1 Ne biakalua ne muanjelu wakakula kundi, wamba: Tangila! Ne ngakatangila ne ngakamona bisamba ne makalenga a bungi.

2 Ne muanjelu wakamba kundi: Udi umona tshinyi? Ne ngakamba: Ngamonyi bisamba ne makalenga a bungi.

3 Ne wakamba kundi: Ebi bidi bisamba ne makalenga a Bena Bisamba bia Benda.

4 Ne biakalua ne ngakamona munkatshi mua bisamba bia Bena Bisamba bia Benda dienjibua dia ekelezia munena.

5 Ne muanjelu wakamba kundi: Mona dienjibua dia ekelezia udi muikala mupita malu mapita bubi kupita ma’ekelezia makuabu onsu, udi ushipa bansantu ba Nzambi, eyowa, ne ubakengesha ne ubafinakaja panshi, ne ubakudika tshikokedi tshia tshiamua, ne ubavuija panshi mu bukuatshibu.

6 Ne biakalua ne ngakamona ekelezia ewu munena ne wa malu mapita bubi; ne ngakamona diabulu ne uvua mufuki wawu.

7 Ne ngakamona kabidi ngolo, ne mpalata, ne bilulu bia busu, ne bilulu bikunza-kunzû, ne lin muluka bimpa, ne mishindu yonsu ya bivualu bia mushinga; ne ngakamona bandumba ba bungi.

8 Ne muanjelu wakakula kundi, wamba: Mona ngolo, ne mpalata, ne bilulu bia busu, ne bilulu bikunza-kunzû, ne lin muluka bimpa, ne bivualu bia mushinga, ne bandumba, bidi majinga a ekelezia munena ne wa malu mapita bubi ewu.

9 Ne kabidi bua lumu lua ba pa buloba badi babutula bansantu ba Nzambi, ne babavuija panshi mu bukuatshibu.

10 Ne biakalua ne ngakatangila ne ngakamona mâyi a bungi; ne avua atapulula Bena Bisamba bia Benda ne ndelanganyi ya bana betu ba baluma.

11 Ne biakalua ne muanjelu wakamba kundi: Mona tshiji tshia Nzambi tshidi pa mutu pa ndelanganyi ya bana benu ba baluma.

12 Ne ngakatangila ne ngakamona muntu muluma munkatshi mua Bena Bisamba bia Benda, mâyi a bungi avua mamutapulula ne ndelanganyi ya bana betu ba baluma; ne ngakamona Nyuma wa Nzambi, ne wakalua panshi ne wakenza pa mutu pa muntu ewu; ne wakaya pa mâyi a bungi, mena kudi ndelanganyi ya bana betu ba baluma, bavua mu bulaba bulaya.

13 Ne biakalua ne ngakamona Nyuma wa Nzambi, ne wakenza pa mutu pa Bena Bisamba bia Benda bakuabu; ne bakapatuka mu bukuatshibu, pa mutu pa mâyi a bungi.

14 Ne biakalua ne ngakamona misumba ya Bena Bisamba bia Benda ya bungi pa mutu pa bulaba bua dilaya; ne ngakamona tshiji tshia Nzambi, ne tshivua pa mutu pa ndelanganyi ya bana betu ba baluma; ne bakatangalajibua kumpala kua Bena Bisamba bia Benda ne bakatûtshibua.

15 Ne ngakamona Nyuma wa Mukalenga, ne uvua pa mutu pa Bena Bisamba bia Benda, ne bakalubuluka ne kupeta bulaba bua bupianyi buabu; ne ngakamona ne bavua batoka, ne balengela ne bimpa kumona menamena, bumuvua bantu banyi kumpala kua bobu kushipibua.

16 Ne biakalua ne mema, Nefi, ngakamona ne Bena Bisamba bia Benda bavua bapatuka mu bukuatshibu bakadipuekesha kumpala kua Mukalenga; ne bukola bua Mukalenga buvua nabu.

17 Ne ngakamona ne bamamuabu ba Bena Bisamba bia Benda bavua basangishibua pamua pa mutu pa mâyi, ne pa mutu pa bulaba kabidi, bua kubaluisha mvita.

18 Ne ngakamona ne bukola bua Nzambi buvua nabu, ne kabidi ne tshiji tshia Nzambi tshivua pa mutu pa bonsu bavua basangishibua pamua bua kubaluisha mvita.

19 Ne mema, Nefi, ngakamona ne Bena Bisamba bia Benda bavua bapatuka mu bukuatshibu bavua bapatuishibua ku bukola bua Nzambi mu bianza bia bisamba bikuabu bionsu.

20 Ne biakalua ne mema, Nefi, ngakamona ne bakalubuluka mu bulaba; ne ngakamona mukanda, ne uvua mutuadibua munkatshi muabu.

