1 Ne biakalua ne Sheze, uvua muikala kankanunuina ka Hete—bualu Hete uvua mufua ku tshiyola, ne bena mu nzubu wenda bonsu amu pa kumbusha Sheze—pananku, Sheze wakabanga kukankamija kabidi bantu bavua batshibuluka.

2 Ne biakalua ne Sheze wakavuluka dibutuka dia batatuenda, ne wakâsa bukalenga buakana; bualu wakavuluka tshivua Mukalenga muenza ku disambuisha Yalede ne muanabu wa baluma pa mâyi; ne wakenda mu njila ya Mukalenga; ne wakalela bana ba baluma ne bana ba bakaji.

3 Ne muana buta wenda wa baluma, muena dîna dia Sheze, wakamutombokela; nansha nanku, tshianza tshia munyenganganyi wa bintu tshiakatûta Sheze, bua mabanji enda mapita, tshiakatuadila tatuenda ditalala kabidi.

4 Ne biakalua ne tatuenda wakâsa bimenga bia bungi pa mpala wa bulaba, ne bantu bakabanga kabidi kutangalaka pa mpala onsu wa bulaba. Ne Sheze wakashala ne moyo tô ne ku bununu menamena; ne wakalela Lipalakishi. Ne wakafua, ne Lipalakishi wakakôkesha pa muaba wenda.

5 Ne biakalua ne Lipalakishi kakenza tshivua tshikala tshiakana ku mesu a Mukalenga to, bualu uvua ne bakaji ne bakaji ba ku mpenga babakibua ba bungi, ne wakateka pa makaya a bantu tshivua tshikola bua kuambula; eyowa, wakabakosela bitadi bikola; ne ne bitadi, wakâsa nzubu mialabala ya bungi.

6 Ne wakadimanyikijila nkuasa wa bukalenga mulengela menamena; ne wakâsa maloko a bungi, ne ewu yonsu uvua ubenga kubatshikibua kudi bitadi, uvua umuela mu buloko; ne ewu yonsu uvua kayi ne mushindu wa kufuta bitadi to wakela mu buloko; ne wakenzeja ne batungunuka kukuata mudimu bua dibakuatshisha diabu; ne ewu yonsu uvua ubenga bua kukuata mudimu wakamushipesha.

7 Pananku wakapeta bintu bienda bionsu bia mudimu wa ku bianza muimpa, eyowa, ne wakapeluja mena ngolo yenda milelela mu buloko; ne wakenzeja mishindu yonsu ya mudimu wa bantu wa ku bianza mu buloko. Ne biakalua ne wakatatshisha bantu ne masandi ne malu mapita bubi enda.

8 Ne pakakôkeshaye bua mutantshi wa bidimu makumi anayi ne bibidi bantu bakamutombokela; ne kuakabanga kuikala kabidi mvita mu bulaba, mua ne Lipalakishi wakashipibua, ne tunkanunuina tuenda tuakipatshibua mu bulaba.

9 Ne biakalua ne kunyima kua mutantshi wa bidimu bia bungi, Moliantona (uvua muikala kankanunuina ka Lipalakishi) wakasangisha pamua musumba wa basalayi bavua bipata, ne wakaya ne wakela bantu mvita; ne wakapeta bukalenga mu bimenga bia bungi; ne mvita yakalua mikola menamena, ne yakanenga bua mutantshi wa bidimu bia bungi; ne wakapeta bukola pa mutu pa bulaba bonsu, ne wakadishikika mfumu pa mutu pa bulaba bonsu.

10 Ne kunyima kua mudishikika mfumu wakapepeja bujitu bua bantu, ku tshinyi wakasuibua ku mesu a bantu, ne bakamulâba manyi bua kuikala mfumu wabu.

11 Ne uvua ne bululama kudi bantu, kadi kudiye nkayenda to bua masandi enda a bungi; bua nanku wakakoshibua ku mpala kua Mukalenga.

12 Ne biakalua ne Moliantona wakâsa bimenga bia bungi, ne bantu bakalua babanji menamena mu bumfumu buenda, ku nzubu minena, ne ku ngolo ne tshiamua tshia mpalata, ne dikuna dia nteta, ne ku bisumbu bia bimuna bikesa, ne bia bimuna binena, ne bintu bia mushindu ewu bivua bibapingulujibua.

13 Ne Moliantona uvua ne moyo tô ne ku bununu menamena, ne pashisha wakalela Kime. Ne Kime wakakôkesha pa muaba wa tatuenda; ne wakakôkesha bidimu muanda mukulu, ne tatuenda wakafua. Ne biakalua ne Kime kakakôkesha mu buakana to, bua nanku kakasuibua kudi Mukalenga to.

14 Ne muanabu wa baluma wakamutombokela, mu njila ewu wakamutuala mu bukuatshibu; ne wakashala mu bukuatshibu matuku enda onsu; ne wakalela bana ba baluma ne bana ba bakaji mu bukuatshibu, ne mu bununu buenda wakalela Lewi; ne wakafua.

15 Ne biakalua ne Lewi wakasadila mu bukuatshibu kunyima kua lufu lua tatuenda, bua mutantshi wa bidimu makumi anayi ne bibidi. Ne wakaluisha mfumu wa mu bulaba mvita, mu njila ewu wakapeta bukalenga bua nkayenda.

