1 Bualu Mukalenga neafuila Yakoba lusa, ne utshiakasungula Isalele, ne neabateka mu bulaba buabu nkayabu; ne benyi nebasangishibua nabu, ne nebadilamata ku nzubu wa Yakoba.

2 Ne bantu nebabangata ne balua nabu ku muaba wabu; eyowa, kumbukila kula tô ne ku ndekelu ya buloba; ne nebapingana ku malaba abu a dilaya. Ne nzubu wa Isalele neasamu, ne bulaba bua Mukalenga nebuikala bua basadidi baluma ne basadidi bakaji; ne nebangata bu bakuatshibu bobu bavua babakuata; ne nebakokesha bavua bakengeshi babu.

3 Ne nebilua mu dituku adi ne Mukalenga neakupesha dikisha, ku kanyinganyinga keba, ne ku ditshina dieba, ne ku bupika bukola kuwuvua mukuenzejibua mudimu.

4 Ne nebilua mu dituku adi, ne neuya ne lusumuinu elu kudi mfumu wa ku Babulona, ne wamba: Munyi muakashikila mukengeshi, tshimenga tshia ngolo tshiakashikila!

5 Mukalenga udi mutshibula tshibonga tshia bena bubi, makombu a bakokeshi.

6 Yeya wakatûta bantu mu tshiji ne mikumu mitungunuka, yeya wakakokesha bisamba mu tshiji, udi ukengeshibua, ne nansha umua udi ukukandika.

7 Buloba bujima budi ne dikisha, ne budi ne ditalala; badi batudika mu kuimba.

8 Eyowa, mitshi ya cyprès idi isanka bua dibutuka dieba, ne kabidi mitshi ya cèdre ya ku Lebanona, yamba: Katshia wapuekeshibua, mushimbudi nansha umua kena mulua kututapa to.

9 Ngena wa muinshi mua bulaba wanyungushibu bueba bua kukuakidila ku dilua dieba; udi usonsola bafua bueba, mena ba banena bonsu ba pa buloba; udi mujula pa nkuasa ya butumbi bamfumu bonsu ba bisamba.

10 Bonsu nebakula ne bamba kûdi: Udi peba mulua muteketa bu tuetu anyi? Udi mulua bu mutudi anyi?

11 Bunena bueba buapuekeshibu mu lukita; mutoyi wa nzenza yeba kawena umvuika to; bikusu biatangalakanyi muinshi mueba, ne bikusu biakubuikidi.

12 Wamonyi muwaponyi kumbuka mu diûlu, Ô Lusifele, muana wa mu lunkelu! Ûpudibu panshi, wakatekesha bisamba!

13 Bualu udi muamba mu mutshima weba: Nembanda kûlu mu diûlu, nembandisha nkuasa wanyi wa butumbi kupita mitoto ya Nzambi; nensomba pa mukuna wa tshisangilu, ku nseka ya ku node;

14 Nembanda kûlu kupita bula bua mavuba; nengikala bu mudi Mutamba Bunena.

15 Kadi neupuekeshibua mu ngena, ku nseka ya tshina.

16 Badi bakumona nebatangila pabuipi kûdi, ne bakunanela meji, ne bamba: Ewu muntu wakazakeja buloba, wakabukula makalenga anyi?

17 Ne kuvuija buloba bu tshipela, ne kubutula bimenga biapu, ne kakunzulula nzubu wa bena lukanu benda anyi?

18 Bamfumu bonsu ba bisamba, eyowa, bonsu buabu, badi balala mu butumbi, yonsu wabu mu nzubu muenda.

19 Kadi udi muimanshibua pambelu pa lukita lueba bu mudi ditamba dipita bubi, ne tshishadi tshia badi bashibeyibua, batubudibua ne muela wa mvita, badi bapueka ku mabua a mu tshina; bu tshitalu tshidiatakajibua mu makasa.

20 Kuakusangishibua nabu mu dijîkibua to, bua bualu bua udi mubutula bulaba bueba ne mushibeya bantu beba; ndelanganyi ya benji ba bibi kayakumanyibua to.

21 Longololayi kushipa bua bana benda bua malu mabi a batatuabu, bua kabajuki, anyi bashi mu bulaba, anyi buwuji mpala wa buloba ne bimenga to.

22 Mukalenga wa Misumba udi wamba ne: Bualu nenjuka bua kubaluisha; Mukalenga udi wamba ne: Ne nenshipa dîna, ne tshishadi, ne muana wa baluma, ne muana wa baluma wa muanabu kudi Babulona.

23 Mukalenga wa Misumba udi wamba ne: Nemuenza kabidi muaba wa nkesa, ne bisensa bia mâyi; ne nemmukomba ne lukombu lua dibutula.

24 Mukalenga wa Misumba udi muditshipa wamba: Bushuwa bu mundi muela meji buabi, nanku nebilua; ne bu mundi mulongolola, nanku nebienzeka—

25 Ne nentuala Muena Ashû mu bulaba buanyi, ne pa mikuna yanyi mmudiatakaja mu makasa; pashisha tshikokedi tshienda netshiumbuka kudibu, ne bujitu buenda nebumbuka pa makaya abu.

26 Etshi tshidi kipatshila kadi kalongolodibua bua buloba bujima; ne etshi tshidi tshianza tshidi tshiôlola pa bisamba bionsu.

27 Bualu Mukalenga wa Misumba uvua mulongolola, ne nganyi wakupula? Ne tshianza tshienda tshidi tshiôlola, ne nganyi watshikudimuna?

28 Mukiya ewu uvua mu tshidimu tshiakafua mfumu Ahaza.

29 Kusanki to, Peleshete mujima, bua bualu bua mulangala wa wakakutûta udi mutshibuka; bualu ku muji wa nyoka nekupatuka nyoka wa dikâla, ne mamuma enda neikala nyoka wa mbûka wa kapia.

30 Ne bana ba kumpala ba bapela nebadia, ne bakengi nebalala panshi kabayi ne njiwu to; ne nenshipa muji weba ne tshiyola, ne netshishipa tshishadi tshieba.

31 Ela mikunda, Ô tshibuelelu; bila, Ô tshimenga; wewa, Peleshete mujima, wamuangalaki; bualu nekuluila ku node muishi, ne nansha umua neikala nkayenda mu meba mamufundila.

32 Ntshinyi tshiandamuna pashisha batumibua ba bisamba? Ne Mukalenga udi muasa Siona, ne bapela ba bantu benda nebeyemena kudiyi.