1 Dîyi diakamona Yeshaya, muana wa baluma wa Amoza, bitangila Yuda ne Yelushalema:

2 Ne nebilua mu matuku a ndekelu, pâshindamijibua mukuna wa nzubu wa Mukalenga ku misongu ya mikuna, ne pâbandishibua kupita tukuna, ne pâbumbuka bisamba bionsu kudiwu.

3 Ne bantu ba bungi nebaya ne bamba, Luayi, ne tubandayi ku mukuna wa Mukalenga, ku nzubu wa Nzambi wa Yakoba; ne neatulongesha njila yenda, ne netuenda mu njila yenda; bualu kumbukila ku Siona mikenji neiya, ne dîyi dia Mukalenga kumbukila ku Yelushalema.

4 Ne nealumbuluisha munkatshi mua bisamba, ne neatandisha bantu ba bungi: Ne nebatûtakaja miela yabu ya mvita ilua ya madimi, ne mafuma alua kupunga nawu—tshisamba katshiakubandila kabidi tshikuabu muela wa mvita to, ne kabakulonga kabidi mvita nansha.

5 Ô nzubu wa Yakoba, luayi ne tuendayi mu bukenka bua Mukalenga; eyowa, luayi, bualu nudi bonsu bapambuka, yonsu mu njila yenda ya bubi.

6 Bua nanku, Ô Mukalenga, udi mulekela bantu beba, nzubu wa Yakoba, bualu bua badi buwujibua ne bia ku esete, ne badi bateleja kudi bena lubuku bu mudi Bena Peleshete, ne badi badisankishila mu bana ba benyi.

7 Bulaba buabu kabidi budi buwula ne mpalata ne ngolo, anyi kakuena ndekelu wa biuma biabu to; bulaba buabu budi buwula kabidi ne tubalu, ne kakuena kabidi ndekelu wa matempu a mvita abu to.

8 Bulaba buabu budi buwula ne mpingu; badi batendelela mudimu wa bianza biabu, idi minu yabu nkayabu mienza.

9 Ne muntu mupuekela kena winama to, ne muntu munena kena udipuekesha to, bua nanku kumubuikididi to.

10 Ô nuenu bena bubi, buelayi mu dibua, ne sokomayi mu lupuishi, bualu bôwa bua Mukalenga ne butumbi bua bunema buenda nebukutûta.

11 Ne nebilua ne ntangidilu wa diambu wa muntu neapuekeshibua, ne didisua dia bantu nedinamishibua, ne amu Mukalenga nkayenda neazanjikibua mu dituku adi.

12 Bualu dituku dia Mukalenga wa Misumba dilualua katataka pa bisamba bionsu, eyowa, pa mutu pa muntu yonsu; eyowa, pa mutu pa baditambishi ne badiambi, ne kudi muntu yonsu udi mubandishibua, ne neavuishibua panshi.

13 Eyowa, ne dituku dia Mukalenga nedilua pa mitshi yonsu ya cedre ya mu Lebanona, bualu idi mila ne mibandishibua, ne pa nsanga yonsu ya mu Bashana;

14 Ne pa mikuna yonsu mila, ne pa tukuna tonsu, ne pa bisamba bionsu bidi bibandishibua, ne pa bantu bonsu;

15 Ne pa kaleya kala konsu, ne pa tshimanu tshikolesha tshionsu;

16 Ne mu mâtu onsu a mu mbuwa, ne mu mâtu onsu a mu Tâshishi, ne pa bindidimbi bionsu bimpa.

17 Ne diambu dia muntu nedinamishibua, ne didisua dia bantu nedipuekeshibua; ne amu Mukalenga nkayenda neazanjikibuamu dituku adi.

18 Ne mpingu neajikija yonsu.

19 Ne nebaya mu masoso a mbuebua, ne mu ntoka ya mu buloba, bualu bôwa bua Mukalenga nebulua pa mutu pabu ne butumbi bua bunema buenda nebubatûta, pajukaye bua kunyungusha buloba bikola.

20 Mu dituku adi muntu neimansha mpingu yenda ya mpalata ne mpingu yenda ya ngolo, idiye muenza buenda nkayenda bua kutendelela, kudi bibulabula ne kudi midima;

21 Bua kuya mu mitanta ya mabua, ne ku misongu ya mabua matua, bualu bôwa bua Mukalenga nebulua pa mutu pabu ne bunema bua butumbi buenda nebubatûta, pajukaye bua kunyungusha buloba bikola.

22 Lekelayi kueyemena kudi muntu, udi ne mueyelu mu mimpempa yenda ya diulu; bualu udi bua kubadibua ku tshinyi?