1 Ne biakalua ne tshidimu tshia makumi asatu ne tshinayi tshiakapita, ne kabidi tshia makumi asatu ne tshitanu, ne monayi bayidi ba Yezu bakenza ekelezia wa Kilisto mu bulaba bonsu ku mpenga yonsu. Ne bonsu bakalua kudibu, ne bakakudimuna mutshima ku mibi yabu bulelela, bakatambuishibua mu dîna dia Yezu; ne bakapeta kabidi Nyuma wa Tshijila.

2 Ne biakalua ne mu tshidimu tshia makumi asatu ne tshisambombo, bantu bonsu bakakudimuna moyo kudi Mukalenga, pa mpala onsu wa bulaba, Bena Nefi ne Bena Lamana, ne kakuvua makokangana anyi matandu munkatshi muabu to, ne bantu bonsu bakasomba mu bululama muntu ne mukuenda.

3 Ne bavua basangisha bintu biabu bionsu pamua; bua nanku kakuvua mubanji ne mupela, mupika ne mudikadila to, kadi bakavuijibua bonsu badikadila, ne bapetshi ba dipa dia mu diûlu.

4 Ne biakalua ne tshidimu tshia makumi asatu ne tshia muanda muteketa tshiakapita kabidi, ne ditalala ditshivua ditungunuka mu bulaba.

5 Ne kuvua midimu minena ne ya dikema yakenza bayidi ba Yezu, mua ne bakôndopa babêdi, ne bakajula bafua, ne bakendesha balema, ne bakatabadija mpofu, ne bapata matshi bakumvua; ne bakenza bishima bia mishindu yonsu munkatshi mua bana ba bantu; ne bakenza bishima to amu pa kumbusha mu dîna dia Yezu.

6 Ne ki muakapita tshidimu tshia makumi asatu ne tshia muanda mukulu nanku, ne kabidi tshidimu tshia makumi asatu ne tshia tshitema, ne tshia makumi anayi ne tshimua, ne tshia makumi anayi ne tshibidi, eyowa, mena tô ne tshidimu tshia makumi anayi ne tshia tshitema biakapita, ne kabidi tshidimu tshia makumi atanu ne tshimua, ne tshia makumi atanu ne tshibidi; eyowa, mena tô ne tshidimu tshia makumi atanu ne tshia tshitema tshiakapita.

7 Ne Mukalenga wakabalubuluja mu bulaba; eyowa, mua ne bakibaka bimenga kabidi pa miaba ivua bimenga bikala biôshibua.

8 Eyowa, mena tshimenga tshinena tshia Zalahemela atshi bakatshibakisha kabidi.

9 Kadi kuvua bimenga bia bungi bivua bidîna, ne mâyi akalua pa muaba wabi; bua nanku bimenga ebi kabivua mua kuibakishibua kabidi to.

10 Ne mpindiewu, monayi, biakalua ne bantu ba Nefi bakakolakana, ne bakavulangana lukasa menamena, ne bakalua bantu balengela ne basanguluka menamena.

11 Ne bavua basela, ne bavua baselesha, ne bavua babeneshibua bilondeshila ku malaya a bungi avua Mukalenga mubalaya.

12 Ne kabavua kabidi benda bilondeshila muvua midimu ne milulu ya mikenji ya Mose to; kadi bavua benda bilondeshila ku mikenji yakapetabu kudi Mukalenga wabu ne Nzambi wabu, bikala batungunuka ne dijila ne disambila, ne mu dituilangana pamua misangu mivula bua kusambila ne bua kumvua dîyi dia Mukalenga.

13 Ne biakalua ne kakuvua dikokangana munkatshi mua bantu bonsu, mu bulaba bonsu to; kadi kuvua bishima bikola biakenjibua munkatshi mua bayidi ba Yezu.

14 Ne biakalua ne tshidimu tshia makumi muanda muteketa ne tshimua tshiakapita, ne tshia makumi muanda muteketa ne tshibidi tshiakapita kabidi, eyowa, ne mu tshikosu, tô ne tshidimu tshia makumi muanda muteketa ne tshia tshitema tshiakapita; eyowa, mena bidimu lukama biakapita, ne bayidi ba Yezu, bavuaye musungula, bakaya bonsu mu mpaladiso wa Nzambi, amu pa kumbusha basatu bâshala; ne kuvua bayidi bakuabu bakajididibua pa muaba wabu; ne kabidi ba bungi ba ku lukongu lua bantu alu bakafua.

15 Ne biakalua ne kakuvua dikokangana mu bulaba to, bua bualu bua dinanga dia Nzambi divua dikala dikadila mu mitshima ya bantu.

16 Ne kakuvua malakana, anyi luntûta lua bungi, anyi diyoyi, anyi masandi, anyi mafi, anyi dishibeyangana, anyi mishindu yonsu ya majinga a mubidi to; ne bushuwa kakuvua bantu bavua mua kuikala ne disanka dipita munkatshi mua bantu bonsu bavua bafukibua ku tshianza tshia Nzambi to.

