1 Ne biakalua ne kunyima kua mema, Nefi, mubala malu avua makanunyibua pa bitata bia kalabi â, bana betu ba baluma bakalua kundi ne bakangambila ne: malu awabadi â adi umvuija tshinyi? Mona, adi ne bua kumvuibua bilondeshila ku malu adi mikala a ku nyuma, âlua kuenzeka bilondeshila ku nyuma ne ku musunyi to anyi?

2 Ne mema, Nefi, ngakamba kudibu: Monayi avua mamueneshibua kudi muambi kudi dîyi dia Nyuma; bualu ku Nyuma malu onsu adi mamanyishibua kudi bambi, âlua pa mutu pa bana ba bantu bilondeshila mu musunyi.

3 Bua nanku, malu andi mubala adi malu matangila bubidi bua malu a pa bulaba ne a nyuma; bualu bidi bimueneka ne nzubu wa Isalele, nansha ku to to tô, neatangalajibua pa mpala onsu wa buloba, ne kabidi munkatshi mua bisamba bionsu.

4 Ne monayi, kudi ba bungi badi ku Yelushalema bamana kupua moyo. Eyowa, tshitupa tshinena kupita tshia bisa bionsu tshiyishibua kula; ne badi batangalajibua eku ne eku pa mutu pa mbuwa; ne kudibu nansha umua wetu kena mumanya to, amu tudi bamanya ne bavua bayishibua kula.

5 Ne katshia bayishibua kula, malu â adi mambibua ku Nyuma bibatangila, ne kabidi bitangila bonsu bâtangalajibua ne bâbuejakajibua kunyima eku abu, bua bualu bua Wa Tshijila wa Isalele; bualu nebamupapishila mitshima yabu; bua nanku, nebatangalajibua munkatshi mua bisamba bionsu ne nebakinyibua kudi bantu bonsu.

6 Nansha nanku, kunyima kua balamibua kudi Bena Bisamba bia Benda, ne Mukalenga mubandula tshianza pa mutu pa Bena Bisamba bia Benda ne mubateka bu dibendela, ne bana babu bikala bambudibua mu maboku abu, ne bana babu ba bakaji bikala bambudibua pa makaya abu, Mona, malu â adi makudibua adi a mu mubidi; bualu ki mudi bipungidi bia Mukalenga ne batatuetu; ne biumvuija ne tuetu mu matuku adi alua, ne kabidi bana betu ba baluma bonsu badi bikala ba ku nzubu wa Isalele.

7 Ne bidi biumvuija ne tshikondu tshidi tshilua tshia ne kunyima kua nzubu mujima wa Isalele mutangalajibua ne mubuejakajibua, ne Mukalenga Nzambi neabisha tshisamba tshia bukitu munkatshi mua Bantu ba Bisamba bia Benda, eyowa, mena pa mpala wa bulaba ebu; ne ndelanganyi yetu neitangalajibua kudibu.

8 Ne kunyima kua ndelanganyi yetu mitangalajibua Mukalenga Nzambi neatuadija kuenza mudimu wa dikema munkatshi mua Bena Bisamba bia Benda, wikala wa mushinga munena kudi ndelanganyi yetu; bua nanku, udi ufuanyikijibua ku dikala badishibua dibua kudi Bena Bisamba bia Benda ne ku dikala bambudibua mu maboku abu ne pa makaya abu.

9 Ne newikala kabidi wa mushinga kudi Bena Bisamba bia Benda; ne kabiyi amu kudi Bena Bisamba bia Benda to kadi kudi nzubu wa Isalele yonsu, ne ku dimanyisha bipungidi bia Tatu wa diûlu kudi Abalahama, wamba: Kupitshila ku ndelanganyi yeba bisa bionsu bia pa buloba nebibeneshibua.

10 Ne ndi musua, bana betu ba baluma, ne numanya ne bisa bionsu bia pa buloba kabiena mua kubeneshibua to amu yeya muleja diboku dienda ku mesu a bisamba.

11 Bua nanku, Mukalenga Nzambi neatuadija kuleja kua diboku dienda ku mesu a bisamba bionsu, mu dikumbaja bipungidi bienda ne lumu luimpa luenda kudi badi ba ku nzubu wa Isalele.

12 Bua nanku, neabapatula kabidi mu bukuatshibu, ne nebasangishibua pamua ku malaba a bupianyi buabu; ne nebapatudibua mu bujimakana ne mu mîdima; ne nebamanya ne Mukalenga udi Mupandishi wabu ne Musungidi wabu, Wa Bukitu wa Isalele.

13 Ne mashi a ekelezia munena ne wa malu mapita bubi awu, udi muikala ndumba wa buloba bonsu, neapingana pa mitu yabu nkayabu; bualu nebaluangana munkatshi muabu nkayabu, ne muela wa mvita wa ku tshianza biabu nkayabu neupona pa mitu yabu nkayabu, ne nebakuatshika ne mashi abu nkayabu.

14 Ne tshisa tshionsu tshiakuluisha mvita, Ô nzubu wa Isalele, netshikudimukilangana tshimua ku tshikuabu, ne nebapona mu tshina tshivuabu bumbula bua kuteya bantu ba Mukalenga. Ne bonsu badi baluisha Siona nebabutuka, ne ndumba munena awu, udi unyangakaja njila miakana ya Mukalenga, eyowa, ekelezia wa malu mapita bubi awu, neadishinda mu lupuishi ne dipona dienda nedikala dinena.

