1 Ne biakalua ne wakalela Omele, ne Omele wakakôkesha pa muaba wenda. Ne Omele wakalela Yalede; ne Yalede wakalela bana ba baluma ne bana ba bakaji.

2 Ne Yalede wakatombokela tatuenda, ne wakalua ne wakasomba mu bulaba bua Hete. Ne biakalua ne wakabomba bantu ba bungi, bua mêyi enda a budimu, tô ne muakaluaye kupeta tshiabibidi tshia bukalenga.

3 Ne pakapetaye tshia bibidi tshia bukalenga wakela tatuenda mvita, ne wakaya ne tatuenda mu bukuatshibu, ne wakasadila mu bukuatshibu;

4 Ne mpindiewu, mu matuku a bumfumu bua Omele uvua mu bukuatshibu tshiabibidi tshia matuku enda. Ne biakalua ne wakalela bana ba baluma ne bana ba bakaji, ne munkatshi muabu muvua Eseloma ne Koliantumela;

5 Ne bakafîka tshiji menamena bua midimu ya muanabu wa baluma Yalede, mua ne bakakunguija musumba wa basalayi ne bakela Yalede mvita. Ne biakalua ne bakamuela mvita butuku.

6 Ne biakalua ne pakashipabu musumba wa basalayi wa Yalede bavua pabuipi bua kumushipabu penda; ne wakabasengelela ne kabamushipi to, ne nealekelela tatuenda bukalenga. Ne biakalua ne bakamuanyishila ne ikala ne moyo.

7 Ne mpindiewu Yalede wakalua ne kanyinganyinga menamena bua dijimija dia bukalenga, bualu uvua muteka mutshima wenda ku bukalenga ne ku butumbi bua pa buloba.

8 Mpindiewu muana wa bakaji wa Yalede muvuaye mupiluka menamena, ne muvuaye mumona kanyinganyinga ka tatuenda, wakela meji mua kulongolola njila uvuayi mua kupingajila tatuenda bukalenga.

9 Mpindiewu muana wa bakaji wa Yalede uvua mulenga menamena. Ne biakalua ne wakayikila ne tatuenda, ne wakamuambila ne: Tatuanyi udi ne kanyinganyinga ka bungi nanku bua tshinyi? Kena mubala mifundu ivua batatuetu basabuka nayi ndondu mula anyi? Mona, kakuena mulubu mutangila bantu ba ku kala, ne ku malongolola abu a mu musokoku bakapeta makalenga ne butumbi bua bungi anyi?

10 Ne mpindiewu, nanku, lekela tatuanyi abikidisha Akishi, muana wa baluma wa Kimenolo; ne Mona, ndi muimpa kumona, ne nenja maja kumpala kuenda, ne nemmusankisha, bua ne neanjinga ne ndua mukaji wenda; bua nanku biajingaye kûdi ne umpesha kudiye ne ndua mukaji wenda, apu newamba: Nenkupeshayi biwantuadila mutu wa tatuanyi, mfumu.

11 Ne mpindiewu Omele uvua mulunda wa Akishi; pananku, pakabikidisha Yalede Akishi, muana wa bakaji wa Yalede wakaja maja kumpala kuenda bua ne wakamusankisha, mua ne wakajinga bua ikala mukajenda. Ne biakalua ne wakambila Yalede ne: Mumpesha bua ikala mukaji wanyi.

12 Ne Yalede wakamuambila ne: nenkupeshayi, pawikala muntuadila mutu wa tatuanyi, udi muikala mfumu.

13 Ne biakalua ne Akishi wakasangisha malela enda onsu mu nzubu wa Yalede, ne wakabambila ne: Nenuditshipa kundi ne nenuikala ne lulamatu kundi ku tshintu tshingajinga kunudi anyi?

14 Ne biakalua ne bakaditshipa bonsu kudiye, pa Nzambi wa mu diûlu, ne kabidi pa diûlu, ne kabidi pa buloba, ne pa mitu yabu, ne ewu yonsu wakudimuka ku diambuluisha divua Akishi ujinga neajimija mutu wenda; ne ewu yonsu wasokola tshintu tshionsu tshivua Akishi mubamanyisha, yeya muina neajimija moyo wenda.

15 Ne biakalua ne ki muakumvuanganabu ne Akishi nanku. Ne Akishi wakabatshipisha mitshipu ivua bantu ba ku kala bavua pabu bakeba bukalenga benza, ivua mishiya kubangila mena kudi Kana, uvua muikala mushipianganyi kumbukila ku mbangilu.