17 Kakuvua banyengi, anyi bashipianganyi, anyi Bena Lamana, anyi mushindu nansha umua wa ditapulukangana mu bisumbu bia bantu to; kadi bonsu bavua tshintu tshimua, bana ba Kilisto, ne bapianyi ba bukalenga bua Nzambi.

18 Ne bu muvuabu babeneshibua! Bualu Mukalenga wakababenesha mu midimu yabu yonsu; eyowa, bavua wakababenesha ne wakabalubulula tô ne pakapita bidimu lukama ne dikumi; ne lukongu lua bantu lua diambedi lua kumbukila ku Kilisto bakafua, ne kakuvua dikokangana mu bulaba bonsu to.

19 Ne biakalua ne Nefi, yeya uvua mulama miandiku ya ndekelu eyi, (ne uvua muyilama pa bitata bia Nefi) wakafua, ne muanenda wa baluma Amosa wakayilama pa muaba wenda; ne wakayilama pa bitata bia Nefi kabidi.

20 Ne wakatungunuka ne kuyifunda bidimu makumi muanda mukulu ne binayi, ne ditalala ditshivua amu dikala mu bulaba, amu pa kumbusha tshitupa tshikesa tshia bantu tshitombokela ekelezia ne kumbukaku ne tshiangata dîna ne Bena Lamana; bua nanku kuakabanga kuikala Bena Lamana kabidi mu bulaba.

21 Ne biakalua ne Amosa wakafua penda, (ne kukavu bidimu lukama ne makumi tshitema ne binayi kumbukila ku dilua dia Kilisto) ne muanenda wa baluma Amosa wakalama miandiku pa muaba wenda; ne wakayilama pa bitata bia Nefi; ne ivua kabidi mifundibua mu mukanda wa Nefi, udi muikala mukanda ewu.

22 Ne biakalua ne bidimu nkama ibidi biakapita; ne bantu ba lukongu lua bantu luibidi bakafua bonsu pa kumbusha bakesa.

23 Ne mpindiewu mema, Molomo, ndi musua ne numanya ne bantu bavua bavulangana, mua ne bavua batangalakangana pa mpala onsu wa bulaba, ne bavua balua babanji menamena, bua bualu bua dilubuluka diabu mu Kilisto.

24 Ne mpindiewu, mu tshidimu etshi tshia nkama ibidi ne tshimua munkatshi muabu kuakabanga kuikala bavua bikala badibandisha mu diditambisha, bavua bikala bavuala bilamba bia mushinga mukola, ne mishindu yonsu ya masanga mashema, ne wa bintu bishema bia pa buloba.

25 Ne katshia ku tshikondu atshi kabakasangisha bintu biabu pamua kabidi to.

26 Ne bakabanga kuabulukangana bilondeshila ku dimuna diabu; ne bakabanga kudiashila ma’ekelezia bua kupeta makasa, ne bakabanga kuvila ekelezia mulelela wa Kilisto.

27 Ne biakalua ne pakapita bidimu nkama ibidi ne dikumi kuvua ma’ekelezia a bungi mu bulaba; eyowa, kuvua ma’ekelezia a bungi avua amba ne avua mamanya Kilisto, ne nansha nanku ivua ivila tshitupa tshinena tshia lumu luimpa luenda, mu mushindu ne bakitaba mishindu yonsu ya bubi, ne bakâbanya bivua bikala bia tshijila kudi ewu uvua mukandikibua bua bualu bua dipanga dia bukumbana.

28 Ne ekelezia ewu wakavulangana menamena bua malu mabi, ne bua bukola bua Satana uvua mukuata mitshima yabu.

29 Ne kabidi, kuvua ekelezia mukuabu uvua uvila Kilisto; ne bakakengesha ekelezia mulelela wa Kilisto, bua didipuekesha diabu ne ditabuija diabu mu Kilisto; ne bakabapetula bua bishima bia bungi biakenzeka munkatshi muabu.

30 Bua nanku bakenzela bukola ne bukôkeshi pa mutu pa bayidi ba Yezu bavua bashala nabu, ne bakabela mu buloko; kadi ku bukola bua dîyi dia Nzambi, divua munda muabu, maloko yakapandika mu bipesa bibidi, ne bakaya benza bishima bikola munkatshi muabu.

31 Nansha nanku, ne nansha muvuaku bishima bionsu ebi, bantu bakapapisha mitshima yabu, ne bakakeba bua kubashipa, mena bu muakakeba Bena Yuda ku Yelushalema bua kushipa Yezu, bilondeshila ku muaku wenda.

32 Ne bakabela mu bikutu bia kapia, ne bakapatukamu kabayi bôshika nansha kakesa to.

33 Ne bakabela kabidi mu bina bia nyama ya lonji, ne bakanaya ne nyama ya lonji mena bu mutu muana unaya ne muana wa Mukoku; ne bakapatuka munkatshi muayi, kabayi bapetakana ne bualu nansha bumua to.