15 Bualu monayi, muambi udi wamba, tshikondu tshidi tshilua lubilu tshikala Satana kayi ne bukola pa mutu pa mitshima ya bana ba bantu to; bualu dituku didi dilua katataka dikala baditambishi bonsu ne badi benza bubi bu nsona; ne dituku didi dilua didibu ne tshia kôshibua.

16 Bualu tshikondu tshidi tshilua tshiapumuinyibua tshiwudi tshia tshiji tshia Nzambi bana ba bantu; bualu kakulekela ne bena bubi babutula bakana to.

17 Bua nanku, neakuba bakana ku bukola buenda, nansha bikalabi ne tshiwudi tshia tshiji tshienda tshidi ne tshia kulua, ne bakana bakubibua, mena ne ku dibutuka dia bena lukuna babu ku kapia. Bua nanku, bakana kabena ne bua kutshina to; bualu nanku muambi udi wamba, nebapandishibua, nansha bikalabi bu ku kapia.

18 Monayi, bana betu ba baluma, ndi ngamba kunudi, ne malu â adi ne tshia kulua pabuipi apa; eyowa, mena mashi, ne kapia, ne dibungibungi dia muishi bidi ne tshia kulua; ne bidi bikengedibua pa mpala wa buloba ebu; ne adi alua kudi bantu bilondeshila ku mubidi bikalabu ne nebapapishila Wa Tshijila wa Isalele mitshima yabu.

19 Bualu monayi, bakana kabakufua to; bualu tshikondu bushuwa tshidi ne tshia kulua tshia ne bonsu badi baluisha Siona nebakoshibua.

20 Ne Mukalenga bushuwa nealongolola njila bua bantu benda, ne ku dikumbaja dia mêyi a Mose, akakulaye, wamba: Mukalenga Nzambi wenu neanubishila muambi, bu mundi; yeya neunumuteleja mu malu onsu ambaye kunudi. Ne nebilua ne bonsu aba babenga kuteleja muambi awu nebakoshibua munkatshi mua bantu.

21 Ne mpindiewu mema, Nefi, ndi mmanyisha kunudi, ne muambi awu uvua Mose muakuila udi Wa Tshijila wa Isalele; bua nanku, nealumbuluisha mu buakana.

22 Ne bakana kabena ne bua kutshina to, bualu aba badi bâbenga kubuejakajibua. Kadi budi bukalenga bua diabulu, buina buâshibua munkatshi mua bana ba bantu, bukalenga buina budi bushindamijibua munkatshi muabu bina badi bikala mu musunyi—

23 Bualu tshikondu tshidi tshilua lubilu tshia ne ma’ekelezia onsu adi miashibua bua kupetamakasa, ne yonsu adi miashibua bua kupeta bukôkeshi pa mutu pa bantu ayi, ne adi miashibua bua kulua mimanyika ku mesu a ba pa buloba ayi, ne adi akeba nkuka ya mubidi ne malu a pa buloba, ne bua kuenza mishindu yonsu ya malu mabi; eyowa, mu tshikosu, yonsu adi ya ku bukalenga bua diabulu ayi, nyoyi ayi adi ne bua kutshina, ne kuzakala, ne kukanka; nyoyi ayi adi ne tshia kupuekeshibua mu lupuishi; nyoyi ayi adi ne tshia kuvingutudibua bu nsona; ne ebi bidi bilondeshila ku mêyi a muambi.

24 Ne tshikondu tshidi tshilua lubilu tshidi bakana ne tshia kulombodibua bu bana ba ngomba ba mu tshikumbi, ne Wa Tshijila wa Isalele udi ne bua kukôkesha mu bukalenga, ne bukitu, ne bukola, ne butumbi bunena.

25 Ne udi usangisha bana benda kumbukila ku matengu anayi a buloba, ne udi ubala mikoko yenda, ne idi mimumanya; ne nekuikala tshisumbu tshia mikoko tshimua ne mulami umua; ne neadisha mikoko yenda, ne kudiye neipeta mashinda.

26 Ne bua bualu bua buakana bua bantu benda, Satana kena ne bukola to; bua nanku, kena mua kusuludibua to bua mutantshi wa bidimu bia bungi; bualu kena ne bukola pa mitshima ya bantu to, bualu badi bakadila mu buakana, ne Wa Tshijila wa Isalele udi ukôkesha.

27 Ne mpindiewu monayi, mema, Nefi, ndi ngamba kunudi ne malu â onsu adi ne tshia kulua bilondeshila ku musunyi.

28 Kadi, monayi, bisamba bionsu, bisa bionsu, miakulu yonsu, ne bantu bonsu nebasomba mu bukubi mu Wa Tshijila wa Isalele bikalabu ne nebakudimuna mutshima.

29 Ne mpindiewu, mema Nefi, njikiji; bualu bua ntshiakakima kuakula kupita apa bitangila malu â.

30 Pananku, bana betu ba baluma, ndi musua ne numanya ne malu adi mafundibua pa bitata bia tshiamua tshia kalabi adi malelela; ne adi ajadika ne muntu udi ne tshia kuikala mutumikidi ku mikenji ya Nzambi.

31 Bua nanku, kanuena ne dijinga dia kutshinka ne amu mema ne tatuanyi ki badi ba’ajadika, ne ba’alongesha to. Bua nanku, binuikala batumikidi ku mikenji, ne bananukidi tô ne ku ndekelu, nenupandishibua ku dituku dia ndekelu. Ne bidi nanku. Amena.