1 Ne kunyima kua Kilisto mujuka ku bafua neadileja kunudi, bana banyi, ne bana betu bananga; ne mêyi ânuambilaye neikala mikenji inuenza.

2 Bualu monayi, ndi ngamba kunudi ne ndi mumona ne nkongu ya bungi neipita, ne nekuikala mvita mikola ne makokokangana makola munkatshi mua bantu banyi.

3 Ne kunyima kua Mashiya mulua, nekuikala bimanyinu bipeshibua kudi bantu banyi bia diledibua dienda, ne kabidi dia lufu luenda ne dibika dienda dia ku lufu; ne dituku adi nedikala dinena ne ditshinyisha kudi bena bubi, bualu nebafua; ne badi bafua bua bualu bua badi bipata bambi, ne bansantu, ne babâsa mabua, ne babashibeya; bua nanku lubila lua mashi a bansantu nelubanda kûlu kudi Nzambi kumbukila panshi mu buloba bua kubafunda.

4 Pananku, bonsu badi bikala baditambishi, ne badi benza malu mapita bubi, dituku dilualua nedibashidisha, Mukalenga wa Misumba udi wamba, bualu nebikala bu nsona.

5 Ne badi bashipa bambi, ne bansantu, ndondu ya buloba nebubadînyisha, Mukalenga wa Misumba udi wamba; ne mikuna neibabuikila, ne mvunda neibambula kula, ne nzubu minena neibaponela ne ibapanda bipesa ne neibaboza balua musenga.

6 Ne nebakumbudibua ne makubakuba, ne mipenyi, ne manyungana a buloba, ne mishindu yonsu ya dinyanguka, bualu kapia ka tshiji tshia Mukalenga nekatemeshidibua, ne nebikala bu nsona, ne dituku dilualua nedibavingutula, Mukalenga wa Misumba udi wamba.

7 Ô dikenga, ne dipampakana dia anyima wanyi bua dijimija dia bashibeyishibua ba ku bantu banyi! Bualu mema, Nefi, ndi mudimona, ne didi pepi kumvingutula ku mpala kua Mukalenga; kadi ndi ne tshia kubila kudi Nzambi wanyi: Njila yeba idi miakana.

8 Kadi monayi, bakana badi bumvuila mêyi a bambi, ne kabena babashipa to, kadi badi bindila kudi Kilisto ne disuminyina bua bimanyinu bidi bipeshibua, nansha bua dikengeshibua dionsu—monayi, badi aba bâbenga kufua.

9 Kadi Muana wa Buakana neabapatukila; ne neabôndopa, ne nebikala ne ditalala nenda, tô ne pikala nkongu ya bantu isatu mipita, ne pikala ba bungi ba mu lukongu lua bantu luinayi bapita mu buakana.

10 Ne papita malu â dinyanguka dia lubilu nedilua kudi bantu banyi; bualu, nansha bua makenga a anyima wanyi, ndi mudimona; pananku, ndi mumanya ne nedilua; ne badi badipana bua tshianana; bualu bua difutu dia diditambisha diabu ne dia busenji buabu, nebapola dinyanguka; bualu bua badi badilekela kudi diabulu ne badi basungula midimu ya mîdima pamutu pa bukenka, bua nanku badi ne tshia kupueka mu ngena.

11 Bualu Nyuma wa Mukalenga kakukuata mudimu diba dionsu ne muntu to. Ne padi Nyuma ulekela kukuata mudimu ne muntu, pashisha dinyanguka didi dilua lubilu, ne etshi tshidi tshibungamija anyima wanyi.

12 Ne bu mungakudi bitangila ditabujija Bena Yuda ne Yezu udi Kilisto muina, bidi bikengedibua ne Bena Bisamba bia Benda bitabujijibua pabu ne Yezu udi Kilisto, Nzambi wa Tshiendelela;

13 Ne udi udimuenesha kudi bonsu badi bamuitabuija kudiye, ku bukola bua Nyuma wa Tshijila; eyowa, kudi tshisamba tshionsu, bisa bionsu, muakulu onsu, ne bantu bonsu, wenza bishima bikola, bimanyinu ne malu a dikema, munkatshi mua bana ba bantu bilondeshila ku ditabuija diabu.

14 Kadi monayi, ndi ngamba ku Nyuma kunudi bitangila matuku a ku ndekelu; bitangila matuku âtuala Mukalenga Nzambi malu â kudi bana ba bantu.

15 Kunyima kua ndelanganyi yanyi ne ndelanganyi ya bana betu ba baluma mishinguluka mu dipanga dia ditabuija, ne mitûtshibua kudi bena bisamba bia benda; eyowa, kunyima kua Mukalenga Nzambi mubatudila ku mpenga yonsu, ne mubatshintshimikila ne dibûla, ne mubajudila bisokomenu; ne kunyima kua bapuekela mu lupuishi, bua ne kabakuikalaku to, nansha nanku mêyi a bakana neafundibua, ne masambila a bena lulamatu neumvuika, ne bonsu badi bashinguluka mu dipanga dia ditabuija kabakupuishibua moyo to.

16 Bualu aba bâbutuka nebakula kudibu ku buloba, ne diakula diabu nedikala dia panshi dipatukila ku lupuishi, ne dîyi diabu ne dikala bu dia udi utempa mbuku; bualu Mukalenga Nzambi neamupesha bukola, bua anungana buabu, mena bu bivua bibapatukila mu bulaba; ne diakula diabu nedinungana ku lupuishi.

