1 Bualu monayi, Mukalenga, Mukalenga wa Misumba, udi unyenga kudi Yelushalema, ne kudi Yuda, tshikuatshishi ne tshieyemenu, tshieyemenu tshijima tshia diampa, ne tshikuatshishi tshijima tshia mâyi—

2 Muntu wa bukitu, ne muntu wa mvita, mulumbuluishi, ne muambi, ne mutalama, ne mukulu;

3 Kapita ka makumi atanu, ne wa kunemekela, ne mubedi, nensenda mudimuka, ne muakudi mukola.

4 Ne nembapesha bana bua kuikala bakalenga babu, ne bana bateketa nebabakokesha.

5 Ne bantu nebakengeshibua, muntu yonsu kudi mukuabu; ne yonsu kudi mukuenda; muana neikala ne nsombelu wa diditambisha kudi mukulu, ne muntu wa panshi kudi wa kunemekela.

6 Pâkuata muntu muanabu wa baluma wa mu nzubu mua tatuenda, ne pâmbaye: Udi ne tshilamba, ikala mukokeshi wetu, ne kulekedi kabutu aka kalua muinshi mua tshianza tshieba to—

7 Mu dituku adi neaditshipa, wamba ne: Ndi mbenga kuikala môndopi, bualu mu nzubu muanyi kamuena nansha diampa anyi tshilamba; kanunteki mukôkeshi wa bantu to.

8 Bualu Yelushalema udi mubutuka, ne Yuda udi mupona, bua bualu bua ndimi yabu ne bienzedi biabu bidi bikala bitombokela Mukalenga, bua kuyobola mesu a butumbi buenda.

9 Muenekelu wa mpala wabu udi ubapîsha, ne udi umanyisha mibi yabu kuikala mena bu Sodoma, ne kabena mua kuyisokoka to. Diakabi kudi anyima yabu, bualu badi badifuta bubi nkayabu!

10 Amba kudi bakana ne bidi bimpa buabu; bualu nebadia tshimuma tshia bienzedi biabu.

11 Diakabi kudi bena bubi, bualu nebafua; bualu difutu dia bianza biabu nedikala pa mutu pabu!

12 Ne bantu banyi, bana badi bikala bakengeshi babu, ne bakaji badi babakokesha; Ô bantu banyi, badi banulombola badi banutupakaja ne banyangakaja ngikadilu wa njila yenu.

13 Mukalenga udi wimana kûlu bua kulumbuluila, ne wimana bua kulumbuluisha bantu.

14 Mukalenga neabuela mu tshilumbuluilu ne bakulu ba bantu benda ne bakalenga babu; bualu nudi badia budimi bua mvinyo bonsu ne binyengibu bia mupela mu nzubu yenu.

15 Nudi nuamba tshinyi? Nudi nutshibula bantu banyi bitupa, ne nudi nuboza mpala ya bapela, Mukalenga wa Misumba udi wamba.

16 Kabidi, Mukalenga udi wamba ne: Bua bualu bua bana ba bakaji ba Siona badi baditambishi, ne benda ne nshingu miôlola ne mesu maladika, benda ne bazunzuka mudibu baya, ne badidisha bikanu ne makasa abu—

17 Bua nanku Mukalenga neatûta lubombu lua mutu wa bana ba bakaji ba Siona ne nsudi, ne Mukalenga nealeja butaka buabu.

18 Mu dituku adi Mukalenga neanyanga dikima dia bikanu biabu idi idila, ne makondo a nsuki, ne bivungu bu mudi ngondu;

19 Bikanu bia mu nshingu ne bia ku maboku, ne bitambala;

20 Tufulu, ne bikanu bia ku makasa, ne nkamba ya ku mutu, ne tukopu tua manananshi, ne biakumatshi;

21 Mpeta, ne bikanu bia ku diulu;

22 Bivualu bia kushintulula, ne binkutu, ne bitambala bia mutu ne nshingu, ne bikudi;

23 Mmuenu, ne lin muimpa, ne bifulu ne bilulu bia kubuikila mpala.

24 Ne nebilua, pamutu pa mupuya muimpa nekuikala mupuya mubi; ne pamutu pa mukaba, kakusu; ne pamutu pa nsuki mienza bimpa, dibala; ne pamutu pa tshilamba tshia pa tshiadi, didijingila dia bikunyi; nsalu misadibua ne tshiamua tshidi tshiôsha pamutu pa bulengela.

25 Bantu baluma beba nebapona ku muela wa mvita, ne bena bukitu beba mu mvita.

26 Ne bibuelelu bienda nebitangakana ne bidila; ne neikala mutupu, ne neasomba pa buloba.