1 Ne biakalua ne mu matuku a Ahaza, muana wa baluma wa Yotama, muana wa baluma wa Uziya, mfumu wa Yuda, Lesine, mfumu wa Sulia, ne Peka, muana wa baluma wa Lemalaya, mfumu wa Isalele, bakabanda batangila ku Yelushalema bua kumuluisha, kadi kabavua mua kumutshimuna to.

2 Ne bakabuambila nzubu wa Davidi, bamba: Sulia udi musangana ne Efelayima. Ne mutshima wenda wakanyunga, ne mutshima wa bantu benda, bu mitshi ya muitu idi inyungushibua ne lupepela.

3 Pashisha Mukalenga wakamba kudi Yeshaya: Ndâku mpindiewu bua kusambakena ne Ahaza, wewa ne Sheayashuba muaneba wa baluma, ku ndekelu kua tshipitshilu tshia mâyi tshia dijiba dia ku mutu mu tshibeba tshia mpata wa muvuwi wa bilamba;

4 Ne amba kudiye: Dimuka, ne ikala talalâ; kutshinyi to, anyi mutshima weba kawutshioki bua bualu bua nsongu ya bimunyi bia muishi ebi bibidi to, bua tshiji tshikola tshia Lesine ne Sulia, ne tshia muana wa baluma wa Lemalaya.

5 Bualu bua Sulia, Efelayima, ne muana wa baluma wa Lemalaya, badi bakuelela tshifufu tshibi, bamba:

6 Tubandilayi Yuda ne tumutatshisha, ne tubuelelamu buetu, ne tuteka mfumu munkatshi muamu, eyowa, muana wa baluma wa Tabele.

7 Nanku Mukalenga Nzambi udi wamba: Kabuakutua, anyi kabuakwenzeka to.

8 Bualu mutu wa Sulia udi muikala Damaseke, ne mutu wa Damaseke udi muikala Lesine; ne mu bidimu makumi asambombo ne bitanu Efelayima neakosebua bua ne kakuikala kabidi tshisamba tshia bantu to.

9 Ne mutu wa Efelayima udi muikala Samaleya, ne mutu wa Samaleya udi muikala muana wa baluma wa Lemalaya. Binuabenga kuitabuija bushuwa kanuakushindamijibua to.

10 Bia bungi kupita, Mukalenga wakakula kabidi kudi Ahaza, wamba:

11 Lomba wewa tshimanyinu kudi Mukalenga Nzambi weba; tshilomba nansha mu ndondu, anyi kûlu mûlu.

12 Kadi Ahaza wakamba: Ntshiakulomba, anyi ntshiakutêta Mukalenga to.

13 Ne wakamba: Umvuayi mpindiewu, Ô nzubu wa Davidi; budi bualu bukesa bua nuenu kutshiokesha bantu, kadi nenutshiokesha Nzambi wanyi kabidi anyi?

14 Bua nanku, Mukalenga nkayenda neanupesha tshimanyinu—monayi, utshidi kamama neimita, ne nealela muana wa baluma, ne neabikila dîna dienda ne Imanuele.

15 Manteka ne buitshi neadia, bua amanya kubenga bubi ne kusungula buimpa.

16 Bualu kumpala kua muana kumanya kubenga bubi ne kusungula buimpa, bulaba budi ukina nebulekedibua kudi bubidi bua bamfumu babu.

17 Mukalenga neatuala pa mutu peba, ne pa mutu pa bantu beba, ne pa mutu pa nzubu wa tatueba, matuku atu kâyi manji kulua to katshia ku dituku diakapatuka Efelayima, mfumu wa Ashû, ku Yuda.

18 Ne nebilua mu dituku adi ne Mukalenga neela kashiba bua lujiji ludi mu tshitupa tshia kula kupita tshia Ejipitu, ne bua lubulubulu ludi mu bulaba bua Ashû.

19 Ne neilua, ne neikishila yonsu mu bibanda bitupu, ne mu masoso a mbuebua, ne pa mêba onsu, ne pa bisosa bionsu.

20 Mu dituku adi Mukalenga neakungula ne kapaya kadi kasomba, kudibu dinsambu dia musulu, kudi mfumu wa Ashû, mutu, ne nsuki ya makasa; ne nebivingutula kabidi muedi.

21 Ne nebilua mu dituku adi, muntu neadisha muana wa ngomba ne mikoku ibidi;

22 Ne nebilua, bua buvula bua mabela apatulayi neadia manteka; bualu yonsu udi mushala mu bulaba neadia manteka ne buitshi.

23 Ne nebilua mu dituku adi, muaba onsu uvua muikala mitshi ya mvinyo tshinunu mikala bua bitshiela bia mpalata tshinunu, newikala bua mingonga ne mêba.

24 Ne miketa ne ne mata bantu nebaluaku, bualu bua bulaba bonsu nebulua mingonga ne mêba.

25 Ne tukuna tonsu netumbudibua ne kakasu, kakuakuluaku bôwa bua mingonga ne mêba to; kadi newikala bua kupatula ngomba, ne tshidiatshilu tshia nyama mikesa.