutudi tuitabuija mu Kilisto, tudi tulama mikenji ya Mose, ne bindila Kilisto ne disuminyina kudi Kilisto, tô ne pâkumbajibua mikenji.

25 Bualu, bua ndekelu ewu mikenji ivua mipeshibua; bua nanku mikenji idi milua mifua kutudi, ne tudi bavuijibua ne moyo mu Kilisto bua bualu bua ditabuija dietu; nansha nanku tudi tulama mikenji bua bualu bua mikandu.

26 Ne tudi tuakula bitangila Kilisto, tudi tusankila mu Kilisto, tudi tuyisha bitangila Kilisto, tudi tuamba ku Nyuma bitangila Kilisto, ne tudi tufunda bilondeshila ku mambi etu, bua ne bana betu balela bamanya kua kutangidilabu bua dilekedibua dia mibi yabu.

27 Pananku, tudi tuakula bitangila mikenji ne bua bana betu balela bamanya kufua kua mikenji; ne bobu, ku dimanya dia kufua kua mikenji, bindila moyo awu udi muikala mu Kilisto, ne bamanya bua ndekelu kayi mikenji ivua mipeshibua. Ne kunyima kua mikenji mikumbajibua mu Kilisto, ne kabapapishi mitshima yabu kudiye pajika mikenji.

28 Ne mpindiewu monayi, bantu banyi, nudi bantu ba nshingu mîminyina; pananku, ndi muakula patoka kunudi, ne kanuena mua kupanga kumvua to. Ne mêyi andi muakula neanuimanyina bu bujadiki; bualu adi makumbana bua kulongesha muntu yonsu njila muakana: bualu njila muakana udi kuitabuija Kilisto ne kumuvila to; bualu ku dimuvila, nudi nuvila kabidi bambi ne mikenji.

29 Ne mpindiewu monayi, ndi ngamba kunudi ne njila muakana udi kuitabuija mu Kilisto ne kumuvila to; ne Kilisto udi Wa Tshijila wa Isalele; pananku nudi ne tshia kuinama kumpala kuenda, ne kumukukuila ne bukitu buenu bonsu, meji enu onsu, ne makanda enu onsu, ne anyima yenu mijima; ne binuenza nanku, kanuakuimanshibua to nansha munyi.

30 Ne, monsu muakengedibuabi, nudi ne tshia kulama midimu ne milulu ya Nzambi tô ne pâkumbajibua mikenji ivua mipeshibua kudi Mose.