1 Ne mpindiewu, mema, Moloni, ndi ntungunuka ne mifundu yanyi. Nanku, monayi, biakalua ne bua bipungidi bia mu musokoku bia Akishi ne balunda benda, monayi, bakatonkola bukalenga bua Omele.

2 Nansha nanku, Mukalenga uvua ne lusa kudi Omele, ne kabidi kudi bana benda ba baluma ne kudi bana benda ba bakaji bavua kabayi bakeba lufu luenda to.

3 Ne Mukalenga wakadimuisha Omele mu tshilota ne umbuka mu bulaba; bua nanku Omele wakumbuka mu bulaba ne dîku dienda, ne wakenza luendu matuku a bungi, ne wakalua ne wakapitshila pabuipi ne kakuna ka Shima, ne wakaluila pabuipi ne muaba uvua Bena Nefi babutuka, ne kubangilaku mutangila ku esete, ne wakalua ku muaba uvua ubikidibua ne Abaloma, pabuipi ne ku muelelu wa mbuwa, ne wakakuasa ntenta wenda, ne bana benda ba baluma ne bana benda ba bakaji pabu, ne bena mu nzubu wenda bonsu, amu pa kumbusha Yalede ne dîku dienda.

4 Ne biakalua ne Yalede uvua mulâbibua manyi bua kuikala mfumu ku mutu kua bantu, ku njila wa bubi; ne wakapesha Akishi muanenda wa bakaji bu mudi mukaji wenda.

5 Ne biakalua ne Akishi wakakeba moyo wa tatuenda muenu; ne wakalomba kudi bavuaye mutshipisha ne mutshipu wa bantu ba ku kala, ne bakapeta mutu wa tatuenda muenu, bu muvuaye musomba pa nkuasa wenda wa bukalenga, pavuaye wakidila bantu benda.

6 Bualu ditangalaka dia tshisumbu tshia bubi ne tshia mu musokoku etshi divua dinena bikola mu mushindu ne tshivua tshinyanga mitshima ya bantu bonsu; bua nanku bakashipa Yalede pa nkuasa wendawa bukalenga, ne Akishi wakakôkesha pa muaba wenda.

7 Ne biakalua ne Akishi wakabanga kumvuila muanenda wa baluma mukawu, bua nanku wakamukangila mu buloko, ne wakamupesha amu biakudia bikesa anyi kakamupeshabi to tô ne muakakengaye ne lufu.

8 Ne mpindiewu muanabu ne uvua mukenga ne lufu, (ne dîna dienda divua Nimela), wakafîkila tatuenda tshiji bawu bivua tatuenda muenzela muanabu.

9 Ne biakalua ne Nimela wakasangisha bungi bukesa bua bantu, ne wakanyema ushiya bulaba, ne wakaya ne wakasomba ne Omele.

10 Ne biakalua ne Akishi wakalela bana ba baluma bakuabu, ne bakapeta muaba mu mitshima ya bantu, nansha muvuabu baditshipa kudiye bua kuenza mishindu yonsu ya malu a bubi bilondeshila ku tshivuaye ujinga.

11 Mpindiewu bantu ba Akishi bavua ne dijinga dia makasa, mena bu muvua Akishi muikala ne dijinga dia bukalenga; bua nanku, bana ba baluma ba Akishi bakabapesha makuta, akakokelabu nawu tshitupa tshipita bunena tshia bantu kunyima kuabu.

12 Ne kuakabanga kuikala mvita pankatshi pa bana ba baluma ba Akishi ne Akishi, mvita yakashalaku bua mutantshi wa bidimu bia bungi, eyowa, tô ne ku dibutuka dia pabuipi ne bantu bonsu ba mu bukalenga, eyowa, mena bonsu, amu pa kumbusha anyima makumi asatu, ne bakanyema ne nzubu wa Omele.

13 Bua nanku, Omele wakapingulujibua ku bulaba bua bupianyi buenda.

14 Ne biakalua ne Omele wakabanga kulua mununu; nansha nanku, mu bununu buenda wakalela Emele; ne wakalâba Emele manyi bua kuikala mfuma bua kukôkesha pa muaba wenda.

15 Ne kunyima kua yeya mulâba Emele manyi bua kuikala mfumu wakamona ditalala mu bulaba bua mutantshi wa bidimu bibidi, ne wakafua, mumana kusomba matuku a bungi menamena, avua muwula ntenta ne kanyinganyinga. Ne biakalua ne Emele wakakôkesha pa muaba wenda, ne wakalonda njila ya tatuenda.

16 Ne Mukalenga wakabanga kabidi kumbusha mutshipu pa bulaba, ne nzubu wa Emele wakalubuluka menamena mu bumfumu bua Emele; ne mu mutantshi wa bidimu makumi asambombo ne bibidi bakalua bakola menamena, bua ne bakanema menamena—

17 Bikala ne mishindu yonsu ya bimuma, ne ya nteta, ne ya bilulu bia busu, ne ya lin muimpa, ne ya ngolo, ne ya mpalata, ne ya bintu bia mushinga mukola;

18 Ne kabidi mishindu yonsu ya bimuna, ya ngomba miluma, ne ngomba mikaja, ne ya mikoku, ne ya nguluba, ne mbuji, ne kabidi mishindu mikuabu ya bungi ya nyama ivua ne diambuluisha bua tshia kudia tshia muntu.

