1 Kadi monayi, nekuikala ba bungi—mu dituku adi pângatuadija kuenza mudimu wa dikema munkatshi muabu, bua ne mvuluka bipungidi bianyi bindi muenza kudi bana ba bantu, bua ne ngela tshianza tshianyi kabidi musangu muibidi bua kuangatulula bantu banyi, badi bikala ba mu nzubu wa Isalele;

2 Ne kabidi, bua ne mvuluka malaya amvua mulaya kûdi, Nefi, ne kabidi kudi tatueba, bua ne nemvuluka ndelanganyi yenu; ne bua ne mêyi a ndelanganyi yenu neapatukila mukana muanyi aya kudi ndelanganyi yenu; ne mêyi anyi neela kashiba ne ku ndekelu ya buloba, bua tshimanyinu kudi bantu banyi, badi ba mu nzubu wa Isalele;

3 Ne bua bualu bua mêyi anyi neela kashiba—ba bungi ba Bena Bisamba bia Benda nebamba: Bibiliya! Bibiliya! Tudi ne Bibiliya, ne kakuena mua kuikala Bibiliya mukuabu to.

4 Kadi nanku Mukalenga Nzambi udi wamba: Ô bapota, nebikala ne Bibiliya; ne neapatukila kudi bena Yuda, bantu banyi ba tshipungidi tshia kala. Ne tuasanka kayi tudibu natu bua bena Yuda bua Bibiliya udibu bapetela kudibu? Eyowa, Bena Bisamba bia Benda badi bumvuija tshinyi? Badi bavuluka mpaji, ne midimu, ne ntatu bia bena Yuda, ne dinanukila diabu kundi, mu dituala lupandu kudi Bena Bisamba bia Benda anyi?

5 Ô nuenu Bena Bisamba bia Benda, nudi bavuluka bena Yuda, bantu banyi ba tshipungidi tshia kala anyi? To; kadi nudi babatshipa, ne babakina, ne kanuena bakeba bua kubangatulula to. Kadi monayi, nempingaja malu onsu â pa mitu yenu nkayenu; bualu mema Mukalenga ntshiena mupua bantu banyi moyo to.

6 Wewa mupota, wamba: Bibiliya, tudi ne Bibiliya, ne katuena ne dijinga dia Bibiliya mukuabu to. Nudi bapeta Bibiliya kabiyi bua bena Yuda anyi?

7 Kanuena bamanya ne kudi bisamba kupita tshimua anyi? Kanuena bamanya ne mema, Mukalenga Nzambi wenu, ndi mufuka bantu bonsu, ne ndi mvuluka badi pa bidila bia mu mbuwa; ne ndi nkokesha mu diûlu mûlu ne panshi pa buloba; ne ndi ntuala dîyi dianyi kudi bana ba bantu, eyowa, mena pa bisamba bionsu bia pa buloba anyi?

8 Bua tshinyi nudi nunungana, bualu bua ne nenupeta dîyi dianyi dikuabu anyi? Kanuena bamanya ne bujadiki bua bisamba bibidi budi njadikilu kunudi ne ndi Nzambi, ne ndi mvuluka tshisamba tshimua bu mudi tshikuabu anyi? Bua nanku, ndi ngamba mêyi a momumua kudi tshisamba tshimua bukudi tshikuabu. Ne pâtuilangana bisamba pamua bujadiki bua bisamba bibidi nebutuilangana pamua kabidi.

9 Ne ndi ngenza nanku bua kujadika kudi ba bungi ne ndi momumua makelela mushala, lelu, ne bua kashidi; ne ndi ngakula mêyi anyi bilondeshila ku nsankilu wanyi nkayanyi. Ne bualu ndi muakula dîyi dimua kanuena kutshinka to ne ntshiena mua kuakula dikuabu to; bualu mudimu wanyi kawena muanji kujika to; nansha kawakujika to tô ne ku ndekelu wa muntu, nansha ku tshikondu atshi tô ne bua kashidi.

10 Pananku, bualu bua nudi ne Bibiliya kanutshinki ne udi muikala ne mêyi anyi onsu to; nansha kanutshinki ne ntshiena mufundishisha makuabu to.

11 Bualu ndi mpesha bantu bonsu mukenji, konsu ku esete ne ku wesete, ne ku node, ne ku sude, ne ku bidila bia mu mbuwa, ne bafunda mêyi andi ngakula kudibu; bualu mu mikanda yafundibua nendumbuluishila ba pa buloba, muntu yonsu bilondeshila ku midimu yenda, bilondeshila ku tshidi tshifundibua.

12 Bualu monayi, nengakula kudi Bena Yuda ne nebatshifunda; ne nengakula kabidi kudi Bena Nefi ne nebatshifunda; ne nengakula kabidi kudi bisa bikuabu bia ku nzubu wa Isalele, bindi mulombola kula, ne nebatshifunda; ne nengakula kabidi kudi bisamba bionsu bia pa buloba ne nebatshifunda.

13 Ne nebilua ne Bena Yuda nebikala ne mêyi a Bena Nefi, ne Bena Nefi nebikala ne mêyi a bena Yuda; ne bena Nefi ne bena Yuda nebikala ne mêyi a bisa bijimina bia Isalele; ne bisa bijimina bia Isalele nebikala ne mêyi a bena Nefi ne a bena Yuda.

14 Ne nebilua ne bantu banyi, badi ba mu nzubu wa Isalele, nebasangishibua kuabu ku malaba adibu basamu; ne dîyi dianyi nedisangishibua padi pamua. Ne nendeja kudi badi baluisha dîyi dianyi ne baluishi bantu banyi, badi ba ku nzubu wa Isalele, ne ndi Nzambi, ne ndi muenza tshipungidi ne Abalahama ne nemvuluka ndelanganyi yenda bua kashidi.