1 Ne biakalua ne Yalede ne muanabu wa baluma, ne mêku abu, ne kabidi balunda ba Yalede ne ba muanabu wa baluma, ne mêku abu, bakapueka mu tshibanda tshivua tshikala ku luseka lua ku node (ne dîna dia tshibanda divua dikala ne Nimelode, dibikidibua mu dîna dia tshilembi tshinena) ne bisumbu bia bimuna biabu bivuabu basangisha pamua, miluma ne mikaji, ya mushindu onsu.

2 Ne bakateya kabidi mateyi ne bakakuata nyunyi ya mûlu; ne bakalongolola kabidi dilongu muakambuilabu mishipa ya mu mâyi.

3 Ne bakambula kabidi deseleta, tshidi mu diandamuna dia miakulu tshiamba ne lubulubulu wa buitshi; ne bakaya ne bisumbu bia mbulubulu, ne mishindu yonsu ya bivua pa mpala wa bulaba, mamînu a mushindu onsu.

4 Ne biakalua ne pakapuekabu mu tshibanda tshia Nimelode Mukalenga wakapueka ne wakakula ne muanabu ne Yalede wa baluma; ne uvua mu divuba, ne muanabu ne Yalede wa baluma kakamumona to.

5 Ne biakalua ne Mukalenga wakabapesha mukenji ne baya mu tshipela, eyowa, mu tshitupa muvua muntu kayi muanji kuikala to. Ne biakalua ne Mukalenga wakaya kumpala kuabu ne wakakula nabu pavuaye muimana mu divuba, ne wakabaleja njila uvuabu ne bua kuenzela luendu.

6 Ne biakalua ne bakenza luendu mu tshipela, ne bakenza bibeya, muakasabukilabu mâyi a bungi, tshianza tshia Mukalenga tshikala tshitungunuka ne kubaludika.

7 Ne Mukalenga kakalekela ne bashikila dinsambu dia mbuwa mu tshipela to, kadi wakasua ne balua mena tô ne ku bulaba bua dilaya, buvua buikala bua disungula ku mutu kua malaba makuabu onsu, buvua Mukalenga Nzambi mukuba bua bantu bakana.

8 Ne uvua muditshipa kudi muanabu ne Yalede wa baluma mu tshiji tshienda ne ewu yonsu wasa mu bulaba bua dilaya ebu, katshia ku tshikondu etshi tô ne bua kashidi, neamusadila, yeya Nzambi umua mulelela, anyi nebabakomba pabaluila tshiwudi tshia tshiji tshienda.

9 Ne mpindiewu, tudi mua kumona mikenji miela ya Nzambi bitangila bulaba ebu, budi buikala bulaba bua dilaya; ne tshisamba tshionsu tshiasamu netshisadila Nzambi, anyi ne nebatshikomba pâbaluila tshiwudi tshia tshiji tshienda. Ne tshiwudi tshia tshiji tshienda netshibaluila papita malu mabi abu bungi.

10 Bualu monayi, ebu budi bulaba budi buikala bua disungula ku mutu kua malaba makuabu onsu; bua nanku yonsu wasamu neasadila Nzambi anyi neakombibua; bualu ewu udi mukenji wa Nzambi muela wa kashidi. Ne kabakukombibua to, tô ne pakumbana tshiwudi tshia malu mabi munkatshi mua bana ba bantu ba, mu bulaba.

11 Ne ebi bidi binuluila, Ô nuenu Bena Bisamba bia Benda, bua ne numanya mikenji miela ya Nzambi—bua nukudimuna mutshima, ne kanutungunuki ne malu mabi enu tô ne palua tshiwudi tshia malu mabi to, bua kanudituadidi tshiwudi tshia tshiji tshia Nzambi bu muvua bena mu bulaba benza tô ne mpindiewu to.

12 Monayi, ebu budi bulaba budi buikala bua disungula, ne tshisamba tshionsu tshiasamu netshikala ne budishikaminyi ku bupika, ne ku bukuatshibu to, ne kudi bisamba bionsu bia muinshi mua diûlu, kadi amu pikalatshi tshisadila Nzambi wa mu buloba, yeya udi muikala Yezu Kilisto, uvua bintu bitudi bafunda bimuenesha.

13 Ne mpindiewu ndi ntungunuka ne miandiku yanyi; bualu monayi, biakalua ne Mukalenga wakatuala Yalede ne bana babu mena ku mbuwa munena bikola awu udi wabulula malaba. Ne pakaluabu ku mbuwa bakâsa ntenta yabu; ne bakinyika dîna dia muaba ne Moliankumele; ne bakasomba mu ntenta, ne bakasomba mu ntenta ku muelelu wa mbuwa bua mutantshi wa bidimu binayi.

