1 Ne biakalua ne muanjelu wakamba kundi: Tangila, ne mona ndelanganyi yeba, ne kabidi ndelanganyi ya bana benu ba baluma. Ne ngakatangila ne kumona bulaba bua dilaya; ne ngakamona misumba ya bantu, eyowa, mena bu ne bivua bungi bunena bu bua lusenga lua mu mbuwa.

2 Ne biakalua ne ngakamona misumba misangishibua pamua bua kuluangana, umua ne mukuabu; ne ngakamona mvita, ne manunganyi a mvita, ne mashipeyangana ne muela wa mvita dinena munkatshi mua bantu banyi.

3 Ne biakalua ne ngakamona nkongu ya bantu ya bungi ipita, ku mushindu wa mvita ne makokangana mu bulaba; ne ngakamona bimenga bia bungi, eyowa, mena ne ntshiakabibala to.

4 Ne biakalua ne ngakamona dibungi dia mîdima pa mpala wa bulaba bua dilaya; ne ngakamona mipenyi, ne ngakumvua makubakuba, ne manyungana a buloba, ne mishindu yonsu ya mitoyi ya diyoyi; ne ngakamona buloba ne mabua, ne biakapanduluka; ne ngakamona mikuna yupuka bipesa; ne ngakamona mpata ya buloba, ne yakakosolokangana; ne ngakamona bimenga bia bungi ne biakadîna; ne ngakamona bia bungi ne biakôshika ne kapia; ne ngakamona bia bungi biakadishinda panshi, bua bualu bua dinyungana diabu.

5 Ne biakalua ne kunyima kua mema mumona malu â, ngakamona dibungibungi dia mîdima, ne diakapita pa mpala wa buloba; ne monayi, ngakamona misumba ivua kayiyi mipona to bua bualu bua bitungu binena ne bitshinyisha bia Mukalenga.

6 Ne ngakamona diûlu diunzuluka ne Muana wa Mukoku wa Nzambi utulukila mu diûlu; ne wakapueka ne kudileja kudibu.

7 Ne ngakamona kabidi ne ndi njadika ne Nyuma wa Tshijila wakatulukila dikumi ne babidi bakuabu; ne bakajididibua kudi Nzambi, ne kusungudibua.

8 Ne muanjelu wakakula kundi, wamba: Mona bayidi dikumi ne babidi ba Muana wa Mukoku, badi basungudibua bua kusadila ndelanganyi yeba.

9 Ne wakamba kundi: Udi uvuluka bapostolo dikumi ne babidi ba Muana wa Mukoku anyi? Mona badi aba bâlumbuluisha bisa dikumi ne bibidi bia Isalele; bua nanku, basadidi dikumi ne babidi ba ndelanganyi yeba nebalumbuluishibua kudibu; bualu nudi ba mu nzubu wa Isalele.

10 Ne basadidi dikumi ne babidi aba bawudi umona nebalumbuluisha ndelanganyi yeba. Ne, Mona, badi bakana bua kashidi; bualu bua bualu bua ditabuija diabu kudi Muana wa Mukoku wa Nzambi bilamba biabu bidi bitokeshibua mu mashi enda.

11 Ne muanjelu wakamba kundi: Tangila! Ne ngakatangila, ne kumona nkongu ya bantu isatu ipita mu buakana ; ne bilamba biabi bivua bitoka mena bu mudi Muana wa Mukoku wa Nzambi. Ne muanjelu wakamba kundi: Aba badi batokeshibua mu mashi a Muana wa Mukoku, bua bualu bua ditabuija diabu kudiye.

12 Ne mema, Nefi, ngakamona kabidi ba bungi ba ku lukongu lua bantu luinayi bakapita mu buakana.

13 Ne biakalua ne ngakamona misumba ya pa buloba misangishibua pamua.

14 Ne muanjelu wakamba kundi: Mona ndelanganyi yeba, ne kabidi ndelanganyi ya bana benu ba baluma.

15 Ne biakalua ne ngakatangila ne kumona bantu ba ndelanganyi yanyi misangishibua pamua mu misumba minena bua kuluisha ndelanganyi ya bana betu ba baluma; ne bavua basangishibua pamua bua kuluangana.

16 Ne muanjelu wakakula kundi, wamba: Mona mpokolo wa mâyi makoya uvua tatueba mumona; eyowa, mena musulu uvuaye muakuila; ne ndondu yawu idi mikala ndondu ya ngena.

17 Ne mabungi a mîdima adi matêtshibua a diabulu, adi afofomija mesu, ne apapisha mitshima ya bana ba bantu, ne abalombola kula mu njila mialabala, bua ne bafua ne bajimina.

18 Ne nzubu munena ne mualabala, uvua tatueba mumona, udi meji a tshianana ne diditambisha bia bana ba bantu. Ne lupongu lunena ne lutshinyisha ludi lubatapulula ; eyowa, mena dîyi dia bululama bua Nzambi wa Tshiendelela, ne Mashiya udi Muana wa Mukoku wa Nzambi, udi Nyuma wa Tshijila wamba ujadikila, ku mbangilu wa buloba tô ne tshikondu etshi, ne ku tshikondu etshi tô ne bua kashidi.

19 Ne patshivua muanjelu wakula mêyi â, ngakatangila ne kumona ne ndelanganyi ya bana betu ba baluma yakaluisha ndelanganyi yanyi, bilondeshila ku dîyi dia muanjelu; ne bua bualu bua diditambisha dia ndelanganyi yanyi, ne bua matêtshibua a diabulu, ngakamona ne ndelanganyi ya bana betu ba baluma yakatamba bantu bavua bikala ndelanganyi yanyi bukola.

20 Ne biakalua ne ngakatangila, ne ngakamona bantu bavua bikala ndelanganyi ya bana betu ba baluma ne bakatshimuna ndelanganyi yanyi; ne bakaya mu misumba pa mpala wa bulaba.

21 Ne ngakabamona basangishibua pamua mu misumba; ne ngakamona mvita ne manunganyi a mvita munkatshi muabu; ne mu mvita ne manunganyi a mvita ngakamona nkongu ya bantu ya bungi ipita.

22 Ne muanjelu wakamba kundi: Mona aba nebashinguluka mu dipanga dia ditabuija.

23 Ne biakalua ne ngakamona, kunyima kua bashinguluka mu dipanga dia ditabuija bakalua bantu bafîkuluka, ne bendesha ku moyo, ne bakoya, buwula ne bufuba ne mishindu yonsu ya malu mapita bubi.