1 Ne biakalua ne kunyima kua mema, Nefi, muikala muambudibua kula mu Nyuma, mumona malu onsu â, ngakapingana ku ntenta wa tatuanyi.

2 Ne biakalua ne ngakamona bana betu ba baluma, ne bavua batandangana bitangila malu avua tatuanyi muakula kutudi.

3 Bualu bulelela uvua muakula malu a bungi manena kutudi, avua mikala makola bua kumvua, amu muntu muebeja kudi Mukalenga; ne bobu bikala bapapisha mitshima yabu, bua nanku, kabakatangila kudi Mukalenga bu muvuabi kuikala to.

4 Ne mpindiewu mema, Nefi, mvua munyingalala bua bualu bua dipapisha dia mitshima yabu, ne kabidi, bua bualu bua malu amvua mumona, ne mumanya avua ne tshia kulua kakuyi diepuka to bua bualu bua malu mapita bubi a bana ba bantu.

5 Ne biakalua ne mvua mutûtshika bua bualu bua ntatu yanyi, bualu mvua mumona ne ntatu yanyi ivua minena kupita yonsu, bua bualu bua dibutuka dia bantu banyi, bualu mvua mumona dipona diabu.

6 Ne biakalua ne kunyima kua mema mupeta makanda ngakakula kudi bana betu ba baluma, muikala njinga bua kumanya kudibu bualu bua matandu abu.

7 Ne bakamba: Mona, katuena mua kumvua mêyi avua tatuetu muakula bitangila matamba a ntuadijilu a mutshi wa olive, ne kabidi bitangila Bena Bisamba bia Benda to.

8 Ne ngakamba kudibu: Nuebeji Mukalenga anyi?

9 Ne bakamba kundi: Katuena bebeja to; bualu Mukalenga kena uleja bualu bua nanku kutudi to.

10 Monayi, ngakamba kudibu: Munyi mudibi ne kanuena nulama mikenji ya Mukalenga to? Munyi mudibi ne nenufua, bua bualu bua dipapisha dia mitshima yenu anyi?

11 Kanuena nuvuluka malu avua Mukalenga muamba anyi?—Binuikala kanuyi bapapisha mitshima yenu to, ne nundomba ne ditabuija, bikala nuitaba ne nenupeta, ne dinanukila mu dilama dia mikenji yanyi, bulelela malu â neamanyishibua kunudi.

12 Monayi, ndi ngamba kunudi, ne nzubu wa Isalele uvua mufuanyikijibua ne mutshi wa olive, kudi Nyuma wa Mukalenga uvua kudi tatuetu; ne monayi katuena batuka ku nzubu wa Isalele, ne katuena ditamba dia nzubu wa Isalele anyi?

13 Ne mpindiewu, bualu budi tatuetu musua kumvuija bitangila dilamatshishibuaku dia matamba a ntuadijilu ku njila wa tshiwudi tshia Bena Bisamba bia Benda, budi, ne mu matuku a ndekelu, pâshinguluka ndelanganyi yetu mu dipanga dia ditabuija, eyowa, bua mutantshi wa bidimu bia bungi, ne bikondu bia bungi kunyima kua Mashiya mudimuenesha mu mubidi kudi bana ba bantu, pashisha tshiwudi tshia lumu luimpa lua Mashiya netshilua kudi Bena Bisamba bia Benda, ne kumbukila kudi Bena Bisamba bia Benda kuya kudi tshishadi tshia ndelanganyi yetu—

14 Ne ku dituku adi tshishadi tshia ndelanganyi yetu netshimanya ne badi ba ku nzubu wa Isalele, ne badi bantu ba tshipungidi ba Mukalenga; ne pashisha nebamanya ne nebalua ku dimanya bitangila bankambua babu, ne kabidi ku dimanya bitangila lumu luimpa lua Musungidi wabu, luvuaye mulongesha batatuabu; bua nanku, nebalua ku dimanya bitangila Musungidi wabu ne bua tunungu tuina tua dilongesha dienda, bua ne bamanya mua kulua kudiye ne kupandishibua.

15 Ne pashisha ku dituku adi kabakusanka ne kusamuna Nzambi wabu wa tshiendelela, dibua diabu ne lupandu luabu to anyi? Eyowa, ku dituku adi, kabakupeta makanda ne didishibua kumbukila ku mutshi wa mvinyo mulelela anyi? Eyowa, kabakulua ku tshisumbu tshia mikoko tshilelela tshia Nzambi anyi?

16 Monayi, ndi ngamba kunudi, Eyowa; nebavulukibua kabidi munkatshi mua nzubu wa Isalele; nebalamatshishibuaku, bikala ditamba dia ntuadijilu dia mutshi wa olive, ku mutshi wa olive mulelela.

17 Ne etshi tshidi tshivua tatuetu umvuija; ne uvua umvuija ne katshiakulua to tô ne kunyima kua bobu batangalajibua kudi Bena Bisamba bia Benda; ne udi umvuija ne nebilua ku njila wa Bena Bisamba bia Benda, bua Mukalenga aleja bukola buenda kudi Bena Bisamba bia Benda, bua bualu buina buabengedibuaye kudi Bena Yuda, anyi kudi nzubu wa Isalele.

18 Bua nanku, tatuetu kena muakula bua ndelanganyi yetu nkayayi to, kadi kabidi bua nzubu yonsu wa Isalele, ufunkuna ku tshipungidi tshiakumbajibua mu matuku a ku ndekelu; tshipungidi tshidi Mukalenga muenza kudi tatuetu Abalahama, wamba: Kupitshila ku ndelanganyi yeba bisa bionsu bia pa buloba nebibeneshibua.