19 Ne bavua kabidi ne tubalu, ne mpunda, ne muvua tupumbu ne nkuleloma ne nkumoma; bivua bikala bionsu ne diambuluisha kudi muntu, ne nangananga tupumbu, ne nkuleloma ne nkumoma.

20 Ne ki muakabupumuina Mukalenga mabenesha enda mu bulaba ebu, buvua buikala bua disungula ku mutu kua malaba makuabu onsu; ne wakela mukenji ne: ewu yonsu wasa mu bulaba, udi ne bua kuasamu bua Mukalenga, anyi nebabutuka pabobabu mu malu mabi; bualu Mukalenga udi wamba ne, nengupumuna tshiwudi tshia tshiji tshianyi kudi ba buena ebu.

21 Ne Emele wakalumbuluisha mu buakana matuku enda onsu, ne wakalela bana ba baluma ne bana ba bakaji ba bungi; ne wakalela Koliantuma, ne wakalâba Koliantuma manyi bua kukôkesha pa muaba wenda.

22 Ne kunyima kua yeya mulâba Koliantuma manyi bua kukôkesha pa muaba wenda wakashala ne moyo bidimu binayi, ne wakamona ditalala mu bulaba; eyowa, ne wakamona mena Muana wa Buakana, ne wakasanka ne kutumba mu dituku dienda; ne wakafua mu ditalala.

23 Ne biakalua ne Koliantuma wakenda mu njila ya tatuenda, ne wakâsa bimenga binena bia bungi, ne wakapesha tshivua tshimpa kudi bantu benda mu matuku enda onsu. Ne biakalua ne kakapeta bana mena tô ne pakaluaye mununu menamena to.

24 Ne biakalua ne mukaji wenda wakafua, muikala ne bidimu lukama ne bibidi. Ne biakalua ne Koliantuma, mu bununu buenda, wakasela nsongakaji ne wakalela bana ba buluma ne bana ba bakaji; pananku wakashala ne moyo tô ne pakakumbajaye bidimu lukama ne makumi anayi ne bibidi.

25 Ne biakalua ne wakalela Kome, ne Kome wakakôkesha pa muaba wenda; ne wakakôkesha bidimu makumi anayi ne tshitema, ne wakalela Hete; ne wakalela kabidi bana ba baluma ne bana ba bakaji bakuabu.

26 Ne bantu bavua kabidi batangalaka pa mpala onsu wa bulaba, ne kuakabanga kuikala bubi bunena menamena pa mpala wa bulaba, ne Hete wakabanga kuitaba kabidi malongolola a mu musokoku a ku kala, bua kushipa tatuenda.

27 Ne biakalua ne wakanyenga tatuenda nkuasa wa bukalenga, bualu wakamushipa ne muela wenda wa mvita; ne wakakôkesha pa muaba wenda.

28 Ne kuakalua bambi mu bulaba kabidi, babila kudi bantu bua bakudimuna mutshima—ne bavua ne bua kulongolola njila wa Mukalenga tshianana nekulua mutshipu pa mpala wa bulaba; eyowa, mena nekuikala tshiyola tshinena, kuabutukilabu bu bobu kabayi bakudimuna mutshima to.

29 Kadi bantu kaba kitabuija miaku ya bambi to, kadi bakabipata; ne bamua ba munkatshi muabu bakabimansha mu bina ne bakashiya bua kufuabu. Ne biakalua ne bakenza bintu bionsu ebi bilondeshila ku mukenji wa mfumu, Hete.

30 Ne biakalua ne kuakabanga kuikala tshiyola tshikola mu bulaba, ne benamu bakabanga kufua lukasa menamena bua tshiyola, bualu kakuvua mvula pa mpala wa buloba to.

31 Ne kuakalua nyoka ya lulengu kabidi pa mpala wa bulaba, ne yakalunga bantu ba bungi. Ne biakalua ne bisumbu bia bimuna biabu biakabanga kunyema kumpala kua nyoka ya lulengu, bitangila ku buloba bua ku sude, buvua Bena Nefi babikila ne Zalahemela.

32 Ne biakalua ne kuvua ba bungi ba ku bobu bakafua mu njila; nansha nanku, kuvua bamua bakanyemena mu bulaba bua ku sude.

33 Ne biakalua ne Mukalenga wakenzeja ne nyoka kayibalondakaji kabidi nansha, kadi ikanga njila bua ne bantu kabamonyi mua kupita to, bua ne ewu yonsu widikija bua kupita afua ku nyoka ya lulengu.

34 Ne biakalua ne bantu bakalonda njila wa nyama, ne bakadia mu bujima bitalu bia ivua mifua mu njila, tô ne mua kabidiabu bionsu. Mpindiewu pakamona bantu ne bavua ne tshia kufua bakabanga kukudimuna mutshima ku malu mabi abu ne kubila kudi Mukalenga.

35 Ne biakalua ne pakadipuekeshabu bikumbana kumpala kua Mukalenga wakatuma mvula pa mpala wa buloba; ne bantu bakabanga kupeta moyo kabidi, ne kuakabanga kuikala bimuma mu matunga a ku node, ne mu matunga onsu a ku mpenga yonsu. Ne Mukalenga wakabaleja bukola buenda ku dibakuba ku tshiyola.