21 Ne muanjelu wakamba kundi: Udi mumanya diumvuija dia mukanda anyi?

22 Ne ngakamba kudiye: Ntshiena mumanya to.

23 Ne wakamba ne: Mona udi upatukila mukana mua Muena Yuda. Ne mema Nefi, ngakabimona; ne wakamba kundi ne: Mukanda udi umona udi miandiku ya Bena Yuda, idi mikala ne bipungidi bia Mukalenga, bivuaye muenza kudi nzubu wa Isalele; ne idi kabidi mikala ne mambi a bungi a bambi bansantu; ne idi miandiku idi mifuanangana ne mikanunu idi pa bitata bia kalabi, amu kayena ya bungi to; nansha nanku, idi mikala ne bipungidi bia Mukalenga, bivuaye muenza kudi nzubu wa Isalele; bua nanku, idi ya mushinga wa bungi kudi Bena Bisamba bia Benda.

24 Ne muanjelu wa Mukalenga wakamba kundi: Wamonyi ne mukanda uvua mupatukila mukana mua Muena Yuda; ne pavuawu mupatukila mu mukana mua Muena Yuda uvua ne tshiwudi tshia lumu luimpa lua Mukalenga, uvua bapostolo dikumi ne babidi bajadika buenda; ne badi bajadika bilondeshila ku bulelela budi kudi Muana wa Mukoku wa Nzambi.

25 Pananku, malu â adi ayila kudi Bena Yuda mu bukezuka kudi Bena Bisamba bia Benda, bilondeshila ku bulelela budi kudi Nzambi.

26 Ne pashisha adi ayila ku tshianza tshia bapostolo dikumi ne babidi ba Muana wa Mukoku, kudi Bantu ba bisamba bia bienda kufumina kudi Bena Yuda, udi umona dienjibua dia ekelezia awu munena ne wa malu mapita bubi, udi muikala mupita malu mapita bubi kupita ma’ekelezia makuabu onsu; bualu Mona, badi bumbusha ku lumu luimpa lua Muana wa Mukoku bitupa bia bungi bidi bia patoka ne mushinga mupita; ne kabidi bipungidi bia bungi bia Mukalenga badi bumbusha.

27 Ne bionsu ebi badi benza bua kunyangakaja njila miakana ya Mukalenga, bua ne bafofomija mesu ne bapapisha mitshima ya bana ba bantu.

28 Pananku, udi umona ne kunyima kua mukanda mupitshila ku bianza bia ekelezia munena ne wa malu mapita bubi, ne kudi malu a bungi a patoka ne a mushinga adi mumbushibua mu mukanda, udi muikala mukanda wa Muana wa Mukoku wa Nzambi.

29 Ne kunyima kua malu a patoka ne a mushinga â mumbushibua udi uya kudi bisamba bionsu bia Bena Bisamba bia Benda; ne kunyima kua muya kudi bisamba bionsu bia Bena Bisamba bia Benda, eyowa, mena dishiya dia mâyi a bungi awamonyi ne Bena Bisamba bia Benda badi bapatuka mu bukuatshibu, udi umona—bua bualu bua malu a bungi a patoka ne a mushinga adi mumbushibua mu mukanda, avua mikala a patoka bua ngumvuilu wa bana ba bantu, bilondeshila ku patoka padi kudi Muana wa Mukoku wa Nzambi—bua bualu bua malu adi mumbushibua mu lumu luimpa lua Muana wa Mukoku â, bangi ba bungi menamena badi balenduka, eyowa, mua ne Satana udi ne bukola pa mutu pabu.

30 Nansha nanku, udi umona ne Bena Bisamba bia Benda bapatuki mu bukuatshibu, ne badi bikala babandishibua ku bukola bua Nzambi kupita bisamba bikuabu bionsu, pa mpala wa bulaba budi buikala bua disungula ku mutu kua malaba makuabu onsu, budi buikala bulaba budi Mukalenga Nzambi muenza tshipungidi ne tatueba, bua ne ndelanganyi yenda neibupeta bu bulaba bua bupianyi buabu; pananku, udi umona ne Mukalenga Nzambi kakulekela ne Bena Bisamba bia Benda babutula dibondakaja dionsu dia ndelanganyi yeba, idi munkatshi mua bana benu ba baluma to.

31 Nansha kakulekela ne Bena Bisamba bia Benda babutula ndelanganyi ya bana benu ba baluma to.

32 Nansha Mukalenga Nzambi kakulekela ne Bena Bisamba bia Benda bashala bua kashidi mu ngikadilu mubi mupita wa bumpofu, udi mumona ne badimu, bua bualu bua bitupa bia patoka ne bia mushinga mutamba bia lumu luimpa lua Muana wa Mukoku bidi bibengedibua kudi ekelezia awu wa malu mapita bubi, wa dienjibua diwuvua mumona.

33 Muana wa Mukoku udi wamba ne: Bua nanku nengikala ne lusa kudi Bena Bisamba bia Benda, ne ku dikumbula tshishadi tshia nzubu wa Isalele ne tshitungu tshinena.