19 Ne biakalua ne mema, Nefi, ngakakula bia bungi kudibu bitangila malu â; eyowa, ngakakula kudibu bitangila dipinguluja dia Bena Yuda mu matuku a ku ndekelu.

20 Ne ngakabambulula kudibu mêyi a Yeshaya, wakakula bitangila dipinguluja dia Bena Yuda, anyi dia nzubu wa Isalele; ne kunyima kua bobu bapingulujibua kabakubuejakajibua kabidi to, nansha kabakutangalajibua kabidi to. Ne biakalua ne ngakakula mêyi a bungi kudi bana betu ba baluma, bua ne bakatalajibua ne bakadipuekesha kumpala kua Mukalenga.

21 Ne biakalua ne bakakula kundi kabidi, bamba: Tshintu tshivua tatuetu mumona mu tshilota tshidi tshiumvuija tshinyi? Mutshi uvuaye mumona udi umvuija tshinyi?

22 Ne ngakamba kudibu: Tshivua tshimueneshelu tshia mutshi wa moyo.

23 Ne bakamba kundi: Mulonda wa tshiamua uvua tatuetu mumona, ulombola ku mutshi, udi umvuija tshinyi?

24 Ne ngakamba kudibu ne divua dîyi dia Nzambi; ne ewu onsu umvuila dîyi dia Nzambi, ne wiminyina kudidi, kakufua nansha; nansha matêtshibua ne miketa ya kapia bia muluishi kabiakumutamba bukola ne ku bumpofu to, bua kubalombola ku dinyanguka.

25 Bua nanku, mema, Nefi, ngakabakankamija bua kuteya ntema ku dîyi dia Mukalenga; eyowa, ngakabakankamija ne makanda onsu a anyima wanyi, ne ne bukola bonsu bumvua nabu, ne bateya ntema ku dîyi dia Nzambi ne bavuluka bua kulama mikenji yenda diba dionsu mu malu onsu.

26 Ne bakamba kundi: Musulu wa mâyi uvua tatuetu mumona udi umvuija tshinyi?

27 Ne ngakamba kudibu ne mâyi avua tatuanyi mumona avua bukoya; ne lungenyi luenda bikola ludînyibua mu malu makuabu bua ne kakamona bukoya bua mâyi to.

28 Ne ngakamba kudibu ne uvua lupongu lubi lupita, luvua lutapulula bena bubi ku mutshi wa moyo, ne kabidi ku bansantu ba Nzambi.

29 Ne ngakamba kudibu ne tshivua tshimueneshelu tshia ngena mubi mupita awu, uvua muanjelu muamba kundi uvua mulongolodibua bua bena bubi.

30 Ne ngakamba kudibu ne tatuetu kabidi wakamona ne bululama bua Nzambi buakatapulula kabidi bena bubi ku bakana; ne dikenka diabu divua bu mudi dikenka dia kapia ka ndimi, kabanda kudi Nzambi bua kashidi ne kashidi, ne kakayi ne ndekelu.

31 Ne bakamba kundi: Bualu ebu budi bumvuija mpaji ya mubidi mu matuku a ditêtshibua, anyi budi bumvuija ngikadilu wa ndekelu wa anyima kunyima kua lufu lua mubidi wa pa buloba, anyi budi buakula bua malu adi mikala a pa buloba?

32 Ne biakalua ne ngakamba kudibu ne buvua tshimueneshelu tshia malu a bubidi bua a pa buloba ne a mu nyuma; bualu dituku nedilua dikalabu ne tshia kulumbuluishibua bilondeshila ku bienzedi biabu, eyowa, mena bienzedi bivua bienjibua kudi mubidi wa pa buloba mu matuku abu a ditêtshibua.

33 Bua nanku, biafuabu mu bubi buabu badi ne bua kuimanshibua kabidi, bu ku malu adi mikala a mu nyuma, adi mikala atangila buakana; bua nanku, badi ne tshia kuimanyishibua kumpala kua Nzambi, bua kulumbuluishibua bilondeshila ku bienzedi biabu; ne bikala bienzedi biabu bivua bikala bukoya badi bakengedibua kuikala bakoya; ne bikalabu bakoya bidi bikengedibua ne kabena mua kuikadila mu bukalenga bua Nzambi to; biobi nanku, bukalenga bua Nzambi budi ne tshia kuikala pabu bukoya.

34 Kadi monayi, ndi ngamba kunudi, bukalenga bua Nzambi kabuena mukoyato, ne tshintu katshiyi tshikezuka nansha tshimua katshiena mua kubuela mu bukalenga bua Nzambi to; bua nanku kudi kukengedibua kuikala muaba wa bukoya mulongolodibua bua bidi bikala bikoya.

35 Ne kudi muaba mulongolodibua, eyowa, mena ngena mubi mupita awu umvua muakuila, ne diabulu udi mumulongolodi; bua nanku, ngikadilu wa ndekelu wa anyima ya bantu udi ne bua kuikadila mu bukalenga bua Nzambi, anyi kuipatshibua bua bualu bua bululama bumvua muakuila.

36 Bua nanku, bena bubi badi bipatshibua ku bakana, ne kabidi ku mutshi wa moyo, udi muikala ne tshimuma tshidi ne mushinga mukola ne tshidibu mua kujinga menamena, kupita bimuma bikuabu bionsu; eyowa, ne tshidi tshikala dipa dipita bunena dia ku mapa onsu a Nzambi. Ne ngakakula nanku kudi bana betu ba baluma. Amena.