14 Ne biakalua ne ku ndekelu kua bidimu binayi Mukalenga wakalua kabidi kudi muanabu ne Yalede wa baluma, ne wakimana mu divuba ne wakakula nenda. Ne bua mutantshi wa meba asatu Mukalenga wakakula ne muanabu ne Yalede wa baluma, ne wakamutandisha, bualu kavua muvuluka bua kubikila dîna dia Mukalenga to.

15 Ne muanabu ne Yalede wa baluma wakakudimuna mutshima ku bubi buvuaye muenza, ne wakabikila dîna dia Mukalenga bua bana babu bavua bikala nenda. Ne Mukalenga wakamuambila ne: Nenkubuikidila wewa ne bana benu mibi yabu; kadi kuakuenza mibi kabidi nansha, bualu nenuvuluka ne Nyuma wanyi kakukuata mudimu ne muntu diba dionsu to; bua nanku, panuenza mibi tô ne panuaboba menamena nenukoshibua ku mpala kua Mukalenga. Ne â adi meji anyi bua bulaba bunganupesha bua bupianyi buenu; bualu nebuikala bulaba bua disungula ku mutu kua malaba makuabu onsu.

16 Ne Mukalenga wakamba ne: Ndayi ku mudimu ne ibakayi bibeya ku mushindu unudi bibaka tô ne mpindiewu. Ne biakalua ne muanabu ne Yalede wa baluma wakaya kuenza mudimu, ne bana babu kabidi, ne bakenza bibeya mushindu uvuabu benza bilondeshila ku mikenji ya Mukalenga. Ne bivua bikesa, ne bivua bipepela pa mâyi, mena bu mudi dipepela dia nyunyi pa mâyi.

17 Ne bivua bibakibua mu mushindu wa ne bivua bilamakana menamena, mena ne bivua bua kulama mâyi bu mudi dilonga; ne ntaku yabi milamakana bu mudi dilonga; ne mpenga yabi ivua milamakana bu mudi dilongu; ne nsongu yabi ivua misongoloka; ne misonga yabi ivua milamakana bu mudi dilonga; ne bula buabi buvua bua mutshi; ne tshibi tshiabi, pavuatshi tshikala tshikanga, tshivua tshilamakana bu mudi dilongu.

18 Ne biakalua ne muanabu ne Yalede wa baluma wakabila kudi Mukalenga, wamba ne: Ô Mukalenga, ngenji mudimu uvua mumpeshela mukenji, ne ndi muenza bibeya bilondeshila mungenzeja.

19 Ne mona, Ô Mukalenga, munda muabi kamuena bukenka nansha bumua to; netubiludika kunyi? Ne kabidi netufua, bualu katuena mua kupuyakana munda muabi to, amu pa kumbusha lupepa ludimu; bua nanku netufua.

20 Ne Mukalenga wakambila muanabu ne Yalede wa baluma ne: Mona, neutubula disosu mu musonga, ne kabidi ku ntaku; ne pawikala kuyi ne kapepela to, neujikula disosu ne neupeta kapepela. Ne bikalabi ne mâyi adi akubuelela, mona, neujika disosu, bua bua ne kanufu ne mâyi adi abuela to.

21 Ne biakalua ne muanabu ne Yalede wa baluma wakenza nanku, bilondeshila bu muvua Mukalenga mumupeshela mukenji.

22 Ne wakabila kabidi kudi Mukalenga wamba ne: Ô Mukalenga, mona, ngenji mena bu muvua mumpeshela mukenji; ne ngalongolodi mâtu bua bantu banyi, ne mona kakuena bukenka munda muawu to. Mona, Ô Mukalenga, neulekela ne tusambuka mâyi manena â mu mîdima anyi?

23 Ne Mukalenga wakambila muanabu ne Yalede wa baluma ne: Ntshinyi tshiwudi musua ne ngenza bua nupeta bukenka mu mâtu enu? Bualu mona, kanuena mua kuikala ne madidishi to, bualu neapanduluka bipesa; anyi kanuakuya ne kapia to, bualu kanuakuya ku bukenka bua kapia to.

24 Bualu mona, nenuikala bu mushipa munena wa mu mâyi munkatshi mua mbuwa, bualu mikuna ya mavuala neudibuikila pa mutu penu. Nansha nanku nennupatula kabidi ku ndondu ya mbuwa; bualu mpepela idi mipatukila mukana muanyi, ne kabidi mvula ne mâyi a nkoka mvua mubituma.

25 Ne mona, ndi nulongolola ku bintu ebi; bualu kanuena mua kusabuka ndondu mula ewu to amu pa kumbusha mema munulongolola ku mavuala a mbuwa, ne mpepela idi mipatuka, ne mâyi a nkoka âlua. Bua nanku ntshinyi tshiwudi musua ne nnulongoluela bua ne nupeta bukenka panuadîna mu ndondu ya mbuwa?