1 Mu tshidimu tshiakafua mfumu Uziya, ngakamona kabidi Mukalenga musomba pa nkuasa wa butumbi, kûlu ne mubandudibua, ne kuinshi kua muzabi wenda kuwuja ntempelo.

2 Pamutu pawu pavua pimana baselafa; umua umua uvua ne mapuapua asambombo; ne abidi uvua mubuikila mpala wenda, ne ne abidi uvua mubuikila makasa enda, ne ne abidi wakabûka.

3 Ne umua wakabila kudi mukuabu, wamba: Munsantu, munsantu, munsantu ki Mukalenga wa Misumba; buloba bujima budi buwula ne butumbi buenda.

4 Ne makunji a tshibi akanyunga ku dîyi dia wakabila, ne nzubu wakula ne muishi.

5 Pashisha ngakamba: Diakabi didi kundi! bualu ngabutuki; bualu bua ndi muntu wa mishiku mikoya; ne ndi muikadila munkatshi mua bantu ba mishiku mikoya; bualu mesu anyi adi mamona Mfumu, Mukalenga wa Misumba.

6 Pashisha umua wa baselafa wakabûka kundi, muikala ne dikala ditema mu tshianza tshienda, divuaye muangata ne bikuatshilu ku tshiôshelu;

7 Ne wakaditeka pa mukana muanyi, ne wakamba: Tangila, etshi tshialengi mishiku yeba; ne malu mabi eba umbushibu ne mibi yeba yakupudibu.

8 Kabidi ngakumvua dîyi dia Mukalenga, diamba: Nganyi ungantuma, ne nganyi waya buetu? Pashisha ngakamba: Mema ewu; ntuma.

9 Ne wakamba: Ndâku ne wambila bantu aba—Umvuayi bushuwa, kadi kabakumvua to; ne tangilayi bulelela, kadi kabamona to.

10 Vuija mutshima wa bantu aba manyi, ne vuija matshi abu bujitu, ne jika mesu abu—bua kabalu kumona ne mesu abu to, ne kumvua ne matshi abu, ne kumvua ne mutshima wabu, ne kukudimuna moyo ne kôndopibua to.

11 Pashisha ngakamba: Mukalenga, bula kayi? Ne wakamba: Tô ne pikala bimenga tshianana kabiyi ne benamu, ne nzubu kayiyi ne muntu to, ne bulaba buikala butupu bujima;

12 Ne Mukalenga udi mumbusha bantu kubateka kula, bualu nekuikala dilekeledibua dinena munkatshi mua bulaba.

13 Kadi nekuikala kabidi tshia dikumi, ne nebapingana, ne nebadibua bu mutshi wa telebinta, ne bu mutshi wa nsanga miena moyo udi munda muayi padiyi imatshisha mabeji ayi; nanku ndelanganyi minsantu neikala moyo wayi.