Shapita 7
Yakoba udi utungunuka kubala ku Yeshaya: Yeshaya udi wakula bua Mashiya—Mashiya neikala ne ludimi lua bamanyi—Neafila nyima wenda kudi batûtshi—Kakubuejakajibua to—Fuanyikija ne Yeshaya 50. Pabuipi ne 559–545 k.d.K.
1 Eyowa, bualu nanku Mukalenga udi wamba: Ndi mukuipata, anyi ndi mukulekela bua kashidi anyi? Bualu nanku Mukalenga udi wamba: Mukanda wa dishipa dia dibaka dia mamuenu udi penyi? Kudi nganyi kundi mukuipata, anyi kudi nganyi wa basombeshi banyi kundi munupanyisha? Eyowa, kundi nganyi kundi munupanyisha? Monayi, bua malu mabi enu nudi badipanyisha nkayenu, disambuka dia mikenji dienu mamuenu udi muipatshibua.
2 Pananku, pangakalua, kakuvua muntu to; pangakabikila, kakuvua nansha umua bua kuandamuna to. Ô nzubu wa Isalele, tshianza tshianyi tshidi tshipishibua mena bua ne katshiena mua kusungila, anyi ntshiena ne bukola bua kupatuisha anyi? Monayi, ku disamina dianyi ndi ngumisha mbuwa, ndi ngenza misulu yabu tshipela ne mishipa yabu inunka bibi bua bualu bua mâyi adi makama, ne idi ifua bua bualu bua nyota.
3 Ndi mvuadika diûlu ne bufîka, ne ndi ngenza bikunyi tshibuikilu tshiadi.
4 Mukalenga Nzambi udi mumpesha ludimi lua bamanyi, bua mmanya mua kuakula dîyi mu tshikondu kûdi, Ô nzubu wa Isalele. Panudi batshioka udi ubisha ditshi dianyi dinda ne dinda. Udi ubisha ditshi dianyi bua kumvua bu bamanyi.
5 Mukalenga Nzambi udi munzulula ditshi dianyi, ne ntshiakatomboka to, anyi ntshiakapingana panyima to.
6 Ngakafila nyima wanyi kudi mutûtshi, ne matama anyi kudi bakatula muedi. Tshiakasokoka mpala wanyi ku bundu ne mata to.
7 Bualu Mukalenga Nzambi neangambuluisha; bua nanku ntshiakubuejakajijibua to. Bua nanku ndi muteka mpala wanyi bu mudi lusoka, ne ndi mumanya ne ntshiakufua bundu to.
8 Ne Mukalenga udi pabuipi, ne udi umbingisha. Nganyi wakokangana nanyi? Tuimanayi pamua. Nganyi udi muluishi wanyi? Alua pabuipi nanyi, ne nemmutûta ne makanda a mukana muanyi.
9 Bualu Mukalenga Nzambi neangambuluisha. Ne bonsu bâmpîsha, monayi, bonsu nebalua bakulakaja bu tshilamba, ne musuasua neubadia.
10 Nganyi udi munkatshi muenu udi utshina Mukalenga, udi utumikila dîyi dia musadidi wenda, udi wenda mu mîdima ne kayi ne bukenka to?
11 Monayi nuenu bonsu badi batemesha kapia, badi badijingulula ne tuntolantola, endayi mu bukenka bua kapia kenu ne mu tuntolantola tunudi batemesha. Etshi nenupeta ku tshianza tshianyi—nenulala panshi ne kanyinganyinga.