1 Ne biakalua ne Oliha wakalumbuluisha mu buakana mu bulaba matuku enda onsu, ne matuku enda avua a bungi menamena.

2 Ne wakalela bana ba baluma ne bana ba bakaji; eyowa wakalela makumi asatu ne umua, munkatshi muabu muvua bana ba baluma makumi abidi ne basatu.

3 Ne biakalua ne wakalela kabidi Kibe mu bununu buenda. Ne biakalua ne Kibe wakakôkesha pa muaba wenda; ne Kibe wakalela Koliholo.

4 Ne pakakumbaja Koliholo bidimu makumi asatu ne bibidi wakatombokela tatuenda, ne wakaya ne wakasomba mu bulaba bua Neholo; ne wakalela bana ba baluma ne bana ba bakaji, ne bakalua balenga menamena; bua nanku Koliholo wakakoka bantu ba bungi kunyima kuenda.

5 Ne pakasangishaye musumba wa basalayi pamua wakaya ku bulaba bua Molona kuvua mfumu musombela, ne wakaya nenda mumukuata mukuatshibu, tshiakavuija kuamba kua muanabu ne Yalede wa baluma ne nebabatuala mu bukuatshibu.

6 Mpindiewu bulaba bua Molona, muvua mfumu musombela, buvua pabuipi ne bulaba buvua Bena Nefi babikila ne Kabutu.

7 Ne biakalua ne Kibe wakasomba mu bukuatshibu, ne bantu benda kudi muana wa baluma wa Koliholo, tô ne pakaluaye mununu menamena; nansha nanku Kibe wakalela Shule mu bununu buenda, patshivuaye muikala mu bukuatshibu.

8 Ne biakalua ne Shule wakafîkila muanabu wa baluma tshiji; ne Shule wakakolakana, ne wakalua ne bukitu bu mudi ku makanda a muntu; ne uvua kabidi ne bukitu mu kujungulula.

9 Pananku, wakaya ku kakuna ka Efelayima, ne wakengulula biamu ku kakuna, ne wakenza miela ya mvita ne biamua bikolesha bua bavuaye mukoka kudiye abu; ne kunyima kua kubapayaye ne miela ya mvita wakapingana ku tshimenga tshia Neholo, ne wakela muanabu wa baluma Koliholo mvita, kuakapetelaye bukalenga ne wakabupinguluja kudi tatuenda Kibe.

10 Ne mpindiewu bua bualu buvua Shule muenza, tatuenda wakamutenteka bukalenga; bua nanku wakabanga kukôkesha pa muaba wa tatuenda.

11 Ne biakalua ne wakalumbuluisha mu buakana; ne wakatantshisha bukalenga buenda pa mpala onsu wa bulaba, bualu bantu bavua balua ba bungi menamena.

12 Ne biakalua ne Shule wakalela kabidi bana ba baluma ne bana ba bakaji ba bungi.

13 Ne Koliholo wakakudimuna mutshima ku mibi ya bungi ivuaye muenza; bua nanku Shule wakamupesha kaba mu bukalenga buenda.

14 Ne biakalua ne Koliholo wakapeta bana ba baluma ne bana ba bakaji ba bungi. Ne munkatshi mua bana ba baluma ba Koliholo kuvua umua uvua dîna ne Noa.

15 Ne biakalua ne Noa wakatombokela Shule, mfumu, ne kabidi tatuenda Koliholo, ne wakakoka muanabu wa baluma Koholo, ne bana babu ba baluma bonsu ne ba bungi ba ku bantu.

16 Ne wakela Shule, mfumu, mvita, kuakapetelaye bulaba bua bupianyi buabu bua kumpala; ne wakalua mfumu wa pa tshitupa tshia bulaba atshi.

17 Ne wakela kabidi mfumu Shule mvita; ne wakakuata mfumu Shule, ne wakaya nenda mukuatshibu ku Molona.

18 Ne biakalua ne bu muvuaye pabuipi ne kumushipa, bana ba baluma ba Shule bakadibueja butuku mu nzubu mua Noa ne bakamushipa, ne bakashipa tshibi tshia buloko ne bakapatula tatuabu, ne bakamuteka pa nkuasa wenda mu bukalenga buenda.

19 Bua nanku, muana wa Noa wa baluma wakâsa bukalenga bua Noa pa muaba wenda; nansha nanku kabakapeta kabidi bukola pamutu pa mfumu Shule to, ne bantu bavua bikala ku bumfumu bua mfumu Shule bakalubuluka menamena ne bakalua bantu banena.

20 Ne ditunga divua diabuluka; ne kuvua makalenga abidi, bukalenga bua Shule, ne bukalenga bua Koholo, muana wa baluma wa Noa.

21 Ne Koholo, muana wa baluma wa Noa, wakenzeja ne bantu benda bela Shule mvita, ivua Shule mubatambila ne mushipa Koholo.

22 Ne mpindiewu Koholo uvua ne muana wa baluma uvua ubikidibua ne Nimelode; ne Nimelode wakalekelela Shule bukalenga bua Koholo; ne wakasuibua ku mesu a Shule; bua nanku Shule wakamupesha masanka manena, ne Nimelode wakenza mu bukalenga bua Shule bilondeshila ku majinga enda.

23 Ne kabidi mu bumfumu bua Shule bambi bavua batumibua kudi Mukalenga bakalua munkatshi mua bantu, bamba ku Nyuma ne bubi ne ditendelela dia mpingu bia bantu bivua bituala mutshipu pa mutu pa bulaba, ne nebabutuka pikalabu kabayi bakudimuna mutshima to.

24 Ne biakalua ne bantu bakapenda bambi, ne bakabaseka. Ne biakalua ne mfumu Shule wakakosela tshitungu bonsu bakapenda bambi abu.

25 Ne wakateka mukenji mu bulaba bonsu, uvua upesha bambi bukola bua kuya konsu kuvuabu basua; ne bua bualu ebu bantu bakatuadibua ku dikudimuna dia mutshima.

26 Ne bualu bantu bakakudimuna mutshima ku malu mabi abu ne ku ditendelela diabu dia mpingu Mukalenga wakabepelesha, ne bakabanga kulubuluka kabidi mu bulaba. Ne biakalua ne Shule wakalela bana ba baluma ne bana ba bakaji mu bununu buenda.

27 Ne kakuvua kabidi mvita mu matuku a Shule to; ne wakavuluka bintu binena bivua Mukalenga muenza bua batatuenda mu dibatuala ku disabuka ndondu mula kulua ku bulaba bulaya; bua nanku wakalumbuluisha mu buakana matuku enda onsu.