16 Ne bukola bua diabulu buvua bubalama bua kutshipisha bantu mitshipu eyi, bua kubalama mu mîdima, bua kuambuluisha bavua bikala bakeba bukalenga bua kupeta bukalenga, ne bua kushipa, ne bua kupawula bintu bia bienda, ne bua kushima, ne bua kuenza mushindu onsu bubi ne wa masandi.

17 Ne muana wa bakaji wa Yalede ki wakabiteka mu mutshima wenda bua kukebulula bintu ebi bia kala; ne Yalede wakabiteka mu mutshima wa Akishi; bua nanku, Akishi wakayitshipisha malela enda ne balunda benda, ubapambula ku malaya malenga bua kuenza tshintu tshionsu tshivuaye ujinga.

18 Ne biakalua ne bakenza tshipungidi tshia mu musokoku, mena bu muvua bantu ba kala; tshipungidi tshidi tshikala tshia malu a bubi bupita ne tshibi kupita bikuabu bionsu, ku mesu a Nzambi;

19 Bualu Mukalenga kena wenza mudimu ne bipungidi bia mu musokoku to, anyi kena musua ne muntu amatshisha mashi to, kadi mu malu onsu udi mutshikandika, kumbukila ku mbangilu wa muntu.

20 Ne mpindiewu, mema, Moloni, ntshiena mfunda mushindu wa mitshipu yabu ne bipungidi biabu to, bualu bivua bimanyishibua kundi ne bidi bikala munkatshi mua bantu bonsu, ne bidi bikala munkatshi mua Bena Lamana.

21 Ne biakenzeja dibutuka dia bantu bandi ngamba apa, ne kabidi dibutuka dia bantu ba Nefi.

22 Ne tshisamba tshionsu tshitaba bipungidi bia mu musokoku bia nanku awu, bua kupeta bukalenga ne makasa, tô ne pâtangalakabi mu tshisamba tshijima, monayi, ne netshibutuka; bualu Mukalenga kakulekela ne mashi a bansantu benda, âmatshishatshi, abila kudiye diba dionsu ku buloba bua disombuela kuditshi, ne kadi kayi ubasombuela to.

23 Bua nanku, Ô nuenu Bena Bisamba bia Benda, bidi bimpa mu lungenyi lua Nzambi ne bintu ebi bilejibua kunudi, nanku bua nukudimuna mutshima ku mibi yenu, ne kanulekedi ne bipungidi bia dishipa dia bantu ebi, bidi bienza bua kupeta bukalenga ne makasa, bikala ku mutu kuenu to—ne mudimu, eyowa, mena mudimu wa dibutuka unuluila, eyowa, mena muela wa mvita wa bululama bua Nzambi wa Tshiendelela unukulukila, bua ditonkoka ne dibutuka dienu panualekela bintu ebi bikala.

24 Bua nanku, Mukalenga udi unupesha mukenji, panuamona bintu ebi bilua munkatshi muenu ne nenutabuluka bua kumanya ngikadilu wenu udi utshingisha, bua tshisumbu tshia mu musokoku tshikala munkatshi muenu etshi; anyi diakabi dikala kuditshi bua mashi a bavuabu bashipa; bualu badi babila ku lupuishi bua disombuela kuditshi, ne kabidi kudi bavua batshienza abu.

25 Bualu bidi bilua ne ewu yonsu udi utshienza udi ukeba bua kutonkola budishikaminyi bua malaba onsu, bisamba bionsu ne matunga onsu; ne tshidi tshituadisha dibutuka dia bantu bonsu, bualu tshidi tshienza kudi diabulu, udi muikala tatu wa mafi onsu; mena muena mafi muina wakadinga baledi betu ba kumpala, eyowa, mena muena mafi muina udi muenzeja muntu bua kushipa bantu kumbukila ku mbangilu; uvua mupapisha mitshima ya bantu bua ne bakashipa bambi, ne bakabâsa mabua, ne bakabipata kumbukila ku mbangilu.

26 Pananku, mema, Moloni, ndi mupeta mukenji wa kufunda bintu ebi bua ne bubi bujika, ne bua diba dikala Satana kayi ne nansha bumua ku mitshima ya bana ba bantu to dilua, kadi bua ne bitabujijibua bua kuenza malu mimpa diba dionsu, bua ne balua ku mpokolo wa buakana bonsu ne bapandishibua.