1 Diakabi kudi badi bela mikenji idi kayiyi miakana to, ne bafunda dibungamija didibu bateka;

2 Bua kubengela bakengi tshilumbuluilu tshiakana, ne bua kunyenga bapela ba ku bantu banyi bunema, bua bakamba balua tshidibu batuila mesu, ne banyenga kudi bana ba nshiya!

3 Ne nenuenza tshinyi mu dituku dia dinyoka, ne mu kabutu kâvuila kula? kudi nganyi kunuanyemena bua diambuluisha? ne nkunyi kunuashiya butumbi buenu?

4 Nebakobama muinshi mua bena lukanu, ne nebapona muinshi mua bashipeyibua ntshiyiku to. Bua bionsu ebi tshiji tshienda katshiena tshikudimuka to, kadi tshianza tshienda tshitshidi tshiôlola.

5 Ô Muena Ashû, mulangala wa tshiji tshianyi, ne tshibonga mu tshianza tshiabu tshidi difîka munda diabu.

6 Nemmutuma bua kuluisha tshisamba tshia mpala ibidi, ne kuluisha bantu bandi nabu tshiji nemmupesha mudimu wa kuangata tshinyengibu, ne kuangata tshidibu bakuata, ne kubadiatakaja panshi bu mudi bitotshi bia mu njila.

7 Nansha nanku kena musua kuamba nanku to, nansha mutshima wenda kawena wela meji nanku to; kadi mu mutshima wenda bidi bua kubutula ne kukosa bisamba kabiyi bikesa to.

8 Bualu udi wamba: Bakalenga banyi kabena bonsu pamua bamfumu anyi?

9 Kaleno kena bu Kakemisha anyi? Hamata kena bu Apada anyi? Samaleya kena bu Damaseke anyi?

10 Bu muakajadika tshianza tshianyi makalenga a mpingu, ne mêna mpingu misonga yakatamba ya mu Yelushalema ne ya mu Samaleya;

11 Tshiakuenza, bu mungenzela kudi Samaleya, kabidi kuenza kudi Yelushalema ne mpingu yenda anyi?

12 Pananku nebilua ne penza Mukalenga mudimu wenda mujima pa Mukuna wa Siona ne pa mutu pa Yelushalema, nenyoka mamuma a mutshima wa bulobu wa mfumu wa Ashû, ne butumbi bua ntangidilu wa mûlu wenda.

13 Bualu udi wamba: Ku bukola bua tshianza tshianyi ne ku lungenyi luanyi ndi muenza malu â; bualu ndi mutalama; ne ndi mumbusha mikalu ya bantu, ne ndi munyenga biuma biabu, ne ndi mupuekesha benamu bu mudi muntu wa makanda;

14 Ne tshianza tshianyi tshiakajandula mabanji a bantu bu disua; ne bu muntu usangisha mayi adi malekelela ndi musangisha ba pa buloba bonsu; ne kakuvua nansha umua wakanyungusha dipuapua, anyi kunzulula mukana, anyi kutua mukemu to.

15 Tshisuyi netshiditumbisha kudi udi ushimbula natshi anyi? Nsele neadizanjika kudi udi upanda nenda anyi? Bu biadinyungusha mulangala kudi badi bawambula, anyi bu biadiambula tshibonga bu katshiyi mutshi to!

16 Bua nanku Mukalenga, Mukalenga wa Misumba, neatuma munkatshi mua ba manyi benda, tshinyanu; ne muinshi mua butumbi buenda neatemesha diôsha bu diôsha dia kapia.

17 Ne bukenka bua Isalele nebuikala bu kapia, ne Wa Tshijila wenda bu ludimi lua kapia, ne nelôsha ne nelubutula mêba enda ne mingonga yenda mu dituku dimua;

18 Ne neavingutula butumbi bua dîtu dienda, ne bua mpata mufuka wenda, bubidi bua anyima ne mubidi; ne nebikala bu padi muambudi wa dibendela utshioka.

19 Ne tshishadi tshia mitshi ya mu dîtu dienda netshikala tshikesa, bua ne muana udi mua kufunda bungi buayi.

20 Ne nebilua mu dituku adi, ne tshishadi tshia Isalele, ne badi bapanduka ba ku nzubu wa Yakoba, kabakueyemena kabidi kudi wakabatûta to, kadi nebeyemena kudi Mukalenga, Wa Tshijila wa Isalele, mu bulelela.

21 Tshishadi netshipingana, eyowa, mena tshishadi tshia Yakoba, kudi Nzambi wa Bukola.

22 Bualu nansha bantu beba Isalele bikala bu lusenga lua mbuwa, tshishadi tshiabu netshitshipingana; divingutuka dikenjika nedipumuka ne buakana.

23 Bualu Mukalenga Nzambi wa Misumba neenza divingutuka, mena dipangadikibua pa bulaba bonsu.

24 Bua nanku, Mukalenga Nzambi wa Misumba udi wamba: Ô bantu banyi badi bikadila mu Siona, kanumvu Muena Ashû bôwa to; neanutûta ne mulangala, ne neabandula mulangala wenda kunudi, ku mushindu wa Ejipitu.

25 Bualu difîka munda nedijika amu bua mutantshi mukesa bikola, ne tshiji tshianyi mu dibutuka diabu.

26 Ne Mukalenga wa Misumba neabisha tshimbu buenda bilondeshila ku dishipa dia Midiyana ku dibua dia Olebe; ne bu muvua mulangala wenda pa mbuwa momumua neaubandula ku mushindu wa mu Ejipitu.

27 Ne nebilua mu dituku adi ne bujitu buenda nebumbushibua pa dikaya dieba, ne tshikokedi tshienda netshiumbushibua ku nshingu kueba, ne tshikokedi netshibutuka bua bualu bua dilâba manyi.

28 Udi mulua ku Ayata, ne udi mupita ku Migelona; ku Mikemasha udi mutudila matempu enda.

29 Mbaya dishiya dia njila; badi bateka tshitudilu tshiabu ku Geba; Lama udi umvua bôwa; Gibea wa Shaula wanyemi.

30 Bandula dîyi, Ô muana wa bakaji wa Galima; enza ne diumvuika ku Layisha, Ô Anatota mukengi.

31 Mademana mmumbushibua; bena mu Gebima badi badisangisha bua kunyema.

32 Neashala kabidi ku Nobo dituku adi; neabukudila mukuna wa muana wa bakaji wa Siona tshianza tshienda, kakuna ka Yelushalema.

33 Monayi, Mukalenga, Mukalenga wa Misumba neakosa tshitamba ne ditshingisha; ne a mala neupudibua; ne badiambi nebapuekeshibua.

34 Ne neakosa bipuka bia mu mêtu panshi ne tshiamua, ne Lebanona neapona kudi wa bukitu.