16 Ne kunyima kua kupetaye bukalenga bua nkayenda wakenza tshivua tshiakana ku mesu a Mukalenga; ne bantu bakalubuluka mu bulaba; ne uvua ne moyo tô ne ku bidimu bia bununu bukumbana, ne wakalela bana ba baluma ne bana ba bakaji; ne wakalela kabidi Kolome, wakalâbayi manyi bua kuikala mfumu pa muaba wenda.

17 Ne biakalua ne Kolome wakenza tshivua tshikala tshimpa ku mesu a Mukalenga matuku enda onsu; ne wakalela bana ba baluma ne bana ba bakaji ba bungi; ne kunyima kua kusombaye matuku a bungi wakafua, mena bu mudi ba pa buloba bonsu; ne Kishi wakakôkesha pa muaba wenda.

18 Ne biakalua ne Kishi wakafua penda, ne Libi wakakôkesha pa muaba wenda.

19 Ne biakalua ne Libi wakenza penda tshivua tshikala tshimpa ku mesu a Mukalenga. Ne mu matuku a Libi nyoka ya lulengu yakabutuka. Bua nanku bakaya ku bulaba bua ku sude, bua kukeba biakudia bua bantu ba mu bulaba, bualu bulaba buvua buwula ne nyama ya dîtu. Ne Libi wakalua penda yeya muina tshilembi tshinena.

20 Ne bakâsa tshimenga tshinena pabuipi ne tshitupa tshibumbakana tshia bulaba, pabuipi ne muaba udi mbuwa wabulula bulaba.

21 Ne bakakuba bulaba bua ku sude bua buikala tshipela, bua kupeta nyama. Ne mpala mujima wa bulaba bua ku node uvua muwula ne benamu.

22 Ne bavua bikala benji ba mudimu bikola, ne bavua basumbangana ne bapanyishangana ne bendelangana mushinga, bua ne bapeta makasa.

23 Ne bakenza mudimu ne mishindu yonsu ya mabua a biamu, ne bakapatula ngolo, ne mpalata, ne biamua bifika, ne biamua bia kalabi, ne mishindu yonsu ya biamua; ne bakabiumbula mu buloba; bua nanku, bakela mishiki ya buloba mila bua kupeta mabua a biamu, a ngolo, ne a mpalata, ne a biamu bifika, ne a biamua bia kabanda. Ne bakenza mudimu wa mishindu yonsu ya mudimu muimpa.

24 Ne bavua ne bilulu bia busu ne bia lin muluka bimpa; ne bakenza mishindu yonsu ya bilulu, bua ne badivuadika bua kusokoka butaka buabu.

25 Ne bakenza mushindu onsu biamu bia mudimu bua kudima buloba, bua kusôla ne kukuna, bua kupola ne kudima ne lukasu, ne bua kutua kabidi.

26 Ne bakenza mishindu yonsu ya biamu bia mudimu bivuabu benzeja nabi nyama yabu mudimu.

27 Ne bakenza mishindu yonsu ya biluilu bia mvita. Ne bakenza mushindu onsu mudimu wa bantu wa ku bianza wa dikema.

28 Ne kakuvua mua kuikala bantu nansha babeneshibua kubapita bobu to, ne balubulujibua kudi tshianza tshia Mukalenga kupita to. Ne bavua bikala mu bulaba buvua buikala bua disungula ku mutu kua malaba onsu, bualu Mukalenga uvua muamba nanku.

29 Ne biakalua ne Libi uvua ne moyo bidimu bia bungi, ne wakalela bana ba baluma ne bana ba bakaji; ne wakalela kabidi Heletoma.

30 Ne biakalua kabidi ne Heletoma wakakôkesha pa muaba wa tatuenda. Ne pakakôkesha Heletoma bidimu makumi abidi ne binayi, monayi, bakamunyenga bukalenga. Ne wakasadila bidimu bia bungi mu bukuatshibu, eyowa, mena bua tshishadi tshia matuku enda tshionsu.

31 Ne wakalela Hete, ne Hete wakasomba matuku enda onsu mu bukuatshibu. Ne Hete wakalela Alona, ne Alona wakasomba matuku enda onsu mu bukuatshibu; ne wakalela Aminigada, ne Aminigada wakasomba penda matuku enda onsu mu bukuatshibu; ne wakalela Koliantuma, ne Koliantuma wakasomba matuku enda onsu mu bukuatshibu; ne wakalela Kome.

32 Ne biakalua ne Kome wakakoka tshiabibidi tshia bukalenga. Ne wakakôkesha bidimu makumi anayi ne bibidi ku mutu kua tshiabibidi tshia bukalenga; ne wakaya kuluisha mfumu Amigidi mvita, ne bakaluangana bua mutantshi wa bidimu bia bungi, diba diakatshimuna Kome Amigidi, ne diakapetaye bukalenga ku mutu kua tshishadi tshia bukalenga.

33 Ne mu matuku a Kome kuakabanga kuikala banyengi mu bulaba; ne bakangata malongolola a ku kala, ne bakatshipisha mitshipu ku mushindu wa bantu ba ku kala, ne bakakeba kabidi bua kunyangakaja bukalenga.

34 Mpindiewu Kome wakabaluisha bikola; nansha nanku, kakabatshimuna to.