1 Ne mpindiewu, monayi, bana betu bananga, ndi ntshinka ne nudi nunana meji kakesa mu mitshima yenu bitangila tshinudi ne bua kuenza kunyima kua nuenu babuelela ku njila. Kadi, monayi, bua tshinyi nudi nunana meji pa bintu ebi mu mitshima yenu?

2 Kanuena nuvuluka ne nganuambi ne kunyima kua nuenu bapeta Nyuma wa Tshijila nudi mua kuakula ne muakulu wa banjelu anyi? Ne mpindiewu, munyi munuvua mua kuakula ne muakulu wa banjelu amu kabiyi ku Nyuma wa Tshijila?

3 Banjelu badi bakula ku bukola bua Nyuma wa Tshijila; bua nanku, badi bakula mêyi a Kilisto. Pananku, ndi ngamba kunudi, tshionkomokelayi pa mêyi a Kilisto; bualu monayi, mêyi a Kilisto neanuambila malu onsu anudi ne bua kuenza.

4 Pananku, mpindiewu kunyima kua mema muakula mêyi â, binuikala kanuyi mua ku umvua to nebikala bualu bua kanuena nulomba to, nansha kanuena nukokola to; bua nanku, kanuena nutuadibua ku bukenka to, kadi nudi ne tshia kufua mu mîdima.

5 Bualu monayi, kabidi ndi ngamba kunudi ne binuabuelela ku njila, ne binuapeta Nyuma wa Tshijila, nealeja kunudi malu onsu anudi ne bua kuenza.

6 Monayi, edi didi dilongesha dia Kilisto, ne kakuakuikala diyisha dikuabu dipeshibua tô ne kunyima kuadimueneshaye kunudi mu musunyi. Ne pâdimueneshaye kunudi mu musunyi, malu ânuambilaye, nenutangila bua ku’enza.

7 Ne mpindiewu mema, Nefi, ntshiena mua kuamba kupita to; Nyuma udi ukandika diakula dianyi, ne ndi nshala bua kudila bualu bua dipanga ditabuija, ne bubi, ne dipanga dimanya, ne dîminyina dia nshingu dia bantu; bualu badi babenga kukeba dimanya, anyi kumvua dimanya dinena, padidi dipeshibua kudibu patoka, mena patoka bu mudi dîyi mua kuikala.

8 Ne mpindiewu, bana betu bananga, ndi mmona ne nutshidi nunana meji mu mitshima yenu; ne bidi bimbungamija ne ndi ne tshia kuakula bitangila bualu ebu. Bualu binuatelejela kudi Nyuma udi ulongesha muntu bua kusambila, nenumanya ne nudi ne tshia kusambila; bualu nyuma mubi kena ulongesha muntu bua kusambila to, kadi udi umulongesha ne kena ne tshia kusambila to.

9 Kadi monayi, ndi nnuambila ne nudi ne tshia kusambila diba dionsu, ne kanuyi nutshioka to; ne kanuena ne tshia kuenza tshintu nansha tshimua bua Mukalenga amu bangabanga nuenu basambila Tatu mu dîna dia Kilisto, bua anujidila midimu yenu, ne midimu yenu ikala bua diakalengela dia anyima yenu.