Shapita 22
Mu dituku dia tshikondu tshia bidimu tshinunu bantu bonsu nebasamuna Mukalenga—Neikadila munkatshi muabu—Fuanyikijayi ne Yeshaya 12. Pabuipi ne 559–545 k.d.K.
1 Ne mu dituku adi newamba: Ô Mukalenga, nenkusamuna; nansha muwuvua mumfîkila tshiji, tshiji tshieba tshiakudimuki, ne wansambi.
2 Mona, Nzambi udi lupandu luanyi; nengeyemena, ne tshiakumvua bôwa to; bualu Mukalenga Yehowa udi makanda anyi ne musambu wanyi; walu kabidi lupandu luanyi.
3 Bua nanku, ne disanka nenutunta mâyi mu bina bia mâyi bia lupandu.
4 Ne mu dituku adi nenuamba: Samunayi Mukalenga, bikilayi dîna dienda, manyishayi bienzedi bienda munkatshi mua bantu, ambayi ne dîna dienda ndibandishibua.
5 Imbayi kudi Mukalenga; bualu udi muenza bimpa kupita; etshi ntshimanyibua pa buloba bonsu.
6 Bila bikola ne ela sama, wewa muena mu Siona; bualu munena udi Wa Tshijila wa Isalele munkatshi mueba.