34 Nansha nanku, bantu bakapapisha mitshima yabu, bualu bakuidi ne bambi ba mafi ba bungi bavua babasaka bua kuasa ma’ekelezia a bungi, ne bua kuenza mishindu yonsu ya malu a bubi. Ne bakatûta bantu ba Yezu; kadi, bantu ba Yezu kabakabatûta pabu to. Ne nanku bakashinguluka mu dipanga dia ditabuija ne bubi, ku tshidimu ne ku tshidimu tô ne pakapita bidimu nkama ibidi ne makumi asatu.

35 Ne mpindiewu biakalua ne mu tshidimu etshi, eyowa, mu tshidimu tshia nkama ibidi ne makumi asatu ne tshimua, kuvua ditapulukangana dinena munkatshi mua bantu.

36 Ne biakalua ne mu tshidimu etshi kuakajuka bantu bakabikidibua ne Bena Nefi, ne bavua bikala bitabuiji balelela mu Kilisto; ne munkatshi muabu kuvua bavua Bena Lamana babikila ne Bena Yakoba, Bena Yosefe, ne Bena Zolama;

37 Bua nanku bitabuiji balelela mu Kilisto, ne batendeledi balelela ba Kilisto, (ba munkatshi muvua bayidi ba Yezu bâshala) bavua babikidibua ne Bena Nefi, ne Bena Yakoba, ne Bena Yosefe, ne Bena Zolama.

38 Ne biakalua ne bakabenga lumu luimpa bakabikidibua ne Bena Lamana, ne Bena Lemuele, ne Bena Yishemaela; ne kabakashinguluka mu dipanga dia ditabuija to, kadi bakatombokela lumu luimpa lua Kilisto ku disua diabu; ne bakalongesha bana babu ne kabitabuiji to, mena bu muvua batatuabu, kumbukila ku mbangilu, bavua bashinguluka.

39 Ne bivua bua bubi ne malu mapita bubi bia batatuabu, mena bu muvuabi ku mbangilu. Ne bakabalongesha bua kukina bana ba Nzambi, mena bu muvuabu balongesha Bena Lamana bua kukina bana ba Nefi kumbukila ku mbangilu.

40 Ne biakalua ne bidimu nkama ibidi ne makumi anayi ne binayi biakapita, ne ki muvua malu a bantu nanku. Ne tshitupa tshinena tshia bantu ba bubi tshiakakolakana, ne tshiakalua tshia bungi kupita bungi bua bantu ba Nzambi.

41 Ne bakatshitungunuka kudiashila ma’ekelezia, ne ku’alengeja ne mishindu yonsu ya bintu bia mushinga mukola. Ne ki muakapita bidimu nkama ibidi ne makumi atanu nanku, ne bidimu nkama ibidi ne makumi asambombo kabidi.

42 Ne biakalua ne tshitupa tshia bubi tshia bantu tshiakabanga kabidi kupingaja diditshipa dia mu musokoku ne bipungidi bia Gadiantona.

43 Ne bantu kabidi bavua babikidibua ne bantu ba Nefi bakabanga kuikala baditambishi mu mitshima yabu, bua bualu bua mabanji abu mapita, ne bakabanga kulua bena lumu bu muvua bana babu, Bena Lamana.

44 Ne katshia ku tshikondu etshi bayidi bakabanga kunyingalala bua mibi ya ba pa buloba.

45 Ne biakalua ne kunyima kua bidimu nkama isatu bipita, bantu ba Nefi ne Bena Lamana bakalua ne bantu ba bubi menamena ewu bu mudi ewu.

46 Ne biakalua ne banyengi ba Gadiantona bakatangalaka pa mpala onsu wa bulaba; ne kakuvua muntu nansha umua uvua muikala muakana to amu pa kumbusha bayidi ba Yezu. Ne bakalama ngolo ne mpalata yabu ya bungi mu tshibutshilu, ne bakenda mushinga wa mushindu onsu.

47 Ne biakalua ne kunyima kua bidimu nkama isatu ne bitanu bipita, (ne bantu batshivua mu bubi) Amosa wakafua; ne muanabu wa baluma, Amalona, wakalama miandiku pa muaba wenda.

48 Ne biakalua ne pakapita bidimu nkama isatu ne makumi abidi, Amalona, muikala muenzejibua kudi Nyuma wa Tshijila, wakasokoka miandiku ivua mikala ya tshijila—eyowa, mena miandiku yonsu ya tshijila ivua mifidibua ku lukongu lua bantu lumua ne kudi lukuabu, ivua mikala ya tshijila—mena tô ne ku tshidimu tshia nkama isatu ne makumi abidi katshia ku dilua dia Kilisto.

49 Ne wakabisokoka kudi Mukalenga, bua ne bilua kabidi kudi tshishadi tshia nzubu wa Yakoba, bilondeshila ku mambi ne malaya a Mukalenga. Ne ki mudi ndekelu wa miandiku ya Amalona nanku.