1 Ne mpindiewu, Yakoba wakakula malu a bungi kupita kudi bantu banyi diba adi; nansha nanku amu malu â ndi muenzeja ne afundibua, bualu malu andi mufunda mankumbanyina.

2 Ne mpindiewu mema, Nefi, ndi mfunda mêyi a bungi makuabu a Yeshaya, bualu anyima wanyi udi usankila mu mêyi enda. Bualu nengenzela mêyi enda kudi bantu banyi, ne nengatuma kudi bana banyi bonsu, bualu bulelela wakamona Musungidi wanyi, bu mundi mumumona.

3 Ne muanetu, Yakoba, kabidi udi mumumona, bu mundi mumumona; bua nanku, nentuma mêyi abu kudi bana banyi bua kubajadikila ne mêyi anyi adi malelela. Pananku, ku mêyi a basatu, Nzambi udi muamba, nenshindamija dîyi dianyi. Nansha nanku, Nzambi udi utuma bajadiki ba bungi, ne udi ujadika mêyi enda onsu.

4 Monayi, anyima wanyi udi usankila mu dijadikila bantu banyi bulelela bua dilua dia Kilisto; bualu, bua ndekelu ewu mikenji ya Mose idi mikala mipeshibua; ne malu onsu adi mikala mapeshibua kudi Nzambi ku mbangilu wa buloba, kudi muntu, adi tshimanyinu tshienda.

5 Ne kabidi anyima wanyi udi usankila mu bipungidi bia Mukalenga bidiye muenza kudi batatuetu; eyowa, anyima wanyi udi usankila mu ngâsa wenda, ne mu bululama buenda, ne bukola, ne lusa mu dilongolola dinena ne dia tshiendelela dia dipatuisha dia ku lufu.

6 Ne anyima wanyi udi usankila mu dijadika kudi bantu banyi, ne bantu bonsu badi ne tshia kufua, pa kumbusha Kilisto mulua.

7 Bualu bikalaku kakuena Kilisto to kakuena Nzambi to; ne bikalaku kakuena Nzambi to katuenaku to, bualu kakuvua mua kuikala bufuki to. Kadi kudi Nzambi, ne udi muikala Kilisto, ne udi ulua mu tshiwudi tshia diba dienda.

8 Ne mpindiewu ndi mfunda amua a ku mêyi a Yeshaya, bua bonsu ba ku bantu banyi bamona mêyi â bikala mua kubandula mitshima yabu ne basanka bua bantu bonsu. Mpindiewu, â adi mêyi, ne nudi mua kuenzela kunudi ne kudi bantu bonsu.