17 Bualu Mukalenga Nzambi udi wamba: Nebafunda malu enjibua munkatshi muabu, ne neafundibua ne neakangibua mu mukanda, ne badi bashinguluka mu dipanga dia ditabuija kabakuwupeta to, bualu badi bakeba bua kunyangakaja malu a Nzambi.

18 Pananku, bu muvua bavua babutuka bavua bikala babutuka lubilu; ne musumba wa batshinyishi babu newikala bu bisota bidi bipepuka—eyowa, Mukalenga Nzambi udi wamba: Nebikala mu kasunsa, tshimpitshimpi—

19 Ne nebilua, ne badi bashinguluka mu dipanga dia ditabuija nebatûtshibua kudi tshianza tshia bena bisamba bia benda.

20 Ne bena bisamba bia benda badi badibandisha mu diditambisha dia ku mesu abu, ne badi batetuka, bua bualua bua bunena bua dibua dia ditetuka diabu, bua ne badi bâsa ma’ekelezia a bungi; nansha nanku, badi bapepeja bukola ne bishima bia Nzambi, ne badiyisha lungenyi luabu nkayabu ne dimanya diabu nkayabu, bua bapeta makasa ne baboza mpala wa bapela.

21 Ne kudi ma’ekelezia a bungi mâsa adi alela malakana, ne luntûta lua bungi, ne meji mabi.

22 Ne kudi kabidi bipungidi bia mu musokoku, bu mu bikondu bia kala, bilondeshila ku bipungidi bia diabulu, bualu udi mufuki wa malu onsu â; eyowa, mufuki wa dishipeyangana, ne wa midimu ya mu mîdima; eyowa, ne udi ubalombola ku nshingu ne nshinga wa lin, tô ne mua basuikaye ne mionji yenda mikola bua kashidi.

23 Bualu monayi, bana betu bananga, ndi ngamba kunudi ne Mukalenga Nzambi kena wenza mu mîdima to.

24 Kena wenza tshintu to amu bikala bua dikuatshisha dia ba pa buloba; bualu udi munanga ba pa buloba, mena bua ne udi ufila moyo wenda bua akoka bantu kudiye. Bua nanku, kena ukandika nansha umua to ne kabalu kuangata lupandu luenda to.

25 Monayi, udi ubila nansha kudi umua, wamba: Umbuka kundi? Monayi ndi ngamba kunudi, To; kadi udi wamba: Luayi kundi nuenu bonsu ndekelu ya buloba, sumbayi mabela ne buitshi, kakuyi makuta ne kakuyi mushinga to.

26 Monayi, udi muelela nansha umua mukenji ne apatuka mu nsunagoga yabu, anyi mu nzubu ya ditendelela anyi? Monayi, ndi nnuambila ne, To.

27 Udi muelela nansha umua mukenji ne kabangatshi lupandu luenda anyi? Monayi ndi nnuambila, To; kadi udi mulupesha tshianana kudi bantu bonsu; ne udi muelela bantu benda mukenji ne bitabujija bantu bonsu bua dikudimuna dia mutshima.

28 Monayi, Mukalenga udi muelela muntu nansha umua mukenji ne kapetshi buimpa buenda anyi? Monayi, ndi ngamba kunudi, To; kadi bantu bonsu badi ne bunema muntu yonsu bu mudi mukuabu, ne nansha umua kena mukandikibua to.

29 Udi wela mukenji ne kakuikadi buakuidi bua mafi to; bualu, monayi, buakuidi bua mafi budi bua ne bantu bayisha ne badipitshisha bu bukenka kudi ba pa buloba, bua bapeta makasa ne lumu lua kudi ba pa buloba; kadi kabena bakeba diakalenga dia Siona to.

30 Monayi, Mukalenga udi ukandika bualu ebu; pananku, Mukalenga Nzambi udi muela mukenji ne bantu bonsu bikala ne bunangi, buina bunangi budi dinanga. Ne pa kumbusha bikala ne bunangi badi tshianana. Pananku, bikalabu ne bunangi kabakulekela mukuatshi wa mudimu wa mu Siona afua to.

31 Kadi mukuatshi wa mudimu wa mu Siona neakuata mudimu bua Siona; bualu biakuatabu mudimu bua makuta nebafua.

32 Ne kabidi, Mukalenga Nzambi udi muela mukenji ne bantu kabashipeyanganyi to; ne kabashimi to, ne kabibi to; ne kabangatshi dîna dia Mukalenga Nzambi wabu tshianana to; ne kabalakanyi to; ne kabikadi ne meji mabi to; ne kabakokanganyi muntu ne mukuenda to; ne kabendi masandi to; ne kabenji tshintu nansha amua a ku malu â to; bualu ewu onsu udi u’enza neafua.

33 Bualu nansha amua a ku malu mabi â adi avuila kudi Mukalenga; bualu udi wenza tshidi tshimpa munkatshi mua bana ba bantu; ne kena wenza tshintu nansha tshimua tshidi katshiyi patoka kudi bana ba bantu to; ne udi ubabikila bonsu bua kulua kudiye ne kuangata buimpa buenda; ne kena ubengela nansha umua udi ulua kudiye to, bafîka ne batoka, bapika ne badikadila, baluma ne bakaji; ne udi uvuluka bampakanyi; ne bonsu badi momumua kudi Nzambi, bubidi muena Yuda ne Muena tshisamba tshia benda.