34 Ne biakalua ne muanjelu wa Mukalenga wakakula kundi, wamba: Mona, Muana wa Mukoku wa Nzambi udi wamba, kunyima kua mema mukumbula tshishadi tshia nzubu wa Isalele—ne tshishadi tshindi ngakuila tshidi ndelanganyi ya tatueba—pananku, kunyima kua mema mubakumbula ne tshitungu, ne mubatûta ku tshianza tshia Bena Bisamba bia Benda, ne kunyima kua Bena Bisamba bia Benda balenduka menamena, bua bualu bua bitupa bipita patoka ne bia mushinga mupita bia lumu luimpa lua Muana wa Mukoku bidi bikala bibengedibua kudi ekelezia awu wa malu mapita bubi, udi mamuenda wa bandumba, Muana wa Mukoku udi wamba—Nengikala ne lusa kudi Bena Bisamba bia Benda dituku adi, mua ne nentuala kudibu, mu bukola buanyi nkayanyi, bia bungi bia ku lumu luimpa luanyi, bikala patoka ne bia mushinga, Muana wa Mukoku udi wamba.

35 Bualu, mona, Muana wa Mukoku udi wamba: Nendimuenesha kudi ndelanganyi yeba, bua bafunda malu a bungi angabalongesha, ikala patoka ne a mushinga; ne kunyima kua ndelanganyi yeba mibutuka, ne mishinguluka mu dipanga dia ditabuija, ne kabidi ndelanganyi ya bana benu ba baluma, Mona, malu â neasokokibua, bua kulua kudi Bena Bisamba bia Benda, ku dipa ne bukola bua Muana wa Mukoku.

36 Ne mu wowu lumu luimpa luanyi nelufundibua, Muana wa Mukoku udi wamba, ne dibua dianyi ne lupandu luanyi.

37 Ne babeneshibua badi aba bâkeba kupatuisha Siona wanyi ku dituku adi, bualu nebikala ne dipa ne bukola bua Nyuma wa Tshijila; ne biananukilabu tô ne ku ndekelu nebabandishibua ku dituku dia ndekelu, ne nebapandishibua mu bukalenga bua tshiendelela bua Muana wa Mukoku; ne ewu onsu watangalaja ditalala, eyowa, lumu lua disanka dikola, bu muikalabu balengela pa mikuna!

38 Ne biakalua ne ngakamona tshishadi tshia ndelanganyi ya bana betu ba baluma, ne kabidi mukanda wa Muana wa Mukoku wa Nzambi, uvua mupatukila mukana mua Muena Yuda, ne wakavuila tshishadi tshia ndelanganyi ya bana benu ba baluma ufumina kudi Bena Bisamba bia Benda.

39 Ne kunyima kua mulua kudibu ngakamona mikanda mikuabu, yakaluila ku bukola bua Muana wa Mukoku, ilua kudibu kumbukila kudi Bantu ba Bisamba bia Benda, bua kuitabujija Bantu ba Bisamba bia Benda ne tshishadi tshia ndelanganyi ya bana betu ba baluma, ne kabidi Bena Yuda bavua bikala batangalaka pa mpala onsu wa buloba, ne miandiku ya bambi ne ya bapostolo dikumi ne babidi ba Muana wa Mukoku idi milelela.

40 Ne muanjelu wakakula kundi, wamba: miandiku ya ndekelu eyi, iwuvua mumona munkatshi mua Bantu ba bisamba bia ba benda, neishindamija bulelela bua ya kumpala, idi mikala ya bapostolo dikumi ne babidi ba Muana wa Mukoku, ne neimanyisha patoka ne mushinga wa malu adi mumbushibua kudibu; ne nebamanyisha bisa bionsu, miakulu yonsu, ne bantu bonsu, ne Muana wa Mukoku wa Nzambi udi Muana wa Tatu wa Tshiendelela, ne Mupandishi wa ba pa buloba; ne bantu bonsu badi ne tshia kulua kudiye, anyi kabena mua kupandishibua to.

41 Ne badi ne tshia kulua bilondeshila ku mêyi âshindamijibua mukana mua Muana wa Mukoku; ne mêyi a Muana wa Mukoku neamanyishibua mu miandiku ya ndelanganyi yeba, momumua ne mu miandiku ya bapostolo dikumi ne babidi ba Muana wa Mukoku; bua nanku bubidi buayi neishikikibua pamua; bualu kudi kuikala Nzambi umua ne Mulami wa mikoku umua pa buloba bonsu.

42 Ne tshikondu tshilualua tshiadimueneshaye kudi bisamba bionsu, kudi bubidi bua Bena Yuda ne kabidi kudi Bena Bisamba bia Benda; ne kunyima kua mudimuenesha kudi Bena Yuda ne kabidi kudi Bena Bisamba bia Benda, pashisha neadimuenesha kudi Bantu ba bisamba bia bena ne kabidi kudi Bena Yuda, ne ba ndekelu nebikala ba kumpala, ne ba kumpala nebikala ba ndekelu.