1 Ne mpindiewu monayi, bana betu bananga, ndi musua kuakula kunudi; bualu, mema, Nefi, ntshiena musua kushiya ne nutshinka ne nudi bakana kupita muikala Bena Bisamba bia Benda to. Bualu monayi, pa kumbusha nenulama mikenji ya Nzambi nenufua bonsu momumua; ne bua bualu bua mêyi adi mikala makudibua kanuena kutshinka ne Bena Bisamba bia Benda nebabutuka bonsu to.

2 Bualu monayi, ndi ngamba kunudi ne bonsu ba ku Bena Bisamba bia Benda bakudimuna mutshima badi bantu ba tshipungidi ba Mukalenga; ne bonsu ba bena Yuda babenga kukudimuna mutshima nebakoshibua; bualu Mukalenga kena wenza tshipungidi nansha ne umua to, amu bikalabi ne badi bakudimuna mutshima ne bitabuija Muanenda, udi Wa Tshijila wa Isalele.

3 Ne mpindiewu, ndi musua kuamba ku Nyuma kakesa kupita bitangila bena Yuda ne Bena Bisamba bia Benda. Bualu, kunyima kua mukanda undi muakuila ewu mulua, ne mufundibua bua Bena Bisamba bia Benda, ne mukangibua kabidi bua Mukalenga, nekuikala ba bungi bitabuija mêyi adi mafundibua; ne nebalua nawu kudi tshishadi tshia ndelanganyi yetu.

4 Ne pashisha tshishadi tshia ndelanganyi yetu netshimanya bitutangila, munyi mutuakapatuka mu Yelushalema, ne badi tunkanunuina tua bena Yuda.

5 Ne lumu luimpa lua Yezu Kilisto nelumanyishibua munkatshi muabu; pananku, nebapingajibua ku dimanya dia batatuabu, ne kabidi ku dimanya dia Yezu Kilisto, divua dikala munkatshi mua batatuabu.

6 Ne pashisha nebasanka; bualu nebamanya ne tshidi dibenesha kudibu dia ku tshianza tshia Nzambi; ne bilamulamu biabu bia mîdima nebibanga kupona ku mesu abu; ne nkongu ya bungi kayakupita munkatshi muabu to, amu balua bantu badi bakezuka ne balengela.

7 Ne nebilua ne bena Yuda badi batangalaka pabu nebabanga kuitabuija mu Kilisto; ne nebabanga kudisangisha pa mpala wa bulaba; ne bungi bonsu buitabuija Kilisto nebulua pabu balengela.

8 Ne nebilua ne Mukalenga Nzambi neatuadija mudimu wenda munkatshi mua bisamba bionsu, bisa bionsu, miakulu yonsu, ne bantu bonsu, bua kutuala dipinguluja dia bantu benda pa buloba.

9 Ne ne buakana Mukalenga Nzambi nealumbuluisha bapela, ne adiwula ne bujalama bua batudiji ba pa buloba. Ne neatûta buloba ne mulangala wa mukana muenda; ne ne mueyelu wa ku mishiku yenda neashipa muena bubi.

10 Bualu tshikondu tshidi tshilua lubilu dikala tshienzeja Mukalenga Nzambi ditapuluka dinena munkatshi mua bantu, ne bena bubi neabutula; ne neepelesha bantu benda, eyowa, mena bikalabi ne udi ne tshia kubutula bena bubi ku kapia.

11 Ne buakana nebuikala mukaba wa mu tshimonu tshienda, ne lulamatu mukaba wa mu tshimonu tshienda.

12 Ne pashisha mubuabua neusomba ne muana wa mukoku; ne nkashama nealala panshi ne muana wa mbuji, ne muana wa ngomba, ne muana wa ntambua, ne nyama wa manyi, pamua; ne muana muteketa neabalombola.

13 Ne ngomba mukaji ne muzewu nebadia; bana babu nebalala panshi pamua; ne ntambua neadia bisosa bu mudi ngomba.

14 Ne muana udi wamua neanaya pa buina bua nyoka wa dikâla, ne muana ukadi mulekela kuamua neateka tshianza tshienda pa tshina bua ntoka.

15 Kabakubenzela bibi anyi kubutula mu mukuna wanyi wa tshilija onsu to; bualu buloba nebuikala buwula ne dimanya dia Mukalenga bu mâyi abuikila mbuwa.

16 Pananku, malu a bisamba bionsu neamanyibua; eyowa, malu onsu neamanyibua kudi bana ba bantu.

17 Kakuena bualu budi mu musokoku buapanga kubuluibua to; kakuena mudimu wa mu mîdima wapanga kumueneshibua mu bukenka to; ne kakuena tshintu tshidi tshisuikibua pa buloba to tshiapanga kusuludibua.

18 Bua nanku, malu onsu adi mikala abuluidibua kudi bana ba bantu neikala dituku adi mabuluidibua; ne Satana kakuikala kabidi ne bukola pa mitshima ya bana ba bantu to, bua tshikondu tshila. Ne mpindiewu, bana betu bananga, ndi ngajikiji apa kuakula kuanyi.